جبیر بن نفیر سے مروی ہے، انہوں نے بیان کیا کہ ایک دن ہم مقداد بن اسود کے پاس بیٹھے ہوئے تھے۔ تو ایک شخص ان کے پاس سے گزرا اور اس نے کہا: کیا خوش قسمت اور مبارک ہیں یہ دونوں آنکھیں جنہوں نے رسول اللہ صلی اللہ علیہ وسلم کو دیکھا ہے۔ اللہ کی قسم ہمارا دل چاہتا ہے کہ کاش ہم بھی وہ دیکھتے جو آپ نے دیکھا اور ان (معرکوں) میں شریک ہوتے جن میں آپ شریک ہوئے ہیں۔ اس پر سیدنا مقداد رضی اللہ عنہ غضبناک ہوئے۔ تو مجھے تعجب ہوا کہ اس نے تو اچھی بات ہی کہی ہے (یہ غصے کیوں ہو رہے ہیں)۔ اس کے بعد مقداد رضی اللہ عنہ اس کی طرف متوجہ ہوئے اور انہوں نے کہا: آدمی ایسی چیزوں کی تمنا کیوں کرتا ہے کہ جن چیزوں سے اللہ نے اس کو غائب رکھا۔ اسے نہیں معلوم کہ اگر وہ وہاں ہوتا تو ا س کا کیا کردار ہوتا؟ اللہ کی قسم رسول اللہ صلی اللہ علیہ وسلم کو ایسے لوگوں نے بھی دیکھا جنہیں اللہ نے منہ کے بل جہنم میں ڈال دیا۔ کیونکہ انہوں نے رسول اللہ صلی اللہ علیہ وسلم کی بات نہیں مانی، ان کی تصدیق نہیں کی۔ کیا تم اللہ عزوجل کی اس بات پر حمد نہیں کرتے کہ جب اس نے تمہیں دنیا میں پیدا کیا تو تم اپنے رب کے سوا کسی کو جانتے ہی نہ تھے۔ اور تم اس شریعت کی تصدیق کرتے ہو جو تمہارے نبی صلی اللہ علیہ وسلم لائے ہیں۔ (اچھا ہوا) تم ان آزمائشوں سے بچ گئے ہو جن سے صحابہ گزرے۔ اللہ کی قسم نبی صلی اللہ علیہ وسلم بہت ہی سخت حالات میں جاہلیت کے زمانے میں اور نبوت کے وقفے کے زمانے میں مبعوث ہوئے تھے۔ کوئی نبی اتنے سخت حالات میں مبعوث نہیں کیا گیا تھا۔ اس زمانے میں ان لوگوں کے نزدیک کوئی دین بت پرستی سے زیادہ بہتر نہیں تھا۔ تو نبی صلی اللہ علیہ وسلم ایسے کلام کو لے آئے جو فرقان تھا جس نے حق و باطل میں فرق کیا۔ اور اس کے ذریعے سے باپ اور بیٹے کے درمیان فرق ڈال دیا (کہ ایک کافر ہوتا اور ایک مسلمان)۔ یہاں تک کہ اگر ایک آدمی اپنے باپ کو، اپنے بیٹے کو اور اپنے بھائی کو حالت کفر میں دیکھتا تھا۔ اور اللہ نے اس کے اپنے دل کا قفل ایمان کی چابی سے کھول دیا تھا۔ اور وہ جانتا تھا کہ میرا باپ، بھائی، بیٹا جو کافر تھا اگر وہ اسی حالت میں مر گیا تو جہنم میں داخل ہو گا تو اس کی آنکھ ٹھنڈی نہیں ہو تی تھی اور وہ جانتا تھا کہ اس کا عزیز جہنم میں گیا۔ اور یہ آنکھوں کی ٹھنڈک تو اسی چیز سے ہوتی ہے جس کے متعلق اللہ عزوجل نے فرمایا: ‏ «‏وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ» ”اور وہ لوگ جو کہتے ہیں کہ اے ہمارے رب ہمیں اپنی بیویوں اور اپنی اولاد سے آنکھوں کی ٹھنڈک عطا فرما۔“ (مطلب یہ کہ وہ شریعت پر عمل کریں کیونکہ مومن کی آنکھ، اولاد اور بیوی سے تب ہی ٹھنڈی ہو گی جب وہ اللہ کے عبادت گزار ہوں۔) [صحيح الادب المفرد/حدیث: 64]

سیدنا انس رضی اللہ عنہ کہتے ہیں: ایک دن میں نبی صلی اللہ علیہ وسلم کی خدمت میں حاضر ہوا تو وہاں صرف میں تھا میری والدہ تھیں اور میری خالہ ام حرام تھیں۔ تو نبی صلی اللہ علیہ وسلم تشریف لائے اور ہم سے کہا: ”کیا میں تمہیں نماز نہ پڑھاؤں؟“ اور یہ نماز کا وقت نہیں تھا (یعنی نفلی نماز پڑھنا چاہتے تھے) تو لوگوں میں سے ایک آدمی نے کہا: انس کو کہاں کھڑا کیا؟ تو کہا: انس کو دائیں طرف کھڑا کیا پھر ہمیں نماز پڑھائی۔ پھر ہم گھر والوں کے لیے دنیا اور آخرت کی تمام بھلائیوں میں سے ہر بھلائی کے ساتھ دعا مانگی۔ تو میری ماں نے کہا: اے اللہ کے رسول! آپ کا یہ ادنیٰ سا خادم ہے اس کے لیے بھی اللہ سے دعا کریں تو انہوں نے میرے لیے ہر خیر کی دعا کی۔ آپ صلی اللہ علیہ وسلم کی دعا کے آخری الفاظ یہ تھے آپ صلی اللہ علیہ وسلم نے فرمایا: «اللهم أكثر ماله وولده، وبارك له» ”یا اللہ! اس کے مال اور اولاد کو زیادہ کر دے اور اس کے لیے برکت ڈال دے۔“ (اس کا مطلب یہ ہے کہ اگر اولاد نیک ہو تو اس سے بہتر کوئی سرمایہ نہیں ہے اس کی برکت کے لیے دعا کرنی چاہیے۔) [صحيح الادب المفرد/حدیث: 65]

سیدنا انس بن مالک رضی اللہ عنہ سے مروی ہے کہ ایک عورت سیدہ عائشہ رضی اللہ عنہا کے پاس آئی۔ عائشہ رضی اللہ عنہا نے اسے تین کھجوریں عطا کیں اس نے اپنے دونوں بچوں کو ایک ایک دی اور ایک اپنے لیے رکھ لی۔ دونوں بچوں نے دونوں کھجوریں کھا لیں اور اپنی ماں کی طرف دیکھنے لگے۔ اس نے تیسری کھجور کو دو ٹکڑے کر کے ایک ایک ٹکرا دونوں بچوں کو دے دیا۔ اس کے بعد نبی صلی اللہ علیہ وسلم تشریف لائے تو سیدہ عائشہ رضی اللہ عنہا نے آپ صلی اللہ علیہ وسلم سے یہ قصہ بیان کیا۔ آپ صلی اللہ علیہ وسلم نے فرمایا: ”اس میں تعجب کی کوئی بات نہیں، اللہ تعالیٰ نے اس پر رحم فرمایا کیونکہ اس نے اپنے دونو ں بچوں پر رحم کیا۔“ [صحيح الادب المفرد/حدیث: 66]

سیدہ عائشہ رضی اللہ عنہا سے روایت ہے کہ ایک اعرابی نبی صلی اللہ علیہ وسلم کی خدمت میں حاضر ہوا اور اس نے کہا: کیا آپ لوگ بچوں کا بوسہ لیتے ہیں، اللہ کی قسم ہم لوگ تو ان کا بوسہ نہیں لیتے۔ اس پر نبی صلی اللہ علیہ وسلم نے فرمایا: ”اگر اللہ نے تیرے دل سے رحمت نکال دی ہے تو میں کیا کروں؟“ [صحيح الادب المفرد/حدیث: 67]

سیدنا ابوہریرہ رضی اللہ عنہ سے مروی ہے، انہوں نے کہا کہ رسول اللہ صلی اللہ علیہ وسلم نے سیدنا حسن بن علی رضی اللہ عنہما کا بوسہ لیا۔ اس وقت آپ صلی اللہ علیہ وسلم کے پاس اقرع بن حابس تمیمی بیٹھے ہوئے تھے۔ اقرع نے کہا: میرے دس بیٹے ہیں میں نے ان میں سے کسی کا بوسہ نہیں لیا ہے۔ اس پر رسول صلی اللہ علیہ وسلم نے ان کی طرف دیکھا اور فرمایا: ”جو رحم نہیں کرتا اس پررحم نہیں کیا جاتا۔“ [صحيح الادب المفرد/حدیث: 68]

سیدنا نعمان بن بشیر رضی اللہ عنہ سے مروی ہے، انہوں نے کہا کہ ان کے والد انہیں اٹھا کر رسول اﷲ صلی اللہ علیہ وسلم کی خدمت میں حاضر ہوئے۔ اور (ان کے والد نے رسول صلی اللہ علیہ وسلم سے) عرض کیا، یا رسول اﷲ! میں آپ کو گواہ بنانا چاہتا ہوں کہ میں نے نعمان کو فلاں فلاں چیزیں دے دیں۔ آپ صلی اللہ علیہ وسلم نے فرمایا: ”کیا تم نے اپنے سارے بچوں کو یہ تحفہ دیا ہے“، عرض کیا: نہیں۔ فرمایا: ”تو پھر کسی اور کو گواہ بناؤ۔“ اس کے بعد آپ صلی اللہ علیہ وسلم نے فرمایا: ”کیا تمہیں یہ پسند نہیں کہ تمہارے سارے بچے تمہارے ساتھ حسن سلوک کرنے میں برابر ہوں۔“ عرض کیا کیوں نہیں، فرمایا: ”تو پھر ایسا نہ کرو۔“ ابوعبداللہ بخاری رحمہ اللہ کہتے ہیں: نبی صلی اللہ علیہ وسلم کا گواہی دینا اجازت کے قائم مقام نہیں ہو گا۔ [صحيح الادب المفرد/حدیث: 69]

سیدنا ابوسعید رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جو رحم نہیں کرتا اس پر رحم نہیں کیا جاتا۔“ [صحيح الادب المفرد/حدیث: 70]