سیدنا ابن عمر رضی اﷲ عنہما سے مروی ہے انہوں نے کہا: ایک زمانہ، یا کہا: ایک وقت ہم پر وہ بھی آیا تھا کہ اس وقت ایک شخص اپنے درہم و دینار کا حقدار اپنے مسلمان بھائی سے زیادہ کسی کو نہ سمجھتا تھا۔ اب وہ وقت آ گیا کہ درہم و دینار ہمارے نزدیک مسلمان بھائی سے زیادہ محبوب ہیں۔ میں نے نبی صلی اللہ علیہ وسلم کو یہ فرماتے ہوئے سنا ہے کہ بہت سے ہمسایے قیامت کے دن اپنے ہمسایہ سے لٹکے (چپکے) رہیں گے۔ ہمسایہ کہے گا کہ اے میرے رب! اس شخص نے مجھ پر اپنا دروازہ بند کر رکھا تھا اور اپنا احسان مجھ سے روک لیا تھا۔ [صحيح الادب المفرد/حدیث: 81]

عبداللہ بن مساور سے مروی ہے کہتے ہیں میں نے سیدنا ابن عباس رضی اللہ عنہما سے سنا وہ سیدنا عبداﷲ بن زبیر رضی اللہ عنہ کو بتاتے تھے۔ وہ کہتے تھے کہ میں نے نبی صلی اللہ علیہ وسلم سے سنا ہے کہ مسلمان وہ نہیں کہ جو خود پیٹ بھر کر کھائے اور اس کا ہمسایہ بھوکا ہو۔ [صحيح الادب المفرد/حدیث: 82]

سیدنا ابوذر (غفاری) رضی اللہ عنہ سے روایت ہے کہ انہوں نے کہا: میرے دوست محمد صلی اللہ علیہ وسلم نے مجھے تین باتوں کی وصیت فرمائی ہے: ”بات سنوں اور اطاعت کروں۔ اگرچہ کان کٹے غلام ہی کی بات ہو (خواہ ایسا غلام حکمران ہو جس کے ہاتھ پاؤں کٹے ہوں۔) جب تم شوربہ پکا ؤ تو شوربہ بڑھا لو تو اپنے ہمسایہ کے گھروں کو دیکھ لو اور اُن کو دے دو (اس شوربے کے ذریعہ سے ان کے ساتھ احسان کرو) اور نماز کو اول وقت پر پڑھ لو اور اس کے بعد اگر دیکھو کہ امام نماز پڑھا چکا ہے، تو تم نے اپنی نماز حاصل کر لی اور اگر ابھی امام نے نماز پڑھانی ہو تو اس کے ساتھ دوبارہ پڑھ لو یہ نفل ہو جائے گی۔“ اور ایک روایت میں ان الفاظ کے ساتھ ہے: ”اے ابوذر! جب تم شوربہ پکاؤ تو شوربے کا پانی بڑھا لو اور اپنے پڑوسیوں کا خیال کرو یا اپنے پڑوسیوں میں تقسیم کرو۔“ [صحيح الادب المفرد/حدیث: 83]

سیدنا عبداﷲ بن عمرو بن عاص رضی اللہ عنہ رسول اللہ صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”بہترین ساتھی اﷲ کے نزدیک وہ ہے جو اپنے ساتھی کے لیے بہتر ہو، اور اللہ کے نزدیک سب سے بہتر ہمسایہ وہ ہے جو اپنے ہمسایہ کے لیے بہتر ہو۔“ [صحيح الادب المفرد/حدیث: 84]

نافع بن عبدالحارث نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”ایک مسلمان کی خوش بختیوں میں سے یہ ہے: وسیع مکان، نیک ہمسایہ اور پسندیدہ سواری۔“ [صحيح الادب المفرد/حدیث: 85]

سیدنا ابوہریرہ رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم کی دعاؤں میں سے یہ دعا بھی تھی، «اللَّهُمَّ إِنِّي أَعُوذُ بِكَ مِنْ جَارِ السُّوءِ فِي دَارِ الْمُقَامِ» ”اے اﷲ! میں تجھ سے پناہ مانگتا ہوں رہائش میں برُے ہمسایہ سے۔“ کیونکہ دنیا کا پڑوسی نقل مکانی کر جاتا ہے۔ [صحيح الادب المفرد/حدیث: 86]

ابوموسیٰ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”قیامت اس وقت تک قائم نہ ہو گی جب تک کہ آدمی اپنے ہمسائے، اپنے بھائی اور اپنے باپ کو قتل نہ کرے۔“ [صحيح الادب المفرد/حدیث: 87]

سیدنا ابوہریرہ رضی اﷲ عنہ کہتے ہیں کہ نبی صلی اللہ علیہ وسلم سے عرض کیا گیا کہ یا رسول اﷲ! فلاں عورت رات کو قیام کرتی ہے، دن کو روزے رکھتی ہے، نیک عمل کرتی ہے، صدقہ دیتی ہے، اور اپنے ہمسایوں کو اپنی زبان سے دکھ پہنچاتی ہے۔ اس پر رسول صلی اللہ علیہ وسلم نے فرمایا: ”اس میں کوئی بھلائی نہیں ہے، وہ جہنم والیوں میں سے ہے۔“ لوگوں نے عرض کیا: فلاں عورت فرض نمازیں پڑھتی ہے، پنیر کے کچھ ٹکڑے ہی صدقہ کرتی ہے اور کسی کو دکھ نہیں پہنچاتی۔ اس پر رسول اللہ صلی اللہ علیہ وسلم نے فرمایا: ”یہ جنت والیوں میں سے ہے۔“ [صحيح الادب المفرد/حدیث: 88]

سیدنا ابوہریرہ رضی اﷲ عنہ سے مروی ہے، انہوں نے کہا: کہ رسول اللہ صلی اللہ علیہ وسلم نے فرمایا: ”وہ شخص جنت میں نہیں جائے گا جس کے شر سے اس کا ہمسایہ محفوظ نہ ہو۔“ [صحيح الادب المفرد/حدیث: 89]

عمرو بن معاذ اشہلی اپنی دادی سے روایت کرتے ہیں کہ انہوں نے کہا: رسول اللہ صلی اللہ علیہ وسلم نے مجھ سے فرمایا: ”اے مومن عورتو! تم میں سے کوئی عورت اپنی ہمسایہ عورت کو تحفہ دینا حقیر نہ سمجھے۔ اگر چہ بکری کا جلا ہوا پایہ ہی کیوں نہ ہو۔“ [صحيح الادب المفرد/حدیث: 90]