سیدنا انس بن مالک رضی اللہ عنہ سے روایت ہے کہ جب اہل یمن آئے، تو رسول اللہ صلی اللہ علیہ وسلم نے فرمایا: ”تحقیق اہل یمن تمہارے پاس آ گئے ہیں۔ اور یہ پہلے لوگ ہیں جنہوں نے مصافحے کا عمل شروع کیا۔“ [سنن ابي داود/أبواب السلام /حدیث: 5213]

ایوب بن بشیر بن کعب عدوی، بنو عنزہ کے ایک آدمی سے روایت کرتے ہیں کہ اس نے سیدنا ابوذر غفاری رضی اللہ عنہ سے کہا (جبکہ انہیں شام سے روانہ کر دیا گیا تھا): ”میں آپ سے رسول اللہ صلی اللہ علیہ وسلم کی ایک حدیث دریافت کرنا چاہتا ہوں۔“ انہوں نے کہا: ”اگر راز کی بات نہ ہوئی تو میں بتا دوں گا۔“ میں نے کہا: ”کوئی راز کی بات نہیں ہے، آپ لوگ جب رسول اللہ صلی اللہ علیہ وسلم سے ملاقات کرتے تھے تو کیا رسول اللہ صلی اللہ علیہ وسلم تم لوگوں سے مصافحہ کیا کرتے تھے؟“ انہوں نے کہا: ”میں جب بھی آپ صلی اللہ علیہ وسلم سے ملا، آپ صلی اللہ علیہ وسلم نے مجھ سے مصافحہ فرمایا، اور ایک دن آپ صلی اللہ علیہ وسلم نے مجھے بلوایا مگر میں گھر میں نہیں تھا، جب میں واپس آیا تو مجھے آپ صلی اللہ علیہ وسلم کے بلاوے کا بتایا گیا، میں آپ صلی اللہ علیہ وسلم کی خدمت میں پہنچا، آپ صلی اللہ علیہ وسلم اپنی چارپائی پر تشریف فرما تھے، تو آپ صلی اللہ علیہ وسلم نے مجھ سے معانقہ فرمایا اور یہ (میرے لیے) عمدہ، بہت عمدہ بات تھی۔“ [سنن ابي داود/أبواب السلام /حدیث: 5214]

سیدنا ابوسعید خدری رضی اللہ عنہ سے روایت ہے کہ بنو قریظہ نے جب سیدنا سعد (سعد بن معاذ) رضی اللہ عنہ کا فیصلہ قبول کر لینے پر اتفاق کر لیا تو آپ نے سیدنا سعد رضی اللہ عنہ کو بلوایا، وہ ایک سفید گدھے پر سوار ہو کر آئے، تو نبی کریم صلی اللہ علیہ وسلم نے فرمایا: ”اپنے سردار کی طرف یا اپنے افضل کی طرف بڑھو۔“ تو وہ (سعد) آئے حتیٰ کہ رسول اللہ صلی اللہ علیہ وسلم کے پاس بیٹھ گئے۔ [سنن ابي داود/أبواب السلام /حدیث: 5215]

جناب شعبہ رحمہ اللہ نے یہ روایت بیان کی، انہوں نے کہا کہ جب وہ مسجد کے قریب آئے تو آپ صلی اللہ علیہ وسلم نے انصاریوں سے فرمایا: ”اپنے سردار کی طرف بڑھو۔“ [سنن ابي داود/أبواب السلام /حدیث: 5216]

ام المؤمنین سیدہ عائشہ رضی اللہ عنہا نے بیان کیا: ”میں نے کسی کو نہیں پایا کہ وہ اپنی عادات، چال چلن اور بات چیت میں سیدہ فاطمہ رضی اللہ عنہا سے بڑھ کر رسول اللہ صلی اللہ علیہ وسلم کے مشابہ ہو۔ حسن بن علی کی روایت میں «حَدِيثًا وَكَلَامًا» ”بات چیت اور کلام“ کے لفظ وارد ہیں، «السَّمْتَ وَالْهَدْيَ وَالدَّلَّ» ”عادات، چال چلن اور طریقے“ کے الفاظ نہیں ہیں۔ جب وہ آپ کے ہاں آتیں تو آپ صلی اللہ علیہ وسلم اٹھ کر ان کی طرف بڑھتے، ان کا ہاتھ پکڑتے، بوسہ دیتے اور اپنی جگہ پر بٹھا لیتے اور (اسی طرح) جب آپ ان کے ہاں جاتے تو وہ اٹھ کر آپ صلی اللہ علیہ وسلم کی طرف بڑھتیں، آپ صلی اللہ علیہ وسلم کا ہاتھ پکڑتیں، بوسہ دیتیں اور اپنی جگہ پر بٹھا دیتیں۔“ [سنن ابي داود/أبواب السلام /حدیث: 5217]

سیدنا ابوہریرہ رضی اللہ عنہ سے روایت ہے کہ اقرع بن حابس رضی اللہ عنہ نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم سیدنا حسین رضی اللہ عنہ کو بوسہ دے رہے تھے، تو انہوں نے کہا: ”تحقیق میرے دس بچے ہیں اور میں نے کسی کے ساتھ ایسے نہیں کیا (کسی کو کبھی بوسہ نہیں دیا)۔“ تو رسول اللہ صلی اللہ علیہ وسلم نے فرمایا: ”جو رحم نہیں کرتا اس پر رحم نہیں کیا جاتا۔“ [سنن ابي داود/أبواب السلام /حدیث: 5218]

جناب عروہ سے روایت ہے کہ سیدہ عائشہ رضی اللہ عنہا نے (واقعہ افک کے سلسلے میں بیان کرتے ہوئے) کہا پھر نبی کریم صلی اللہ علیہ وسلم نے فرمایا: ”عائشہ! خوشخبری ہو، اللہ عزوجل نے تیری براءت نازل فرما دی ہے۔“ اور اسے قرآن مجید کی آیات پڑھ کر سنائیں، تو میرے ماں باپ نے مجھے کہا: ”اٹھو اور رسول اللہ صلی اللہ علیہ وسلم کے سر کو بوسہ دو۔“ تو میں نے کہا: ”میں اللہ عزوجل کی حمد کرتی ہوں، تم دونوں کی نہیں۔“ [سنن ابي داود/أبواب السلام /حدیث: 5219]

جناب شعبی رحمہ اللہ سے مروی ہے کہ ”نبی کریم صلی اللہ علیہ وسلم ، سیدنا جعفر بن ابی طالب رضی اللہ عنہ سے ملے (جبکہ وہ سفر سے واپس آئے تھے) تو آپ صلی اللہ علیہ وسلم نے ان سے معانقہ کیا اور ان کی آنکھوں کے درمیان بوسہ بھی دیا۔“ [سنن ابي داود/أبواب السلام /حدیث: 5220]

جناب ایاس بن دغفل رحمہ اللہ بیان کرتے ہیں کہ ”میں نے جناب ابونضرہ (منذر بن مالک) رحمہ اللہ کو دیکھا کہ انہوں نے سیدنا حسن بن علی رضی اللہ عنہما کے رخسار پر بوسہ دیا۔“ [سنن ابي داود/أبواب السلام /حدیث: 5221]

سیدنا براء رضی اللہ عنہ بیان کرتے ہیں کہ میں سیدنا ابوبکر رضی اللہ عنہ کے ساتھ آیا جبکہ یہ لوگ نئے نئے مدینہ آئے تھے، اور ان کی صاحبزادی سیدہ عائشہ رضی اللہ عنہا بخار کی وجہ سے لیٹی ہوئی تھی، تو ابوبکر رضی اللہ عنہ ان کے قریب ہوئے اور پوچھا: ”بٹیا تمہارا کیا حال ہے؟“ اور ان کے رخسار پر بوسہ بھی دیا۔ [سنن ابي داود/أبواب السلام /حدیث: 5222]