سیدنا جابر بن عبداللہ رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”خواتین کا نکاح صرف کفو میں کرو، ان کی شادی صرف اولیاء کریں، اور دس درہم سے کم مہر نہیں ہونا چاہیے۔“ اس روایت کا راوی مبشر بن عبید متروک الحدیث ہے، اس کی نقل کردہ احادیث کی متابعت نہیں کی گئی ہے۔ [سنن الدارقطني/ كِتَابُ النِّكَاحِ/حدیث: 3601]

سیدنا جابر بن عبداللہ رضی اللہ عنہ بیان کرتے ہیں: نبی کریم صلی اللہ علیہ وسلم نے ارشاد فرمایا: ”دس درہم سے کم مہر نہیں ہونا چاہیے۔“ [سنن الدارقطني/ كِتَابُ النِّكَاحِ/حدیث: 3602]

سیدنا علی رضی اللہ عنہ فرماتے ہیں: ”دس درہم سے کم مہر نہیں ہونا چاہیے۔“ [سنن الدارقطني/ كِتَابُ النِّكَاحِ/حدیث: 3603]

شعبی فرماتے ہیں: ”دس درہم سے کم مہر نہیں ہونا چاہیے۔“ [سنن الدارقطني/ كِتَابُ النِّكَاحِ/حدیث: 3604]

سیدنا علی رضی اللہ عنہ فرماتے ہیں: ”پانچ درہم سے کم مہر نہیں ہونا چاہیے۔“ [سنن الدارقطني/ كِتَابُ النِّكَاحِ/حدیث: 3605]

ایک اور سند کے ہمراہ یہ منقول ہے: سیدنا علی رضی اللہ عنہ فرماتے ہیں: ”دس درہم سے کم مہر نہیں ہونا چاہیے۔“ [سنن الدارقطني/ كِتَابُ النِّكَاحِ/حدیث: 3606]

امام جعفر صادق رحمہ اللہ اپنے والد (امام محمد باقر رحمہ اللہ) کے حوالے سے نقل کرتے ہیں: سیدنا علی رضی اللہ عنہ فرماتے ہیں: ”مہر وہی ہو گا، جس پر میاں بیوی راضی ہوں گے۔“ [سنن الدارقطني/ كِتَابُ النِّكَاحِ/حدیث: 3607]

عروہ، سیدہ ام حبیبہ رضی اللہ عنہا کے بارے میں نقل کرتے ہیں: وہ پہلے عبداللہ بن جحش کی اہلیہ تھیں، ان کا انتقال ہو گیا، سیدہ ام حبیبہ رضی اللہ عنہا نے حبشہ کی سرزمین کی طرف ہجرت کی تھی، تو نجاشی نے ان کی شادی نبی کریم صلی اللہ علیہ وسلم کے ساتھ کر دی، وہ اس وقت ان لوگوں کے پاس حبشہ میں مقیم تھیں۔ عبدالرزاق نامی راوی نے یہ بات نقل کی ہے: سیدہ ام حبیبہ رضی اللہ عنہا کا پہلا شوہر عبیداللہ بن جحش تھا، جو عیسائی ہو کر مرا تھا۔ [سنن الدارقطني/ كِتَابُ النِّكَاحِ/حدیث: 3608]

عروہ، سیدہ ام حبیبہ رضی اللہ عنہا کے بارے میں نقل کرتے ہیں: وہ عبیداللہ بن جحش کی اہلیہ تھیں، عبیداللہ کا انتقال حبشہ میں ہو گیا، تو نجاشی نے سیدہ ام حبیبہ رضی اللہ عنہا کی شادی نبی کریم صلی اللہ علیہ وسلم کے ساتھ کر دی اور اپنی طرف سے چار ہزار درہم مہر کے طور پر انہیں ادا کیے، اور پھر سیدنا شرحبیل بن حسنہ رضی اللہ عنہ کے ہمراہ انہیں نبی کریم صلی اللہ علیہ وسلم کی خدمت میں (مدینہ منورہ) بھجوایا۔ [سنن الدارقطني/ كِتَابُ النِّكَاحِ/حدیث: 3609]

عبیداللہ اشجعی بیان کرتے ہیں: میں نے سفیان سے کہا: داؤد نے شعبی کے حوالے سے سیدنا علی رضی اللہ عنہ کا یہ فرمان نقل کیا ہے: ”دس درہم سے کم مہر نہیں ہو گا۔“ تو سفیان بار بار ”داؤد، داؤد“ کہتے رہے، گویا وہ ان کا انکار کر رہے تھے، میں نے کہا: شعبہ نے ان کے حوالے سے روایات نقل کی ہیں، تو انہوں نے اپنی پیشانی پر ہاتھ مارا اور ”داؤد، داؤد“ کہتے رہے۔ [سنن الدارقطني/ كِتَابُ النِّكَاحِ/حدیث: 3610]