سیدنا حکیم بن حزام رضی اللہ عنہ سے روایت ہے کہ انہوں نے نبی صلی اللہ علیہ وسلم سے عرض کیا: ان عبادت کے معاملات کے بارے میں آپ کا کیا خیال ہے جو میں جاہلیت میں کرتا تھا جیسے صلہ رحمی، غلام آزاد کرنا، صدقہ کرنا، کیا ان کا بھی مجھے اجر ملے گا؟ حکیم کہتے ہیں کے رسول اللہ صلی اللہ علیہ وسلم نے فرمایا: ”تو اس نیک کام کے ساتھ ہی مسلمان ہوا ہے جو تونے پہلے (جاہلیت میں) کیے ہیں۔ (یعنی ان کا اجر بھی ملے گا)۔“ [صحيح الادب المفرد/حدیث: 51]

سیدنا ابن عمر رضی اﷲ عنہما سے مروی ہے کہ ایک بار سیدنا عمر رضی اﷲ عنہ نے ایک حلہ دیکھا جس میں ریشم کی کچھ ملاوٹ کی گئی تھی تو انہوں نے کہا: اے اللہ کے رسول! اگر آپ یہ حلہ خرید لیں تو اسے جمعہ کے دن یا جب کوئی وفود آپ کے پاس آئیں اسے پہن لیں۔ تو آپ صلی اللہ علیہ وسلم نے فرمایا: ”اے عمر! اسے تو صرف وہی لوگ پہنتے ہیں جن کا (آخرت میں) کوئی حصہ نہیں ہے۔“ اس کے بعد آپ صلی اللہ علیہ وسلم کو ان ہی حلوں میں سے کچھ حلے دیے گئے۔ تو آپ صلی اللہ علیہ وسلم نے ان میں سے ایک حلہ سیدنا عمر رضی اﷲ عنہ کو بھیج دیا۔ تو سیدنا عمر رضی اﷲ عنہ رسول اللہ صلی اللہ علیہ وسلم کی خدمت میں حاضر ہوئے اور عرض کیا: یا رسول اﷲ! آپ نے میری طرف یہ بھیج دیا۔ حالانکہ میں اس کے بارے میں آپ سے سن چکا ہوں۔ آپ صلی اللہ علیہ وسلم نے فرمایا: ”میں نے تمہیں یہ تحفہ اس لیے نہیں دیاکہ تم اسے پہن لو، بلکہ یہ تحفہ اس لیے دیا ہے کہ تم اسے فروخت کر لو یا اس کو پہنا دو یا کسی کو دے دو۔“ تو سیدنا عمر رضی اﷲ عنہ نے یہ اپنے سوتیلے بھائی کو دے دیا جو مشرک تھے۔ [صحيح الادب المفرد/حدیث: 52]