حضرت اشعث فرماتے ہیں کہ حضرت حسن بصری اور حضرت شعبی ان دونوں حضرات نے ارشاد فرمایا: خطا کی صورت میں دیت خاندان پر ہوگی اور عمد اور صلح کی صورت میں دیت نقصان پہنچانے والے کے مال میں لازم ہوگی۔ [مصنف ابن ابي شيبه/كتاب الديات/حدیث: 29221]

حضرت ہشام بن عروہ فرماتے ہیں کہ ان کے والد حضرت عروہ فرمایا کرتے تھے قتل عمد کی صورت میں خاندان والے دیت ادا نہیں کریں گے مگر اپنی چاہت سے اس لیے کہ قبیلہ غلطی کی صور ت میں دیت ادا کرتا ہے۔ [مصنف ابن ابي شيبه/كتاب الديات/حدیث: 29222]

حضرت جابر فرماتے ہیں کہ حضرت عامر نے ارشاد فرمایا: مسلمانوں نے اس بات پر اتفاق کیا تھا کہ خاندان والے دیت ادا نہیں کریں گے صلح کی صورت میں نہ ہی عمد کی صورت میں اور نہ ہی اعتراف کی صورت میں۔ [مصنف ابن ابي شيبه/كتاب الديات/حدیث: 29223]

حضرت مالک بن انس رحمہ اللہ فرماتے ہیں کہ امام زہری نے ارشاد فرمایا: سنت گزرچکی ہے اس میں کہ خاندان والے کسی عمد کی دیت ادا نہیں کریں گے مگر اپنی خوشنودی سے۔ [مصنف ابن ابي شيبه/كتاب الديات/حدیث: 29224]

حضرت قاسم بن نافع فرماتے ہیں کہ حضرت علی بن ماجدہ رحمہ اللہ نے فرمایا: میں نے کسی بچہ سے لڑائی کی اور میں نے اس کی ناک کاٹ دی پھر مجھے حضرت ابوبکر کے پاس لایا گیا۔ انہوں نے میری پیمائش کی تو مجھ پر قصاص لازم نہ پایا اور آپ نے میرے خاندان والوں پر دیت کو لازم فرمایا۔ [مصنف ابن ابي شيبه/كتاب الديات/حدیث: 29225]

حضرت ہشام فرماتے ہیں کہ حضرت حسن بصری نے بچہ اور مجنون دونوں کے بارے میں ارشاد فرمایا: ان دونوں کا غلطی سے یا جان بوجھ کر کسی کو نقصان پہنچانا ان کے خاندان والوں کے حق میں برابر ہے۔ [مصنف ابن ابي شيبه/كتاب الديات/حدیث: 29226]

حضرت عبیدہ فرماتے ہیں کہ حضرت ابراہیم نے ارشاد فرمایا: بچہ کا جان بوجھ کر اور غلطی سے نقصان پہنچانا خاندان والوں کے حق میں برابر ہے۔ [مصنف ابن ابي شيبه/كتاب الديات/حدیث: 29227]

حضرت شعبی فرماتے ہیں کہ بچہ کا جان بوجھ کر اور غلطی سے نقصان پہنچانا برابر ہے۔ [مصنف ابن ابي شيبه/كتاب الديات/حدیث: 29228]

حضرت حکم اور حضرت حماد نے یہی بات ابراہیم سے نقل کی ہے۔ ان دونوں حضرات (شعبی اور ابراہیم) نے فرمایا: بچہ کا جان بوجھ کر اور غلطی سے نقصان پہنچانا برابر ہے۔ [مصنف ابن ابي شيبه/كتاب الديات/حدیث: 29229]

حضرت شعبی فرماتے ہیں کہ سب سے پہلے تنخواہ مقرر کرنے والے حضرت عمر بن خطاب ہیں اور آپ نے مکمل دیت تین سالوں میں مقرر فرمائی: دیت کے دو تہائی حصے دوسالوں میں اور آدھا حصہ دو سالوں میں اور ایک تہائی ایک سال میں اور جو اس سے کم ہو تو وہ اسی سال میں ادا کرنی ہوگی۔ [مصنف ابن ابي شيبه/كتاب الديات/حدیث: 29230]