حضرت عمرو بن شعیب کے پردادا رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”ذمی کی دیت مسلمان سے نصف ہے۔ ذمی سے مراد یہود و نصاریٰ ہیں۔“ [سنن نسائي/كتاب القسامة والقود والديات/حدیث: 4810]

حضرت عبداللہ بن عمرو رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”کافر کی دیت مومن کی دیت سے نصف ہے۔“ [سنن نسائي/كتاب القسامة والقود والديات/حدیث: 4811]

حضرت ابن عباس رضی اللہ عنہما سے روایت ہے، انہوں نے فرمایا کہ رسول اللہ صلی اللہ علیہ وسلم نے مکاتب کے بارے میں، جسے قتل کر دیا جائے، فیصلہ فرمایا کہ ”جس قدر وہ مکاتبت ادا کر چکا ہے، اتنی آزاد کی دیت دی جائے گی۔“ [سنن نسائي/كتاب القسامة والقود والديات/حدیث: 4812]

حضرت عبداللہ بن عباس رضی اللہ عنہما سے روایت ہے کہ اللہ کے نبی صلی اللہ علیہ وسلم نے مکاتب کے بارے میں فیصلہ فرمایا کہ (اگر وہ قتل کر دیا جائے تو) ”جس قدر وہ آزاد ہو چکا ہے، اتنی دیت آزاد کی دی جائے گی۔“ [سنن نسائي/كتاب القسامة والقود والديات/حدیث: 4813]

حضرت ابن عباس رضی اللہ عنہما سے روایت ہے، انہوں نے فرمایا: رسول اللہ صلی اللہ علیہ وسلم نے مکاتب کے بارے میں فیصلہ فرمایا: ”مکاتب غلام جس قدر مال مکاتبت ادا کر چکا ہے، اس کی اتنی دیت آزاد کے حساب سے دی جائے گی اور باقی غلام کے لحاظ سے۔“ [سنن نسائي/كتاب القسامة والقود والديات/حدیث: 4814]

سندِ حدیث۔ [سنن نسائي/كتاب القسامة والقود والديات/حدیث: 4815]

حضرت ابن عباس رضی اللہ عنہما سے منقول ہے کہ رسول اللہ صلی اللہ علیہ وسلم کے دورِ مبارک میں ایک مکاتب کو قتل کر دیا گیا تو آپ صلی اللہ علیہ وسلم نے حکم دیا: ”جس قدر وہ مالِ مکاتبت ادا کر چکا ہے، اتنے حصے کی دیت آزاد کے حساب سے دی جائے اور باقی کی غلام کے لحاظ سے۔“ [سنن نسائي/كتاب القسامة والقود والديات/حدیث: 4816]

حضرت بریدہ رضی اللہ عنہ سے روایت ہے کہ ایک عورت نے دوسری عورت کو پتھر دے مارا جس سے اس کا حمل ضائع ہوگیا۔ رسول اللہ صلی اللہ علیہ وسلم نے اس سلسلے میں بچے کی دیت پچاس بکریاں مقرر کیں اور اس دن آپ نے «الْخَذْفِ» سے بھی منع فرمایا۔ ابو نعیم رحمہ اللہ نے اس روایت کو مرسل بیان کیا۔ [سنن نسائي/كتاب القسامة والقود والديات/حدیث: 4817]

حضرت عبداللہ بن بریدہ رحمہ اللہ نے بیان کیا کہ ایک عورت نے دوسری عورت کو پتھر دے مارا جس سے اس کا حمل ضائع ہو گیا، یہ مقدمہ رسول اللہ صلی اللہ علیہ وسلم کے سامنے پیش کیا گیا تو آپ نے اس بچے کی دیت پانچ سو بکریاں مقرر فرمائی، نیز اس دن آپ نے «الْخَذْفِ» ”کنکری پھینکنے“ سے روک دیا۔ امام ابوعبدالرحمن نسائی رحمہ اللہ بیان کرتے ہیں: یہ وہم ہے، ہو سکتا ہے کہ ان کا ارادہ ”ایک سو بکریاں“ کہنے کا ہو (لیکن غلطی سے پانچ سو بکریاں کہہ دیں)۔ اور «الْخَذْفِ» ”کنکری پھینکنے“ کی ممانعت تو عبداللہ بن بریدہ رحمہ اللہ کی حضرت عبداللہ بن مغفل رضی اللہ عنہ سے مروی ہے (اور وہ اگلی حدیث: 4819 ہی میں ہے)۔ [سنن نسائي/كتاب القسامة والقود والديات/حدیث: 4818]

حضرت عبداللہ بن مغفل رضی اللہ عنہ نے ایک آدمی کو «الْخَذْفَ» ”خذف“ کرتے دیکھا تو فرمایا: «الْخَذْفَ» ”خذف“ نہ کر کیونکہ نبی اکرم صلی اللہ علیہ وسلم نے ” «الْخَذْفَ» ”خذف“ سے منع فرمایا ہے“ یا ”آپ اسے ناپسند فرماتے تھے۔“ کَھْمَس کو شک ہے۔ [سنن نسائي/كتاب القسامة والقود والديات/حدیث: 4819]