حضرت محمد بن علی فرماتے ہیں کہ ایک رات رسول اللہ صلی اللہ علیہ وآلہ وسلم نماز پڑھ رہے تھے اس درمیان جب آپ صلی اللہ علیہ وآلہ وسلم نے اپنا ہاتھ زمین پر رکھا تو بچھو نے آپ صلی اللہ علیہ وآلہ وسلم کو ڈس لیا۔ رسول اللہ صلی اللہ علیہ وآلہ وسلم نے اپنی جوتی سے اس کو پکڑا اور اس کو مار دیا۔ جب نماز سے فارغ ہوئے تو ارشاد فرمایا: اللہ بچھو کو رسوا کرے! یہ کسی نمازی کو اور اس کے علاوہ کو نہیں چھوڑتا اور نہ کسی مومن کو اور اس کے علاوہ کو نہیں چھوڑتا، پھر آپ صلی اللہ علیہ وآلہ وسلم نے نمک اور پانی منگوایا پھر اس کو برتن میں ڈال دیا۔ اور اسے اپنی انگلی پر ڈسنے والی جگہ ڈالتے اور ملتے جاتے۔ اور آپ صلی اللہ علیہ وآلہ وسلم نے معوذتین کے ذریعہ اس پر دم فرمایا۔ [مصنف ابن ابي شيبه/كتاب الدعاء/حدیث: 31788]

حضرت قعقاع فرماتے ہیں کہ حضرت ابراہیم فرماتے ہیں! بچھو کے ڈنک سے بچنے کا تعویذ یوں ہے۔ شَجَّۃُ قَرْنِیَّۃٍ مَلِحَۃٍ بحر قفطا۔ [مصنف ابن ابي شيبه/كتاب الدعاء/حدیث: 31789]

حضرت ابراہیم فرماتے ہیں کہ حضرت اسود نے ارشاد فرمایا: میں نے یہ کلمات حضرت عائشہ رضی اللہ عنہا پر پیش کیے تو آپ نے فرمایا: یہ عہد و اقرار کے الفاظ ہیں۔ [مصنف ابن ابي شيبه/كتاب الدعاء/حدیث: 31790]

حضرت زیاد بن حدیر فرماتے ہیں کہ میں نے سنا کہ حضرت علاء بن الحضرمی اپنے ماموں سے بیان کر رہے تھے کہ سمندر میں داخل ہوتے وقت میری زبان پر یہ دعا تھی: اے اللہ! اے بردبار اے بلند وبالا، اے بڑے بزرگ۔ [مصنف ابن ابي شيبه/كتاب الدعاء/حدیث: 31791]

حضرت ابوہریرہ فرماتے ہیں نبی کریم صلی اللہ علیہ وآلہ وسلم نے ارشاد فرمایا: جب تم مرغ کی آواز سنو تو اللہ سے اس کا فضل مانگو، پس وہ فرشتہ کو دیکھتا ہے، اور جب تم گدھے کی آواز سنو تو تم شیطان سے اللہ کی پناہ مانگو، پس وہ شیطان کو دیکھتا ہے۔ [مصنف ابن ابي شيبه/كتاب الدعاء/حدیث: 31792]

حضرت جابر بن عبد اللہ رضی اللہ عنہ فرماتے ہیں کہ میں نے رسول اللہ صلی اللہ علیہ وآلہ وسلم کو یہ فرماتے ہوئے سنا ہے کہ: جب تم رات کو کتوں کے بھونکنے کی اور گدھوں کی آواز سنو تو اللہ کی پناہ مانگو، پس بیشک یہ وہ چیزیں دیکھتے ہیں جو تم نہیں دیکھتے۔ [مصنف ابن ابي شيبه/كتاب الدعاء/حدیث: 31793]

حضرت عطاء فرماتے ہیں کہ حضرت ابن عباس رضی اللہ عنہما جب گدھے کی آواز سنتے تو یوں دعا فرماتے: اللہ کے نام سے شروع کرتا ہوں جو نہایت مہربان اور رحم کرنے والا ہے، میں اللہ کی پناہ لیتا ہوں جو سننے والا، جاننے والا ہے شیطان مردود سے۔ [مصنف ابن ابي شيبه/كتاب الدعاء/حدیث: 31794]

حضرت انس بن مالک رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: کوئی بھی بندہ اللہ سے تین مرتبہ جنت کا سوال نہیں کرتا مگر جہنم کہتی ہے: اے اللہ! اس کو مجھ سے بچا لے۔ [مصنف ابن ابي شيبه/كتاب الدعاء/حدیث: 31795]

حضرت مسعر فرماتے ہیں کہ حضرت عبد الاعلی التیمی رحمہ اللہ نے ارشاد فرمایا: جنت اور جہنم دونوں بنو آدم کی پکار سنتی ہیں، پس جب آدمی جنت کا سوال کرتا ہے، تو جنت کہتی ہے، اے اللہ! تو اس کو مجھ میں داخل فرما۔ اور جب وہ جہنم سے پناہ مانگتا ہے تو جہنم کہتی ہے: اے اللہ! تو اس کو مجھ سے اپنی پناہ میں لے لے۔ [مصنف ابن ابي شيبه/كتاب الدعاء/حدیث: 31796]

حضرت عامر بن شقیق فرماتے ہیں کہ حضرت ابو وائل نے ارشاد فرمایا: حضرت عبد اللہ (بن مسعود) رضی اللہ عنہ جب بھی کسی مجمع کی جگہ یا دسترخوان پر حاضر ہوتے تو کھڑے نہ ہوتے یہاں تک کہ وہ اللہ کی حمد و ثنا بیان کرتے اور نبی کریم صلی اللہ علیہ وآلہ وسلم پر درود بھیجتے۔ اور وہ بازار میں سب سے غفلت والی جگہ تلاش کرتے پھر اس جگہ میں بیٹھتے اور اللہ کی حمد و ثنا بیان کرتے اور نبی صلی اللہ علیہ وآلہ وسلم پر درود بھیجتے۔ [مصنف ابن ابي شيبه/كتاب الدعاء/حدیث: 31797]