حضرت عائشہ رضی اللہ عنہا سے روایت ہے، وہ نبی صلی اللہ علیہ وسلم سے بیان کرتی ہیں کہ آپ صلی اللہ علیہ وسلم نے اپنے مرضِ وفات میں فرمایا: ”اللہ تعالیٰ یہود و نصاریٰ پر لعنت کرے کہ انھوں نے اپنے پیغمبروں کی قبروں کو سجدہ گاہ بنا لیا۔“ حضرت عائشہ رضی اللہ عنہا فرماتی ہیں: اگر یہ ڈر نہ ہوتا تو آپ صلی اللہ علیہ وسلم کی قبر مبارک کو بالکل ظاہر کر دیا جاتا، مگر مجھے اندیشہ ہے کہ مبادا اسے بھی سجدہ گاہ بنا لیا جائے۔ [صحيح البخاري/كتاب الجنائز/حدیث: 1330]

حضرت سمرہ بن جندب رضی اللہ عنہ سے روایت ہے، انہوں نے فرمایا: میں نے نبی صلی اللہ علیہ وسلم کے پیچھے ایک ایسی عورت کی نمازِ جنازہ پڑھی جو دورانِ زچگی فوت ہوئی تھی، تو آپ صلی اللہ علیہ وسلم اس کے درمیان میں کھڑے ہوئے تھے۔ [صحيح البخاري/كتاب الجنائز/حدیث: 1331]

حضرت سمرہ بن جندب رضی اللہ عنہ ہی سے روایت ہے، انہوں نے فرمایا: میں نے نبی صلی اللہ علیہ وسلم کے پیچھے ایک عورت کی نمازِ جنازہ پڑھی جو بحالتِ نفاس فوت ہو گئی تھی، آپ صلی اللہ علیہ وسلم اس کے وسط میں کھڑے ہوئے تھے۔ [صحيح البخاري/كتاب الجنائز/حدیث: 1332]

حضرت ابو ہریرہ رضی اللہ عنہ سے روایت ہے کہ جس دن حبشہ کے بادشاہ نجاشی کی وفات ہوئی تو اسی روز رسول اللہ صلی اللہ علیہ وسلم نے ہمیں ان کے فوت ہونے کی خبر سنائی، صحابہ کرام رضی اللہ عنہم کے ہمراہ آپ صلی اللہ علیہ وسلم عید گاہ تشریف لے گئے، ان کی صف بندی کی اور ان کی نماز جنازہ میں آپ صلی اللہ علیہ وسلم نے چار تکبیریں کہیں۔ [صحيح البخاري/كتاب الجنائز/حدیث: 1333]

حضرت جابر رضی اللہ عنہ سے روایت ہے کہ نبی صلی اللہ علیہ وسلم نے اصحمہ نجاشی کی نماز جنازہ پڑھی تو چار تکبیریں کہیں۔ یزید بن ہارون اور عبدالصمد نے بھی سلیم بن حیان سے اصحمہ بیان کیا ہے۔ [صحيح البخاري/كتاب الجنائز/حدیث: 1334]

حضرت طلحہ رضی اللہ عنہ سے روایت ہے، انہوں نے کہا: میں نے حضرت ابن عباس رضی اللہ عنہما کے پیچھے نماز جنازہ پڑھی۔ اس میں آپ نے سورہ فاتحہ کی قراءت فرمائی۔ فراغت کے بعد فرمایا (کہ میں نے اس لیے پڑھی ہے) تاکہ تمہیں اس کے سنت ہونے کا علم ہو جائے۔ [صحيح البخاري/كتاب الجنائز/حدیث: 1335]

حضرت شعبی رحمہ اللہ سے روایت ہے، انہوں نے کہا: مجھے اس شخص نے حدیث بیان کی جو نبی صلی اللہ علیہ وسلم کے ہمراہ ایک الگ تھلگ قبر کے پاس سے گزرا، رسول اللہ صلی اللہ علیہ وسلم نے وہاں لوگوں کی امامت کی اور لوگوں نے آپ کے پیچھے نماز (جنازہ) پڑھی۔ شیبانی کہتے ہیں: میں نے ابو عمرو شعبی رحمہ اللہ سے دریافت کیا: آپ کو یہ حدیث کس نے بیان کی تھی؟ انہوں نے فرمایا: مجھے حضرت ابن عباس رضی اللہ عنہما نے اس کے متعلق بتایا تھا۔ [صحيح البخاري/كتاب الجنائز/حدیث: 1336]