تو ہم نے اسے ایک بہت بردبار لڑکے کی بشارت دی۔

پھر جب وہ اس کے ساتھ دوڑ د ھوپ کی عمر کو پہنچ گیا تو اس نے کہا اے میرے چھوٹے بیٹے! بلاشبہ میں خواب میں دیکھتا ہوں کہ میں تجھے ذبح کر رہا ہوں، تو دیکھ تو کیا خیال کرتا ہے ؟ اس نے کہا اے میرے باپ! تجھے جو حکم دیا جا رہا ہے کر گزر، اگر اللہ نے چاہا تو تو ضرور مجھے صبر کرنے والوں میں سے پائے گا ۔

تو جب دونوں نے حکم مان لیا اور اس نے اسے پیشانی کی ایک جانب پر گرا دیا۔

اور ہم نے اسے آواز دی کہ اے ابراہیم !

یقینا تو نے خواب سچا کر دکھایا، بے شک ہم نیکی کرنے والوں کو اسی طرح جزا دیتے ہیں۔

بے شک یہی تو یقینا کھلی آزمائش ہے۔

اور ہم نے اس کے فدیے میں ایک بہت بڑا ذبیحہ دیا۔

اور پیچھے آنے والوں میں اس کے لیے یہ بات چھوڑ دی۔

کہ ابراہیم پر سلام ہو۔

ہم اسی طرح نیکی کرنے والوں کو بدلہ دیتے ہیں۔

بلاشبہ وہ ہمارے مومن بندوں سے تھا۔

اور ہم نے اسے اسحاق کی بشارت دی، جو نبی ہو گا، صالح لوگوں سے (ہو گا)۔

اور ہم نے اس پر اور اسحاق پر برکت نازل کی اور ان دونوں کی اولاد میں سے کوئی نیکی کرنے والا ہے اور کوئی اپنے آپ پر صریح ظلم کرنے والا ہے۔

اور بلا شبہ یقینا ہم نے موسیٰ اور ہارون پر احسان کیا۔

اور ہم نے ان دونوں کو اور دونوں کی قوم کو بہت بڑی مصیبت سے نجات دی۔

اور ہم نے ان کی مدد کی تو وہی غالب ہوئے۔

اور ہم نے ان دونوں کو نہایت واضح کتاب دی۔

اور ہم نے ان دونوں کو سیدھے راستے پر چلایا۔

اور ہم نے پیچھے آنے والوں میں ان کے لیے یہ بات چھوڑی۔

کہ موسیٰ اور ہارون پر سلام ہو۔

بے شک ہم نیکی کرنے والوں کو اسی طرح جزا دیتے ہیں۔

بے شک وہ دونوں ہمارے مومن بندوں میں سے تھے۔

اور بلاشبہ الیاس یقینا رسولوں میں سے تھا۔

جب اس نے اپنی قوم سے کہا کیا تم ڈرتے نہیں ؟

کیا تم بعل کو پکارتے ہواور بنانے والوں میں سے سب سے بہتر کو چھوڑ دیتے ہو؟

اللہ کو،جو تمھارا رب ہے اور تمھارے پہلے باپ دادا کا رب ہے۔

تو انھوں نے اسے جھٹلا دیا، سو یقینا وہ ضرور حاضر کیے جانے والے ہیں۔

مگر اللہ کے وہ بندے جو چنے ہوئے ہیں۔

اور ہم نے پیچھے آنے والوں میں اس کے لیے یہ بات چھوڑ دی۔

کہ سلام ہو الیاسین پر ۔

بے شک ہم نیکی کرنے والوں کو اسی طرح جزا دیتے ہیں۔

یقینا وہ ہمارے مومن بندوں میں سے تھا۔

اور بلاشبہ لوط یقینا رسولوں میں سے تھا۔

جب ہم نے اسے اور اس کے سب گھر والوں کو نجات دی ۔

سوائے ایک بڑھیا کے جو پیچھے رہ جانے والوں میں سے تھی۔

پھر ہم نے دوسروں کو ہلاک کر دیا۔

اور بلا شبہ تم یقینا صبح جاتے ہوئے ان پر سے گزرتے ہو۔

اور رات کو بھی۔ تو کیا تم سمجھتے نہیں؟ـ

اور بلاشبہ یونس یقینا رسولوں میں سے تھا۔

جب وہ بھری ہوئی کشتی کی طرف بھاگ کر گیا۔

پھر وہ قرعہ میں شریک ہو ا تو ہارنے والوں میں سے ہو گیا۔

پھر مچھلی نے اسے نگل لیا، اس حال میں کہ وہ مستحق ملامت تھا۔

پھر اگر یہ بات نہ ہوتی کہ وہ تسبیح کرنے والوں سے تھا۔

تو یقینا اس کے پیٹ میں اس دن تک رہتا جس میں لوگ اٹھائے جائیں گے۔

پھر ہم نے اسے چٹیل میدان میں پھینک دیا، اس حال میں کہ وہ بیمار تھا۔

اور ہم نے اس پر ایک بیل دار پودا اگا دیا۔

اور اسے ایک لاکھ کی طرف بھیجا، بلکہ وہ زیادہ ہوں گے۔

پس وہ ایمان لے آئے تو ہم نے انھیں ایک وقت تک فائدہ دیا۔

پس ان سے پوچھ کیا تیرے رب کے لیے بیٹیاں ہیں اور ان کے لیے بیٹے؟

یا ہم نے فرشتوں کو مؤنث پیدا کیا، جب کہ وہ حاضر تھے۔