سیدنا ابوذر غفاری رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جب زمانہ (قیامت کے) قریب ہوگا تو طیالسہ (ایک مخصوص قسم کی چادر) کا لباس عام ہو جائے گا، تجارت کی کثرت ہوگی، مال کی فراوانی ہوگی اور صاحبِ مال کی تعظیم اس کی دولت کی وجہ سے کی جائے گی۔ فحاشی بڑھ جائے گی، حکومت ناسمجھ لڑکوں کے ہاتھ میں ہوگی، فساد کثیر ہوگا، حکمران ظلم کرے گا اور ناپ تول میں کمی کی جائے گی۔ آدمی کے لیے کتے کے بچے کو پالنا اپنی اولاد کی پرورش کرنے سے بہتر ہوگا، نہ بڑے کی توقیر ہوگی اور نہ چھوٹے پر رحم کیا جائے گا۔ حرام کی اولاد کثرت سے ہوگی یہاں تک کہ مرد سرِ راہ عورت سے بدفعلی کرے گا، تو اس وقت کا سب سے مثالی شخص وہ ہوگا جو کہے گا: ”کاش تم راستے سے ہٹ جاتے۔“ وہ لوگ بھیڑیوں جیسے دلوں پر بھیڑوں کی کھالیں پہنیں گے، اور اس زمانے کا سب سے بہتر شخص وہ ہوگا جو مداہنت (دینی معاملے میں سمجھوتہ) کرنے والا ہو۔“ [المعجم الأوسط/باب العين/حدیث: 4860]

عتی السعدی رحمہ اللہ بیان کرتے ہیں کہ میں علم کی تلاش میں نکلا یہاں تک کہ کوفہ پہنچا، وہاں میں نے سیدنا عبداللہ بن مسعود رضی اللہ عنہ کو اہل کوفہ کے درمیان (موجود) پایا، میں نے ان کے بارے میں پوچھا تو مجھے ان کا پتہ بتایا گیا، وہ اس وقت وہاں کی جامع مسجد میں تشریف فرما تھے، میں ان کی خدمت میں حاضر ہوا اور عرض کی: ”اے ابو عبد الرحمن! میں آپ کی خدمت میں اس غرض سے حاضر ہوا ہوں کہ آپ سے علم حاصل کروں، شاید اللہ تعالیٰ آپ کے بعد ہمیں اس سے نفع پہنچائے۔“ انہوں نے مجھ سے پوچھا: ”تم کس قبیلے سے ہو؟“ میں نے عرض کی: ”میں اہل بصرہ میں سے ایک شخص ہوں۔“ انہوں نے پوچھا: ”بصرہ میں کس سے؟“ میں نے عرض کی: ”بنی سعد کے اس محلے سے۔“ انہوں نے مجھ سے فرمایا: ”اے سعدی! میں تمہیں تمہارے بارے میں وہ حدیث سناؤں گا جو میں نے رسول اللہ صلی اللہ علیہ وسلم سے سنی ہے؛ میں نے رسول اللہ صلی اللہ علیہ وسلم کو (اس وقت) سنا جب ایک شخص آپ صلی اللہ علیہ وسلم کی خدمت میں حاضر ہوا اور عرض کی: اے اللہ کے رسول! کیا میں آپ کو ایسی قوم کا پتہ نہ بتاؤں جن کے اموال بہت زیادہ اور جن کی قوت و شوکت بہت بڑی ہے، آپ ان سے بہت زیادہ مالِ غنیمت حاصل کر لیں گے؟ آپ صلی اللہ علیہ وسلم نے دریافت فرمایا: «مَنْ هُمْ؟» ”وہ کون لوگ ہیں؟“ اس نے عرض کی: بنی سعد کا یہ قبیلہ جو ریگستانی علاقے کے رہنے والے ہیں۔ رسول اللہ صلی اللہ علیہ وسلم نے فرمایا: «مَهْ، فَإِنَّ بَنِي سَعْدٍ عِنْدَ اللهِ ذُو حَظٍّ عَظِيمٍ» ”خاموش ہو جاؤ، کیونکہ اللہ کے ہاں بنی سعد کا بہت بڑا مقام و مرتبہ ہے۔“
(سیدنا ابن مسعود رضی اللہ عنہ نے فرمایا:) اے سعدی! اب تم (جو چاہو) پوچھو۔ میں نے عرض کی: ”اے ابو عبد الرحمن! کیا قیامت کی کوئی ایسی نشانی ہے جس سے قیامت کو پہچانا جا سکے؟“ راوی کہتے ہیں کہ وہ تکیہ لگائے ہوئے تھے، (یہ سن کر) سیدھے ہو کر بیٹھ گئے اور فرمایا: ”اے سعدی! تم نے مجھ سے وہی سوال کیا ہے جو میں نے رسول اللہ صلی اللہ علیہ وسلم سے پوچھا تھا، میں نے عرض کی تھی: اے اللہ کے رسول! کیا قیامت کی کوئی ایسی نشانی ہے جس سے اسے پہچانا جا سکے؟ تو آپ صلی اللہ علیہ وسلم نے فرمایا: ”ہاں، اے ابن مسعود! بیشک قیامت کی کچھ علامتیں اور کچھ نشانیاں ہیں۔ خبردار! قیامت کی علامتوں اور نشانیوں میں سے یہ ہے کہ اولاد (نافرمانی کی وجہ سے) والدین کے لیے رنج و غصے کا باعث بن جائے گی، بارش گرمی کے موسم میں (بے وقت) ہوگی اور اشراف (معزز لوگ) کثرت سے پھیل جائیں گے۔
اے ابن مسعود! قیامت کی علامتوں اور نشانیوں میں سے یہ ہے کہ خائن کو امانت دار سمجھا جائے گا اور امانت دار کو خائن قرار دیا جائے گا۔ اے ابن مسعود! قیامت کی علامتوں اور نشانیوں میں سے یہ ہے کہ اجنبی طبقوں سے تعلقات جوڑے جائیں گے اور رشتہ داریاں توڑ دی جائیں گی۔ اے ابن مسعود! قیامت کی علامتوں اور نشانیوں میں سے یہ ہے کہ ہر قبیلے کی سیادت ان کے منافق لوگ کریں گے اور ہر بازار کی قیادت ان کے بدکار لوگ کریں گے۔ اے ابن مسعود! قیامت کی علامتوں اور نشانیوں میں سے یہ ہے کہ محرابوں کو (نمائش کے لیے) بدلا جائے گا اور دل ویران ہو جائیں گے۔ اے ابن مسعود! قیامت کی علامتوں اور نشانیوں میں سے یہ ہے کہ اپنی قوم میں مومن ایک ذلیل و خوار بھیڑ سے بھی زیادہ حقیر سمجھا جائے گا۔
اے ابن مسعود! قیامت کی علامتوں اور نشانیوں میں سے یہ ہے کہ مرد مردوں پر اور عورتیں عورتوں پر اکتفا کریں گی۔ اے ابن مسعود! قیامت کی علامتوں اور نشانیوں میں سے یہ ہے کہ بچوں کی حکمرانی ہوگی اور عورتوں کی مشاورت چلے گی۔ اے ابن مسعود! قیامت کی علامتوں اور نشانیوں میں سے یہ ہے کہ مسجدیں کثرت سے بنائی جائیں گی اور منبر اونچے کیے جائیں گے۔ اے ابن مسعود! قیامت کی علامتوں اور نشانیوں میں سے یہ ہے کہ دنیا کے ویران علاقے آباد کیے جائیں گے اور آباد علاقوں کو ویران کر دیا جائے گا۔ اے ابن مسعود! قیامت کی علامتوں اور نشانیوں میں سے یہ ہے کہ آلاتِ موسیقی، تکبر اور شراب نوشی عام ہو جائے گی۔ اے ابن مسعود! قیامت کی علامتوں اور نشانیوں میں سے یہ ہے کہ حرام کار اولاد کی کثرت ہو جائے گی۔“ میں نے عرض کی: ”اے ابو عبد الرحمن! کیا وہ (ایسا کرنے والے) مسلمان ہوں گے؟“ انہوں نے فرمایا: ”ہاں۔“ میں نے عرض کی: ”اے ابو عبد الرحمن! کیا قرآن ان کے درمیان موجود ہوگا؟“ انہوں نے فرمایا: ”ہاں۔“ میں نے عرض کی: ”اے ابو عبد الرحمن! پھر یہ سب کیسے ہوگا؟“ انہوں نے فرمایا: ”لوگوں پر ایسا زمانہ آئے گا کہ آدمی (اپنی) عورت کو طلاق دے دے گا، پھر اپنی طلاق کا انکار کر دے گا اور اس کے ساتھ تعلق قائم رکھے گا، پس جب تک وہ دونوں اس حال میں رہیں گے، زنا کار ہی رہیں گے۔“
امام طبرانی رحمہ اللہ فرماتے ہیں: ”مبارک بن فضالہ سے یہ دو حدیثیں صرف سیف بن مسکین نے ہی روایت کی ہیں۔“ [المعجم الأوسط/باب العين/حدیث: 4861]

ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”ہر نشہ آور چیز حرام ہے۔“
اس حدیث کو عطا رحمہ اللہ سے حیان بن عبید اللہ کے علاوہ کسی نے روایت نہیں کیا، اور اس کی روایت میں شہاب بن معمر منفرد ہیں۔ [المعجم الأوسط/باب العين/حدیث: 4862]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم باہر تشریف لائے تو آپ صلی اللہ علیہ وسلم نے مسجد میں ایک شخص کو دیکھا جو اپنا رکوع اور سجدہ مکمل نہیں کر رہا تھا، تو رسول اللہ صلی اللہ علیہ وسلم نے فرمایا: ”اس شخص کی نماز قبول نہیں ہوتی جو رکوع اور سجدہ مکمل نہیں کرتا۔“
اس حدیث کو ابوجعفر رازی رحمہ اللہ سے یحییٰ بن ابی بکیر رحمہ اللہ کے علاوہ کسی نے روایت نہیں کیا، اور ان سے روایت کرنے میں ابراہیم بن عباد رحمہ اللہ منفرد ہیں۔ [المعجم الأوسط/باب العين/حدیث: 4863]

حمید الطویل رحمہ اللہ بیان کرتے ہیں، اور میرا یہی گمان ہے کہ میں نے یہ روایت سیدنا انس رضی اللہ عنہ سے سنی ہے کہ رسول اللہ صلی اللہ علیہ وسلم نے ایک شخص کو دیکھا جسے دو آدمیوں کے درمیان سہارا دے کر چلایا جا رہا تھا، تو آپ صلی اللہ علیہ وسلم نے دریافت فرمایا: ”یہ کیا معاملہ ہے؟“ لوگوں نے عرض کیا: ”اس نے پیدل حج کرنے کی نذر مانی ہے۔“ آپ صلی اللہ علیہ وسلم نے فرمایا: ”اللہ تعالیٰ اس سے بے نیاز ہے کہ یہ شخص اپنی جان کو (اس طرح مشقت میں ڈال کر) ہلاک کرے، اسے حکم دو کہ وہ سوار ہو جائے۔“
اس حدیث کو یونس بن عبید رحمہ اللہ سے صرف سکن برجمی رحمہ اللہ نے روایت کیا ہے، اور ان سے روایت کرنے میں ازہر بن جمیل رحمہ اللہ منفرد ہیں۔ [المعجم الأوسط/باب العين/حدیث: 4864]

ام المومنین سیدہ عائشہ رضی اللہ عنہا سے روایت ہے کہ انہوں نے رسول اللہ صلی اللہ علیہ وسلم کو یہ فرماتے ہوئے سنا: ”جس نے کسی چھوٹے بچے کی پرورش کی یہاں تک کہ وہ «لا إله إلا الله» کہنے لگے، تو اللہ عزوجل اس کا محاسبہ نہیں فرمائے گا۔“
اس حدیث کو ہشام بن عروہ سے عیسیٰ بن یونس کے علاوہ کسی نے روایت نہیں کیا، اور ان سے روایت کرنے میں سلیمان بن داود رحمہ اللہ منفرد ہیں۔ [المعجم الأوسط/باب العين/حدیث: 4865]

سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جنت والے (جنت میں) کھائیں گے بھی اور پیئیں گے بھی، لیکن وہ وہاں نہ تھوکیں گے، نہ ناک سنکیں گے (رینٹ نکالیں گے)، نہ پاخانہ کریں گے اور نہ ہی پیشاب کریں گے؛ ان کا کھانا (ہضم ہو کر) محض ایک ڈکار اور ایسے پسینے کی صورت میں خارج ہوگا جس کی خوشبو کستوری کی خوشبو جیسی ہوگی۔“
امام طبرانی رحمہ اللہ فرماتے ہیں: ”مالک بن مغول رحمہ اللہ سے اس حدیث کو صرف فریابی رحمہ اللہ اور ابوبکر حنفی رحمہ اللہ نے روایت کیا ہے۔“ [المعجم الأوسط/باب العين/حدیث: 4866]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم سے دریافت کیا گیا: ”کیا ذبح صرف حلق اور سینے کے اوپر والے گڑھے (لبہ) ہی میں ہوتا ہے؟“ تو آپ صلی اللہ علیہ وسلم نے ارشاد فرمایا: ”اگر تم (ایسی صورت میں) اس کی ران میں بھی نیزہ یا دھار دار چیز مار دو تو وہ تمہارے لیے کفایت کر جائے گا۔“
اس حدیث کو جعفر بن سلیمان رحمہ اللہ سے صرف بکر بن الشرود رحمہ اللہ نے روایت کیا ہے، اور سیدنا انس رضی اللہ عنہ سے یہ روایت صرف اسی سند کے ساتھ مروی ہے۔ [المعجم الأوسط/باب العين/حدیث: 4867]

قتادہ رحمہ اللہ بیان کرتے ہیں کہ میں نے سیدنا انس بن مالک رضی اللہ عنہ سے دریافت کیا: ”رسول اللہ صلی اللہ علیہ وسلم کی قرات کیسی تھی؟“ انہوں نے فرمایا: ”رسول اللہ صلی اللہ علیہ وسلم جب قرات فرماتے تو اپنی آواز کو خوب کھینچ کر (مد کے ساتھ) پڑھتے تھے۔“
امام طبرانی رحمہ اللہ فرماتے ہیں: ”اس حدیث کو حرب بن شداد سے صرف بکار بن یحییٰ نے روایت کیا ہے، اور ان سے روایت کرنے میں بشر بن ہلال منفرد ہیں۔“ [المعجم الأوسط/باب العين/حدیث: 4868]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اگر کوئی شخص اللہ کی رضا کے لیے نفلی روزہ رکھے، پھر اسے زمین بھر سونا بھی دے دیا جائے، تب بھی وہ روزِ حساب سے پہلے اپنا پورا اجر حاصل نہیں کر سکے گا۔“ [المعجم الأوسط/باب العين/حدیث: 4869]