حضرت عبید اللہ بن عمر رحمہ اللہ فرماتے ہیں کہ حضرت نافع رحمہ اللہ نے ایک کبوتر کو پتھر مارا اور اسے گرا دیا، پھر حضرت عبد اللہ بن عمر رضی اللہ عنہما نے اسے پکڑ کر اپنے پاس موجود ایک تیشے سے ذبح کرنا چاہا لیکن وہ ان کے ذبح کرنے سے پہلے ان کے ہاتھ میں مرگئی تو انہوں نے اسے پھینک دیا۔ [مصنف ابن ابي شيبه/كتاب الصيد/حدیث: 20795]

حضرت عطاء رحمہ اللہ فرماتے ہیں کہ اگر تم شکار تک پہنچنے کی کوشش کرو اور وہ تمہارے پہنچنے سے پہلے مرجائے تو اس کھانے میں کوئی حرج نہیں اور اگر تم اسے پکڑ لو اور تمہیں ذبح کرنے کا موقع بھی ملے لیکن تم اس کو ذبح نہ کرو تو اب اسے مت کھاؤ۔ [مصنف ابن ابي شيبه/كتاب الصيد/حدیث: 20796]

حضرت شعبہ رحمہ اللہ فرماتے ہیں کہ میں نے حضرت حکم رحمہ اللہ سے سوال کیا کہ اگر کوئی آدمی شکار کو پہنچے اور اس میں زندگی کی رمق موجود ہو لیکن وہ کتے کو چھوڑے رکھے یہاں تک کہ کتا اسے مار ڈالے تو اس شکار کا کیا حکم ہے؟ انہوں نے فرمایا کہ اسے مت کھائے۔ [مصنف ابن ابي شيبه/كتاب الصيد/حدیث: 20797]

حضرت حسن رحمہ اللہ فرماتے ہیں کہ اگر کسی آدمی نے اپنے کتے کو شکارپر چھوڑا، جب آدمی شکار تک پہنچا تو اس میں زندگی کی رمق باقی تھی لیکن وہ اس کے ہاتھ میں مرگیا اب اگر اس کا کتا سدھایا ہوا تھا تو وہ آدمی اسے کھا سکتا ہے۔ [مصنف ابن ابي شيبه/كتاب الصيد/حدیث: 20798]

حضرت معاویہ بن قرہ رحمہ اللہ فرماتے ہیں کہ ان میں سے کوئی آدمی شکار کو دیکھے بغیر بسم اللہ پڑھ کر اپنے کتے کو روانہ کر دیتا اور جب کتا شکار کرلیتا تو وہ اس شکار کو کھا لیتا۔ [مصنف ابن ابي شيبه/كتاب الصيد/حدیث: 20799]

حضرت حجاج رحمہ اللہ فرماتے ہیں کہ میں نے حضرت عطاء رحمہ اللہ سے ان کتوں کے قتل کے بارے میں سوال کیا جو اپنے باندھے جانے کی جگہ سے بھاگ جائیں اور شکار کرلیں تو اس کا شکار کا کیا حکم ہے؟ انہوں نے فرمایا اس میں کچھ حرج نہیں۔ [مصنف ابن ابي شيبه/كتاب الصيد/حدیث: 20800]

حضرت معروف رحمہ اللہ فرماتے ہیں کہ ہم اپنے کتوں کو لے کر نکلے اور حضرت ابن عمر رضی اللہ عنہما سے ہماری ملاقات ہوئی۔ انہوں نے فرمایا کہ جب تم اپنے کتوں کو روانہ کرو تو بسم اللہ پڑھو اور یہ کہو:: اے اللہ ان کے دلوں کو درست راستہ دکھا۔ [مصنف ابن ابي شيبه/كتاب الصيد/حدیث: 20801]

حضرت عبد اللہ بن ابی بکر رحمہ اللہ فرماتے ہیں کہ میرے والد جب اپنے کتوں کو شکار کے لیے روانہ کرتے تو یہ دعا وہ کرتے تھے: اے اللہ! ان کے دلوں کو سیدھا راستہ دکھا۔ [مصنف ابن ابي شيبه/كتاب الصيد/حدیث: 20802]

حضرت عدی بن حاتم رضی اللہ عنہ فرماتے ہیں کہ اگر کتا شکار کا خون پی لے تو اس کا شکار مت کھاؤ کیونکہ جو تم نے اسے سکھایا ہے وہ اس نے نہیں سیکھا۔ [مصنف ابن ابي شيبه/كتاب الصيد/حدیث: 20803]

حضرت عطاء رحمہ اللہ فرماتے ہیں کہ کتا اگر شکار کا گوشت کھائے تو اسے مت کھاؤ لیکن اگر وہ خون پیئے تو کھا سکتے ہو۔ [مصنف ابن ابي شيبه/كتاب الصيد/حدیث: 20804]