اللہ تعالیٰ کے اس ارشادِ گرامی کے بیان میں کہ ”اور اگر ہم ان پر یہ فرض کر دیتے کہ اپنی جانیں قربان کر دو یا اپنے گھروں سے نکل جاؤ، تو ان میں سے چند نفوس کے علاوہ کوئی اس پر عمل پیرا نہ ہوتا، اور اگر وہ اس نصیحت پر کاربند رہتے جو انہیں کی جاتی ہے تو یہ ان کے حق میں سراسر بہتر ہوتا اور (حق پر) بہت زیادہ ثابت قدمی کا موجب بنتا۔“

اللہ تعالیٰ کے اس ارشاد گرامی کی وضاحت میں کہ ”اور جو کوئی اللہ اور اس کے رسول کی اطاعت کرے گا، تو ایسے ہی لوگ (آخرت میں) ان ہستیوں کے ہمراہ ہوں گے جن پر اللہ نے اپنا فضل و انعام فرمایا ہے، یعنی انبیاء، صدیقین، شہداء اور صالحین؛ اور رفاقت کے لیے یہ لوگ کیا ہی بہترین ہیں“۔

اللہ تعالیٰ کے اس ارشادِ گرامی کی تفسیر ”اور آخر تمہیں کیا ہوا ہے کہ تم اللہ کی راہ میں اور ان بے بس و لاچار مردوں، عورتوں اور بچوں کی خاطر جہاد نہیں کرتے جو یہ دعائیں مانگتے ہیں کہ اے ہمارے پروردگار! ہمیں اس بستی سے نکال لے جس کے رہنے والے نہایت ظالم ہیں، اور اپنی جناب سے ہمارے لیے کوئی حامی و سرپرست مقرر فرما دے اور اپنی بارگاہ سے ہمارے لیے کوئی مددگار بنا دے۔“

”کیا تم نے ان لوگوں کے حال پر غور نہیں کیا جن سے (پہلے) کہا گیا تھا کہ اپنے ہاتھ (جنگ سے) روکے رکھو اور نماز قائم کرو اور زکوۃ ادا کرو، پھر جب ان پر قتال فرض کر دیا گیا تو اچانک ان میں سے ایک فریق لوگوں سے اس طرح ڈرنے لگا جیسے اللہ کا خوف ہو یا اس سے بھی بڑھ کر، اور وہ کہنے لگے کہ اے ہمارے پروردگار! تو نے ہم پر قتال کیوں فرض کر دیا؟ کیوں نہ تو نے ہمیں تھوڑی مدت تک مزید مہلت دے دی؟ آپ فرما دیجیے کہ دنیا کا فائدہ تو نہایت قلیل ہے اور تقویٰ اختیار کرنے والے کے لیے آخرت ہی بہتر ہے، اور تم پر دھاگے کے برابر بھی ظلم نہیں کیا جائے گا۔“