حضرت براء بن عازب رضی اللہ عنہ سے روایت ہے، انہوں نے فرمایا کہ عید الاضحیٰ کے دن رسول اللہ صلی اللہ علیہ وسلم نے ہمیں نماز کے بعد خطبہ دیا، آپ نے فرمایا: ”جس نے ہمارے جیسی نماز پڑھی اور ہماری طرح قربانی کی تو اس نے ہمارے طریقہ قربانی کو حاصل کر لیا اور جس نے نماز سے پہلے قربانی کی تو یہ ایک گوشت کی بکری ہے۔“ حضرت ابوبردہ بن نیار رضی اللہ عنہ اٹھے اور عرض کیا: اللہ کے رسول! اللہ کی قسم! میں نے نماز کے لیے نکلنے سے پہلے قربانی کر دی ہے اور میں نے سوچا کہ آج کا دن کھانے پینے کا دن ہے اس لیے میں نے جلدی کی، خود کھایا، نیز اہل خانہ اور ہمسایوں کو کھلایا۔ رسول اللہ صلی اللہ علیہ وسلم نے فرمایا: ”یہ تو گوشت کی بکری ہے (قربانی نہیں)۔“ میں نے عرض کیا: میرے پاس ایک ایک سالہ بکری کا بچہ ہے جو دو بکریوں کے گوشت سے بہتر ہے، کیا وہ مجھے قربانی سے کافی ہو گا؟ آپ نے فرمایا: ”ہاں! لیکن تیرے بعد کسی کے لیے کافی نہیں ہو گا۔“ [صحيح البخاري/كتاب العيدين/حدیث: 983]

حضرت براء بن عازب رضی اللہ عنہما سے روایت ہے، انہوں نے کہا کہ میں نے نبی صلی اللہ علیہ وسلم کو خطبہ دیتے ہوئے سنا، آپ نے فرمایا: ”سب سے پہلی چیز جس سے ہم آج کے دن کا آغاز کریں وہ ہمارا نماز پڑھنا ہے، پھر گھر واپس جا کر قربانی کرنا ہے، جس نے اس طرح کیا اس نے ہماری سنت کو پا لیا۔“ [صحيح البخاري/كتاب العيدين/حدیث: 951]

حضرت انس رضی اللہ عنہ سے روایت ہے، انہوں نے کہا: نبی صلی اللہ علیہ وسلم نے فرمایا: ”جس شخص نے نماز عید سے پہلے قربانی کو ذبح کر لیا وہ دوبارہ قربانی کرے۔“ ایک شخص کھڑا ہو کر عرض کرنے لگا کہ آج کے دن گوشت کی بہت خواہش ہوتی ہے اور اس نے اپنے پڑوسیوں کا تذکرہ کیا، نبی صلی اللہ علیہ وسلم نے اس کی باتوں پر مہر تصدیق ثبت فرمائی۔ اس نے عرض کیا کہ میرے پاس ایک بکری کا بچہ ہے جو گوشت کی دو بکریوں سے مجھے زیادہ محبوب ہے۔ نبی صلی اللہ علیہ وسلم نے اسے ذبح کرنے کی اجازت مرحمت فرمائی۔ راوی کہتا ہے کہ اب مجھے پتا نہیں کہ یہ اجازت اس کے علاوہ دوسرے لوگوں کو بھی ہے یا نہیں۔ [صحيح البخاري/كتاب العيدين/حدیث: 954]

حضرت براء بن عازب رضی اللہ عنہما سے روایت ہے، انہوں نے کہا کہ نبی صلی اللہ علیہ وسلم نے عید الاضحیٰ کے دن نماز کے بعد ہمارے سامنے خطبہ دیتے ہوئے ارشاد فرمایا: ”جو شخص ہمارے جیسی نماز پڑھے اور ہمارے جیسی قربانی کرے تو اس کا فریضہ پورا ہو گیا اور جس نے نماز سے قبل قربانی کی تو وہ نماز سے پہلے ہونے کی بنا پر قربانی نہیں ہے۔“ اس پر حضرت براء رضی اللہ عنہما کے ماموں ابوبردہ بن نیار رضی اللہ عنہما نے عرض کیا: اللہ کے رسول! میں نے اپنی بکری نماز سے پہلے ہی ذبح کر دی ہے کیونکہ میرے علم میں تھا کہ آج کھانے پینے کا دن ہے، اس لیے میری خواہش تھی کہ سب سے پہلے میرے ہی گھر میں بکری ذبح کی جائے، اس بنا پر میں نے اپنی بکری ذبح کر دی اور نماز کے لیے آنے سے قبل کچھ ناشتہ بھی کر لیا، آپ صلی اللہ علیہ وسلم نے فرمایا: ”تمہاری بکری تو صرف گوشت کی بکری ٹھہری (قربانی نہیں ہے)۔“ انہوں نے عرض کیا: اللہ کے رسول! ہمارے پاس بھیڑ کا ایک سالہ بچہ ہے جو مجھے دو بکریوں سے زیادہ عزیز ہے کیا وہ میرے لیے کافی ہو جائے گا؟ آپ صلی اللہ علیہ وسلم نے فرمایا: ”ہاں! لیکن تمہارے علاوہ کسی دوسرے کو کافی نہ ہو گا۔“ [صحيح البخاري/كتاب العيدين/حدیث: 955]

حضرت براء بن عازب رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”سب سے پہلی چیز جس سے ہم آج کے دن کا آغاز کریں وہ یہ ہے کہ ہم نماز پڑھیں، پھر گھروں کو واپس ہوں اور قربانی کریں، جس نے ایسا کیا اس نے ہماری سنت کو پا لیا اور جس نے نماز سے پہلے قربانی ذبح کی تو وہ صرف گوشت ہے جو اس نے اپنے گھر والوں کے لیے تیار کیا، قربانی نہیں ہے۔“ انصار کے ایک آدمی نے کہا جسے ابوبردہ بن نیار رضی اللہ عنہما کہا جاتا تھا: اللہ کے رسول! میں تو قربانی کا جانور ذبح کر چکا ہوں، اب میرے پاس ایک سالہ بکری کا ایک بچہ ہے جو دو دانتے سے بہتر ہے۔ آپ صلی اللہ علیہ وسلم نے فرمایا: ”اسے اس کی جگہ ذبح کر دو مگر تمہارے بعد کسی دوسرے کے لیے کافی نہیں ہو گا۔“ [صحيح البخاري/كتاب العيدين/حدیث: 965]

حضرت براء بن عازب رضی اللہ عنہما سے روایت ہے، انہوں نے فرمایا کہ نبی صلی اللہ علیہ وسلم نے قربانی کے دن ہمیں خطبہ دیا تو فرمایا: ”سب سے پہلے ہم جس کام سے اس دن کا آغاز کرتے ہیں وہ نماز پڑھنا ہے، پھر واپس جا کر قربانی کرنا۔ جس نے ایسا کیا اس نے ہماری سنت کو پا لیا اور جس نے نماز سے پہلے قربانی ذبح کر دی تو وہ گوشت ہے جو اس نے اپنے گھر والوں کے لیے جلدی تیار کر لیا ہے، قربانی نہیں ہے۔“ میرے ماموں حضرت ابوبردہ بن نیار رضی اللہ عنہ کھڑے ہوئے اور کہا: اے اللہ کے رسول صلی اللہ علیہ وسلم ! میں نے اپنی قربانی کو قبل از نماز ذبح کر دیا ہے اور میرے پاس بکری کا ایک سالہ بچہ ہے جو دو دانتے سے بہتر ہے۔ آپ صلی اللہ علیہ وسلم نے فرمایا: ”اسے پہلے کی جگہ پر کر دے، یا فرمایا، اس کی جگہ ذبح کر دے، لیکن تیرے بعد کسی دوسرے کے لیے ایسا کرنا جائز نہیں ہو گا۔“ [صحيح البخاري/كتاب العيدين/حدیث: 968]

حضرت براء بن عازب رضی اللہ عنہ سے روایت ہے، انہوں نے فرمایا کہ نبی کریم صلی اللہ علیہ وسلم عید الاضحیٰ کے دن نکلے اور دو رکعت نمازِ عید ادا کی، پھر ہماری طرف رخ کر کے کھڑے ہوئے اور فرمایا: ”ہماری اس دن سب سے پہلی عبادت یہ ہونی چاہیے کہ ہم نماز پڑھیں، پھر واپس ہوں اور قربانی کریں۔ جس نے ایسا کیا اس نے ہماری سنت کے مطابق کام کیا اور جس نے نماز سے پہلے قربانی ذبح کر دی تو وہ گوشت ہے جو اس نے اپنے گھر والوں کے لیے تیار کیا ہے، قربانی نہیں ہے۔“ اس دوران میں ایک شخص کھڑا ہوا اور عرض کرنے لگا: اے اللہ کے رسول! میں نے تو (نماز سے پہلے قربانی) ذبح کر دی ہے اور اب میرے پاس ایک سالہ بھیڑ کا بچہ ہے جو دو دانتے سے کہیں بہتر ہے۔ آپ صلی اللہ علیہ وسلم نے فرمایا: ”تم اسی کو ذبح کر دو لیکن تمہارے بعد کسی اور کے لیے کافی نہیں ہوگا۔“ [صحيح البخاري/كتاب العيدين/حدیث: 976]

حضرت انس بن مالک رضی اللہ عنہ سے روایت ہے، انہوں نے فرمایا کہ رسول اللہ صلی اللہ علیہ وسلم نے عیدالاضحیٰ کے دن نماز پڑھائی، پھر خطبہ دیا، آپ صلی اللہ علیہ وسلم نے خطبے میں حکم دیا: ”جس نے نماز سے پہلے قربانی کی وہ دوبارہ کرے۔“ انصار میں سے ایک شخص کھڑا ہوا اور اس نے عرض کی: اللہ کے رسول! میرے پڑوسی ہیں جو محتاج ہیں، یا کہا: فقیر ہیں، لہٰذا میں نے ان کی وجہ سے قبل از نماز اپنی قربانی کو ذبح کر دیا اور میرے پاس یک سالہ بکری کا بچہ ہے جو مجھے گوشت کی دو بکریوں سے محبوب تر ہے۔ آپ صلی اللہ علیہ وسلم نے اسے وہی ذبح کرنے کی اجازت دے دی۔ [صحيح البخاري/كتاب العيدين/حدیث: 984]

حضرت جندب رضی اللہ عنہ سے روایت ہے، انہوں نے فرمایا کہ نبی صلی اللہ علیہ وسلم نے عیدالاضحیٰ کے دن نماز پڑھی، پھر خطبہ دیا، پھر قربانی کی اور دورانِ خطبہ فرمایا: ”جس نے نماز سے پہلے (قربانی کا جانور) ذبح کیا تو اسے دوسرا جانور ذبح کرنا چاہیے اور جس نے نماز سے پہلے ذبح نہیں کیا اسے چاہیے کہ اب اللہ کا نام لے کر ذبح کرے۔“ [صحيح البخاري/كتاب العيدين/حدیث: 985]

حضرت عقبہ بن عامر رضی اللہ عنہ سے روایت ہے کہ نبی صلی اللہ علیہ وسلم نے انہیں بکریاں دیں تاکہ وہ آپ کے صحابہ کرام رضی اللہ عنہم میں تقسیم کر دیں۔ تقسیم کے بعد بکری کا ایک بچہ باقی رہ گیا۔ انہوں نے نبی صلی اللہ علیہ وسلم سے اس کا ذکر کیا، تو آپ نے فرمایا: ”اس کی تم قربانی کر لو۔“ [صحيح البخاري/كتاب العيدين/حدیث: 2300]

حضرت عقبہ بن عامر رضی اللہ عنہ سے روایت ہے کہ رسول اللہ صلی اللہ علیہ وسلم نے انہیں بکریاں دیں تاکہ وہ قربانی کے طور پر صحابہ کرام رضی اللہ عنہم میں تقسیم کر دیں، تقسیم کرتے کرتے صرف بکری کا ایک سالہ بچہ باقی رہ گیا جس کا انہوں نے رسول اللہ صلی اللہ علیہ وسلم سے ذکر کیا تو آپ نے فرمایا: ”صرف تمہیں اس کو بطور قربانی ذبح کرنے کی اجازت ہے۔“ [صحيح البخاري/كتاب العيدين/حدیث: 2500]

حضرت جندب بن سفیان بجلی رضی اللہ عنہ سے روایت ہے، انہوں نے کہا کہ ہم نے ایک مرتبہ رسول اللہ صلی اللہ علیہ وسلم کے ساتھ قربانی کی۔ کچھ لوگوں نے نماز عید سے پہلے ہی قربانی کی۔ کچھ لوگوں نے نماز عید سے پہلے ہی قربانی کر ڈالی۔ جب نبی صلی اللہ علیہ وسلم نماز سے فراغت کے بعد واپس تشریف لائے تو آپ نے دیکھا کہ کچھ لوگوں نے اپنی قربانیاں نماز سے پہلے ہی ذبح کر لی ہیں تو آپ نے فرمایا: ”جس شخص نے نماز سے پہلے قربانی ذبح کر لی ہو اسے اس کی جگہ دوسری قربانی ذبح کرنی ہوگی اور جس نے ہمارے نماز پڑھنے سے پہلے ذبح نہیں کی اسے چاہیے کہ وہ نماز کے بعد اللہ کے نام پر ذبح کرے۔“ [صحيح البخاري/كتاب العيدين/حدیث: 5500]

حضرت براء رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”پہلا کام جس سے ہم عید الاضحیٰ کے دن کی ابتدا کریں گے وہ نماز ہے، پھر واپس آ کر قربانی کریں گے۔ جس نے ایسا کیا اس نے ہمارے طریقے کے مطابق عمل کیا، لیکن جو شخص اس سے پہلے قربانی کرے گا اس کی حیثیت صرف گوشت کی ہے جو اس نے اپنے اہل خانہ کے لیے پہلے تیار کر لیا ہے، یہ کسی صورت میں قربانی نہیں ہو گی۔“ یہ سن کر حضرت ابو بردہ بن نیار رضی اللہ عنہ کھڑے ہوئے، انہوں نے نمازِ عید سے پہلے قربانی ذبح کر لی تھی، کہنے لگے: ”اب تو میرے پاس بکری کا ایک بچہ ہے؟“ آپ صلی اللہ علیہ وسلم نے فرمایا: ”وہی ذبح کر دو لیکن تمہارے بعد کسی اور کے لیے یہ کافی نہیں ہو گا۔“ ایک دوسری روایت میں ہے کہ نبی صلی اللہ علیہ وسلم نے فرمایا: ”جس نے نماز کے بعد قربانی کی اس کی قربانی پوری ہو گئی اور اس نے مسلمانوں کے طریقے کو بھی پا لیا۔“ [صحيح البخاري/كتاب العيدين/حدیث: 5545]

حضرت انس بن مالک رضی اللہ عنہ سے روایت ہے، انہوں نے بیان کیا کہ نبی صلی اللہ علیہ وسلم نے فرمایا: ”جس نے نماز عید سے پہلے قربانی ذبح کر لی، اس نے صرف اپنی ذات کے لیے اسے ذبح کیا۔ اور جس نے نماز عید کے بعد قربانی کی، اس کی قربانی پوری ہو گئی اور اس نے مسلمانوں کی سنت کے مطابق عمل کیا۔“ [صحيح البخاري/كتاب العيدين/حدیث: 5546]

حضرت عقبہ بن عامر جہنی رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم نے صحابہ کرام رضی اللہ عنہم میں قربانیاں تقسیم کیں تو ایک یکسالہ حضرت عقبہ رضی اللہ عنہ کے حصے میں آیا۔ میں نے عرض کی: ”اللہ کے رسول! میرے حصے میں تو یکسالہ آیا ہے؟“ آپ صلی اللہ علیہ وسلم نے فرمایا: ”تم اسی کی قربانی کرلو۔“” [صحيح البخاري/كتاب العيدين/حدیث: 5547]

حضرت انس بن مالک رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”جس نے نماز عید سے پہلے قربانی ذبح کی وہ دوبارہ قربانی کرے۔“ یہ سن کر ایک آدمی کھڑا ہوا اور عرض کرنے لگا: ”اللہ کے رسول! اس دن گوشت کی خواہش کی جاتی ہے“ اور اس نے اپنے ہمسایوں کی غربت کا ذکر کیا: ”اب تو میرے پاس یکسالہ ہے جو گوشت کی دو بکریوں سے بہتر ہے“، آپ صلی اللہ علیہ وسلم نے اس کو رخصت دی کہ وہی ذبح کر دے۔ مجھے معلوم نہیں کہ یہ اجازت دوسروں کو بھی ہے یا نہیں؟ اس کے بعد نبی صلی اللہ علیہ وسلم دو مینڈھوں کی طرف مائل ہوئے اور انہیں ذبح کیا اور لوگ بھی بکریوں کی طرف متوجہ ہوئے اور انہیں تقسیم کر کے ذبح کیا۔ [صحيح البخاري/كتاب العيدين/حدیث: 5549]

حضرت عقبہ بن عامر رضی اللہ عنہ سے روایت ہے کہ نبی صلی اللہ علیہ وسلم نے انہیں کچھ بکریاں دیں تاکہ وہ آپ کے صحابہ کرام رضی اللہ عنہم میں بطور قربانی تقسیم کر دیں۔ انہوں نے تقسیم کیں تو یکسالہ بکری کا ایک بچہ باقی رہ گیا، انہوں نے نبی صلی اللہ علیہ وسلم سے اس کا تذکرہ کیا تو آپ نے فرمایا: ”اس کو تم ذبح کر لو۔“ [صحيح البخاري/كتاب العيدين/حدیث: 5555]

حضرت براء بن عاذب رضی اللہ عنہ سے روایت ہے، انہوں نے کہا کہ میرے ماموں ابو بردہ بن نیار رضی اللہ عنہ نے نماز سے پہلے قربانی کر لی تو انہیں رسول اللہ صلی اللہ علیہ وسلم نے فرمایا: ”تمہاری بکری صرف گوشت کی بکری ہے۔“ انہوں نے عرض کیا: اے اللہ کے رسول! میرے پاس بکری کا ایک یکسالہ گھریلو بچہ ہے؟ آپ صلی اللہ علیہ وسلم نے فرمایا: ”تم اسے ہی ذبح کر لو، لیکن تمہارے بعد کسی اور کے لیے یہ جائز نہیں ہوگا۔“ اس کے بعد آپ صلی اللہ علیہ وسلم نے فرمایا: ”جس نے نماز سے پہلے (اپنی قربانی کو) ذبح کیا، اس نے صرف اپنی ذات کے لیے ذبح کیا ہے اور جس نے نمازِ عید کے بعد قربانی ذبح کی، اس کی قربانی پوری ہو گئی اور اس نے مسلمانوں کے طریقے کو پا لیا۔“ عبیدہ نے شعبی اور ابراہیم سے روایت کرنے میں خالد بن عبداللہ کی متابعت کی ہے۔ اس کی وکیع نے بھی متابعت کی ہے، وہ حریث سے، وہ شعبی سے بیان کرتے ہیں۔ عاصم اور داؤد نے شعبی سے یہ الفاظ بیان کیے ہیں: ”میرے پاس بکری یا بھیڑ کا دودھ پیتا یکسالہ بچہ ہے۔“ زبید اور فراس نے شعبی سے یہ الفاظ نقل کیے ہیں: ”میرے پاس یکسالہ بچہ ہے۔“ ابوالاحوص نے کہا کہ ہمیں منصور نے بتایا: ”میرے پاس یکسالہ جوان بچہ ہے۔“ ابن عون نے یہ الفاظ بیان کیے ہیں: ”میرے پاس دودھ پیتا یکسالہ بچہ ہے۔“ [صحيح البخاري/كتاب العيدين/حدیث: 5556]

حضرت براء بن عازب رضی اللہ عنہ سے روایت ہے انہوں نے کہا کہ ابو بردہ رضی اللہ عنہ نے نماز عید سے پہلے قربانی کر لی تو نبی صلی اللہ علیہ وسلم نے انہیں فرمایا: ”اس کے بدلے کوئی دوسری قربانی ذبح کرو۔“ انہوں نے عرض کی: ”میرے پاس صرف ایک یکسالہ بچہ ہے میرے خیال کے مطابق وہ دو دانتے جانور سے بہتر ہے۔“ آپ صلی اللہ علیہ وسلم نے فرمایا: ”پھر اس کی جگہ اسی کو ذبح کر دو لیکن تمہارے بعد کسی دوسرے کے لیے جائز نہیں ہوگا۔“ حاتم بن وردان نے محمد بن سیرین سے، انہوں نے حضرت انس رضی اللہ عنہ سے اور انہوں نے نبی صلی اللہ علیہ وسلم سے بیان کیا، اس میں یہ الفاظ ہیں کہ ”میرے پاس ایک یکسالہ جوان بچہ ہے۔“ [صحيح البخاري/كتاب العيدين/حدیث: 5557]

حضرت براء رضی اللہ عنہ سے روایت ہے، انہوں نے کہا کہ میں نے نبی صلی اللہ علیہ وسلم کو خطبہ دیتے ہوئے سنا، آپ صلی اللہ علیہ وسلم نے فرمایا: ”بلاشبہ ہم آج کے دن کی ابتدا نماز سے کریں گے، پھر واپس آ کر قربانی کرنے کا فریضہ سر انجام دیں گے۔ جو شخص اس طرح کرے گا وہ ہمارے طریقے کو پالے گا اور جس نے نماز سے پہلے قربانی کی تو وہ ایسا گوشت ہے جسے اس نے اپنے اہل خانہ کے لیے تیار کیا ہے، وہ قربانی کسی درجے میں بھی نہیں۔“ حضرت ابو بردہ رضی اللہ عنہ نے عرض کی: ”اللہ کے رسول! میں نے تو نماز سے پہلے قربانی کر لی ہے، البتہ میرے پاس ابھی یکسالہ بکری کا بچہ ہے اور وہ دو دانتے جانور سے بہتر ہے۔“ آپ صلی اللہ علیہ وسلم نے فرمایا: ”تم اس کے بدلے میں اسی یکسالہ بچے کی قربانی کرو لیکن تمہارے بعد یہ کسی کے لیے جائز نہ ہوگا۔“ [صحيح البخاري/كتاب العيدين/حدیث: 5560]

حضرت انس رضی اللہ عنہ سے روایت ہے وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جس نے عید سے پہلے قربانی کر لی ہو وہ دوبارہ قربانی کرے۔“ ایک آدمی نے عرض کی: ”اس دن لوگوں کو گوشت کی خواہش زیادہ ہوتی ہے“، پھر اس نے اپنے پڑوسیوں کی محتاجی کا ذکر کیا گویا رسول اللہ صلی اللہ علیہ وسلم نے اسے معذور خیال کیا۔ اس نے مزید کہا کہ: ”میرے پاس بکری کا یکسالہ بچہ ہے جو دو بکریوں سے بھی اچھا ہے“، تو آپ صلی اللہ علیہ وسلم نے اسے اجازت دے دی۔ حضرت انس رضی اللہ عنہ نے کہا: ”مجھے علم نہیں کہ یہ رخصت دوسروں کے لیے تھی یا نہیں۔“ پھر آپ صلی اللہ علیہ وسلم دو مینڈھوں کی طرف متوجہ ہوئے یعنی ان کو ذبح کیا۔ اس کے بعد لوگ اپنی بکریوں کی طرف متوجہ ہوئے اور انہیں ذبح کیا۔ [صحيح البخاري/كتاب العيدين/حدیث: 5561]

حضرت جندب بن سفیان بجلی رضی اللہ عنہ سے روایت ہے، انہوں نے کہا کہ میں بڑی عید کے دن نبی صلی اللہ علیہ وسلم کی خدمت میں حاضر تھا، آپ صلی اللہ علیہ وسلم نے فرمایا: ”جس نے نمازِ عید سے پہلے قربانی ذبح کی وہ اس کی جگہ دوسری قربانی ذبح کرے اور جس نے نمازِ عید سے پہلے قربانی ذبح نہیں کی وہ اب نماز کے بعد ذبح کرے۔“ [صحيح البخاري/كتاب العيدين/حدیث: 5562]

حضرت براء بن عازب رضی اللہ عنہ سے روایت ہے، انہوں نے کہا کہ ایک دن رسول اللہ صلی اللہ علیہ وسلم نے نماز پڑھی پھر فرمایا: ”جس نے ہماری طرح نماز پڑھی اور ہمارے قبلے کی طرف متوجہ ہوا وہ قربانی نہ کرے حتیٰ کہ وہ نماز سے فارغ ہو جائے۔“ ابو بردہ بن نیار رضی اللہ عنہ نے کھڑے ہوکر عرض کی: ”اللہ کے رسول! میں تو قربانی کر بیٹھا ہوں؟“ آپ صلی اللہ علیہ وسلم نے فرمایا: ”یہ کام تو نے قبل از وقت کر لیا ہے۔“ انہوں نے کہا: ”اب میرے پاس بکری کا یکسالہ بچہ ہے جو وہ دو دانتہ دو بکریوں سے بہتر ہے، کیا میں اسے ذبح کر لوں؟“ آپ صلی اللہ علیہ وسلم نے فرمایا: ”ہاں، لیکن تمہارے بعد یہ اجازت کسی اور کے لیے نہیں ہوگی۔“ (راوئِ حدیث) حضرت عامر رحمہ اللہ نے کہا: ”یہ ان کی بہترین قربانی تھی۔“ [صحيح البخاري/كتاب العيدين/حدیث: 5563]

حضرت براء بن عاذب رضی اللہ عنہ سے روایت ہے کہ ان کے ہاں کچھ مہمان ٹھہرے ہوئے تھے، انہوں نے اپنے اہل خانہ سے کہا کہ ”ان کے واپس آنے سے پہلے جانور ذبح کر لیں تاکہ مہمان اسے تناول کریں“، چنانچہ انہوں نے (عیدالاضحیٰ کی) نماز سے قبل اپنا جانور ذبح کر لیا، پھر نبی صلی اللہ علیہ وسلم سے اس کا ذکر کیا تو آپ صلی اللہ علیہ وسلم نے حکم دیا کہ ”نماز کے بعد دوبارہ ذبح کریں۔“ انہوں نے کہا: ”اللہ کے رسول! میرے پاس دودھ پینے والا ایک بکری کا بچہ ہے جو گوشت کی دو بکریوں سے بہتر ہے۔“ (رسول اللہ صلی اللہ علیہ وسلم نے وہی ذبح کرنے کی اجازت دے دی۔) راویِ حدیث کہتے ہیں: ”مجھے معلوم نہیں ہوسکا کہ مذکورہ رخصت دوسرے لوگوں کے لیے بھی ہے یا صرف ان (حضرت براء بن عاذب رضی اللہ عنہ) کے لیے تھی۔“ اس روایت کو ایوب نے ابن سیرین سے، انہوں نے حضرت انس رضی اللہ عنہ سے اور انہوں نے نبی صلی اللہ علیہ وسلم سے ذکر کیا ہے۔ [صحيح البخاري/كتاب العيدين/حدیث: 6673]

حضرت جندب رضی اللہ عنہ سے روایت ہے، انہوں نے کہا: میں اس وقت موجود تھا جب نبی صلی اللہ علیہ وسلم نے نماز عید پڑھائی، پھر آپ نے خطبہ دیا اور فرمایا: ”جس نے نماز سے پہلے ذبح کر لیا ہو اسے چاہیے کہ اس کی جگہ دوسرا جانور ذبح کرے اور جس نے ابھی ذبح نہ کیا ہو اسے چاہیے کہ اللہ کا نام لے کر اسے ذبح کر دے۔“ [صحيح البخاري/كتاب العيدين/حدیث: 6674]

حضرت جندب رضی اللہ عنہ سے روایت ہے کہ وہ قربانی کے دن نبی صلی اللہ علیہ وسلم کے پاس موجود تھے، آپ نے نماز پڑھی، پھر خطبہ دیا اور فرمایا: ”جس نے نماز عید سے پہلے قربانی کر دی، وہ اس کی جگہ اور قربانی کرے اور جس نے ابھی تک قربانی ذبح نہ کی ہو، تو وہ اللہ کا نام لے کر ذبح کرے۔“ [صحيح البخاري/كتاب العيدين/حدیث: 7400]