خالد بن دہقان نے بیان کیا کہ ہم لوگ غزوہ قسطنطینیہ میں ذلقیہ مقام پر تھے کہ اہل فلسطین کا ایک بڑا رئیس آیا جسے وہ لوگ پہچانتے تھے اور اس کا نام ہانی بن کلثوم بن شریک کنانی تھا۔ اس نے عبداللہ بن ابی زکریا کو سلام کہا اور وہ ان کا مقام و مرتبہ پہچانتا تھا۔ خالد نے بیان کیا: پھر ہمیں عبداللہ بن ابو زکریا نے حدیث بیان کی، انہوں نے کہا: ”میں نے ام درداء رضی اللہ عنہا سے سنا وہ کہتی تھیں کہ میں نے سیدنا ابودرداء رضی اللہ عنہ سے سنا، وہ کہتے تھے کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”ہر گناہ امید ہے کہ اللہ اسے معاف فرما دے گا، مگر وہ جو شرک کی حالت میں مر گیا یا جس نے جان بوجھ کر کسی مومن کو قتل کیا ہو۔““ تو ہانی بن کلثوم نے کہا: ”میں نے محمود بن ربیع رضی اللہ عنہ سے سنا، وہ سیدنا عبادہ بن صامت رضی اللہ عنہ سے روایت کرتے تھے کہ انہوں نے رسول اللہ صلی اللہ علیہ وسلم کو فرماتے ہوئے سنا، آپ صلی اللہ علیہ وسلم نے فرمایا: ”جس نے کسی مومن کو قتل کیا اور بلاوجہ ظلم سے قتل کیا تو اللہ اس کا کوئی عمل قبول نہیں کرے گا نفل نہ فرض۔““ خالد نے ہمیں کہا: پھر ابن ابو زکریا نے مجھے بواسطہ ام درداء رضی اللہ عنہا، ابودرداء رضی اللہ عنہ سے بیان کیا کہ رسول اللہ صلی اللہ علیہ وسلم نے فرمایا: ”مومن ہمیشہ بڑا ہلکا پھلکا اور اچھے اعمال کی توفیق میں رہتا ہے جب تک کہ کسی حرام خون کا مرتکب نہ ہو، جب وہ اس کا مرتکب ہو جاتا ہے تو اس توفیق سے محروم ہو جاتا ہے۔“ اور ہانی بن کلثوم نے بواسطہ محمود بن ربیع رضی اللہ عنہ، سیدنا عبادہ بن صامت رضی اللہ عنہ سے رسول اللہ صلی اللہ علیہ وسلم سے بالکل اسی کے مثل روایت کیا۔ [سنن ابي داود/كتاب الفتن والملاحم /حدیث: 4270]

خالد بن دہقان رحمہ اللہ نے کہا کہ میں نے یحییٰ بن یحییٰ غسانی رحمہ اللہ سے «اعْتَبَطَ بِقَتْلِهِ» کا مفہوم پوچھا تو انہوں نے کہا: ”جو لوگ فتنے میں قتال کرتے ہیں اور ان میں سے ایک کسی کو قتل کر دیتا ہے اور پھر سمجھتا ہے کہ وہ حق اور ہدایت پر تھا اور اس عمل پر اللہ سے استغفار نہیں کرتا ہے۔“ امام ابوداؤد رحمہ اللہ کہتے ہیں، اور مزید کہا کہ «فَاعْتَبَطَ» کا مفہوم ہے کہ ”خون بہاتا ہے، خوب بہانا۔“ [سنن ابي داود/كتاب الفتن والملاحم /حدیث: 4271]

خارجہ بن زید کہتے ہیں کہ ”میں نے سیدنا زید بن ثابت رضی اللہ عنہ سے اس جگہ سنا تھا، وہ کہتے تھے کہ ”سورۃ النساء کی یہ آیت کریمہ ﴿وَمَنْ يَقْتُلْ مُؤْمِنًا مُتَعَمِّدًا فَجَزَاؤُهُ جَهَنَّمُ خَالِدًا فِيهَا﴾ [سورة النساء: 93] سورۃ الفرقان کی آیت ﴿وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ﴾ [سورة الفرقان: 68] سے چھ ماہ بعد نازل ہوئی ہے۔““ [سنن ابي داود/كتاب الفتن والملاحم /حدیث: 4272]

سعید بن جبیر رحمہ اللہ کہتے ہیں کہ میں نے سیدنا ابن عباس رضی اللہ عنہ سے سوال کیا تو انہوں نے کہا: جب سورۃ الفرقان کی آیت ﴿وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ﴾ [سورة الفرقان: 68] نازل ہوئی تو مکہ کے مشرکین نے کہا: ”(اب ہمارے ایمان لانے کا کیا فائدہ) ہم نے ناحق جانیں قتل کی ہیں، اللہ کے ساتھ دوسرے معبودوں کو پکارا ہے اور بدکاریوں کا ارتکاب بھی کیا ہے۔“ تب اللہ تعالیٰ نے یہ ارشاد نازل کیا: ﴿إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ﴾ [سورة الفرقان: 70] ”یہ آیتیں انہی مشرکین کے حق میں ہیں۔“ (سیدنا ابن عباس رضی اللہ عنہ نے) کہا: ”لیکن سورۃ النساء کی آیت ﴿وَمَنْ يَقْتُلْ مُؤْمِنًا مُتَعَمِّدًا فَجَزَاؤُهُ جَهَنَّمُ﴾ [سورة النساء: 93] ایسے (مسلمان) شخص کے لیے ہے جو اسلامی احکام جانتا ہے پھر کسی مومن کو جان بوجھ کر قتل کرتا ہے تو اس کی سزا جہنم ہے اور اس کی توبہ بھی قبول نہیں۔“ سعید رحمہ اللہ نے کہا کہ میں نے (سیدنا ابن عباس رضی اللہ عنہ کی) اس بات کا مجاہد رحمہ اللہ سے ذکر کیا تو انہوں نے کہا: ”مگر جو شخص نادم ہو جائے۔ (تو اس کی توبہ قبول ہو گی۔ ان شاء اللہ)“ [سنن ابي داود/كتاب الفتن والملاحم /حدیث: 4273]

سعید بن جبیر نے سیدنا عبداللہ بن عباس رضی اللہ عنہما سے سورہ الفرقان کی آیت ﴿وَالَّذِينَ لَا يَدْعُونَ مَعَ اللَّهِ إِلَهًا آخَرَ﴾ [سورة الفرقان: 68] کی تفسیر میں بیان کیا کہ ”یہ مشرکین کے بارے میں ہے، نیز یہ بھی نازل ہوا: ﴿يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ﴾ [سورة الزمر: 53] ”اے میرے بندو! جنہوں نے اپنی جانوں پر زیادتی کی ہے تم اللہ کی رحمت سے ناامید نہ ہو جاؤ۔“” [سنن ابي داود/كتاب الفتن والملاحم /حدیث: 4274]

سعید بن جبیر، سیدنا ابن عباس رضی اللہ عنہ سے روایت کرتے ہیں کہ سورۃ النساء کی آیت ﴿وَمَنْ يَقْتُلْ مُؤْمِنًا مُتَعَمِّدًا﴾ [سورة النساء: 93] ”اور جو کوئی کسی مومن کو جان بوجھ کر قتل کرے۔“ ”کو کسی آیت نے منسوخ نہیں کیا ہے۔“ [سنن ابي داود/كتاب الفتن والملاحم /حدیث: 4275]

جناب ابومجلز سے مروی ہے کہ ﴿وَمَنْ يَقْتُلْ مُؤْمِنًا مُتَعَمِّدًا فَجَزَاؤُهُ جَهَنَّمُ﴾ [سورة النساء: 93] ”قاتلِ عمد کی سزا یہی ہے کہ ہمیشہ جہنم میں رہے۔ اور اگر اللہ اسے معاف کرنا چاہے تو کر سکتا ہے۔“ [سنن ابي داود/كتاب الفتن والملاحم /حدیث: 4276]

سیدنا سعید بن زید رضی اللہ عنہ سے روایت ہے کہ ہم نبی کریم صلی اللہ علیہ وسلم کی خدمت میں حاضر تھے کہ آپ صلی اللہ علیہ وسلم نے فتنے کے ہونے کا ذکر فرمایا اور اس کی ہیبت ناکی بیان کی۔ ہم نے عرض کیا یا لوگوں نے کہا: ”اے اللہ کے رسول! اگر یہ ہمیں پہنچ گیا تو ہلاک کر ڈالے گا۔“ آپ صلی اللہ علیہ وسلم نے فرمایا: ”ہرگز نہیں۔ اس میں تمہیں قتل ہو جانا ہی کافی ہو گا۔“ سعید کہتے ہیں: ”پھر میں نے اپنے بھائیوں کو دیکھا کہ قتل ہو گئے۔“ [سنن ابي داود/كتاب الفتن والملاحم /حدیث: 4277]

سیدنا ابوموسیٰ اشعری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میری اس امت پر اللہ کی رحمت ہے، آخرت میں اس پر عذاب نہیں، اس کا عذاب دنیا میں فتنوں، زلزلوں اور قتل کی صورت میں ہے۔“ [سنن ابي داود/كتاب الفتن والملاحم /حدیث: 4278]