حضرت ابوہریرہ رضی اللہ عنہ سے روایت ہے کہ ایک انصاری صحابی نے رسول اللہ صلی اللہ علیہ وسلم کی خدمت میں پیغام بھیجا کہ ”میرے گھر تشریف لا کر میرے لیے گھر میں ایک مسجد (نماز کی جگہ) مقرر کر دیجئے جہاں میں نماز پڑھا کروں۔“ اس وقت وہ صحابی نابینا ہو چکے تھے۔ رسول اللہ صلی اللہ علیہ وسلم تشریف لائے اور اس صحابی کی فرمائش پوری کی۔ [سنن ابن ماجه/كتاب المساجد والجماعات/حدیث: 755]

حضرت انس بن مالک رضی اللہ عنہ سے روایت ہے، انہوں نے فرمایا: ”میرے ایک چچا جان نے نبی صلی اللہ علیہ وسلم کے لیے کھانا تیار کیا۔ انہوں نے نبی صلی اللہ علیہ وسلم سے عرض کیا: میری خواہش ہے کہ آپ میرے گھر تشریف لا کر کھانا تناول فرمائیں اور نماز بھی ادا فرمائیں، چنانچہ نبی صلی اللہ علیہ وسلم تشریف لے آئے۔ گھر میں ایک پرانی چٹائی تھی، انہوں نے اس کے ایک حصے کو صاف کرا کے اس پر پانی چھڑکوا دیا (تاکہ نرم ہو جائے)۔ نبی صلی اللہ علیہ وسلم نے (کھجور کے پتوں کی بنی ہوئی اس چٹائی پر) نماز ادا فرمائی اور ہم نے بھی آپ کی اقتدا میں نماز پڑھی۔“ امام ابو عبداللہ ابن ماجہ رحمہ اللہ نے فرمایا کہ: ”(روایت میں مذکور) «فَحْل» سے مراد ایسی چٹائی ہے جو (کثرت استعمال کی وجہ سے) سیاہ ہو چکی ہو۔“ [سنن ابن ماجه/كتاب المساجد والجماعات/حدیث: 756]

حضرت ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے مسجد سے کوڑا کرکٹ نکالا، اللہ اس کے لیے جنت میں گھر تعمیر کرے گا۔“ [سنن ابن ماجه/كتاب المساجد والجماعات/حدیث: 757]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے حکم دیا کہ ”محلوں میں مسجدیں تعمیر کی جائیں، انہیں پاک صاف رکھا جائے اور انہیں خوشبو لگائی جائے۔“ [سنن ابن ماجه/كتاب المساجد والجماعات/حدیث: 758]

حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم نے محلوں میں مسجدیں بنانے، انہیں پاک رکھنے اور انہیں خوشبو لگانے کا حکم دیا ہے۔“ [سنن ابن ماجه/كتاب المساجد والجماعات/حدیث: 759]

حضرت ابو سعید خدری رضی اللہ عنہ سے روایت ہے، انہوں نے فرمایا: ”سب سے پہلے جس نے مسجدوں میں چراغ روشن کیے، وہ جناب تمیم داری رضی اللہ عنہ ہیں۔“ [سنن ابن ماجه/كتاب المساجد والجماعات/حدیث: 760]

حضرت ابوہریرہ رضی اللہ عنہ اور حضرت ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم کو مسجد کی دیوار پر بلغم نظر آیا، آپ صلی اللہ علیہ وسلم نے ایک کنکری لے کر اسے کھرچ دیا، پھر فرمایا: ”کوئی شخص جب بلغم تھوکنا چاہے، تو سامنے نہ تھوکے، نہ دائیں تھوکے، اسے چاہیے کہ بائیں طرف تھوکے یا اپنے بائیں پاؤں کے نیچے تھوک لے۔“ [سنن ابن ماجه/كتاب المساجد والجماعات/حدیث: 761]

حضرت انس رضی اللہ عنہ سے روایت ہے کہ نبی صلی اللہ علیہ وسلم کو مسجد میں قبلے کی طرف (دیوار پر) بلغم نظر آیا، آپ صلی اللہ علیہ وسلم اس قدر غضب ناک ہوئے کہ چہرہ مبارک سرخ ہو گیا۔ (یہ دیکھ کر) ایک انصاری خاتون نے آ کر اسے کھرچ دیا اور اس جگہ خوشبو لگا دی۔ رسول اللہ صلی اللہ علیہ وسلم نے فرمایا: ”بہت خوب!“ [سنن ابن ماجه/كتاب المساجد والجماعات/حدیث: 762]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم لوگوں کو نماز پڑھا رہے تھے کہ مسجد میں قبلے کی طرف (دیوار پر) بلغم نظر آیا، آپ صلی اللہ علیہ وسلم نے اسے کھرچ دیا، نماز سے فارغ ہو کر فرمایا: ”جب تم میں سے کوئی شخص نماز پڑھ رہا ہوتا ہے تو اللہ اس کے چہرے کی طرف ہوتا ہے، لہٰذا کسی کو نماز کے دوران میں سامنے کی طرف نہیں تھوکنا چاہیے۔“ [سنن ابن ماجه/كتاب المساجد والجماعات/حدیث: 763]

حضرت عائشہ رضی اللہ عنہا سے روایت ہے کہ ”نبی صلی اللہ علیہ وسلم نے مسجد میں قبلے کی دیوار پر لگا ہوا تھوک کھرچ دیا۔“ [سنن ابن ماجه/كتاب المساجد والجماعات/حدیث: 764]