حضرت ابو تمیمہ فرماتے ہیں کہ حضرت عمر رضی اللہ عنہ نے حضرت اشعری رضی اللہ عنہ کو خط لکھا کہ حضرت دانیال علیہ السلام کو بیری اور ریحان کے پانی سے غسل دو اور ان کی نماز جنازہ پڑھی جائے، کیونکہ وہ نبی ہیں جنہوں نے اپنے رب سے دعا کی تھی کہ مسلمان انہیں دفن کریں۔ [مصنف ابن ابي شيبه/كتاب البعوث والسرايا/حدیث: 36083]

حضرت انس رضی اللہ عنہ فرماتے ہیں کہ جب ہم نے تستر کو فتح کیا تو ہم نے تابوت میں ایک آدمی پایا جس کی ناک ایک ذراع لمبی تھی۔ وہ لوگ اس کے ذریعے غلبہ اور بارش طلب کیا کرتے تھے۔ حضرت ابو موسیٰ نے اس بارے میں حضرت عمر کو خط لکھا تو حضرت عمر نے جواب میں فرمایا کہ یہ انبیاء میں سے ایک نبی ہیں، آگ انبیاء کو نہیں کھاتی اور زمین انبیاء کو نہیں کھاتی۔ اور انہیں کسی ایسی جگہ دفن کردو جہاں تمہارے اور تمہارے ایک ساتھی کے سوا کوئی نہ جانتا ہو۔ چناچہ میں اور حضرت ابوموسیٰ ان کی میت کو لے کر گئے اور اسے دفن کردیا۔ [مصنف ابن ابي شيبه/كتاب البعوث والسرايا/حدیث: 36084]

حضرت حبیب ابو یحییٰ فرماتے ہیں کہ حضرت خالد بن زید نے، جن کی آنکھ سوس میں شہید ہوگئی تھی، فرمایا کہ ہم نے سوس کا محاصرہ کیا، اس دوران ہمیں بہت مشقت اٹھانا پڑی۔ لشکر کے امیر حضرت ابو موسیٰ تھے۔ وہاں کے سردار نے اپنے لیے اور اپنے ساتھ والوں کے لیے امان حاصل کی تو حضرت ابو موسیٰ نے اس سے فرمایا کہ انہیں الگ کردو۔ وہ انہیں الگ کرنے لگا۔ حضرت ابو موسیٰ نے اپنے ساتھیوں سے فرمایا کہ مجھے امید ہے کہ اللہ اسے خود اس کی اپنی ذات کے بارے میں دھوکے میں ڈال دے گا۔ چناچہ اس نے انہیں الگ کردیا اور اللہ کے اس دشمن نے خود کو چھوڑ دیا۔ حضرت ابو موسیٰ نے حکم دیا کہ اسے گرفتار کرکے لایا جائے، وہ لایا گیا اور اس نے اپنی جان کے بدلے بہت سا مال دینے کی فرمائش کی، لیکن حضرت ابو موسیٰ نے انکار کردیا اور اس کی گردن اڑا دی۔ [مصنف ابن ابي شيبه/كتاب البعوث والسرايا/حدیث: 36085]

ایک اور سند سے یونہی منقول ہے۔ [مصنف ابن ابي شيبه/كتاب البعوث والسرايا/حدیث: 36086]

حضرت انس رضی اللہ عنہ فرماتے ہیں کہ میں تستر کی لڑائی میں حضرت ابو موسیٰ اشعری رضی اللہ عنہ کے ساتھ شریک تھا۔ ایک دن میری صبح کی نماز قضا ہوگئی اور میں آدھا دن گزرنے تک نما زنہ پڑھ سکا۔ مجھے اس نماز کے بدلے ساری دنیا بھی مل جائے تو مجھے خوشی نہ ہوگی۔ [مصنف ابن ابي شيبه/كتاب البعوث والسرايا/حدیث: 36087]

حضرت ابو فرقد فرماتے ہیں کہ جب ہم نے حضرت ابو موسیٰ رضی اللہ عنہ کی قیادت میں اہواز کے بازار کو فتح کیا تو مشرکین کا ایک آدمی بھاگا۔ دو مسلمان بھی اس کے پیچھے بھاگے، دوڑتے ہوئے ایک مسلمان نے اس سے کہا ”مترس“ یہ سن کر وہ رک گیا، انہوں نے اسے پکڑ لیا اور حضرت ابو موسیٰ کے پاس لے آئے۔ حضرت ابو موسیٰ قیدیوں کے سر قلم کررہے تھے، جب اس آدمی کی باری آئی تو اسے پکڑنے والے مسلمانوں نے کہا کہ اسے امان دی گئی ہے۔ حضرت ابو موسیٰ نے پوچھا کہ اسے کیسے امان دی گئی؟ اس آدمی نے کہا کہ یہ بھاگ رہا تھا میں نے اسے کہا ”مترس“ تو یہ کھڑا ہوگیا۔ حضرت ابو موسیٰ نے پوچھا کہ مترس کا کیا مطلب ہے؟ اس نے کہا کہ اس کا مطلب ہے مت ڈرو۔ حضرت ابو موسیٰ نے فرمایا کہ یہ امان ہے۔ اس آدمی کو جانے دو۔ لہٰذا اس آدمی کو آزاد کردیا گیا۔ [مصنف ابن ابي شيبه/كتاب البعوث والسرايا/حدیث: 36088]

حضرت سدیس عدوی فرماتے ہیں کہ ہم نے اپنے امیر کے ساتھ ابلہ کی لڑائی میں حصہ لیا۔ وہاں ہم کامیاب ہوئے، پھر ہم اہواز گئے، وہاں زط اور اساورہ کے لوگ تھے۔ ہم نے ان سے زبردست لڑائی کی اور ہم کامیاب ہوگئے۔ اس میں بہت سے قیدی ہمارے ہاتھ لگے اور ہم نے انہیں آپس میں تقسیم کرلیا۔ بعض لوگوں کو ایک اور بعض کو دو قیدی ملے۔ ہم نے اپنی مملوکہ عورتوں سے جماع بھی کیا۔ حضرت عمر رضی اللہ عنہ کو اس کی اطلاع ہوئی تو انہوں نے ہمیں خط لکھا جس میں تحریر تھا کہ تم زمین آباد کرنے کی طاقت نہیں رکھتے، سب قیدیوں کو آزاد کردو اور تم ان میں سے کسی کے مالک نہیں ہو۔ ان کے پاس جتنی زمین ہے اس کے بقدر ان سے خراج لو۔ چناچہ اس حکم کے آنے کے بعد ہم نے سب قیدیوں کو آزاد کردیا۔ ہمارے کتنے ہی بچے تھے جن پر الہماس غالب آگیا! جن زط لوگوں پر ہم غالب آئے تھے ان میں سے بہت سے عربوں کے مشابہ تھے۔ لمبی داڑھی رکھتے تھے، ازار باندھتے تھے اور ٹانگوں کے گرد حلقہ بنا کر بیٹھتے تھے۔ ان کے بارے میں حضرت عمر کو خط لکھا گیا تو آپ نے فرمایا کہ ان لوگوں کو اپنے قریب کرو، ان میں سے جو اسلام قبول کرلے اسے مسلمانوں کے ساتھ شامل کردو۔ جب لوگوں کے مقابلے میں ان کی آزمائش ہوئی تو ان میں کوئی لڑنے کی قوت نہ نکلی۔ اساورہ ان سے زیادہ زور آور تھے۔ ان کے بارے میں بھی حضرت عمر کو لکھا گیا تو آپ نے جواب میں فرمایا کہ ان کو قریب کرو جو اسلام قبول کرلے اسے مسلمانوں کے ساتھ ملا دو۔ [مصنف ابن ابي شيبه/كتاب البعوث والسرايا/حدیث: 36089]

حضرت مہلب فرماتے ہیں کہ ہم نے اہل مناذر پر چڑھائی کی اور ان پر غلبہ پا لیا۔ گویا ان کا مسلمانوں کے ساتھ عہد تھا۔ جس کی وجہ سے حضرت عمر نے ہمیں خط میں لکھا کہ تم نے ان کا جو کچھ حاصل کیا ہے واپس کردو۔ چنانچہ انہوں نے واپس کردیا حتی کہ حاملہ عورتوں کو بھی واپس کردیا۔ [مصنف ابن ابي شيبه/كتاب البعوث والسرايا/حدیث: 36090]

حضرت ابو زرعہ بن عمرو بن جریر فرماتے ہیں کہ حضرت ابو موسیٰ کے ساتھیوں میں ایک آدمی بہت بہادر اور دلیر تھا۔ جب مسلمانوں کو مال غنیمت حاصل ہوا تو حضرت ابو موسیٰ نے اسے اس کا حصہ پورا نہ دیا۔ اس نے کم حصہ لینے سے انکار کردیا۔ حضرت ابو موسیٰ نے اسے بیس کوڑے لگوائے اور اس کا سر مونڈ دیا۔ اس نے اپنے بال جمع کئے اور حضرت عمر رضی اللہ عنہ کی خدمت میں حاضر ہوا۔ حضرت جریر فرماتے ہیں کہ میں لوگوں میں اس کے سب سے زیادہ قریب تھا۔ اس نے اپنے بال ان کے سینے پر مارے اور کہا کہ خدا کی قسم! اگر وہ نہ ہوتی! حضرت عمر نے فرمایا کہ یہ سچ کہتا ہے کہ اگر جہنم نہ ہوتی۔ پھر حضرت عمر نے اس سے اس کی وجہ پوچھی تو اس نے ساری بات بتائی اور کہا کہ حضرت ابو موسیٰ کا خیال ہے کہ ان سے اس کا بدلہ نہیں لیا جائے گا۔ حضرت عمر نے فرمایا کہ تمام لوگ اس آدمی جیسی پختگی پر ہوجائیں، یہ مجھے ان سب چیزوں سے زیادہ محبوب ہے جو میرے پاس آئی ہیں۔ پھر حضرت عمر نے حضرت ابو موسیٰ کو خط لکھا جس میں سلام کے بعد فرمایا کہ فلاں بن فلاں نے مجھے یہ خبر دی ہے اور میں تمہیں قسم دے کر کہتاہوں کہ اگر تم نے اس کے ساتھ یہ زیادتی لوگوں کے سامنے کی ہے تو لوگوں کے سامنے بیٹھ کر اسے بدلہ دو اور اگر تنہائی میں کی ہے تو تنہائی میں اسے بدلہ دو۔ لوگوں نے اس آدمی سے کہا کہ انہیں معاف کردو۔ اس نے کہا کہ نہیں، خدا کی قسم میں اسے کسی کی خاطر نہیں چھوڑوں گا۔ جب خط حضرت ابو موسیٰ کو ملا تو وہ بدلے کے لئے بیٹھ گئے۔ اس آدمی نے اپنا سر آسمان کی طرف اٹھایا اور کہا کہ میں نے انہیں معاف کردیا۔ [مصنف ابن ابي شيبه/كتاب البعوث والسرايا/حدیث: 36091]

حضرت حماد نے یہ بھی کہا کہ حضرت ابو موسیٰ رضی اللہ عنہ نے اسے اس کے حصے کا کچھ حصہ دیا۔ اور حضرت جریر رضی اللہ عنہ نے یہ بھی فرمایا کہ میں لوگوں میں اس کے سب سے زیادہ قریب تھا۔ اور یہ بھی کہا کہ میں نے اللہ کے لئے انہیں معاف کردیا۔ [مصنف ابن ابي شيبه/كتاب البعوث والسرايا/حدیث: 36092]