حضرت یعلی رضی اللہ عنہ سے روایت ہے کہ ایک آدمی نے دوسرے آدمی کے بازو پر کاٹ کھایا جس سے اس کا سامنے والا دانت اکھڑ گیا، وہ نبی کریم صلی اللہ علیہ وسلم کے پاس (دیت لینے کے لیے) آیا تو آپ صلی اللہ علیہ وسلم نے اسے ”رائیگاں قرار دیا۔“ (اس کا کوئی معاوضہ نہیں دلوایا)۔ [سنن نسائي/كتاب القسامة والقود والديات/حدیث: 4770]

حضرت یعلی رضی اللہ عنہ سے منقول ہے کہ انہوں نے ایک شخص کو نوکر رکھا، وہ کسی آدمی سے لڑ پڑا اور اس کا ہاتھ کاٹ کھایا، ساتھ ہی دانت بھی اکھڑ گیا۔ وہ یہ مقدمہ نبی صلی اللہ علیہ وسلم کی عدالت میں لے گیا تو آپ صلی اللہ علیہ وسلم نے فرمایا: ”کیا وہ اپنا ہاتھ (تیرے منہ میں) چھوڑ دیتا کہ تو اسے اونٹ کی طرح چباتا رہتا؟“ [سنن نسائي/كتاب القسامة والقود والديات/حدیث: 4771]

حضرت یعلی رضی اللہ عنہ سے روایت ہے، انہوں نے فرمایا: میں غزوۂ تبوک میں رسول اللہ صلی اللہ علیہ وسلم کے ساتھ جنگ پر گیا تو میں نے ایک شخص نوکر رکھ لیا، پھر میرا نوکر کسی آدمی سے لڑ پڑا، اس آدمی نے اسے کاٹ کھایا حتیٰ کہ اس کا سامنے والا دانت گر گیا، وہ شخص نبی اکرم صلی اللہ علیہ وسلم کے پاس آیا اور آپ کے سامنے یہ بات ذکر کی، نبی اکرم صلی اللہ علیہ وسلم نے اسے رائیگاں قرار دیا (اس کا کوئی معاوضہ نہ دلوایا)۔ [سنن نسائي/كتاب القسامة والقود والديات/حدیث: 4772]

حضرت یعلی بن امیہ رضی اللہ عنہ سے روایت ہے، انہوں نے فرمایا: میں رسول اللہ صلی اللہ علیہ وسلم کے ساتھ تنگی والے لشکر میں گیا اور میرے نزدیک میرا یہ عمل سب سے افضل عمل ہے۔ وہاں میرا ایک نوکر کسی آدمی سے لڑ پڑا۔ ان میں سے کسی ایک نے دوسرے کی انگلی پر دانت گاڑ دیا۔ اس نے جو انگلی کھینچی تو ساتھ ہی دانت بھی اکھڑ آیا۔ دوسرا شخص نبی اکرم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے اسے کوئی معاوضہ نہ دلوایا بلکہ فرمایا: ”کیا وہ اپنا ہاتھ تیرے منہ میں دیے رکھتا کہ تو اسے چبا ڈالتا؟“ [سنن نسائي/كتاب القسامة والقود والديات/حدیث: 4773]

حضرت یعلی رضی اللہ عنہ سے اس شخص کے بارے میں جس نے ساتھی کو کاٹ کھایا تھا اور اس کا دانت اکھڑ گیا تھا، سابقہ روایت کی طرح بیان ہے کہ نبی اکرم صلی اللہ علیہ وسلم نے فرمایا تھا: ”تجھے کوئی دیت نہیں ملے گی۔“ [سنن نسائي/كتاب القسامة والقود والديات/حدیث: 4774]

حضرت صفوان بن یعلی بن منیہ سے روایت ہے کہ میرے والد حضرت یعلی بن منیہ رضی اللہ عنہ کے ایک نوکر کے بازو پر ایک دوسرے شخص نے دانت گاڑ دیے۔ اس نے اپنا ہاتھ اس کے منہ سے کھینچا تو اس کا دانت گر گیا۔ یہ مقدمہ نبی اکرم صلی اللہ علیہ وسلم کے پاس پیش ہوا تو آپ نے اس دانت کا کوئی معاوضہ نہ دلوایا بلکہ فرمایا: ”کیا وہ اپنا ہاتھ تیرے منہ میں رکھ چھوڑتا کہ تو اسے اونٹ کی طرح چباتا رہتا؟“ [سنن نسائي/كتاب القسامة والقود والديات/حدیث: 4775]

حضرت صفوان بن یعلیٰ رحمہ اللہ سے روایت ہے کہ میرے والد (حضرت یعلیٰ بن منیہ رضی اللہ عنہ) غزوہ تبوک میں رسول اللہ صلی اللہ علیہ وسلم کے ساتھ گئے۔ وہ ساتھ ایک نوکر بھی لے گئے۔ وہ کسی آدمی سے لڑ پڑا۔ اس آدمی نے اس کی کلائی پر کاٹ لیا۔ جب اس کو تکلیف ہوئی تو اس نے زور سے ہاتھ کھینچا، ساتھ ہی دانت بھی اکھڑ آیا۔ یہ مقدمہ رسول اللہ صلی اللہ علیہ وسلم کی خدمت میں پیش کیا گیا تو آپ صلی اللہ علیہ وسلم نے فرمایا: ”تم میں سے کوئی شخص اپنے بھائی کی طرف بڑھتا ہے اور اس کو اس طرح کاٹ کھاتا ہے جیسے اونٹ چباتا ہے۔“ آپ صلی اللہ علیہ وسلم نے اس کے دانت کا کوئی معاوضہ نہ دلوایا۔ [سنن نسائي/كتاب القسامة والقود والديات/حدیث: 4776]

حضرت ابو سعید خدری رضی اللہ عنہ سے روایت ہے، انہوں نے فرمایا: ایک دفعہ رسول اللہ صلی اللہ علیہ وسلم کوئی چیز تقسیم فرما رہے تھے کہ ایک آدمی آیا اور (بے صبری میں) آپ پر اوندھا ہی ہو گیا، آپ صلی اللہ علیہ وسلم نے اپنے ہاتھ میں پکڑی ہوئی چھڑی کی نوک اس کو مار دی، وہ آدمی (حلقہ سے) نکل گیا۔ رسول اللہ صلی اللہ علیہ وسلم نے فرمایا: ”بھائی! ادھر آ اور بدلہ لے لے۔“ اس نے کہا: (نہیں) بلکہ میں نے معاف کر دیا۔ [سنن نسائي/كتاب القسامة والقود والديات/حدیث: 4777]

حضرت ابوسعید خدری رضی اللہ عنہ سے روایت ہے کہ ایک دفعہ رسول اللہ صلی اللہ علیہ وسلم کوئی چیز تقسیم فرما رہے تھے کہ ایک آدمی (لینے کے لیے) آپ پر اوندھا ہی ہو گیا، رسول اللہ صلی اللہ علیہ وسلم نے اپنے ہاتھ میں پکڑی ہوئی ایک چھڑی سے اسے کچوکا لگایا تو وہ ہائے وائے کرنے لگا، رسول اللہ صلی اللہ علیہ وسلم نے اس سے فرمایا: ”ادھر آ اور بدلہ لے لے۔“ اس نے کہا: اللہ کے رسول! (نہیں) بلکہ میں نے معاف کر دیا۔ [سنن نسائي/كتاب القسامة والقود والديات/حدیث: 4778]

حضرت ابن عباس رضی اللہ عنہما سے روایت ہے کہ ایک آدمی نے حضرت عباس رضی اللہ عنہ کے جاہلی دور کے ایک جدِ امجد کو برا بھلا کہا۔ حضرت عباس رضی اللہ عنہ نے اسے تھپڑ رسید کر دیا۔ اس آدمی کے قبیلے والے آئے اور کہنے لگے: یہ بھی انہیں تھپڑ مارے گا جس طرح انہوں نے اسے تھپڑ مارا ہے، حتیٰ کہ انہوں نے اسلحہ پہن لیا۔ یہ بات نبی اکرم صلی اللہ علیہ وسلم تک پہنچی۔ آپ صلی اللہ علیہ وسلم منبر پر چڑھے اور فرمایا: ”اے لوگو! تم روئے زمین پر بسنے والے لوگوں میں سے کس شخص کو اللہ تعالیٰ کے نزدیک زیادہ معزز و محترم سمجھتے ہو؟“ انہوں نے کہا: آپ صلی اللہ علیہ وسلم کو۔ آپ صلی اللہ علیہ وسلم نے فرمایا: ”پھر سن لو! عباس مجھ سے ہیں اور میں ان سے ہوں۔ ہمارے فوت شدہ آباؤ اجداد کو برا نہ کہو، اس طرح تم ہم میں سے زندہ افراد کو تکلیف پہنچاؤ گے۔“ وہ لوگ آپ صلی اللہ علیہ وسلم کے پاس حاضر ہوئے اور کہا: ہم آپ کی ناراضی سے اللہ تعالیٰ کی پناہ مانگتے ہیں، (معاف فرما دیجیے اور) اللہ تعالیٰ سے ہمارے لیے بخشش کی دعا فرمائیے۔ [سنن نسائي/كتاب القسامة والقود والديات/حدیث: 4779]