ام المومنین سیدہ حفصہ رضی اللہ عنہا بیان کرتی ہیں: ”چار کام ایسے تھے جنہیں نبی کریم صلی اللہ علیہ وسلم کبھی نہیں چھوڑتے تھے: عاشوراء کا روزہ، (ذوالحجہ کے) دس دنوں کا روزہ، ہر مہینے کے تین دن کے روزے اور فجر سے پہلے کی دو رکعتیں۔“
امام طبرانی رحمہ اللہ فرماتے ہیں: ”اس حدیث کو عمرو بن قیس سے اشجعی کے سوا کسی نے روایت نہیں کیا، اور اشجعی سے ابو النضر کے سوا کسی نے روایت نہیں کیا، اس میں عثمان بن ابی شیبہ منفرد ہیں۔“ [المعجم الأوسط/بَابُ الْمِيمِ/حدیث: 7831]

سیدنا عبداللہ بن مسعود رضی اللہ عنہ بیان کرتے ہیں: ”اس رات ہمارے ساتھ دو حدی خواں (اونٹوں کو گا کر ہانکنے والے) تھے جس رات رسول اللہ صلی اللہ علیہ وسلم نماز سے سوئے رہ گئے یہاں تک کہ سورج طلوع ہو گیا۔“
امام طبرانی رحمہ اللہ فرماتے ہیں: ”اس حدیث کو عبداللہ بن ولید سے حسن بن ثابت کے سوا کسی نے روایت نہیں کیا، اس میں یحییٰ بن آدم منفرد ہیں۔“ [المعجم الأوسط/بَابُ الْمِيمِ/حدیث: 7832]

سیدنا براء بن عازب رضی اللہ عنہ سے روایت ہے کہ رسول اللہ صلی اللہ علیہ وسلم ظہر سے پہلے چار رکعتیں پڑھا کرتے تھے۔
امام طبرانی رحمہ اللہ فرماتے ہیں: ”یہ حدیث براء رضی اللہ عنہ سے صرف اسی سند کے ساتھ مروی ہے، اس میں بکر القاضی منفرد ہیں۔“ [المعجم الأوسط/بَابُ الْمِيمِ/حدیث: 7833]

سیدنا عبداللہ بن عباس رضی اللہ عنہما سے روایت ہے کہ نبی کریم صلی اللہ علیہ وسلم نے سینگی لگوائی اور سینگی لگانے والے کو اس کی اجرت ایک دینار دی۔
امام طبرانی رحمہ اللہ فرماتے ہیں: ”سیدنا ابن عباس رضی اللہ عنہما سے کسی بھی طریق سے یہ روایت کہ ’نبی کریم صلی اللہ علیہ وسلم نے سینگی لگانے والے کو اس کی اجرت ایک دینار دی‘ صرف اسی سند سے مروی ہے، اس میں عمر بن فروخ منفرد ہیں۔“ [المعجم الأوسط/بَابُ الْمِيمِ/حدیث: 7834]

ام المومنین سیدہ عائشہ رضی اللہ عنہا بیان کرتی ہیں کہ میں نے عرض کیا: ”اے اللہ کے رسول! آپ بیت الخلا میں جاتے ہیں تو (بعد میں) آپ صلی اللہ علیہ وسلم سے خارج ہونے والی گندگی میں سے کچھ بھی دکھائی نہیں دیتا؟“ آپ صلی اللہ علیہ وسلم نے فرمایا: ”اے عائشہ! کیا تمہیں معلوم نہیں کہ زمین انبیاء سے خارج ہونے والی چیز کو نگل لیتی ہے، چنانچہ اس میں سے کچھ بھی نظر نہیں آتا؟“
امام طبرانی رحمہ اللہ فرماتے ہیں: ”یہ حدیث سیدہ عائشہ رضی اللہ عنہا سے صرف اسی سند کے ساتھ مروی ہے، اسے روایت کرنے میں اسماعیل بن ابان منفرد ہیں۔“ [المعجم الأوسط/بَابُ الْمِيمِ/حدیث: 7835]

سیدنا جابر رضی اللہ عنہما سے روایت ہے کہ نبی کریم صلی اللہ علیہ وسلم کے پاس ایک عورت لائی گئی جس نے چوری کی تھی، تو آپ صلی اللہ علیہ وسلم نے اس کا ہاتھ کاٹ دیا، اور فرمایا: ”اس ذات کی قسم جس کے ہاتھ میں میری جان ہے! اگر (یہ چوری کرنے والی) فاطمہ بنت محمد ( صلی اللہ علیہ وسلم ) بھی ہوتی تو میں اس کا ہاتھ ضرور کاٹ دیتا۔“
امام طبرانی رحمہ اللہ فرماتے ہیں: ”یہ حدیث ابو الزبیر سے صرف اشعث نے روایت کی ہے، اور اسے روایت کرنے میں حفص منفرد ہیں۔“ [المعجم الأوسط/بَابُ الْمِيمِ/حدیث: 7836]

سیدنا جابر رضی اللہ عنہما سے روایت ہے کہ نبی کریم صلی اللہ علیہ وسلم نے صرف شلوار میں نماز پڑھنے سے منع فرمایا۔
امام طبرانی رحمہ اللہ فرماتے ہیں: ”یہ حدیث ابو الزبیر سے صرف حسین بن وردان نے روایت کی ہے، اور اس کا مطلب یہ ہے کہ آدمی قمیص اور چادر کے بغیر تنہا شلوار ہی میں (اپنے آپ کو ڈھانپ کر) نماز پڑھے۔“ [المعجم الأوسط/بَابُ الْمِيمِ/حدیث: 7837]

سیدنا بریدہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے منع فرمایا کہ ہم (کسی کا نام) ”کلب“ یا ”کلیب“ رکھیں۔
امام طبرانی رحمہ اللہ فرماتے ہیں: ”یہ حدیث صالح بن حیان سے صرف علی بن غراب نے روایت کی ہے، اور اسے روایت کرنے میں ابو الشعثاء منفرد ہیں۔“ [المعجم الأوسط/بَابُ الْمِيمِ/حدیث: 7838]

کریمہ بنت سیرین رحمہا اللہ بیان کرتی ہیں کہ میں مزدلفہ سے منیٰ تک سیدنا ابن عمر رضی اللہ عنہما کے ساتھ رہی، تو میں نے عرض کیا: ”میں نے منت مانی تھی کہ بدھ کے دن روزہ رکھوں گی، اور وہ (بدھ) اسی دن (یعنی یوم النحر، عید کے دن) آ پڑا ہے، آپ کی کیا رائے ہے؟“ انہوں نے فرمایا: ”اللہ تعالیٰ نے منت پوری کرنے کا حکم دیا ہے، اور رسول اللہ صلی اللہ علیہ وسلم نے اس دن روزہ رکھنے سے منع فرمایا ہے۔“
امام طبرانی رحمہ اللہ فرماتے ہیں: ”یہ حدیث محمد بن سیرین کی بہن کریمہ بنت سیرین سے صرف عاصم احول نے روایت کی ہے، اور اسے روایت کرنے میں حفص بن غیاث منفرد ہیں۔“ [المعجم الأوسط/بَابُ الْمِيمِ/حدیث: 7839]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”یہ امت تہتر فرقوں میں بٹ جائے گی، ان میں سے ایک کے سوا باقی سب جہنم میں جائیں گے۔“ صحابہ رضی اللہ عنہم نے عرض کیا: ”وہ فرقہ کون سا ہے؟“ آپ صلی اللہ علیہ وسلم نے فرمایا: ”وہ جو اس طریقے پر ہو جس پر آج میں اور میرے صحابہ ہیں۔“
امام طبرانی رحمہ اللہ فرماتے ہیں: ”اس حدیث کو یحییٰ بن سعید رحمہ اللہ سے عبداللہ بن سفیان مدنی اور یاسین زیات کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 7840]