حضرت ابو سعید خدری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”قبرستان اور غسل خانے کے سوا ساری زمین مسجد ہے۔“ [سنن ابن ماجه/كتاب المساجد والجماعات/حدیث: 745]

حضرت عبداللہ بن عمر رضی اللہ عنہما سے روایت ہے، انہوں نے کہا: رسول اللہ صلی اللہ علیہ وسلم نے ”سات جگہوں میں نماز پڑھنے سے منع فرمایا: کوڑا کرکٹ پھینکنے کی جگہ، مذبح (جانور ذبح کرنے کی جگہ) میں، قبرستان میں، عام راستے میں، غسل خانے میں، اونٹوں کے باڑے میں، اور کعبہ شریف کے اوپر (چھت پر)۔“ [سنن ابن ماجه/كتاب المساجد والجماعات/حدیث: 746]

حضرت عمر بن خطاب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”سات جگہ نماز پڑھنا جائز نہیں: بیت اللہ کی چھت پر، قبرستان میں، کوڑا کرکٹ پھینکنے کی جگہ، مذبح (جانور ذبح کرنے کی جگہ) میں، غسل خانے میں، اونٹوں کے باڑے میں اور عام راستے کے درمیان میں۔“ [سنن ابن ماجه/كتاب المساجد والجماعات/حدیث: 747]

حضرت عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جو کام مسجد میں کرنے مناسب نہیں، وہ یہ ہیں: اسے راہ گزر نہ بنایا جائے، اس میں کسی ہتھیار کی نمائش نہ کی جائے، کمان نہ پکڑی جائے، (ترکش سے) تیر نہ نکالے جائیں، اس میں کچا گوشت نہ لے جایا جائے، (مجرم پر) حد نہ لگائی جائے، کسی سے قصاص نہ لیا جائے اور اسے بازار نہ بنایا جائے (خریدو فروخت نہ کی جائے)۔“ [سنن ابن ماجه/كتاب المساجد والجماعات/حدیث: 748]

جناب عمرو بن شعیب اپنے والد جناب شعیب بن محمد (رحمہ اللہ) سے، اور وہ اپنے دادا (حضرت عبداللہ بن عمرو بن عاص رضی اللہ عنہ) سے روایت کرتے ہیں کہ انہوں نے کہا: رسول اللہ صلی اللہ علیہ وسلم نے ”مسجد میں خریدو فروخت اور شعر گوئی سے منع فرمایا۔“ [سنن ابن ماجه/كتاب المساجد والجماعات/حدیث: 749]

حضرت واثلہ بن اسقع رضی اللہ عنہ سے روایت ہے، نبی صلی اللہ علیہ وسلم نے فرمایا: ”اپنی مسجدوں کو بچوں، دیوانوں، بدخصلت لوگوں، خرید و فروخت، جھگڑوں، شور و غوغا، حدیں لگانے اور تلواریں کھینچنے سے دور رکھو، اور ان کے دروازوں کے قریب استنجا اور وضو کی جگہ بناؤ، اور جمعہ کے دن ان میں خوشبو (اگر بتی وغیرہ) سلگاؤ۔“ [سنن ابن ماجه/كتاب المساجد والجماعات/حدیث: 750]

حضرت عبداللہ بن عمر رضی اللہ عنہما سے روایت ہے، انہوں نے فرمایا: ”ہم لوگ رسول اللہ صلی اللہ علیہ وسلم کے زمانۂ مبارک میں مسجد میں سو جایا کرتے تھے۔“ [سنن ابن ماجه/كتاب المساجد والجماعات/حدیث: 751]

جناب یعیش بن قیس بن طخفہ اپنے والد رضی اللہ عنہ سے روایت کرتے ہیں، وہ اصحابِ صفہ میں سے تھے، انہوں نے کہا: رسول اللہ صلی اللہ علیہ وسلم نے ہم سے فرمایا: ”آؤ چلیں۔“ ہم حضرت عائشہ رضی اللہ عنہا کے گھر کی طرف روانہ ہوئے (وہاں جا کر) ہم نے کھایا پیا۔ (اس کے بعد) رسول اللہ صلی اللہ علیہ وسلم نے ہم سے فرمایا: ”چاہو تو یہاں سو رہو، چاہو تو مسجد میں چلے جاؤ۔“ ہم نے عرض کیا: ”ہم تو مسجد میں ہی چلے جائیں گے۔“ [سنن ابن ماجه/كتاب المساجد والجماعات/حدیث: 752]

حضرت ابو ذر غفاری رضی اللہ عنہ سے روایت ہے، انہوں نے فرمایا: میں نے عرض کیا: ”اے اللہ کے رسول! سب سے پہلے کون سی مسجد بنائی گئی؟“ آپ صلی اللہ علیہ وسلم نے فرمایا: ”مسجد حرام۔“ میں نے کہا: ”پھر کون سی؟“ فرمایا: ”پھر مسجد اقصیٰ۔“ میں نے کہا: ”ان کے درمیان کتنی مدت کا فرق ہے؟“ فرمایا: ”چالیس سال، پھر ساری زمین تیرے لیے نماز کی جگہ ہے، جہاں وقت آ جائے، وہیں نماز پڑھ لے۔“ [سنن ابن ماجه/كتاب المساجد والجماعات/حدیث: 753]

حضرت محمود بن ربیع انصاری رضی اللہ عنہ سے روایت ہے، یہ وہ صحابی ہیں جن کے گھر میں رسول اللہ صلی اللہ علیہ وسلم نے ڈول سے پانی لے کر ان کے کنویں میں کلی فرمائی تھی، انہوں نے حضرت عتبان بن مالک سالمی رضی اللہ عنہ سے روایت کی، جو اپنے قبیلے بنو سالم (کی مسجد میں ان) کے امام تھے، انہوں نے رسول اللہ صلی اللہ علیہ وسلم کی معیت میں جنگ بدر میں بھی شرکت فرمائی تھی۔ انہوں نے فرمایا: ”میں رسول اللہ صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول! میری نظر کمزور ہو گئی ہے، اور سیلاب آتا ہے تو میں اپنے قبیلے کی مسجد تک نہیں پہنچ سکتا۔ وہاں سے گزرنا میرے لیے مشکل ہو جاتا ہے۔ اگر آپ مناسب سمجھیں تو میرے ہاں تشریف لا کر میرے گھر میں ایک جگہ نماز ادا فرمائیں، اور میں وہاں نماز پڑھا کروں۔“ رسول اللہ صلی اللہ علیہ وسلم نے فرمایا: ”(اچھا) میں آؤں گا۔“ جب دن کافی چڑھ آیا تو رسول اللہ صلی اللہ علیہ وسلم اور حضرت ابوبکر رضی اللہ عنہ تشریف لے آئے۔ آپ صلی اللہ علیہ وسلم نے (اندر آنے کی) اجازت طلب فرمائی، میں نے اجازت دے دی۔ آپ صلی اللہ علیہ وسلم بیٹھے نہیں، پہلے فرمایا: ”تم اپنے گھر میں کس جگہ چاہتے ہو کہ میں وہاں نماز پڑھوں؟“ میں نے اس جگہ کی طرف اشارہ کر دیا جہاں میں نماز پڑھنا چاہتا تھا (اور وہ جگہ اس مقصد کے لیے مخصوص کی تھی۔) رسول اللہ صلی اللہ علیہ وسلم کھڑے ہو گئے۔ ہم نے آپ کے پیچھے صف بنا لی تو آپ صلی اللہ علیہ وسلم نے ہمیں دو رکعت نماز پڑھا دی۔ پھر میں نے نبی صلی اللہ علیہ وسلم کو کھانا کھلانے کے لیے روک لیا جو ابھی تیار ہو رہا تھا۔ [سنن ابن ماجه/كتاب المساجد والجماعات/حدیث: 754]