سیدنا جریر بن عبداﷲ رضی اللہ عنہ سے روایت ہے۔ انہوں نے کہا کہ رسول اللہ صلی اللہ علیہ وسلم نے فرمایا: ”اس شخص پر اﷲ رحم نہیں کرتا جو انسانوں پر رحم نہیں کرتا۔“ دوسری سند میں یہ الفاظ ہیں: ”جو انسانوں پر رحم نہیں کرتا اس پر اﷲ بھی رحم نہیں کرتا۔“ [صحيح الادب المفرد/حدیث: 71]

ابوعثمان سے مروی ہے کہ سیدنا عمر رضی اﷲ عنہ نے ایک شخص کو عامل مقرر کیا۔ عامل نے کہا: میرے اتنے اتنے لڑکے ہیں، میں نے ان میں سے کسی کا بوسہ نہیں لیا تو سیدنا عمر رضی اﷲ عنہ نے خیال کیا یا عمر نے کہا: اﷲ عزوجل اپنے بندوں میں صرف ان پر رحم فرما تا ہے جو ان میں سے سب سے اچھا سلوک کرتا ہو۔ [صحيح الادب المفرد/حدیث: 72]

سیدنا ابوہریرہ رضی اﷲ عنہ سے روایت ہے انہوں نے کہا کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: ”اﷲ عزوجل نے رحمت کے سو حصے بنائے، ننانوے حصے تو اپنے پاس رکھ لیے اور صرف ایک حصّہ زمین پر نازل فرمایا۔ اسی ایک حصے کی بدولت لوگ آپس میں ایک دوسرے پر رحم کرتے ہیں۔ یہاں تک کہ گھوڑی اپنے کھر کو اٹھا لیتی ہے کہ اس کے بچے پر نہ پڑ جائے۔“ [صحيح الادب المفرد/حدیث: 73]

سیدہ عائشہ رضی اﷲ عنہا نبی صلی اللہ علیہ وسلم سے روایت کرتی ہیں کہ آپ صلی اللہ علیہ وسلم نے فرمایا: ”جبریل علیہ السلام مجھے ہمسائے کے متعلق مسلسل تاکید کرتے رہے حتیٰ کہ میں نے یہ گمان کیا کہ شاید وہ ہمسایہ کو وارث قرار دیں گے۔“ [صحيح الادب المفرد/حدیث: 74]

سیدنا ابوشریح خزاعی رضی اللہ عنہ نبی صلی اللہ علیہ وسلم سے روایت کرتے ہیں کہ کہ آپ صلی اللہ علیہ وسلم نے فرمایا: ”جو اﷲ اور قیامت کے دن پر ایمان رکھتا ہے اسے چاہیے کہ اپنے پڑوسی کے ساتھ اچھا سلوک کرے اور جو اللہ اور آخرت کے دن پر ایمان رکھتا ہے اسے چاہیے کہ مہمان کی عزت کرے اور جو اﷲ اور قیامت کے دن پر ایمان رکھتا ہے اسے چاہیے کہ اچھی بات کہے ورنہ خاموش رہے۔“ [صحيح الادب المفرد/حدیث: 75]

سیدنا مقداد بن اسود رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم نے اپنے صحابہ سے زنا کے متعلق سوال کیا۔ لوگوں نے عرض کیا: یہ حرام ہے، اﷲ عزوجل اور اس کے رسول صلی اللہ علیہ وسلم نے اسے حرام قرار دیا ہے۔ آپ صلی اللہ علیہ وسلم نے فرمایا: ”ایک آدمی دس عورتوں سے بدکاری کرے تو یہ اس سے کم درجے کا گناہ ہو گا کہ وہ اپنے پڑوسی کی بیوی سے بدکاری کرے۔“ اور ان سے پوچھا: ”چوری کے متعلق تمہارا کیا خیال ہے؟“ انہوں نے کہا: یہ حرام ہے اللہ عزوجل اور اس کے رسول صلی اللہ علیہ وسلم نے اسے حرام کیا ہے۔ آپ صلی اللہ علیہ وسلم نے فرمایا: ”کسی شخص کا دس گھروں سے چوری کرنا اس سے کم درجے کا گناہ ہے کہ وہ اپنے ہمسایہ کے گھر سے چوری کرے۔“ [صحيح الادب المفرد/حدیث: 76]

سیدنا ابن عمر رضی اللہ عنہما سے مروی ہے انہوں نے کہا: رسول اللہ صلی اللہ علیہ وسلم نے فرمایا: ”جبریل مجھے ہمسائے کے متعلق مسلسل تاکید کرتے رہے، حتیٰ کہ میں نے یہ گمان کیا کہ یقیناًً وہ ہمسایہ کو وارث قرار دیں گے۔“ [صحيح الادب المفرد/حدیث: 77]

سیدنا عبداللہ بن عمرو رضی اللہ عنہ سے مروی ہے کہ ان کا کوئی بکرا ذبح کیا گیا تو سیدنا عبداللہ بن عمرو رضی اللہ عنہ اپنے غلام سے کہتے جاتے تھے: کیا آپ نے ہمارے پڑوسی یہودی کو تحفہ بھیجا ہے؟ کیا آپ نے ہمارے پڑوسی یہودی کو تحفہ بھیجا ہے؟ میں نے رسول اللہ صلی اللہ علیہ وسلم سے سنا آپ صلی اللہ علیہ وسلم فرماتے تھے: ”جبریل مسلسل مجھے پڑوسی کے بارے میں وصیت کرتے رہے یہاں تک کہ میں نے گمان کیا کہ وہ اس کو وارث قرار دیں گے۔“ [صحيح الادب المفرد/حدیث: 78]

سیدہ عائشہ رضی اﷲ عنہا سے روایت ہے انہوں نے کہا: میں نے عرض کیا: اے اللہ کے رسول! میرے دو ہمسائے ہیں، میں اُن میں سے کسے تحفہ بھیجوں؟ آپ صلی اللہ علیہ وسلم نے فرمایا: ”دونوں میں سے جس کا دروازہ تم سے زیادہ قریب ہو۔“ [صحيح الادب المفرد/حدیث: 79]

حسن (بصری) روایت کرتے ہیں کہ ان سے ہمسایہ کے متعلق سوال کیا گیا تو انہوں نے کہا: چالیس گھر (اپنے گھر کے) آگے، چالیس گھر پیچھے، چالیس گھر دائیں اور چالیس گھر بائیں۔ (یعنی چالیسواں گھر بھی ہمسایہ ہوتا ہے)۔ [صحيح الادب المفرد/حدیث: 80]