سیدنا ابوبرزہ اسلمی رضی اللہ عنہ سے روایت ہے، انہوں نے کہا، میں نے عرض کیا: یا رسول اللہ! مجھے کوئی ایسا عمل بتائیں جو مجھے جنت میں پہنچا دے۔ فرمایا: ”لوگوں کی گزرگاہ سے تکلیف دہ چیزوں کو ہٹا دو۔“ [صحيح الادب المفرد/حدیث: 168]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں آپ صلی اللہ علیہ وسلم نے فرمایا: ”ایک مسلمان شخص کانٹے دار ٹہنی کے پاس سے گزرا جو راستے میں تھی، اس نے کہا: میں ضرور ان کانٹوں کو (راستے سے) ہٹا دوں گا (تاکہ) کسی مسلمان آدمی کو تکلیف نہ دیں تو اس شخص کو معاف کر دیا گیا۔“ [صحيح الادب المفرد/حدیث: 169]

سیدنا ابوذر رضی اللہ عنہ سے مروی ہے، انہوں نے کہا، رسول اللہ صلی اللہ علیہ وسلم نے فرمایا: ”میرے سامنے میری امت کے اچھے اور برے اعمال پیش کیے گئے تو میں نے ان کے اچھے اعمال میں یہ پایا: تکلیف دہ چیز جس کو راستے سے ہٹایا جاتا ہے اور میں نے ان کے برے اعمال میں یہ پایا: وہ بلغم جو مسجد میں تھوکی گئی اور اسے دفن نہیں کیا گیا۔“ [صحيح الادب المفرد/حدیث: 170]

سیدنا عبداللہ بن یزید خطمی رضی اللہ عنہ سے روایت ہے انہوں نے کہا، رسول اللہ صلی اللہ علیہ وسلم نے فرمایا: ”ہر نیکی کا کام صدقہ ہے۔“ [صحيح الادب المفرد/حدیث: 171]

سیدنا انس رضی اللہ عنہ سے روایت ہے، انہوں نے کہا، نبی صلی اللہ علیہ وسلم کے پاس جب بھی کوئی چیز لائی جاتی تھی تو فرماتے تھے: ”یہ فلاں عورت کے پاس لے جاؤ، وہ خدیجہ کی دوست تھیں یہ فلاں عورت کے گھر لے جاؤ، وہ خدیجہ سے محبت کرتی تھیں۔“ [صحيح الادب المفرد/حدیث: 172]

سیدنا حذیفہ رضی اللہ عنہ سے روایت ہے، انہوں نے کہا، تمہارے نبی صلی اللہ علیہ وسلم نے فرمایا: ”ہر نیکی کا کام صدقہ ہے۔“ [صحيح الادب المفرد/حدیث: 173]

عمرو بن ابوقرۃ کندی کہتے ہیں، میرے والد نے سلمان رضی اللہ عنہ کے سامنے اپنی بہن کا رشتہ پیش کیا، تو انہوں نے انکار کیا اور اپنی آزاد کردہ لونڈی سے نکاح کر لیا جس کا نام بقیرہ تھا۔ ابوقرہ کو یہ بات پہنچی کہ حذیفہ اور سلمان کے مابین کوئی بات (کوئی ناچاقی) ہے، وہ سلمان کو تلاش کرتے ہوئے آئے۔ انہیں بتایا گیا کہ وہ اپنی ترکاریوں کی کیاریوں پر (اپنے کھیت میں) ہیں۔ وہ اسی طرف چلے تو سلمان سے ملاقات ہوئی، انہوں نے ایک ٹوکرا اپنے کندھے پر اٹھایا ہوا تھا جس میں سبزیاں تھیں اور اپنی لاٹھی ٹوکرے کے کنڈے میں ڈالی ہو ئی تھی، ابوقرہ نے کہا: اے ابوعبدللہ! آپ کے اور حذیفہ کے مابین کیا بات (ناچاقی) ہے؟ بیان کرتے ہیں: سلمان کہتے ہیں: «‏وَكَانَ الإِنْسَانُ عَجُولاً» ‏ ‏، انسان بڑا جلد باز واقع ہوا ہے، ہم دونوں (ابوقرہ اور سلمان) چلتے رہے یہاں تک کہ سلمان کے گھر پہنچے، سلمان اپنے گھر میں داخل ہوئے اور کہا: السَّلاَمُ عَلَیْکُمْ پھر ابوبقرہ کو اجازت دی کہ اندر آ جائیں، تو وہ بھی اندر داخل ہوئے تو دیکھا کہ دروازے پر چمڑے کا بستر رکھا ہو ا تھا اور اس کے کنارے پر کچھ اینٹیں تھیں اور تھوڑی سی زین کا کپڑا تھا، تو انہوں نے کہا: اپنی لونڈی کے بستر پر بیٹھیں یہ وہ بستر ہے جو وہ اپنے لیے بچھاتی ہے (یہ صحابہ کرام کی انتہائی سادگی کا بیان ہے مطلب یہ ہے کہ ایک چمڑے کا فراش بچھایا ہوا تھا، اینٹیں رکھی ہوئی تھیں اور اینٹوں پر ایک زین رکھی ہوئی تھی اسے تکیے کی صورت دی ہوئی تھی) وہاں ایک بستر پڑا ہے، سرہانے پر اینٹیں رکھی ہیں، کچھ ترکاری کے ٹکڑے پڑے ہیں، سلمان نے کہا کہ اپنی لونڈی کے بستر پر جو اس نے اپنے لئے بچا رکھا ہے بیٹھو، پھروہ ان کو بتانے لگے کہنے لگے: میرے اور حذیفہ کے درمیان جو ناچاقی کی وجہ بنی وہ یہ تھی کہ حذیفہ کچھ حدیثیں بیان کرتے تھے اور وہ الفاظ نبی صلی اللہ علیہ وسلم غصے کی حالت میں لوگوں سے کہتے تھے تو لوگ میرے پاس ان باتوں کے متعلق پوچھنے آتے کہ یہ کہنی جائز ہیں کہ نہیں۔ (حذیفہ کہتے تھے کہ یہ حدیثیں نبی صلی اللہ علیہ وسلم نے بیان کیں ہیں ہم بھی کہہ سکتے ہیں جب کہ سلمان کا خیال تھا کہ چونکہ نبی صلی اللہ علیہ وسلم نے یہ غصے میں کہا ہے اس لیے ہم نہیں کہہ سکتے۔) میں کہتا: حذیفہ خوب جانتا ہے جو وہ کہتا ہے اسی کو پتا ہے، اور میں ناپسند کرتا تھا کہ لوگوں کے درمیان عداوتیں بڑھ جائیں۔ کچھ لوگ حذیفہ کے پاس گئے ان سے کہا گیا: سلمان نہ تو تیری تصدیق کرتا ہے اور نہ ہی تیری تکذیب کرتا ہے جو تو کہتا ہے، تو حذیفہ میرے پاس آئے (یعنی حذیفہ کا تقاضایہ تھا کہ سلمان میری تصدیق کرتا)۔ تو کہا: اے سلمان ام سلمان کے بیٹے! (یعنی سخت الفاظ کہے تو سلمان کہتے ہیں کہ مجھے بھی غصہ آ گیا) تو میں نے کہا: اے حذیفہ ام حذیفہ کے بیٹے! تم باز آ جاؤ ورنہ میں تیرے بارے میں سیدنا عمر رضی اللہ عنہ کو لکھ دوں گا، جب میں نے سیدنا عمر رضی اللہ عنہ کے ساتھ اس کو دھمکایا اس نے مجھے چھوڑ دیا جبکہ رسول اللہ صلی اللہ علیہ وسلم نے فرمایا: ”میں آدم کی اولاد میں سے ہوں، جس بندے کو میں نے ناجائز لعنت کی ہو یا اسے برا بھلا کہا: ہو۔ یا اللہ، اس کو اس پر رحمت بنا دے۔“ پھر باتیں کرنے لگے۔ کہا کہ حذیفہ وہ باتیں بیان کیا کرتے تھے جو رسول صلی اللہ علیہ وسلم نے بعض لوگوں پر غصے کی حالت میں فرمائیں تھیں، یہ باتیں میرے پاس لائی گئیں اور مجھ سے سوال کیا گیا تو میں نے کہہ دیا کہ حذیفہ جو بیان کرتے ہیں اسے وہی جانتے ہیں میں اسے ناپسند کرتا تھا کہ لوگوں میں کینہ پھیلے، حذیفہ سے لوگوں نے جا کر کہا کہ سلمان نہ تمہاری تصدیق کرتے ہیں نہ تکذیب۔ اس کے بعد حذیفہ میرے پاس اے اور کہا: اے سلمان بن ام سلمان! میں نے بھی کہا: اے حذیفہ بن ام حذیفہ! یا تو اس حرکت سے بعض آ جاؤ ورنہ میں سیدنا عمر رضی اللہ عنہ کو لکھ بھیجوں گاجب میں نے عمر رضی اللہ عنہ سے ڈرایا تو انہوں نے مجھے چھوڑ دیا اور رسول صلی اللہ علیہ وسلم نے فرمایا ہے: ”اولاد آدم میں سے جس کسی شخص پر میں لعنت کروں یا اس کی ناپسندیدگی کے باوجود برا بھلا کہوں تو میں اس پر رحمت کر رہا ہوں۔“ [صحيح الادب المفرد/حدیث: 174]

ابوسلمہ کہتے ہیں، میں سیدنا ابوسعید خدری رضی اللہ عنہ کے پاس آیا، وہ میرے دوست تھے، میں نے (ان سے) کہا: کیا آپ میرے ساتھ باغ کی طرف چلیں گے؟ وہ نکلے اور ان پر ایک کالے رنگ کا اون کا کپڑا تھا۔ اس وقت وہ سیاہ چادر اوڑھے ہوئے تھے۔ [صحيح الادب المفرد/حدیث: 175]

سیدنا علی صلوات اللہ علیہ کہتے ہیں، نبی صلی اللہ علیہ وسلم نے سیدنا عبداللہ بن مسعود رضی اللہ عنہ کو حکم دیاکہ درخت پر چڑھ کر اس سے کوئی مسواک وغیرہ لائیں تو آپ کے ساتھیوں نے سیدنا عبداللہ بن مسعود رضی اللہ عنہ کی پنڈلی کو دیکھا اور ان کی دبلی پتلی پنڈلیاں دیکھ کر ہنس پڑے، اس پر رسول اللہ صلی اللہ علیہ وسلم نے فرمایا: ”تم کس بات پر ہنستے ہو؟ عبداللہ کی ٹانگ میزان (حشر) میں احد (پہاڑ) سے بھی زیادہ بھاری ہو گی۔“ [صحيح الادب المفرد/حدیث: 176]

سیدنا ابوہریرہ رضی اللہ عنہ سے روایت ہے کہ انہوں نے کہا: مومن اپنے بھائی کا آئینہ ہے جب وہ اس میں کوئی عیب دیکھتا ہے اسے ٹھیک کر دیتا ہے۔ [صحيح الادب المفرد/حدیث: 177]