حبیب بن ابی ملیکہ رحمہ اللہ بیان کرتے ہیں کہ میں سیدنا ابن عمر رضی اللہ عنہما کے پہلو میں بیٹھا تھا کہ ان کے پاس ایک شخص آیا اور کہنے لگا: ”اے ابو عبدالرحمن! مجھے عثمان کے بارے میں بتائیے، کیا وہ بدر میں شریک ہوئے تھے؟“ انہوں نے فرمایا: ”نہیں۔“ اس نے کہا: ”کیا وہ بیعتِ رضوان میں شریک ہوئے؟“ فرمایا: ”نہیں۔“ اس نے کہا: ”کیا وہ ان لوگوں میں سے تھے جو اس دن پیٹھ پھیر گئے تھے جب دونوں لشکر آپس میں ٹکرائے تھے؟“ فرمایا: ”ہاں۔“ (یہ سن کر) وہ شخص پلٹ کر چل دیا۔ تو (ایک اور) شخص نے سیدنا عبداللہ بن عمر رضی اللہ عنہما سے کہا: ”یہ شخص اب جائے گا اور لوگوں کو بتائے گا کہ آپ نے سیدنا عثمان رضی اللہ عنہ کی شان میں گستاخی کی ہے۔“ انہوں نے فرمایا: ”کیا میں نے ایسا کیا ہے؟“ اس نے کہا: ”اس کا تو یہی خیال ہے۔“ تو انہوں نے فرمایا: ”اس آدمی کو میرے پاس لاؤ۔“ چنانچہ لوگوں نے اسے واپس بلا لیا۔ انہوں نے پوچھا: ”کیا تمہیں معلوم ہے کہ میں نے تم سے کیا کہا؟“ اس شخص نے کہا: ”میں نے آپ سے پوچھا تھا کہ کیا عثمان بدر میں شریک ہوئے؟ تو آپ نے فرمایا: نہیں۔ اور میں نے پوچھا کہ کیا وہ بیعتِ رضوان میں شریک ہوئے؟ تو آپ نے فرمایا: نہیں۔ اور میں نے پوچھا کہ کیا وہ ان لوگوں میں تھے جو اس دن پیٹھ پھیر گئے جب دونوں لشکر ٹکرائے؟ تو آپ نے فرمایا: ہاں۔“ تو سیدنا عبداللہ بن عمر رضی اللہ عنہما نے فرمایا: ”رسول اللہ صلی اللہ علیہ وسلم نے بدر کے دن فرمایا تھا: ’عثمان اللہ اور اس کے رسول کے کام کی وجہ سے روک لیے گئے ہیں۔‘ چنانچہ رسول اللہ صلی اللہ علیہ وسلم نے ان کے لیے (مالِ غنیمت میں) حصہ مقرر فرمایا، اور ان کے سوا کسی غیر حاضر شخص کے لیے حصہ مقرر نہیں فرمایا۔ اور بیعتِ رضوان کے موقع پر رسول اللہ صلی اللہ علیہ وسلم نے سیدنا عثمان رضی اللہ عنہ کو مکہ بھیجا تھا تاکہ وہ قربانی کے جانور اور مکہ میں داخلے کے بارے میں اہلِ مکہ سے اجازت طلب کریں۔ پھر آپ صلی اللہ علیہ وسلم نے بیعتِ رضوان لی جبکہ آپ صلی اللہ علیہ وسلم مکہ میں داخل ہونے کا ارادہ رکھتے تھے، تو آپ صلی اللہ علیہ وسلم نے فرمایا: ’عثمان اللہ اور اس کے رسول کے کام میں گئے ہوئے ہیں، لہٰذا میں ان کی طرف سے اللہ کے لیے بیعت کرتا ہوں۔‘ پھر آپ صلی اللہ علیہ وسلم نے اپنا ایک ہاتھ دوسرے ہاتھ پر مارا۔“ اور (رہی پیٹھ پھیرنے کی بات تو) اللہ تعالیٰ نے فرمایا: ﴿إِنَّ الَّذِينَ تَوَلَّوْا مِنْكُمْ يَوْمَ الْتَقَى الْجَمْعَانِ إِنَّمَا اسْتَزَلَّهُمُ الشَّيْطَانُ بِبَعْضِ مَا كَسَبُوا وَلَقَدْ عَفَا اللَّهُ عَنْهُمْ﴾ پس جاؤ، اللہ تعالیٰ انہیں معاف فرما چکا ہے، اب جاؤ اور میرے خلاف جتنا زور لگا سکتے ہو لگا لو۔
امام طبرانی رحمہ اللہ فرماتے ہیں: ”اس حدیث کو روایت کرنے والوں میں سے کسی نے اس سند میں کلیب بن وائل اور حبیب بن ابی ملیکہ کے درمیان ہانی بن قیس کو داخل نہیں کیا، سوائے عبدالواحد بن زیاد کے۔ اور اسے زائدہ اور ایک جماعت نے کلیب بن وائل سے، انہوں نے حبیب بن ابی ملیکہ سے، انہوں نے ابن عمر رضی اللہ عنہما سے روایت کیا ہے۔ اور حبیب بن ابی ملیکہ کی کنیت ابو ثور حدانی ہے، (حدان) قبیلہ مراد کی ایک شاخ ہے۔“ [المعجم الأوسط/بَابُ الْمِيمِ/حدیث: 8494]

سیدنا جندب بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں سے جو شخص یہ طاقت رکھے کہ اس کے اور جنت کے درمیان خون کی ایک مٹھی بھر مقدار بھی حائل نہ ہو جسے اس نے (ناحق) اس طرح بہایا ہو گویا وہ مرغی ذبح کر رہا ہو، (تو وہ ایسا ہی کرے، کیونکہ) جب بھی وہ جنت کے دروازوں میں سے کسی دروازے کے پاس جائے گا تو وہ خون اس کے اور جنت کے درمیان حائل ہو جائے گا۔ اور تم میں سے جو شخص یہ طاقت رکھے کہ اپنے پیٹ میں صرف پاکیزہ (حلال) چیز ہی ڈالے تو وہ ایسا ہی کرے، کیونکہ انسان کا جو حصہ سب سے پہلے سڑتا ہے وہ اس کا پیٹ ہے۔“
امام طبرانی رحمہ اللہ فرماتے ہیں: ”اس حدیث کو قتادہ سے ابو عوانہ اور حجاج بن حجاج کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 8495]

سیدنا سمرہ بن جندب رضی اللہ عنہ سے روایت ہے کہ رسول اللہ صلی اللہ علیہ وسلم نے تبتل (نکاح سے کنارہ کشی اور ترکِ دنیا کی رہبانیت) سے منع فرمایا۔
قتادہ رحمہ اللہ نے (اس کی تائید میں) یہ آیت تلاوت کی: ﴿وَلَقَدْ أَرْسَلْنَا رُسُلًا مِنْ قَبْلِكَ وَجَعَلْنَا لَهُمْ أَزْوَاجًا وَذُرِّيَّةً﴾ ”اور بلاشبہ ہم نے آپ سے پہلے بھی بہت سے رسول بھیجے اور ہم نے انھیں بیویاں اور اولاد عطا کی۔“
امام طبرانی رحمہ اللہ فرماتے ہیں: ”اس حدیث کو قتادہ سے ہشام کے سوا کسی نے روایت نہیں کیا، معاذ اس کی روایت میں منفرد ہیں۔“ [المعجم الأوسط/بَابُ الْمِيمِ/حدیث: 8496]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ نے اپنی مخلوق میں سے سات قسم کے لوگوں پر اپنے ساتوں آسمانوں کے اوپر سے لعنت فرمائی ہے۔ ان میں سے ایک پر اس نے تین بار لعنت دہرائی، اور ہر ایک پر ایسی لعنت فرمائی جو اس کے لیے کافی ہے۔ چنانچہ فرمایا: ملعون ہے وہ جو قومِ لوط کا سا عمل کرے، ملعون ہے وہ جو قومِ لوط کا سا عمل کرے، ملعون ہے وہ جو قومِ لوط کا سا عمل کرے۔ ملعون ہے وہ جو اللہ کے سوا کسی اور کے نام پر ذبح کرے۔ ملعون ہے وہ جو کسی چوپائے سے بدفعلی کرے۔ ملعون ہے وہ جو اپنے والدین کی نافرمانی کرے۔ ملعون ہے وہ جو عورت اور اس کی بیٹی کو (نکاح میں) جمع کرے۔ ملعون ہے وہ جو زمین کی حدود (نشانات) کو بدل ڈالے۔ ملعون ہے وہ جو اپنے آزاد کرنے والے آقاؤں کے سوا کسی اور کی طرف اپنی نسبت کرے۔“ [المعجم الأوسط/بَابُ الْمِيمِ/حدیث: 8497]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”چھ چیزوں (کے آنے) سے پہلے نیک اعمال میں جلدی کر لو۔ تم کس چیز کے منتظر ہو؟ کیا ایسی مالداری کے جو سرکش بنا دے، یا ایسی بیماری کے جو (سب کچھ) بگاڑ دے، یا ایسے بڑھاپے کے جو عقل کو ماؤف کر دے، یا ایسی موت کے جو اچانک آ دبوچے، یا دجال کے، اور وہ بدترین چیز ہے جس کا انتظار کیا جا رہا ہے، یا قیامت کے؟ اور قیامت تو نہایت سخت اور بہت ہی تلخ ہے۔“
امام طبرانی رحمہ اللہ فرماتے ہیں: ”ان دونوں حدیثوں کو اعرج سے محرر بن ہارون کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 8498]

طلحہ مولیٰ آلِ سراقہ رحمہ اللہ بیان کرتے ہیں کہ میں نے معاویہ بن عبداللہ بن جعفر رحمہ اللہ کو وضو کرتے دیکھا: انھوں نے کلی کی، ناک میں پانی ڈالا، تین بار اپنا چہرہ دھویا، تین بار اپنے دونوں ہاتھ دھوئے، اپنے سر کا مسح کیا اور تین بار اپنے دونوں پاؤں دھوئے۔ پھر کہا: ”میں نے سیدنا عبداللہ بن جعفر رضی اللہ عنہ کو اسی طرح وضو کرتے دیکھا تھا۔“ اور سیدنا عبداللہ بن جعفر رضی اللہ عنہ نے فرمایا: ”میں نے سیدنا عثمان بن عفان رضی اللہ عنہ کو اسی طرح وضو کرتے دیکھا تھا۔“ اور سیدنا عثمان رضی اللہ عنہ نے فرمایا: ”میں نے رسول اللہ صلی اللہ علیہ وسلم کو اسی طرح وضو کرتے دیکھا تھا۔“
امام طبرانی رحمہ اللہ فرماتے ہیں: ”اس حدیث کو معاویہ بن عبداللہ بن جعفر سے طلحہ مولیٰ آلِ سراقہ کے سوا کسی نے روایت نہیں کیا، اور اس میں عطاف بن خالد منفرد ہیں۔“ [المعجم الأوسط/بَابُ الْمِيمِ/حدیث: 8499]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ اپنے بندے کی توبہ سے اس شخص کی خوشی سے بھی کہیں زیادہ خوش ہوتا ہے جسے اپنا اونٹ، جو چٹیل بیابان میں گم ہو گیا تھا، اچانک (اپنے پاس) مل جائے۔“
امام طبرانی رحمہ اللہ فرماتے ہیں: ”اس حدیث کو عمر بن ابراہیم سے شاذ کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 8500]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ایک بندہ مومن پیدا ہوتا ہے، مومن ہی جیتا ہے اور مومن ہی مرتا ہے، اور ایک بندہ کافر پیدا ہوتا ہے، کافر ہی جیتا ہے اور کافر ہی مرتا ہے۔ اور ایک بندہ اپنی زندگی کا ایک عرصہ نیکی و سعادت کے کام کرتا رہتا ہے، پھر اسے وہ (تقدیر) آ لیتی ہے جو اس کے لیے لکھی جا چکی ہے، چنانچہ وہ کفر کی حالت میں مرتا ہے۔ اور ایک بندہ اپنی زندگی کا ایک عرصہ بدبختی کے کام کرتا رہتا ہے، پھر اسے وہ (تقدیر) آ لیتی ہے جو اس کے لیے لکھی جا چکی ہے، چنانچہ وہ نیک بخت ہو کر مرتا ہے۔“
امام طبرانی رحمہ اللہ فرماتے ہیں: ”اس حدیث کو قتادہ رحمہ اللہ سے عمر بن ابراہیم کے سوا کسی نے روایت نہیں کیا، اس میں شاذ (بن فیاض) منفرد ہیں۔“ [المعجم الأوسط/بَابُ الْمِيمِ/حدیث: 8501]

ام المومنین سیدہ صفیہ رضی اللہ عنہا بیان کرتی ہیں: ”رسول اللہ صلی اللہ علیہ وسلم نے مجھے آزاد فرمایا اور میری آزادی ہی کو میرا مہر مقرر فرما دیا۔“ [المعجم الأوسط/بَابُ الْمِيمِ/حدیث: 8502]

ام المومنین سیدہ صفیہ رضی اللہ عنہا بیان کرتی ہیں: ”رسول اللہ صلی اللہ علیہ وسلم میرے پاس تشریف لائے تو میں رو رہی تھی۔ آپ صلی اللہ علیہ وسلم نے فرمایا: ”اے حیی کی بیٹی! تمہیں کس چیز نے رلایا ہے؟“ میں نے عرض کیا: ”مجھے خبر پہنچی ہے کہ عائشہ اور حفصہ رضی اللہ عنہما میرے بارے میں زبان درازی کرتی ہیں اور کہتی ہیں: ”ہم اس سے بہتر ہیں، ہم رسول اللہ صلی اللہ علیہ وسلم کے چچا کی بیٹیاں بھی ہیں اور آپ صلی اللہ علیہ وسلم کی بیویاں بھی۔“ آپ صلی اللہ علیہ وسلم نے فرمایا: ”تم نے یہ کیوں نہ کہہ دیا: ”تم دونوں مجھ سے بہتر کیسے ہو سکتی ہو، جبکہ میرے والد ہارون (علیہ السلام) ہیں، میرے چچا موسیٰ (علیہ السلام) ہیں اور میرے شوہر محمد صلی اللہ علیہ وسلم ہیں؟““ [المعجم الأوسط/بَابُ الْمِيمِ/حدیث: 8503]