اللہ تعالیٰ کے اس فرمان کے بیان میں کہ: ”رمضان وہ مہینہ ہے جس میں قرآن اتارا گیا جو لوگوں کے لیے ہدایت ہے اور جس میں رہنمائی کی اور حق و باطل میں فرق کر دینے والی واضح نشانیاں ہیں، پس تم میں سے جو کوئی اس مہینے کو پا لے تو اسے چاہیے کہ وہ اس کے روزے رکھے، اور جو شخص بیمار ہو یا سفر پر ہو تو وہ دوسرے دنوں میں (روزوں کی) گنتی پوری کرے، اللہ تمہارے حق میں آسانی چاہتا ہے اور تمہارے لیے تنگی و دشواری کا ارادہ نہیں رکھتا، اور تاکہ تم (روزوں کی) تعداد مکمل کر سکو اور اللہ نے تمہیں جو ہدایت بخشی ہے اس پر اس کی بڑائی بیان کرو اور تاکہ تم شکر گزار بن جاؤ۔“

اللہ تعالیٰ کے اس ارشادِ گرامی کے بیان میں کہ: ”اور جب میرے بندے آپ سے میرے متعلق دریافت کریں تو (انہیں بتا دیں کہ) میں یقیناً قریب ہی ہوں، میں پکارنے والے کی پکار کا جواب دیتا ہوں جب وہ مجھے پکارتا ہے، پس انہیں چاہیے کہ وہ میرا حکم مانیں اور مجھ پر ایمان لائیں تاکہ وہ راہِ راست پا سکیں“۔

اللہ تعالیٰ کا ارشاد: ”تمہارے لیے روزوں کی راتوں میں اپنی بیویوں کے پاس جانا حلال کر دیا گیا ہے، وہ تمہارے لیے لباس ہیں اور تم ان کے لیے لباس ہو، اللہ تعالیٰ کو علم ہے کہ تم (اس سے قبل) اپنی جانوں کے ساتھ خیانت کر رہے تھے، چنانچہ اس نے تمہاری توبہ قبول فرمائی اور تمہیں معاف کر دیا؛ پس اب ان سے مباشرت کرو اور اللہ نے جو تمہارے لیے مقدر کر دیا ہے اسے تلاش کرو، اور کھاؤ اور پیو یہاں تک کہ فجر کی سفید دھاری سیاہ دھاری سے ممتاز ہو کر تم پر واضح ہو جائے، پھر رات تک روزے کو پورا کرو، اور جب تم مسجدوں میں اعتکاف کی حالت میں ہو تو ان سے مباشرت نہ کرو، یہ اللہ کی مقرر کردہ حدود ہیں، پس ان کے قریب نہ جاؤ، اسی طرح اللہ اپنی آیات لوگوں کے لیے کھول کر بیان فرماتا ہے تاکہ وہ تقویٰ اختیار کریں۔“