سیدنا سہل بن سعد رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”میں اور یتیم کا کفیل جنت میں اس طرح ہوں گے اور آپ صلی اللہ علیہ وسلم نے اپنی دو انگلیوں شہادت کی انگلی اور درمیانی انگلی کے ساتھ اشارہ کیا۔“ [صحيح الادب المفرد/حدیث: 101]

ابوبکر بن حفص روایت کرتے ہیں کہ عبداﷲ اپنے دسترخوان پر کسی یتیم کو ساتھ لئے بغیر کھانا نہیں کھاتے تھے۔ [صحيح الادب المفرد/حدیث: 102]

عبدالرحمن بن ابزی سے مروی ہے کہتے ہیں، داود کہتے ہیں، یتیم کے لیے ایسے ہو جاؤ جیسے مشفق باپ اور یہ بھی جان لو جیسا بیج ڈالو گے ویسی فصل کاٹو گے، دولت مند ہونے کے بعد محتاج ہونا کتنا برا ہے اور اس سے بھی برا یہ ہے یا اس سے بھی زیادہ سنگین یہ ہے کہ ہدایت ملنے کے بعد انسان گمراہ ہو جائے جب تم اپنے ساتھی سے وعدہ کرو تو جو وعدہ کرو پورا کرو اگر ایسا نہیں کرو گے تو تمہارے اور اس کے درمیان عداوت ڈال دی جائے گی اور ایسے ساتھی سے اللہ کی پناہ مانگو کہ اگر تمہیں یاد ہو تو وہ تیری مدد نہ کرے اور اگر تم بھول چکے ہو تو تمہیں یاد نہ کرائے۔ [صحيح الادب المفرد/حدیث: 103]

اسماء بن عبید سے مروی ہے میں نے ابن سیرین سے کہا: میرے پاس ایک یتیم ہے۔ انہوں نے کہا: اس کے ساتھ وہی معاملہ کرو جو اپنے حقیقی بیٹے سے کرتے ہو اور اس کو (ادب سکھانے کے لیے) اس چیز پر مارو جس پر اپنے بیٹے کو مارتے ہو۔ [صحيح الادب المفرد/حدیث: 104]

شمیسہ عتکیہ کہتی ہیں: سیدہ عائشہ رضی اﷲ عنہا کے سامنے یتیم کو ادب سکھانے کا ذکر کیا گیا تو انہوں نے کہا: میں یتیم کو اتنا مارتی ہوں یہاں کہ وہ زمین پر لیٹ جاتا ہے۔ [صحيح الادب المفرد/حدیث: 105]

سیدنا ابوہریرہ رضی اﷲ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس مسلمان کے تین بچے فوت ہو جائیں تو اسے جہنم کی آگ نہیں چھو سکتی مگر قسم کو پورا کرنے لیے۔“ (جو اس آیت میں ہے: «وَإِنْ مِنْكُمْ إِلَّا وَارِدُهَا كَانَ عَلَى رَبِّكَ حَتْمًا مَقْضِيًّا»)۔ [صحيح الادب المفرد/حدیث: 106]

سیدنا ابوہریرہ رضی اﷲ عنہ سے مروی ہے کہ ایک عورت نبی صلی اللہ علیہ وسلم کی خدمت میں ایک بچہ کو لے کر حاضر ہوئی اور عرض کیا کہ اس کے (زندہ رہنے کے) لیے دعا فرمائیں، میں تین بچوں کو دفن کر چکی ہوں۔ تو آپ صلی اللہ علیہ وسلم نے فرمایا: ”تم نے جہنم سے بچنے کے لیے بہت طاقتور باڑ بنا لی ہے۔“ [صحيح الادب المفرد/حدیث: 107]

خالد عبسی کہتے ہیں، میرا ایک بیٹا فوت ہو گیا۔ مجھے اس کا بڑا صدمہ ہوا، تو میں نے سیدنا ابوہریرہ رضی اللہ عنہ سے کہا: آپ نے نبی صلی اللہ علیہ وسلم سے کیا سنا ہے جس کے ذریعہ ہم اپنے دلوں کو اپنے مردوں کے غم سے تسلی دے سکیں؟ انہوں نے کہا: میں نے نبی صلی اللہ علیہ وسلم سے سنا ہے آپ صلی اللہ علیہ وسلم نے فرمایا: ”تمہارے چھوٹے بچے جنت کے «دعاميص» ہیں۔“ دعامیص کی وضاحت: ابن کثیر کہتے ہیں: «دعاميص» اصل میں «دعموص» کی جمع ہے۔ یہ ایک کیڑے پر بولا جاتا ہے جو کہ ایک ٹھہرے ہوئے پانی میں پایا جاتا ہے۔ اسی طرح «‏‏‏‏دعموص» کسی بھی جگہ گھس جانے والے کو بھی کہتے ہیں یعنی یہ بچے جنت میں بلا روک ٹوک گھومتے پھریں گے، گھروں میں داخل ہوں گے اور ان پر کہیں جانا منع نہیں ہو گا۔ [صحيح الادب المفرد/حدیث: 108]

سیدنا جابر بن عبداﷲ رضی اللہ عنہ سے روایت ہے میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم نے فرمایا: ”جس کے تین بچے فوت ہو جائیں اور وہ ان پر صبر کر کے ثواب کی امید رکھے وہ جنت میں جائے گا۔“ ہم نے کہا: یا رسول اﷲ! اور دو بچے (اگر فوت ہو جائیں)؟ فرمایا: ”اور دو بچے ّ بھی۔“ میں نے جابر رضی اللہ عنہ سے کہا: میرا خیال ہے اگر آپ لوگ ایک بچہ کہتے تو آپ صلی اللہ علیہ وسلم ایک بچہ بھی فرما دیتے۔ جابر رضی اللہ عنہ نے کہا: اللہ کی قسم میرا بھی یہی خیال ہے۔ [صحيح الادب المفرد/حدیث: 109]

سیدنا ابوہریرہ رضی اللہ عنہ سے مروی ہے، وہ بیان کرتے ہیں کہ ایک عورت رسول اللہ صلی اللہ علیہ وسلم کی خدمت میں حاضر ہوئی اور عرض کیا: یا رسول اﷲ! ہم آپ کی مجلس میں حاضر نہیں ہو سکتے، تو آپ ہمارے لیے الگ دن مقرر فرما دیں تاکہ اس دن ہم آپ کے پاس آ جائیں۔ فرمایا: ”تمہارا مقرر وقت فلاں کے گھر ہے“، تو آپ صلی اللہ علیہ وسلم ان عورتوں کے ہاں گئے اور آپ نے کچھ ہدایت فرمائی اس میں ایک بات یہ بھی تھی: ”تم میں سے جس کے تین بچے مر جائیں اور وہ صبر کرے تو جنت میں جائے گی۔“ ایک عورت نے کہا: اور دو بچے؟ رسول اللہ صلی اللہ علیہ وسلم نے فرمایا: ”اور دو بچے بھی۔“ اس روایت میں سہیل ہیں جو حدیث میں سختی کرتے تھے اور یاد کرتے تھے، اور کوئی ان کے سامنے لکھنے کی جرأت نہیں کر سکتا تھا۔ [صحيح الادب المفرد/حدیث: 110]