سیدنا ابن عمر رضی اللہ عنہما سے مروی ہے انہوں نے کہا کہ رسول اللہ صلی اللہ علیہ وسلم نے فرمایا: ”جو اللہ کی پناہ چاہے، اسے پناہ دو اور جو اللہ کے نام پر مانگے اسے عطا کرو اور جو تمہارے ساتھ نیکی کرے اس کا بدلہ دو اگر بدلہ نہ دے سکو تو اس کے لئے دعا کرو تاکہ وہ جان لے کہ تم نے اس کا بدلہ ادا کر دیا۔“ [صحيح الادب المفرد/حدیث: 158]

سیدنا انس رضی اللہ عنہ سے روایت ہے، انہوں نے کہا کہ مہاجرین نے عرض کیا، یا رسول اللہ! سارا اجر انصار لے گئے، فرمایا: ”نہیں، جب تک کہ تم ان کے لئے دعا کرتے رہو اور ان کی تعریف کرتے رہو تم کو بھی اجر ملے گا۔“ [صحيح الادب المفرد/حدیث: 159]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جو انسانوں کا شکریہ ادا نہیں کرتا وہ اللہ کا بھی شکر ادا نہیں کرتا۔“ [صحيح الادب المفرد/حدیث: 160]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”اللہ تعالیٰ نے نفس سے فرمایا: نکل جا، اس نے کہا: میں نہیں نکلوں گی مگر نا چاہتے ہوئے۔“ [صحيح الادب المفرد/حدیث: 161]

سیدنا ابوذر رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم سے عرض کیا گیا اور ایک روایت میں ہے کہ سیدنا ابوذر رضی اللہ عنہ نے نبی صلی اللہ علیہ وسلم سے سوال کیا: اعمال میں سے کون سا عمل سب سے بہتر ہے؟ اور ایک روایت میں ہے: اعمال میں سے کون سا عمل سب سے افضل ہے؟ فرمایا: ”اللہ پر ایمان لانا، اس کے راستے میں جہاد کرنا“، دوسری روایت میں ہے کہا گیا: کون سی گردن آزاد کرنا افضل ہے؟ فرمایا: ”جس کی قیمت زیادہ ہو اور جو اپنے مالکوں کے ہاں زیادہ عمدہ ہو۔“ عرض کیا: آپ فرمائیں اگر میں یہ کام نہ کر سکوں؟ فرمایا: ”کسی ضائع ہونے والے (جو ہنرمند نہ ہو) کی مدد کر دو یا بےہنر کے لیے کوئی چیز بنا دو۔“ عرض کیا: آپ بتائیں اگر میں کمزور پڑ جاؤں۔ فرمایا: ”لوگوں سے اپنا شر دور کر دو، یہ بھی صدقہ ہے جس کے ساتھ تم اپنے نفس پر صدقہ کرو گے۔“ [صحيح الادب المفرد/حدیث: 162]

سیدنا قبیصہ بن برمہ اسدی رضی اللہ عنہ کہتے ہیں کہ میں نبی صلی اللہ علیہ وسلم کی خدمت میں حاضر تھا کہ آپ صلی اللہ علیہ وسلم کو یہ فرماتے ہوے سنا: ”جو دنیا میں بھلائی کرنے والے ہیں وہی آخرت میں بھلائی کے سلوک کا حقدار ہوں گے اور جو دنیا میں برائی کرنے والے ہیں وہی آخرت میں برائی کے سلوک کے حقدار ہیں۔“ [صحيح الادب المفرد/حدیث: 163]

معتمر نے ہم سے حدیث بیان کی، کہتے ہیں کہ میں نے اپنے والد سے ابوعثمان کی حدیث بیان کی وہ سلمان سے روایت کرتے ہیں کہ انہوں نے کہا: دنیا میں بھلائی کرنے والے ہی آخرت میں اچھے سلوک کے حقدار ہیں تو انہوں نے کہا کہ میں نے اسے ابوعثمان سے سنا ہے اور وہ سلمان سے روایت کرتے تھے، تو میں نے جان لیا کہ یہ وہی ہے اور میں نے کسی سے یہ حدیث قطعاً بیان نہیں کی اور ایک روایت میں ہے: ابوعثمان سے مروی ہے کہ رسول اللہ صلی اللہ علیہ وسلم ایسا ہی فرماتے تھے جیسا معتمر نے بیان کیا۔ [صحيح الادب المفرد/حدیث: 164]

سیدنا جابر بن عبداللہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”ہر نیکی صدقہ ہے۔“ [صحيح الادب المفرد/حدیث: 165]

سیدنا ابوموسیٰ رضی اللہ عنہ سے روایت ہے انہوں نے کہا، نبی صلی اللہ علیہ وسلم نے فرمایا: ”ہر مسلمان پر صدقہ واجب ہے۔“ لوگوں نے عرض کیا: اگر کوئی نہ پائے؟ آپ صلی اللہ علیہ وسلم نے فرمایا: ”اپنے ہاتھوں سے کام کرے اور اپنے آپ کو فائدہ پہنچائے اور صدقہ کرے۔“ لوگوں نے کہا: اگر وہ اس کی طاقت نہ رکھے یا ایسا نہ کر سکے۔ فرمایا: ”وہ شدید ضرورت مند کی مدد کرے۔“ لوگوں نے عرض کیا: اگر یہ بھی نہ کر سکے تو؟ آپ صلی اللہ علیہ وسلم نے فرمایا: ”تو اچھی باتوں کا حکم دیا کرے“، یا (فرمایا) ”پسندیدہ باتوں کا حکم دیا کرے۔“ لوگوں نے عرض کیا: جو یہ بھی نہ کر سکے تو؟ آپ صلی اللہ علیہ وسلم نے فرمایا: ”بری باتوں سے رک جائے، یہ اس کے لیے صدقہ ہے۔“ [صحيح الادب المفرد/حدیث: 166]

سیدنا ابوذر رضی اللہ عنہ سے روایت ہے انہوں نے کہا، عرض کیا گیا: یا رسول اللہ! سرمایہ دار (دولت مند لوگ) سارا اجر لے گئے، وہ نمازیں پڑھتے ہیں جیسے ہم نمازیں پڑھتے ہیں، وہ روزے رکھتے ہیں جیسے ہم روزے رکھتے ہیں اور (مزید یہ کہ) وہ اپنے زائد مالوں سے صدقہ کرتے ہیں۔ آپ صلی اللہ علیہ وسلم نے فرمایا: ”کیا اللہ نے تمہیں کچھ نہیں دیا جو تم صدقہ کر سکو؟ بیشک! ہر سبحان اللہ اور ہر الحمدللہ صدقہ ہے، اور تم میں سے کسی ایک کا وظیفہ زوجیت ادا کرنا صدقہ ہے۔“ عرض کیا گیا: کیا خواہش پوری کرنے میں بھی صدقہ ہے؟ فرمایا: ”اگر وہ حرام کاری کرتا تو کیا اس پر گناہ نہیں تھا؟ اسی طرح اگر وہ حلال کام کرے گا تو اس کے لیے اجر ہے۔“ [صحيح الادب المفرد/حدیث: 167]