سیدنا ابوہریرہ رضی اﷲ عنہ سے روایت ہے کہ نبی صلی اللہ علیہ وسلم نے فرمایا: ”اے مسلمان عورتو! اے مسلمان عورتو! تم میں سے کوئی عورت اپنی ہمسایہ عورت کو تحفہ دینا حقیر نہ سمجھے خواہ بکری کا پایہ ہی کیوں نہ ہو۔“ [صحيح الادب المفرد/حدیث: 91]

سیدنا ابوہریرہ رضی اﷲ عنہ سے روایت ہے، انہوں نے کہا: ایک شخص نے عرض کیا: یا رسول اﷲ! میرا ایک ہمسایہ ہے جو مجھے دکھ پہنچاتا ہے۔ آپ صلی اللہ علیہ وسلم نے فرمایا: ”جاؤ، اپنا سامان گھر سے نکال کر راستے پر رکھ دو۔“ وہ گیا اور اس نے اپنا سامان نکال کر راستہ میں رکھ دیا۔ لوگ اس پر جمع ہو گئے اور پوچھنے لگے: آپ کو کیا ہوا۔ اس نے کہا: میرا ہمسایہ مجھے دکھ پہنچاتا ہے۔ جب میں نے یہ نبی صلی اللہ علیہ وسلم سے بیان کیا تو آپ صلی اللہ علیہ وسلم نے فرمایا: ”جاؤ، اور اپنا سامان نکال کر راستے پر رکھ دو۔“ تو سب لوگ کہنے لگے: اے اللہ! اس پر لعنت کر، اے اللہ اس کو ذلیل کر۔ جب یہ بات ہمسایہ تک پہنچی وہ اس کے پاس آیا اور اس نے کہا: اپنے گھر واپس چلے جاؤ۔ اللہ کی قسم اب میں کبھی تمہیں دکھ نہ پہنچاؤں گا۔ [صحيح الادب المفرد/حدیث: 92]

سیدنا ابوجحیفہ رضی اللہ عنہ سے مروی ہے کہ ایک آدمی نے نبی صلی اللہ علیہ وسلم سے اپنے پڑوسی کی شکایت کی۔ تو آپ صلی اللہ علیہ وسلم نے فرمایا: ”اپنا سامان اٹھا لواور اسے راستے پر ڈال دو، جو وہاں سے گزرے گا اس پر لعنت کرے گا۔“ تو جو بھی وہاں سے گزرتا تھا وہ اس پر لعنت کرتا تھا۔ تو وہ نبی صلی اللہ علیہ وسلم کے پاس آیا تو اس نے کہا: لوگوں کی طرف سے مجھے کس سلوک کا سامنا کرنا پڑ رہا ہے؟ تو نبی صلی اللہ علیہ وسلم نے فرمایا: ”اللہ کی لعنت ان کی لعنت سے بھی بڑی ہے۔“ (جب تم بندوں کی لعنت کو برداشت نہیں کر رہے ہو تو جو پڑوسی پڑوسی کو تکلیف دے اس پر اللہ کی لعنت ہے)، پھر آپ نے اس آدمی سے کہا: جس نے شکایت کی تھی، تجھے کفایت کرتی ہے۔ [صحيح الادب المفرد/حدیث: 93]

ابوعامر حمصی سے روایت ہے، انہوں نے کہا کہ سیدنا ثوبان رضی اﷲ عنہ کہا کرتے تھے: جب کبھی دو آدمی ایک دوسرے سے تین دن سے زیادہ قطع تعلقی کیے رکھیں تو ان میں سے ایک برباد ہو جاتا ہے۔ اور اگر دونوں اسی قطع تعلقی میں مر گئے تو دونوں ہی ہلاک ہوئے اور کوئی شخص اپنے ہمسایہ پر ظلم کرتا اور اس پر غالب آتا ہے اتنا کہ اسے اس کا گھر چھوڑنے پر مجبور کر دے تو ایسا شخص ہلاک ہو جاتا ہے۔ [صحيح الادب المفرد/حدیث: 94]

مجاہد بیان کرتے ہیں کہ میں سیدنا عبداﷲ بن عمرو رضی اللہ عنہ کے پاس تھا اور ان کا غلام بکری کی کھال اتار ہا تھا۔ انہوں نے کہا: اے لڑکے! جب اس کام سے فارغ ہو جانا تو سب سے پہلے گوشت ہمارے ہمسایہ یہودی کو دینا۔ لوگوں میں سے ایک شخص نے کہا: اللہ آپ کی اصلاح کرے۔ کیا یہودی کو؟ انہوں نے کہا: میں نے نبی صلی اللہ علیہ وسلم سے سنا ہے آپ صلی اللہ علیہ وسلم ہمسایہ کے بارے میں اتنی تاکید فرماتے تھے کہ ہم ڈرے یا ہم نے خیال کیا کہ آپ صلی اللہ علیہ وسلم اسے وارث قرار دے دیں گے۔ [صحيح الادب المفرد/حدیث: 95]

سیدنا ابوہریرہ رضی اﷲ عنہ سے روایت ہے انہوں نے کہا: رسول اللہ صلی اللہ علیہ وسلم سے سوال کیا گیا: لوگوں میں سے معززترین کون ہے؟ فرمایا: ”اﷲ کے نزدیک سب سے زیادہ معزز وہ ہے جو سب سے زیادہ متقی ہو۔“ لوگوں نے عرض کیا: ہم نے یہ سوال نہیں کیا۔ فرمایا: ”لوگوں میں سب سے زیادہ معزز (ایک روایت میں ہے: معزز باپ کا بیٹا معزز اس کا بیٹا معزز): یوسف ہیں جو اللہ کے نبی ہیں اور اللہ کے نبی کے بیٹے ہیں اور وہ اللہ کے خلیل کے بیٹے ہیں (جو خود نبی ہیں، نبی اﷲ کے فرزند ہیں، اور خلیل اﷲ کے پڑپوتے ہیں) (یوسف بن یعقوب بن اسحاق بن ابراہیم)۔“ لوگوں نے عرض کیا: ہم یہ بھی نہیں پوچھتے، فرمایا: ”تو کیا تم عرب کے قبائل کے متعلق پوچھ رہے ہو؟“ لوگوں نے عرض کیا: جی ہاں۔ فرمایا: ”جو تم میں سے جاہلیت میں بہتر تھے وہی اسلام میں بہتر ہیں، بشرطیکہ دین میں سوجھ بوجھ بھی حاصل کر لیں۔“ (مطلب یہ ہے کہ انسان طبعی طور پر فراخ دل اور معزز ہے اگر وہ جاہلیت میں ایسا ہے تو اسلام میں تو اور بھی اچھا ہو گا۔) [صحيح الادب المفرد/حدیث: 96]

محمد بن علی بن حنفیہ سے اس آیت کی تشریح میں مروی ہے ‏: ‏ ‏ «‏هَلْ جَزَاءُ الإِحْسَانِ إِلاَّ الإِحْسَانُ» ‏ ‏، ”کیا احسان کا بدلہ احسان کے سوا بھی ہو سکتا ہے؟“ یہ آیت نیک اور فاجر سب کے لیے لکھی جا چکی ہے ابوعبداللہ رحمہ اللہ نے فرمایا: ابوعبید کا قول ہے: «مسجلة» یعنی یہ آیت بھیجی گئی ہے (نازل کی گئی) ہے۔ [صحيح الادب المفرد/حدیث: 97]

سیدنا ابوہریرہ رضی اﷲ عنہ نبی صلی اللہ علیہ وسلم سے روایت کرتے ہیں کہ بیوہ اور مساکین کے لیے کما کے لانے والا، اﷲ کی راہ میں جہاد کرنے والے کے برابر ہے یا اس کے برابر ہے جو دن کو روزہ رکھے اور رات کو تہجد پڑھے۔ [صحيح الادب المفرد/حدیث: 98]

نبی صلی اللہ علیہ وسلم کی زوجہ عائشہ رضی اﷲ عنہا سے روایت ہے کہ ایک عورت میرے پاس آئی، اس کے ساتھ دو لڑکیاں تھیں اس نے مجھ سے کچھ مانگا، میرے پاس اس وقت ایک کھجور کے سوا کچھ نہ مل سکا۔ تو میں نے اسے کھجور دے دی۔ اس نے دو ٹکڑے کر کے اپنی بچیوں کو دے دی۔ اس کے بعد اٹھی اور چلی گئی۔ پھر جب نبی صلی اللہ علیہ وسلم تشریف لائے تو میں نے آپ صلی اللہ علیہ وسلم سے یہ قصّہ بیان کیا۔ فرمایا جو بھی ان بیٹیوں میں سے کسی کا ذمہ دار ہو گا تو وہ ان کے ساتھ حسن سلوک کرے وہ ان کے لیے جہنم سے پردہ بن جائیں گی۔ [صحيح الادب المفرد/حدیث: 99]

امّ سعید بنت مرۃ فھری اپنے والد سے اور ان کے والد نبی صلی اللہ علیہ وسلم سے روایت کرتے ہیں (کہ آپ صلی اللہ علیہ وسلم نے فرمایا): ”میں اور یتیم کی کفالت کرنے والا شخص جنت میں اس طرح، یا یوں ہوں گے۔“ سفیان کو شک ہے «كهكَهَاتَيْنِ» یا «كَهَذِهِ مِنْ هَذِهِ‏ .» ‏کے الفاظ بولے اس کے بعد آپ صلی اللہ علیہ وسلم نے درمیانی انگلی اور شہادت کی انگلی کو ملایا (اس سے اشارہ فرمایا)۔ [صحيح الادب المفرد/حدیث: 100]