حضرت عثمان بن غیاث فرماتے ہیں کہ حضرت عکرمہ اور حضرت حسن بصری ان دونوں حضرات نے ارشاد فرمایا: یہودی اور عیسائی کی دیت چار ہزار درہم ہے اور مجوسی کی دیت آٹھ سودرہم ہے۔ [مصنف ابن ابي شيبه/كتاب الديات/حدیث: 29251]

حضرت یحییٰ بن سعید فرماتے ہیں کہ حضرت سلیمان بن یسار نے ارشاد فرمایا: پہلے زمانے میں قاضی آتش پرست کی دیت میں آٹھ سو درہم کا فیصلہ کرتے تھے یہودی اور عیسائی کی دیت میں اتنی دیت کا فیصلہ فرماتے جتنی قبیلہ والے اپنے درمیان آپس میں مل کر ادا کرسکتے پھر دیت کا معاملہ چھ ہزار درہم کی طرف لوٹ آیا۔ [مصنف ابن ابي شيبه/كتاب الديات/حدیث: 29252]

حضرت عبدالملک فرماتے ہیں کہ حضرت عطاء نے ارشاد فرمایا: یہودی اور عیسائی کی دیت چار ہزار درہم ہے، اور آتش پرست کی دیت آٹھ سو درہم ہے۔ [مصنف ابن ابي شيبه/كتاب الديات/حدیث: 29253]

حضرت اشعث فرماتے ہیں کہ حضرت نافع اور حضرت عمرو بن دینار یہ دونوں حضرات فرمایا کرتے تھے، یہودی اور عیسائی کی دیت چار ہزار درہم ہے۔ [مصنف ابن ابي شيبه/كتاب الديات/حدیث: 29254]

حضرت سعید بن مسیب فرماتے ہیں کہ حضرت عثمان نے یہودی اور عیسائی کی دیت میں چار ہزار درہم کا فیصلہ فرمایا۔ [مصنف ابن ابي شيبه/كتاب الديات/حدیث: 29255]

حضرت عبدالرحمن بن بیلمانی فرماتے ہیں کہ رسول اللہ صلی اللہ علیہ وآلہ وسلم نے قصاصاً اہل قبلہ میں سے ایک آدمی کو قتل کیا جس نے ایک ذمی شخص کو قتل کیا تھا اور آپ صلی اللہ علیہ وآلہ وسلم نے فرمایا: میں زیادہ حقدار ہوں اپنے وعدہ کو پورا کرنے کا۔ [مصنف ابن ابي شيبه/كتاب الديات/حدیث: 29256]

حضرت حکم فرماتے ہیں کہ حضرت علی رضی اللہ عنہ حضرت عبداللہ بن مسعود ان دونوں حضرات نے ارشاد فرمایا: جب مسلمان کسی یہودی یا عیسائی کو قتل کردے تو قصاصاًاسے بھی قتل کیا جائے گا۔ [مصنف ابن ابي شيبه/كتاب الديات/حدیث: 29257]

حضرت حمید فرماتے ہیں کہ حضرت میمون بن مہران نے ارشاد فرمایا: مسلمانوں کا ایک آدمی یہود کے آدمی کے پاس سے گزرا تو اس یہودی کی بیوی اس کو پسند آگئی اس نے اس کو قتل کر کے اس کی بیوی کو قبضہ میں لے لیا اور پھر اس بارے میں گورنر نے حضرت عمر عبدالعزیز کو خط لکھا تو حضرت عمر نے جواب لکھا: کہ اس مسلمان کو اس کے سر پر ست کے سپردکر دو راوی کہتے ہیں: ہم نے اس کو اس کی ماں کے سپرد کردیا اس کی ماں نے اس کا سر پتھر یا کونے والی سیل سے توڑ دیاراوی کہتے ہیں مجھے معلوم نہیں کہ اس کے خلاف بینہ قائم ہوگیا تھا یا اس نے اعتراف کیا تھا۔ [مصنف ابن ابي شيبه/كتاب الديات/حدیث: 29258]

حضرت عبدالملک بن میسرہ فرماتے ہیں کہ حضرت نزال بن سبرہ نے ارشاد فرمایا: کوفہ کے شہسواروں میں سے ایک آدمی نے مقام حیرہ کے باشندوں میں سے ایک عیسائی کو قتل کردیا تو حضرت عمر نے اس کے بارے میں لکھا کہ اس قاتل کو پکڑ کے اس عیسائی کے بھائی کے حوالے کردو پس لوگوں نے اس آدمی کو عیسائی کے بھائی کے حوالے کردیا پس اس نے اسے قتل کردیا پھر حضرت عمر کا دوبارہ خط آیا: کہ تم اس کو قتل نہ کرنا لیکن اس نے اسے قتل کردیا تھا۔ [مصنف ابن ابي شيبه/كتاب الديات/حدیث: 29259]

حضرت اعمش فرماتے ہیں کہ ابراہیم نے ارشاد فرمایا: معاہد (عہد والے غیر مسلم) کے بدلے میں مسلمان کو قتل کیا جائے گا۔ [مصنف ابن ابي شيبه/كتاب الديات/حدیث: 29260]