حضرت ابو سعید خدری اور حضرت ابوہریرہ رضی اللہ عنہما سے روایت ہے کہ رسول اللہ صلی اللہ علیہ وسلم نے ایک شخص کو خیبر کا حاکم مقرر کیا، (صدقات کی وصولی کے لیے) وہ آپ صلی اللہ علیہ وسلم کے پاس جنیب نامی کھجوریں لایا، تو رسول اللہ صلی اللہ علیہ وسلم نے اس سے پوچھا: ”کیا خیبر کی تمام کھجوریں ایسی ہیں؟“ تو اس نے کہا: نہیں، اللہ کی قسم! اے اللہ کے رسول! ہم ان کا ایک صاع، دو صاع کے عوض اور دو صاع، تین صاع کے عوض لیتے ہیں، تو رسول اللہ صلی اللہ علیہ وسلم نے فرمایا: ”ایسا مت کرو، ردی اور مخلوط کو دراہم کے عوض فروخت کر دو، پھر دراہم دے کر جنیب خرید لو۔“ [صحيح مسلم/كتاب المساقاة/حدیث: 4082]

امام صاحب اپنے مختلف اساتذہ سے بیان کرتے ہیں کہ حضرت ابو سعید خدری رضی اللہ عنہ بیان کرتے ہیں کہ حضرت بلال رضی اللہ عنہ برنی کھجوریں لائے، تو رسول اللہ صلی اللہ علیہ وسلم نے ان سے پوچھا: ”کہاں سے لائے ہو؟“ تو حضرت بلال رضی اللہ عنہ نے عرض کی: ہمارے پاس نکمی کھجوریں تھیں، تو میں نے ان کے دو صاع کے عوض ایک صاع خرید لیا تاکہ رسول اللہ صلی اللہ علیہ وسلم (انہیں) کھا لیں، تو اس پر رسول اللہ صلی اللہ علیہ وسلم نے فرمایا: ”افسوس! وہ تو خالص سود ہے، وہ تو خالص سود ہے، ایسا مت کرو، لیکن جب تم ایسی کھجوریں خریدنا چاہو تو (اپنی کھجوریں) الگ طور پر بیچ دو، پھر اس (قیمت) سے خرید لو۔“ ابن سہیل کی روایت میں «عِنْدَ ذٰلِكَ» ”اس وقت“ کے الفاظ ہیں۔ [صحيح مسلم/كتاب المساقاة/حدیث: 4083]

حضرت ابو سعید رضی اللہ عنہ سے روایت ہے کہ رسول اللہ صلی اللہ علیہ وسلم کے پاس کھجوریں لائی گئیں، تو آپ صلی اللہ علیہ وسلم نے فرمایا: ”یہ ہماری کھجوروں میں سے تو نہیں ہیں،“ تو (لانے والے) آدمی نے کہا: ہم نے اپنی دو صاع کھجوریں اس کے ایک صاع کے عوض بیچ دی ہیں، تو رسول اللہ صلی اللہ علیہ وسلم نے فرمایا: ”یہ سودی معاملہ ہے، اس کو واپس کرو، پھر ہماری کھجوریں بیچو اور ہمارے لیے ان کو خرید لو۔“ [صحيح مسلم/كتاب المساقاة/حدیث: 4084]

حضرت ابوسعید رضی اللہ عنہ بیان کرتے ہیں کہ رسول اللہ صلی اللہ علیہ وسلم کے عہد مبارک میں ہمیں جمع یعنی مخلوط کھجوریں دی جاتی تھیں، تو ہم دو صاع ایک صاع کے عوض فروخت کر دیتے تھے، تو رسول اللہ صلی اللہ علیہ وسلم تک اس کی اطلاع پہنچ گئی، اس پر آپ صلی اللہ علیہ وسلم نے فرمایا: ”دو صاع کھجور ایک صاع کے عوض، اور دو صاع گندم ایک صاع کے عوض، اور ایک درہم دو درہم کے عوض، سب ناجائز ہیں۔“ [صحيح مسلم/كتاب المساقاة/حدیث: 4085]

ابو نضرہ رحمہ اللہ سے روایت ہے کہ میں نے حضرت ابن عباس رضی اللہ عنہما سے کرنسی کے باہمی تبادلہ کے بارے میں سوال کیا تو انہوں نے پوچھا، کیا ہاتھوں ہاتھ ہے؟ میں نے کہا، جی ہاں۔ کہا، اس میں کوئی حرج نہیں ہے، میں نے اس بات کی خبر حضرت ابو سعید رضی اللہ عنہ کو دی، میں نے کہا، میں نے حضرت ابن عباس رضی اللہ عنہما سے نقدی کے تبادلہ کے بارے میں سوال کیا، تو انہوں نے پوچھا، کیا نقد بنقد ہے؟ میں نے کہا، جی ہاں۔ انہوں نے کہا، اس میں کوئی حرج نہیں ہے۔ حضرت ابو سعید رضی اللہ عنہ نے کہا، کیا انہوں نے یہ بات کہی ہے؟ ہم انہیں ابھی لکھتے ہیں تو تمہیں یہ فتویٰ نہیں دیں گے، حضرت ابو سعید رضی اللہ عنہ نے بتایا، اللہ کی قسم! رسول اللہ صلی اللہ علیہ وسلم کے بعض خادم آپ صلی اللہ علیہ وسلم کے پاس کھجوریں لائے، تو آپ صلی اللہ علیہ وسلم نے ان پر تعجب کا اظہار کیا، اور فرمایا، ”گویا یہ ہماری سرزمین کی کھجوریں نہیں ہیں“ خادم نے کہا، ہمارے علاقہ کی کھجور یا کھجوروں میں، اس سال کچھ خرابی تھی، تو میں نے یہ لے کر، کچھ زائد کھجوریں دے دیں، تو آپ صلی اللہ علیہ وسلم نے فرمایا: ”تو نے اضافہ کیا، زیادہ دیں، تو نے سود دیا، اس معاملہ کے قریب نہ جانا، جب تمہیں اپنی کھجوروں کے بارے میں کچھ خلجان ہو، تو انہیں فروخت کر دو، پھر جو کھجوریں چاہو خرید لو۔“ [صحيح مسلم/كتاب المساقاة/حدیث: 4086]

ابو نضرہ رحمہ اللہ سے روایت ہے کہ میں نے حضرت ابن عمر رضی اللہ عنہما اور حضرت ابن عباس رضی اللہ عنہما سے نقدی کے باہمی تبادلے کے بارے میں سوال کیا، تو انہوں نے اس میں کوئی حرج نہیں سمجھا؛ میں حضرت ابو سعید خدری رضی اللہ عنہ کے پاس بیٹھا ہوا تھا، تو میں نے ان سے بھی «صرف» (نقدی کا باہمی تبادلہ) کے بارے میں پوچھ لیا، تو انہوں نے کہا: ایک جنس کی صورت میں جو اضافہ ہے وہ سود ہے، تو میں نے ان دونوں (ابن عمر اور ابن عباس رضی اللہ عنہما) کے قول کی بنا پر اس کا انکار کیا، تو ابو سعید رضی اللہ عنہ نے کہا: میں تو تمہیں وہی بات بتا رہا ہوں جو میں نے رسول اللہ صلی اللہ علیہ وسلم سے سنی ہے؛ آپ صلی اللہ علیہ وسلم کی کھجوروں کا نگران آپ صلی اللہ علیہ وسلم کے پاس ایک اچھی قسم کی کھجوروں کا ایک صاع لایا اور نبی اکرم صلی اللہ علیہ وسلم کی کھجوریں (کم تر) قسم کی تھیں، تو نبی اکرم صلی اللہ علیہ وسلم نے اس سے پوچھا: ”تم یہ کہاں سے لائے ہو؟“ اس نے جواب دیا: میں دو صاع لے کر گیا اور ان کے عوض یہ ایک صاع خرید لایا، کیونکہ ان کا بازار میں بھاؤ یہ ہے اور ان کا نرخ یہ (یعنی اچھی کھجوروں کا نرخ زیادہ ہے اور نکمی کا کم ہے)، تو رسول اللہ صلی اللہ علیہ وسلم نے فرمایا: ”تم پر افسوس ہے! تم نے سودی معاملہ کیا ہے؛ جب تم اچھی کھجوریں لینا چاہو تو اپنی کھجوریں ایک سودے کی صورت میں فروخت کر دو، پھر اپنے سامان (قیمت) سے جو چاہو کھجوریں خرید لو۔“ ابو سعید رضی اللہ عنہ نے سوال کیا: کھجوروں کا کھجوروں سے تبادلے پر سود زیادہ صادق آتا ہے یا چاندی کا چاندی سے تبادلے پر؟ (یعنی اگر کھجور کا کھجور سے تبادلے میں کمی و بیشی سود ہے تو چاندی کا چاندی سے تبادلے میں کمی و بیشی بالاولیٰ سود ہے)۔ ابو نضرہ کہتے ہیں: میں بعد میں حضرت ابن عمر رضی اللہ عنہما کو ملا تو انہوں نے مجھے اس سے منع کر دیا، لیکن میں ابن عباس رضی اللہ عنہما کو نہیں ملا، لیکن مجھے ابو صبہاء نے بتایا کہ میں نے اس معاملے کے بارے میں ابن عباس رضی اللہ عنہما سے مکہ مکرمہ میں سوال کیا تو انہوں نے اس کو ناپسند قرار دیا۔ [صحيح مسلم/كتاب المساقاة/حدیث: 4087]

حضرت ابوسعید خدری رضی اللہ عنہ بیان کرتے ہیں کہ ”دینار دینار کے عوض اور درہم درہم کے عوض برابر برابر ہوں گے، جس نے زیادہ دیا یا زیادہ لیا تو وہ سود ہو گا“، ابوصالح رحمہ اللہ کہتے ہیں: میں نے ان سے کہا کہ عبداللہ بن عباس رضی اللہ عنہما اس کے خلاف بتاتے ہیں، تو حضرت ابوسعید رضی اللہ عنہ نے کہا: میں عبداللہ بن عباس رضی اللہ عنہما کو مل چکا ہوں، میں نے ان سے پوچھا: بتائیے، یہ جو کچھ آپ بیان کرتے ہیں، کیا آپ نے اسے رسول اللہ صلی اللہ علیہ وسلم سے سنا ہے یا اسے اللہ عزوجل کی کتاب میں پایا ہے؟ تو انہوں نے جواب دیا: نہ میں نے یہ رسول اللہ صلی اللہ علیہ وسلم سے سنا ہے اور نہ ہی اسے اللہ کی کتاب میں پایا ہے (یعنی نہ قرآن سے اخذ کیا ہے)، لیکن مجھے تو حضرت اسامہ بن زید رضی اللہ عنہما نے بتایا کہ رسول اللہ صلی اللہ علیہ وسلم نے فرمایا: ”سود صرف ادھار میں ہے۔“ [صحيح مسلم/كتاب المساقاة/حدیث: 4088]

امام صاحب اپنے چار اساتذہ سے بیان کرتے ہیں، الفاظ عمرو کے ہیں، حضرت ابن عباس رضی اللہ عنہما بیان کرتے ہیں کہ مجھے حضرت اسامہ بن زید رضی اللہ عنہ نے خبر دی کہ نبی اکرم صلی اللہ علیہ وسلم نے فرمایا: ”سود صرف ادھار میں ہے۔“ [صحيح مسلم/كتاب المساقاة/حدیث: 4089]

حضرت عبداللہ بن عباس رضی اللہ عنہما حضرت اسامہ بن زید رضی اللہ عنہما سے روایت کرتے ہیں کہ رسول اللہ صلی اللہ علیہ وسلم نے فرمایا: ”جو تبادلہ نقد بنقد ہو وہ سودی معاملہ نہیں ہے۔“ [صحيح مسلم/كتاب المساقاة/حدیث: 4090]

عطاء بن ابی رباح رحمہ اللہ بیان کرتے ہیں کہ حضرت ابو سعید خدری رضی اللہ عنہ، ابن عباس رضی اللہ عنہما سے ملے، تو ان سے پوچھا: آپ بیعِ صرف کے بارے میں جو کہتے ہیں، بتائیے کیا وہ ایسی بات ہے جو آپ نے رسول اللہ صلی اللہ علیہ وسلم سے سنی ہے یا وہ بات آپ نے اللہ عزوجل کی کتاب سے اخذ کی ہے؟ تو ابن عباس رضی اللہ عنہما نے جواب دیا: ہرگز نہیں، میں کچھ نہیں کہتا، کیونکہ رسول اللہ صلی اللہ علیہ وسلم کے بارے میں تو آپ زیادہ جانتے ہیں، رہا اللہ کی کتاب کا معاملہ، تو میں نے اس سے بھی یہ معلوم نہیں کیا، لیکن مجھے تو اسامہ بن زید رضی اللہ عنہما نے بتایا ہے کہ رسول اللہ صلی اللہ علیہ وسلم نے فرمایا: ”خبردار، سود صرف ادھار میں ہے۔“ [صحيح مسلم/كتاب المساقاة/حدیث: 4091]