سیدنا حذیفہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اسلام کے نشانات مٹتے رہیں گے جیسے کسی کپڑے کے نقش و نگار مٹ جاتے ہیں، حتی کہ پتا نہیں چلے گا کہ روزہ کیا ہے، زکوۃ کیا ہے اور قربانی کیا ہے؟ ایک ہی رات میں کتاب اللہ کی تمام آیات مٹا دی جائیں گی، پوری روئے زمین پر ایک آیت تک نہ بچے گی، کچھ بوڑھے مرد اور کچھ بوڑھی عورتیں ہوں گی وہ بتایا کریں گی کہ ہم نے اپنے آباء و اجداد کو کلمہ ” لا الہ الا اللہ “ پڑھتے ہوئے سنا ہے، ہم بھی یہی کلمہ پڑھا کرتے تھے۔ سیدنا صلہ بن زفر نے سیدنا حذیفہ سے کہا: ان لوگوں کو کلمہ کیا فائدہ دے گا جب کہ ان کو روزہ، صدقہ اور قربانی کا تو کچھ پتا نہیں ہو گا؟ سیدنا حذیفہ نے ان سے اس بات سے اعراض کر لیا، صلہ بن زفر نے تین مرتبہ یہی بات کہی اور سیدنا حذیفہ نے تینوں بار اعراض کیا، پھر تیسری مرتبہ ان کی جانب متوجہ ہو کر بولے: اے صلہ! وہ کلمہ ان لوگوں کو دوزخ سے نجات دلائے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8668]

سیدنا عبداللہ بن عمرو رضی اللہ عنہما فرماتے ہیں کہ نبی اکرم صلی اللہ علیہ وسلم نے ارشاد فرمایا: آیات ایک دھاگے میں پروئے ہوئے نگینے ہیں، ان میں سے ایک ٹوٹ جائے تو سب ایک دوسرے کے پیچھے چلے آتے ہیں۔ سیدنا خالد بن حویرث فرماتے ہیں: ہم صبح کے وقت ایک مجلس میں بیٹھے ہوئے تھے، وہاں سیدنا عبداللہ بن عمرو رضی اللہ عنہما بھی تھے، وہاں پر بنی مغیرہ کی ایک عورت بھی تھی، اس کو فاطمہ کہا جاتا تھا، میں نے عبداللہ بن عمرو کو یہ فرماتے ہوئے سنا ہے کہ وہ یزید بن معاویہ ہے۔ اس عورت نے کہا: اے عبداللہ بن عمرو! کیا تم کتاب اللہ میں اسی طرح لکھا پاتے ہو؟ انہوں نے کہا: میں کتاب اللہ میں اس کو اس نام کے ساتھ تو نہیں پاتا ہوں، تاہم معاویہ کی نسل میں ایک ایسا آدمی پاتا ہوں، جو قتل و غارت گری کرے گا، جو لوگوں کے مال حلال سمجھے گا، اس گھر کی اینٹ سے اینٹ بجا دے گا، اگر اس کی حکومت کے وقت تک میں زندہ رہا تو فبہا، ورنہ تو مجھے یاد کر لینا، آپ فرماتے ہیں: ان کی رہائش، ابوقبیس پر تھی، جب حجاج اور ابن زبیر کا زمانہ آیا اور اس عورت نے دیکھا کہ بیت اللہ کو نقصان پہنچایا جا رہا ہے تو بولی: اللہ تعالیٰ عبداللہ بن عمرو رضی اللہ عنہ پر رحمت فرمائے، اس نے یہ حالات ہمیں پہلے ہی بتا دیئے تھے۔ٓ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8669]

سیدنا حذیفہ رضی اللہ عنہ فرماتے ہیں: تم اس وقت کیا کرو گے، جب تم سے حق مانگا جائے گا اور تم دے دو گے، لیکن جب تم اپنا حق مانگو گے تو تمہیں نہیں ملے گا؟ لوگوں نے کہا: ہم صبر کریں گے، آپ نے فرمایا: رب کعبہ کی قسم ہے تب تم جنت میں جاؤ گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8670]

سیدنا عبداللہ بن بریدہ اپنے والد کا یہ بیان نقل کرتے ہیں کہ نبی اکرم صلی اللہ علیہ وسلم نے ارشاد فرمایا: ایک قوم پیدا ہو گی، جن کی آنکھیں چھوٹی چھوٹی ہوں گی، چہرے چوڑے ہوں گے، ان کے چہرے چڑے کی بنی ہوئی ڈھال کی مانند ہوں گے اور اہل اسلام کو شیح (نامی گھاس) اگنے کے مقام (یعنی عرب) سے ملیں گے، گویا کہ میں ان کو دیکھ رہا ہوں، انہوں نے اپنے گھوڑے، مسجد کے ستونوں کے ساتھ باندھے ہیں۔ آپ صلی اللہ علیہ وسلم سے پوچھا گیا: یا رسول اللہ صلی اللہ علیہ وسلم وہ کون لوگ ہیں؟ آپ صلی اللہ علیہ وسلم نے فرمایا: ترکی لوگ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ تاہم شیخین نے ابوالزناد کے ذریعے، اعرج کے واسطے سے سیدنا ابوہریرہ رضی اللہ عنہ سے روایت کیا ہے کہ نبی اکرم صلی اللہ علیہ وسلم نے ارشاد فرمایا: قیامت سے پہلے تم ترکیوں سے جہاد کرو گے، ان کے چہرے چوڑے اور آنکھیں چھوٹی چھوٹی ہوں گی، ان کے ناک چپٹے ہوں گے۔ ان کے چہرے ڈھال کی مانند ہوں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8671]

محمد بن یحیی الصولی النحوی کہتے ہیں: عرب کے شعراء میں سب سے پہلا شخص جس نے ترک کی تعریف کی ہے، وہ علی بن عباس روی ہے اس نے کہا: ٭ جب وہ ثابت ہوتے ہیں تو لوہے کی دیوار کی طرح ہوتے ہیں، ان کی آنکھوں کی سیاہی اور سفیدی بہت گہری معلوم ہوتی ہیں۔ ٭ اور اگر وہ ظاہر ہوں تو دشمنوں پر شعلے بھڑکاتی ہوئی آگ کی طرح ہیں، جس کا دفاع ادھار لیا جاتا ہے۔ ٭ وہ زمین کے بادشاہ ہیں، جب وہ ظاہر ہوتے ہیں، ان کی آنکھیں چھوٹی چھوٹی ہیں، اور وہ خود بڑے بڑے ہیں۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8672]

سیدنا عبداللہ بن مسعود رضی اللہ عنہ فرماتے ہیں: گویا کہ میں ترکوں میں ہوں، وہ تمہارے پاس کئے ہوئے کانوں والے ترکی گھوڑوں پر آئیں گے، وہ ان کو دریائے فرات کے کنارے باندھیں گے۔ سیدنا عبداللہ بن عمرو رضی اللہ عنہما فرماتے ہیں: قریب ہے کہ عجم کی سرزمین میں عرب کا صرف ایک مقتول یا قیدی بچے، اس کے بھی خون کا فیصلہ ہو جائے گا۔ سیدنا زرعہ بن ضمرہ نے کہا: کیا مشرکین، اسلام پر غالب آ جائیں گے؟ انہوں نے پوچھا: تم کس قبیلے سے ہو؟ انہوں نے کہا: بنی عامر بن صعصعہ سے۔ انہوں نے کہا: قیامت سے پہلے بنی عامر کی عورتوں کے کندھے ذی الخلصہ میں ایک دوسرے سے ٹکرائیں گے۔ انہوں نے ان کی یہ بات سیدنا عمر بن خطاب رضی اللہ عنہ کو بتائی، سیدنا عمر رضی اللہ عنہ نے فرمایا: عبداللہ جو کچھ کہہ رہا ہے، اس بارے میں وہ بہتر جانتا ہے، یہ بات آپ نے تین مرتبہ کہی۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8673]

8674 - ابو الاسود الدیلی بیان کرتے ہیں کہ: میں اور زرعہ بن ضمرہ، حضرت ابو موسیٰ اشعری (رضی اللہ عنہ) کے ساتھ حضرت عمر بن خطاب (رضی اللہ عنہ) کی طرف روانہ ہوئے۔ (وہاں) ہم عبداللہ بن عمرو (رضی اللہ عنہما) کے پاس آئے؛ میں ان کے دائیں جانب بیٹھ گیا اور زرعہ ان کے بائیں جانب۔ عبداللہ بن عمرو (رضی اللہ عنہ) نے فرمایا: "قریب ہے کہ عجم کی زمین پر کوئی عرب باقی نہ رہے سوائے اس کے جو قتل کر دیا جائے یا وہ قیدی جس کے خون کا فیصلہ (دشمن کے ہاتھ میں) ہو"۔ زرعہ بن ضمرہ نے پوچھا: "کیا مشرکین اہلِ اسلام پر غالب آ جائیں گے؟" انہوں نے پوچھا: "تم کس قبیلے سے ہو؟" اس نے کہا: "بنو عامر بن صعصعہ سے"۔ انہوں نے فرمایا: "قیامت اس وقت تک قائم نہیں ہوگی جب تک بنو عامر کی عورتوں کے کندھے (طواف کرتے ہوئے) 'ذو الخلصہ' (بت) پر ایک دوسرے سے نہ ٹکرانے لگیں"۔ راوی کہتے ہیں: پھر ہم نے حضرت عمر بن خطاب (رضی اللہ عنہ) سے عبداللہ بن عمرو کے اس قول کا ذکر کیا، تو حضرت عمر (رضی اللہ عنہ) نے تین مرتبہ فرمایا: "عبداللہ بن عمرو جو کہہ رہے ہیں، اسے وہ زیادہ بہتر جانتے ہیں"۔ یہ حدیث شیخین (امام بخاری و مسلم) کی شرائط پر صحیح ہے، لیکن انہوں نے اسے اپنی کتب میں نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8674]

سیدنا عبداللہ بن عمرو رضی اللہ عنہما فرماتے ہیں۔ قریب ہے کہ ” بنی قنطوراء بن کركر “ اہل عراق کو ان کی زمینوں سے نکال دیں گے، میں نے کہا، کیا وہ دوبارہ اپنے وطن واپس آ سکیں گے؟ انہوں نے کہا: کیا تم اس کی خواہش رکھتے ہو؟ انہوں نے کہا: یہ ان کی آسودہ حالی بو گی۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8675]

سیدنا عبداللہ بن عمرو بن العاص رضی اللہ عنہما فرماتے ہیں: قریب ہے کہ ” بنی قنطوراء “ تمہیں سرزمین عراق سے نکال دیں۔ آپ فرماتے ہیں: میں نے کہا: کیا وہ دوبارہ کبھی واپس اپنے وطن آئیں گے؟ انہوں نے فرمایا: یہ بات تمہیں بہت پسند ہے؟ پھر وہ لوٹ کر بھی آئیں گے اور وہاں ان کی زندگی بہت اچھی گزرے گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اور بنو قنطوراء ” ترکوں “ کو کہا جاتا ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8676]