سیدنا حذیفہ رضی اللہ عنہ نے بیان کیا کہ ”رسول اللہ صلی اللہ علیہ وسلم ہم میں (خطبہ دینے کے لیے) کھڑے ہوئے، آپ صلی اللہ علیہ وسلم نے اپنے اس مقام پر قیامت تک جو ہونے والا تھا سب بیان کیا اور اس میں سے کچھ نہ چھوڑا۔ یاد رکھنے والے نے اسے یاد رکھا اور بھولنے والے نے اسے بھلا دیا۔ یقیناً میرے ان ساتھیوں (رسول اللہ صلی اللہ علیہ وسلم کے صحابہ) کو وہ یاد ہو گا اور جب ان واقعات میں سے کوئی پیش آتا ہے تو مجھے وہ سب یاد آ جاتا ہے جیسے کسی کو کسی کے چلے جانے کے بعد اس کا چہرہ یاد رہتا ہے، پھر مدت بعد جب اسے دیکھتا ہے تو اسے پہچان لیتا ہے۔“ [سنن ابي داود/كتاب الفتن والملاحم /حدیث: 4240]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”اس امت میں چار فتنے ہوں گے اور ان کے بعد دنیا فنا ہو جائے گی۔“ [سنن ابي داود/كتاب الفتن والملاحم /حدیث: 4241]

سیدنا عبداللہ بن عمر رضی اللہ عنہما بیان کرتے ہیں کہ ہم رسول اللہ صلی اللہ علیہ وسلم کی خدمت میں بیٹھے ہوئے تھے۔ آپ صلی اللہ علیہ وسلم نے فتنوں اور آزمائشوں کا ذکر فرمایا اور بہت تفصیل سے بیان کیا حتیٰ کہ آپ صلی اللہ علیہ وسلم نے «فِتْنَةُ الْأَحْلَاسِ» ”احلاس کے فتنے“ کا بھی ذکر کیا۔ تو کہنے والے نے کہا: ”اے اللہ کے رسول! احلاس کا فتنہ کیا ہے؟“ آپ صلی اللہ علیہ وسلم نے فرمایا: ”بھاگم بھاگ اور غارت گری! پھر «فِتْنَةُ السَّرَّاءِ» ”وسعت و فراخی (مال و زر) کا فتنہ“ آئے گا جس کا ظہور میرے اہل بیت کے ایک فرد کے پاؤں تلے سے ہو گا۔ اس کا دعویٰ ہو گا کہ وہ مجھ سے ہے حالانکہ وہ مجھ سے نہیں ہو گا۔ بلاشبہ میرے ولی اور دوست صرف متقی لوگ ہیں۔ پھر لوگ ایک آدمی پر صلح کر لیں گے جیسے کہ «كَوَرِكٍ عَلَى ضِلَعٍ» ”سرین ہو پسلی پر!“ (یعنی نامعقول اور نااہل ہو گا جس طرح کہ سرین ایک پسلی پر نہیں ٹک سکتی) پھر ایک فتنہ اٹھے گا «فِتْنَةُ الدُّهَيْمَاءِ» ”گھٹا ٹوپ اندھیرا!“ اس امت میں سے کوئی نہیں بچے گا مگر اسے اس کا طمانچہ پڑ کر رہے گا۔ پس جب سمجھا جائے گا کہ یہ فتنہ ختم ہو گیا وہ اور بڑھ جائے گا۔ آدمی صبح کرے گا تو مومن ہو گا اور شام ہو گی تو کافر ہو جائے گا حتیٰ کہ لوگ دو خیموں (فریقوں) میں تقسیم ہو جائیں گے۔ ایک خیمہ ایمان کا، جس میں کوئی نفاق نہیں ہو گا، اور دوسرا نفاق کا جس میں کوئی ایمان نہ ہو گا، اور جب یہ احوال ہوں تو دجال کا انتظار کرنا، آج آیا کہ کل۔“ [سنن ابي داود/كتاب الفتن والملاحم /حدیث: 4242]

سیدنا حذیفہ بن یمان رضی اللہ عنہ نے بیان کیا کہ ”اللہ کی قسم! میں نہیں جانتا کہ میرے ساتھی حقیقتاً بھول گئے ہیں یا بھولے بنے ہوئے ہیں۔ اللہ کی قسم! دنیا ختم ہونے تک آنے والے فتنوں کے قائدین جن کے ساتھ تین سو یا اس سے زیادہ لوگ ہوں گے، رسول اللہ صلی اللہ علیہ وسلم نے کسی کو نہیں چھوڑا ہے۔ آپ صلی اللہ علیہ وسلم نے ان کے نام، ان کے باپوں کے نام اور ان کے قبیلوں تک کے نام بتا دیے ہیں۔“ [سنن ابي داود/كتاب الفتن والملاحم /حدیث: 4243]

سبیع بن خالد نے بیان کیا کہ جس زمانے میں (خوزستان میں) تستر کا علاقہ فتح ہوا، میں کوفہ آیا۔ میں یہاں سے خچر حاصل کرنا چاہتا تھا۔ میں مسجد میں چلا گیا تو میں نے وہاں چند آدمی دیکھے جن کی قامت و جسامت متوسط قسم کی تھی، اور (ساتھ ہی) ایک اور آدمی بھی بیٹھا ہوا تھا، جسے دیکھ کر آپ کہہ سکتے تھے کہ یہ حجازی آدمی ہے۔ میں نے پوچھا کہ ”یہ کون ہے؟“ تو لوگوں نے ناپسندیدگی کے سے انداز میں دیکھا اور کہا: ”کیا تم انہیں نہیں جانتے ہو؟ یہ رسول اللہ صلی اللہ علیہ وسلم کے صحابی حذیفہ بن یمان رضی اللہ عنہ ہیں۔“ پھر حذیفہ رضی اللہ عنہ نے بیان کیا کہ ”دیگر صحابہ رسول اللہ صلی اللہ علیہ وسلم سے خیر کے متعلق پوچھا کرتے تھے اور میں آپ صلی اللہ علیہ وسلم سے شر کے متعلق سوال کیا کرتا تھا (کہ کہیں اس میں ملوث نہ ہو جاؤں)“ تو ان لوگوں نے ان کو غور سے دیکھا۔ سیدنا حذیفہ رضی اللہ عنہ نے کہا: ”میں خوب سمجھتا ہوں جو تمہیں برا لگتا ہے۔“ میں نے عرض کیا تھا: ”اے اللہ کے رسول! یہ خیر جو اللہ نے ہمیں عنایت فرمائی ہے کیا اس کے بعد شر ہو گا جیسے کہ اس سے پہلے تھا؟“ آپ صلی اللہ علیہ وسلم نے فرمایا: ”ہاں۔“ میں نے عرض کیا: ”تو اس سے بچاؤ کیا ہے؟“ آپ صلی اللہ علیہ وسلم نے فرمایا: ”تلوار۔“ قتیبہ نے اپنی روایت میں کہا: میں (حذیفہ رضی اللہ عنہ) نے عرض کیا: ”کیا تلوار سے کوئی فائدہ ہو گا؟“ فرمایا: ”ہاں۔“ میں نے عرض کیا کہ ”کیا؟“ فرمایا: ”صلح ہو گی جس میں (بباطن) خیانت ہو گی، دھوکا ہو گا۔“ میں نے عرض کیا: ”اے اللہ کے رسول! اس کے بعد کیا ہو گا؟“ آپ صلی اللہ علیہ وسلم نے فرمایا: ”اگر زمین میں اللہ کا کوئی خلیفہ ہو اور وہ تمہاری کمر پر مارے اور تمہارا مال چھین لے تب بھی اس کی اطاعت کرنا، ورنہ اس حال میں مر جانا کہ تم (جنگل میں) کسی درخت کی جڑ چبا کر گزارہ کرنے والے ہو۔“ میں نے عرض کیا: ”پھر کیا ہو گا؟“ آپ صلی اللہ علیہ وسلم نے فرمایا: ”دجال آئے گا، اس کے پاس نہر ہو گی اور آگ، جو اس کی آگ میں پڑا اس کا اجر ثابت ہوا اور اس کے گناہ ختم ہوئے اور جو اس کی نہر میں پڑا اس کے گناہ ثابت ہوئے اور اجر ضائع ہو گئے۔“ میں نے عرض کیا: ”پھر کیا ہو گا؟“ آپ صلی اللہ علیہ وسلم نے فرمایا: ”پھر قیامت آ جائے گی۔“ [سنن ابي داود/كتاب الفتن والملاحم /حدیث: 4244]

خالد بن خالد یشکری نے یہ حدیث روایت کی، اس میں ہے کہ سیدنا حذیفہ رضی اللہ عنہ نے کہا کہ تلوار کے بعد (کیا ہو گا؟) آپ صلی اللہ علیہ وسلم نے فرمایا: ”کچھ لوگ باقی بچیں گے جن کے دلوں میں فساد ہو گا۔ بظاہر صلح کریں گے مگر باطن میں دھوکا ہو گا۔“ پھر حدیث بیان کی۔ کہا کہ جناب قتادہ رضی اللہ عنہ اس حدیث کو سیدنا ابوبکر صدیق رضی اللہ عنہ کے عہد خلافت میں پیش آنے والے فتنہ ارتداد پر محمول کیا کرتے تھے۔ «قَذَاء» «قَذِي» کی جمع ہے، اس تنکے کو کہتے ہیں جو آنکھ میں پڑ جاتا ہے۔ «هُدْنَة» کا معنی ”صلح“ اور «دَخَن» کا معنی ”سینے کا بغض، جلن اور کڑھن“ ہے۔ [سنن ابي داود/كتاب الفتن والملاحم /حدیث: 4245]

نصر بن عاصم لیثی نے بیان کیا کہ ہم بنو لیث کے چند لوگ خالد بن خالد یشکری کے ہاں گئے۔ انہوں نے پوچھا: ”آپ کون لوگ ہیں؟“ ہم نے بتایا کہ: ”بنو لیث سے ہیں۔ ہم آپ کی خدمت میں سیدنا حذیفہ رضی اللہ عنہ کی حدیث معلوم کرنے کے لیے حاضر ہوئے ہیں۔“ تو انہوں نے وہ حدیث بیان کی، کہا کہ: ”ہم (بنو لیث کے لوگ) سیدنا ابوموسیٰ رضی اللہ عنہ کے ساتھ واپس لوٹے۔ جبکہ کوفہ میں جانور (خچر وغیرہ) مہنگے تھے۔ تو میں اور میرے ساتھی نے سیدنا ابوموسیٰ رضی اللہ عنہ سے اجازت چاہی تو انہوں نے ہمیں اجازت دے دی۔ تو میں نے اپنے ساتھی (نصر بن عاصم) سے کہا کہ: ”میں مسجد جاتا ہوں اور جب منڈی شروع ہو گی، میں تمہارے پاس آ جاؤں گا۔““ کہتے ہیں کہ میں مسجد میں داخل ہوا تو دیکھا کہ وہاں ایک حلقہ لگا ہوا ہے، گویا ان کے سر کٹے ہوئے (ہمہ تن گوش) ہیں، ایک آدمی کی بات بڑے غور سے سن رہے ہیں۔ میں بھی ان میں جا کھڑا ہوا تو ایک آدمی میرے پہلو میں آ کھڑا ہوا۔ میں نے پوچھا: ”یہ کون ہے؟“ اس نے کہا: ”کیا تم بصرہ کے ہو؟“ میں نے کہا: ”ہاں۔“ اس نے کہا: ”میں جان گیا ہوں، اگر تم کوفہ کے ہوتے تو اس شخص کے بارے میں نہ پوچھتے۔“ چنانچہ میں اس گفتگو کرنے والے کے قریب ہو گیا (اور وہ سیدنا حذیفہ رضی اللہ عنہ تھے) تو میں نے سیدنا حذیفہ رضی اللہ عنہ سے سنا، وہ بیان کر رہے تھے کہ: ”لوگ تو رسول اللہ صلی اللہ علیہ وسلم سے خیر کے بارے میں پوچھتے تھے اور میں شر کے بارے میں سوال کرتا تھا۔ اور مجھے یقین تھا کہ میں خیر سے محروم نہیں رہوں گا۔“ میں نے عرض کیا: ”اے اللہ کے رسول! کیا اس خیر کے بعد شر ہے؟“ آپ صلی اللہ علیہ وسلم نے فرمایا: ”اے حذیفہ! اللہ کی کتاب سیکھ (اور پڑھا کر) اور جو اس میں ہے اس کی پیروی کر۔“ آپ صلی اللہ علیہ وسلم نے یہ تین بار فرمایا۔ کہتے ہیں کہ میں نے پھر دریافت کیا: ”اے اللہ کے رسول! کیا اس خیر کے بعد شر ہے؟“ آپ صلی اللہ علیہ وسلم نے فرمایا: ”اے حذیفہ! اللہ کی کتاب سیکھ (اور پڑھا کر) اور جو اس میں ہے اس کی اتباع کر۔“ اور حدیث بیان کی، اس میں ہے، سیدنا حذیفہ رضی اللہ عنہ نے کہا: ”اے اللہ کے رسول! کیا اس خیر کے بعد شر ہو گا؟“ آپ صلی اللہ علیہ وسلم نے فرمایا: ”فتنہ ہو گا اور فساد ہو گا۔“ کہتے ہیں: میں نے پوچھا: ”اے اللہ کے رسول! کیا اس شر کے بعد خیر ہو گی؟“ آپ صلی اللہ علیہ وسلم نے فرمایا: ”اے حذیفہ! اللہ کی کتاب سیکھو اور جو اس میں ہے اس کی اتباع کرتے رہو۔“ تین بار فرمایا۔ کہتے ہیں: ”اے اللہ کے رسول! کیا اس شر کے بعد خیر ہو گی؟“ فرمایا: ”صلح ہو گی خیانت والی۔ اتفاق و اجتماع ہو گا مگر کدورت والا۔“ میں نے کہا: ”اے اللہ کے رسول! «الْهُدْنَةُ عَلَى الدَّخَنِ» سے کیا مراد ہے؟“ آپ صلی اللہ علیہ وسلم نے فرمایا: ”لوگوں کے دل پہلے کی سی کیفیت پر واپس نہیں آئیں گے۔“ کہتے ہیں، میں نے کہا: ”اے اللہ کے رسول! کیا اس خیر کے بعد شر ہو گا؟“ فرمایا: ”فتنہ ہو گا اندھا اور بہرا۔ اور اس کے قائد دوزخ کے دروازوں کی طرف دعوت دینے والے ہوں گے۔ تو اے حذیفہ! اگر تم اس حال میں مر جاؤ کہ تم کسی درخت کی جڑ کو چبانے والے ہو تو یہ کیفیت تمہارے لیے اس سے بہتر ہو گی کہ ان میں سے کسی کی اتباع کرو۔““ [سنن ابي داود/كتاب الفتن والملاحم /حدیث: 4246]

سبیع بن خالد نے سیدنا حذیفہ رضی اللہ عنہ سے، انہوں نے نبی کریم صلی اللہ علیہ وسلم سے یہ حدیث بیان کی کہ آپ صلی اللہ علیہ وسلم نے فرمایا: ”اگر تم ان ایام میں کوئی خلیفہ نہ پاؤ تو بھاگ جانا حتیٰ کہ مر جاؤ۔ اور اگر تمہاری موت اس حال میں آئے کہ تم کسی درخت کی جڑ چبانے والے ہوئے (تو یہ بہتر ہو گا)۔“ کہتے ہیں، ”میں نے عرض کیا: اس کے بعد کیا ہو گا؟“ آپ صلی اللہ علیہ وسلم نے فرمایا: ”اگر کسی نے چاہا کہ اس کی گھوڑی بچہ جنے، تو وہ بچہ نہیں جن پائے گی کہ قیامت آ جائے گی۔“ (یعنی بہت جلد ایسا ہو گا)۔ [سنن ابي داود/كتاب الفتن والملاحم /حدیث: 4247]

سیدنا عبداللہ بن عمرو رضی اللہ عنہ نے بیان کیا کہ نبی کریم صلی اللہ علیہ وسلم نے فرمایا: ”جس شخص نے کسی امام کی بیعت کی ہو اور اپنے ہاتھ کا مال اور دل کا پھل (اپنا قول و قرار) اس کو دے دیا ہو تو پھر ہمت بھر اس کی اطاعت کرے۔ اگر کوئی دوسرا (امیر بن کر) آئے اور اس سے جھگڑا کرے تو اس دوسرے کی گردن مار دو۔“ (عبدالرحمٰن کہتے ہیں) میں نے عبداللہ بن عمرو رضی اللہ عنہ سے پوچھا: ”کیا بھلا یہ حدیث آپ نے خود رسول اللہ صلی اللہ علیہ وسلم سے سنی ہے؟“ انہوں نے فرمایا: ”(کیوں نہیں) اسے میرے کانوں نے سنا اور دل نے یاد رکھا ہے۔“ میں نے کہا: ”یہ آپ کے چچا زاد معاویہ رضی اللہ عنہ ہمیں حکم دیتے ہیں کہ یوں کریں اور یوں کریں؟“ انہوں نے کہا: ”اللہ کی اطاعت میں اس کی اطاعت کرو اور اللہ کی معصیت میں اس کی نافرمانی کرو۔“ [سنن ابي داود/كتاب الفتن والملاحم /حدیث: 4248]

سیدنا ابوہریرہ رضی اللہ عنہ نے روایت کیا کہ نبی کریم صلی اللہ علیہ وسلم نے فرمایا: ”ہلاکت ہے عربوں کے لیے، اس شر سے جو قریب آیا چاہتا ہے، کامیاب ہے وہ جس نے اپنا ہاتھ روکے رکھا۔“ [سنن ابي داود/كتاب الفتن والملاحم /حدیث: 4249]