حضرت ابو عمرہ فرماتے ہیں کہ پوچھا گیا: اے اللہ کے رسول (صلی اللہ علیہ وآلہ وسلم)! آپ نے کس حالت میں صبح کی؟ آپ صلی اللہ علیہ وآلہ وسلم نے فرمایا: خیریت کے ساتھ اس قوم میں جو جنازے میں حاضر نہیں ہوتے اور نہ ہی مریض کی عیادت کرتے ہیں۔ [مصنف ابن ابي شيبه/ كتاب الأدب/حدیث: 27469]

حضرت جابر فرماتے ہیں کہ میں نے عرض کیا: اے اللہ کے رسول (صلی اللہ علیہ وآلہ وسلم)! آپ نے کس حالت میں صبح کی؟ تو آپ صلی اللہ علیہ وآلہ وسلم نے فرمایا: خیر کے ساتھ اس آدمی سے بہتر جس نے صبح نہیں کی روزے دار کی حالت میں اور نہ کسی بیمار کی عیادت کی۔ [مصنف ابن ابي شيبه/ كتاب الأدب/حدیث: 27470]

حضرت خیثمہ فرماتے ہیں کہ میں نے حضرت عائشہ رضی اللہ عنہا سے پوچھا: آپ نے کس حال میں صبح کی؟ آپ نے فرمایا: اللہ کی نعمتوں کے ساتھ۔ [مصنف ابن ابي شيبه/ كتاب الأدب/حدیث: 27471]

حضرت ابن عون فرماتے ہیں کہ میں حضرت عامر شعبی کے پاس سے گزرا اس حال میں کہ وہ اپنے گھر کے صحن میں بیٹھے ہوئے تھے، تو میں نے پوچھا: آپ کیسے ہیں؟ آپ نے فرمایا: جب حضرت شریح سے پوچھا جاتا کہ آپ کیسے ہیں؟ تو وہ فرماتے: اس کی نعمتوں میں ہوں، اپنی شہادت کی انگلی سے آسمان کی طر ف اشارہ کرتے تھے۔ [مصنف ابن ابي شيبه/ كتاب الأدب/حدیث: 27472]

حضرت بکیر فرماتے ہیں کہ ایک آدمی نے حضرت ابو تمیمہ الہجیمی سے پوچھا: آپ کیسے ہیں؟ ّآپ نے فرمایا: دو نعمتوں کے درمیان ہوں: ایک تو چھپے ہوئے گناہوں کے درمیان ہوں اور ایسی تعریف کے درمیان ہوں کہ ان لوگوں میں سے کوئی بھی اس کو نہیں جانتا اور اللہ کی قسم میں بھی اس تک نہیں پہنچا اور نہ میں اس قابل ہوں۔ [مصنف ابن ابي شيبه/ كتاب الأدب/حدیث: 27473]

حضرت مغیرہ فرماتے ہیں کہ جب حضرت ابراہیم کو سلام کیا جاتا تو آپ یوں جواب دیتے وعلیکم اور جب ان سے پوچھا جاتا: آپ کیسے ہیں؟ تو آپ جواب دیتے اللہ کی نعمت میں ہوں۔ [مصنف ابن ابي شيبه/ كتاب الأدب/حدیث: 27474]

حضرت اسماعیل بن ابی خالد فرماتے ہیں کہ ایک آدمی نے امام شعبی سے پوچھا: اے ابو عمرو! آپ نے کس حالت میں صبح کی؟ آپ نے فرمایا: نعمتوں میں۔ میں نے پوچھا: کس کی نعمت میں؟ آپ نے فرمایا: اللہ کی نعمتوں میں۔ [مصنف ابن ابي شيبه/ كتاب الأدب/حدیث: 27475]

حضرت مغیرہ فرماتے ہیں کہ حضرت علی رضی اللہ عنہ سے جب بیماری کی حالت میں پوچھا جاتا کہ آپ کیسے ہیں؟ آپ فرماتے بہت بری حالت میں اور یہ آیت تلاوت فرماتے۔ ترجمہ: اور ہم تمہیں آزمائیں گے خیر اور شر کے ساتھ۔ [مصنف ابن ابي شيبه/ كتاب الأدب/حدیث: 27476]

حضرت ایوب فرماتے ہیں کہ میں نے ایک آدمی کو دیکھا کہ وہ حضرت عکرمہ سے مدینہ میں ملا، اور پوچھا: آپ کیسے ہیں؟ آپ نے فرمایا: بری حالت میں ہوں، میرے دونوں ہاتھ پھٹے ہوئے ہیں اور میں اس طرح اور اس طرح ہوں۔ راوی فرماتے ہیں کہ آپ اس آیت کی تاویل کرتے تھے۔ { وَنَبْلُوکُمْ بِالشَّرِّ وَالْخَیْرِ فِتْنَۃً وَإِلَیْنَا تُرْجَعُونَ }۔ [مصنف ابن ابي شيبه/ كتاب الأدب/حدیث: 27477]

حضرت عطاء بن مبارک فرماتے ہیں کہ حضرت ابو عبد الرحمن سلمی سے جب پوچھا جاتا: کہ آپ کیسے ہیں؟ تو آپ فرماتے خیریت کے ساتھ اور ہم اللہ کا شکر ادا کرتے ہیں۔ حضرت عطاء فرماتے ہیں کہ میں نے حضرت ابو البختری کے سامنے یہ ذکر کیا تو آپ نے تین مرتبہ فرمایا: انہوں نے یہ طریقہ کہاں سے لیا؟ [مصنف ابن ابي شيبه/ كتاب الأدب/حدیث: 27478]