حضرت حذیفہ رضی اللہ عنہ فرماتے تھے کہ قسطنطنیہ، دیلم اور طبرستان بنوہاشم کے ایک آدمی کے ہاتھ پر فتح ہوں گے۔ [مصنف ابن ابي شيبه/كتاب البعوث والسرايا/حدیث: 36073]

حضرت مجالد فرماتے ہیں کہ تمام اہل جبل نے صلح کی تھی اور جبل کا کوئی حصہ زبردستی نہیں لیا گیا تھا۔ [مصنف ابن ابي شيبه/كتاب البعوث والسرايا/حدیث: 36074]

حضرت مطرف فرماتے ہیں کہ حلوان سے اوپر کا حصہ ذمہ میں ہے اور حلوان سے نیچے سواد کا جو حصہ ہے وہ فیٔ ہے اور ہمارا یہ سواد فیٔ ہے۔ [مصنف ابن ابي شيبه/كتاب البعوث والسرايا/حدیث: 36075]

حضرت ابو علاء فرماتے ہیں کہ میں بھی تکریت کی فتح میں شامل تھا۔ ہم نے ان سے اس بات پر صلح کی کہ وہ ہمارے لیے ایک بازار لگائیں اور ہم ان کو امان دیں گے۔ چناچہ انہوں نے ہمارے لیے بازار لگا دیا۔ پھر ان میں سے ایک لوہار کو کسی نے قتل کردیا تو ان کا راہب ہمارے پاس آیا اور اس نے کہا کہ کیا تم نے اپنے نبی صلی اللہ علیہ وسلم اور اپنے امیر المومنین اور اپنا عہد نہیں دیا تھا، پھر تم نے اس عہد کی پاسداری نہیں کی؟! ہمارے امیر نے کہا کہ تم اس کے قاتل پر دو عادل گواہ پیش کردو تو ہم قاتل تمہارے حوالے کردیں گے اور اگر تم چاہو تو قسم کھالو ہم تمہیں دیت دے دیں گے اور اگر تم چاہو تو ہم قسم کھا لیں اس صورت میں تمہیں کچھ نہیں ملے گا۔ پس اگلے دن کی ملاقات طے ہوئی، ان کا پادری آیا اور اس نے اللہ تعالیٰ کی حمد وثنا بیان کی، زمین و آسمان کا تذکرہ کیا، قیامت کے دن کا ذکر کیا پھر اس نے کہا کہ خصومات میں سب سے پہلے خون کا حساب ہوگا۔ آدم علیہ السلام کے دو بیٹے فریق ہوں گے اور ایک کے خلاف فیصلہ کردیا جائے گا۔ پھر ایک ایک کرکے خون کا حساب ہوگا معاملہ ہمارے اور تمہارے ساتھی تک آپہنچے گا۔ پس مقتول قاتل سے کہے گا کہ تو نے مجھے کیوں قتل کیا تھا؟ کیا تم یہ پسند نہیں کرتے کہ تمہارے ساتھی کے پاس ہمارے ساتھی کے خلاف یہ دلیل ہو کہ وہ کہہ سکے کہ تیرے بعد تیرے گھر والوں نے تیری دیت وصول کرلی تھی؟ [مصنف ابن ابي شيبه/كتاب البعوث والسرايا/حدیث: 36076]

حضرت عبد الرحمن بن ابی بکرہ فرماتے ہیں کہ جب حضرت ابوموسیٰ رضی اللہ عنہ مجاہدین کو لے کر ہرمزان کی سرکوبی کے لئے تستر پر حملہ آور ہوئے تو انہوں نے یہاں ایک سال یا اس کے لگ بھگ قیام کیا لیکن فتح یاب نہ ہوسکے۔ ہرمزان نے اس دوران تستر کے ایک معزز اور سرکردہ آدمی کو قتل کرادیا۔ مقتول کا بھائی ایک دن حضرت ابو موسیٰ رضی اللہ عنہ کے پاس آیا اور ان سے کہا کہ اگر میں آپ کو ہرمزان کے قلعے میں داخل ہونے کا راستہ بتادوں تو کیا انعام پاؤں گا؟ حضرت ابوموسیٰ نے کہا تو کیا چاہتا ہے؟ اس نے کہا کہ آپ میرا اور میرے گھر والوں کا خون معاف کردیں، اور ہمارے مال اور گھر ہمارے پاس رہنے دیں۔ حضرت ابو موسیٰ نے اس کی حامی بھرلی۔ اس نے کہا کہ اب مجھے کوئی ایسا آدمی دیجئے جو تیراکی جانتا ہو اور عقل مند ہو۔ وہ آپ کے پاس واضح خبر لائے گا۔ (٢) حضرت ابو موسیٰ نے مجزأۃ بن ثور سدوسی کو بلایا اور ان سے کہا کہ اپنی قوم میں سے کوئی ایسا آدمی دیجئے جو تیراکی جانتاہو اور خوب عقل مند ہو، لیکن وہ ایسا اہم آدمی نہ ہو جس کی شہادت مسلمانوں کے لیے مایوسی کا سبب ہو۔ اگر وہ سلامت رہا تو ہمارے پاس خبر لے آئے گا۔ میں نہیں جانتا کہ یہ آدمی کیا چاہتا ہے، نہ مجھے اس پر اعتماد ہے۔ (٣) حضرت مجزأۃ نے کہا کہ وہ شخص مل گیا۔ حضرت ابو موسیٰ نے پوچھا کہ وہ کون ہے؟ انہوں نے کہا کہ میں ہوں۔ حضرت ابو موسیٰ نے کہا کہ اللہ آپ پر رحم فرمائے، میں یہ نہیں چاہتا، مجھے کوئی اور آدمی دیجئے۔ حضرت مجزأۃ بن ثور نے فرمایا کہ خدا کی قسم میں بکر بن وائل کی کسی بڑھیا کے پاس جاکر ام مجزأۃ کے بیٹے کے بدلے اس کے بیٹے کو فدیہ نہیں بناؤں گا۔ حضرت ابو موسیٰ نے فرمایا کہ اگر آپ نہیں مانتے تو چلے جائیے۔ (٤) حضرت مجزأۃ نے سفید کپڑے پہنے اور ایک رومال اور ایک خنجر ہمراہ لے لیا۔ پھر اس آدمی کے ساتھ چلے، راستے میں ایک ندی کو تیر کر عبور کیا۔ پھر ندی کے راستے سے ان کے قلعے میں داخل ہوئے۔ بعض اوقات راستہ اتنا تنگ ہوجاتا کہ پیٹ کے بل چلنا پڑتا اور بعض اوقات راستہ کھل جاتا تو قدموں پر چلتے۔ بعض اوقات گھٹنوں کے بل چلتے۔ یہاں تک کہ شہر میں داخل ہوگئے۔ حضرت ابو موسیٰ نے انہیں حکم دیا تھا کہ شہر کے دروازے کا راستہ اور اس کی فصیل کا راستہ اور ہرمزان کے گھر کو یاد رکھیں۔ وہ آدمی انہیں لے گیا اور انہیں فصیل کا راستہ، دروازے کا راستے اور ہرمزان کا گھر دکھا دیا۔ حضرت ابو موسیٰ نے حضرت مجزأۃ کو وصیت کی تھی کہ خود سے کوئی کارروائی نہ کرنا جب تک مجھے علم نہ ہوجائے۔ (٥) جب حضرت مجزأۃ نے دیکھا کہ ہرمزان اپنے دوستوں کے ساتھ بیٹھا شراب پی رہا ہے تو انہوں نے اس آدمی سے کہا کہ یہ ہرمزان ہے؟ اس نے کہا ہاں یہی ہے۔ حضرت مجزأۃ نے کہا کہ یہی وہ شخص ہے جس نے مسلمانوں کو تکلیف پہنچائی ہے۔ میں اسے زندہ نہیں چھوڑوں گا۔ اس آدمی نے کہا کہ ایسا نہ کرو۔ اس کی حفاظت پر مامور لوگ تمہیں اس تک پہنچنے بھی نہیں دیں گے اور مسلمان بھی قلعہ میں داخل نہ ہوسکیں گے۔ حضرت مجزأۃ اپنی بات پر اڑے رہے۔ اس آدمی نے بہت سمجھایا بالآخر حضرت ابو موسیٰ رضی اللہ عنہ کی نصیحت یاد دلائی تو حضرت مجزأۃ رک گئے اور پھر اس آدمی کے گھر آگئے اور شام تک وہیں رہے۔ (٦) پھر حضرت ابو موسیٰ کے پاس واپس گئے، انہوں نے حضرت مجزأۃ کے ہمراہ تین سو سے زائد مجاہدین کا دستہ روانہ فرمایا اور انہیں حکم دیا کہ ہر شخص صرف دو کپڑے پہنے اور تلوار ہمراہ رکھے۔ لوگوں نے ایسا ہی کیا۔ پھر سب مجاہدین نہر کے کنارے بیٹھ کر حضرت مجزأۃ کا انتظار کرنے لگے، حضرت مجزأۃ حضرت ابوموسیٰ کے پاس تھے اور احکام و ہدایات لے رہے تھے۔ حضرت عبد الرحمن بن ابی بکرہ فرماتے ہیں کہ ان لوگوں کو موت کے سوا کسی چیز کی چاہت نہ تھی۔ وہ منظر میری نظروں کے سامنے ہے کہ دستر خوان حضرت ابو موسیٰ رضی اللہ عنہ کے سامنے بچھا ہوا تھا، لیکن حضرت مجزأۃ اس بات میں شرم محسوس کررہے تھے کہ دستر خوان سے کوئی چیز نہ لیں۔ انہوں نے انگور کا ایک دانہ اٹھایا لیکن اسے بھی نگلنے کی ہمت نہ ہوئی اور اسے آہستگی سے نکال کر نیچے رکھ دیا۔ حضرت ابوموسیٰ نے انہیں نصیحتیں کیں اور انہیں رخصت کردیا۔ رخصت ہوتے ہوئے حضرت مجزأۃ نے حضرت ابو موسیٰ سے کہا کہ میں آپ سے ایک چیز مانگوں تو کیا آپ مجھے عطا فرمائیں گے۔ حضرت ابو موسیٰ نے فرمایا کہ آپ جو چیز بھی مانگیں گے میں آپ کو دوں گا۔ حضرت مجزأۃ نے کہا کہ مجھے اپنی تلوار دے دیجئے تاکہ میں اسے اپنی تلوار کے ساتھ لٹکا لوں۔ چناچہ حضرت ابو موسیٰ نے اپنی تلوار ان کو دے دی۔ (٧) پھر حضرت مجزأۃ مجاہدین کے ساتھ آملے اور اللہ اکبر کہہ کر پانی میں کو دگئے۔ پیچھے سب لوگ بھی پانی میں کود گئے۔ حضرت عبد الرحمن بن ابی بکرہ فرماتے ہیں کہ وہ بطخوں کی طرح پانی میں تیر رہے تھے۔ انہوں نے ندی کو عبور کیا، پھر اس سوراخ کی طرف بڑھے جس سے پانی اندر جارہا تھا۔ انہوں نے اللہ اکبر کہا اور اندر داخل ہوگئے۔ جب وہ شہر میں پہنچے تو ان کے ساتھ صرف پینتیس یا چھتیس آدمی رہ گئے تھے۔ انہوں نے اپنے ساتھیوں سے کہا کہ کیا میں ان کے پاس واپس جاکر انہیں بھی اندر نہ لے آؤں؟ اہل کوفہ کے ایک آدمی نے، جسے اس کی شجاعت کی وجہ سے جبان کہا جاتا تھا، کہا کہ اے مجزأۃ! یہ بات آپ کے سوا کوئی اور کہے، آپ پر صرف اپنی ذمہ داری ہے، آپ کو جس کام کا حکم دیا گیا ہے اسے پورا کیجئے۔ انہوں نے اس سے کہا کہ تم نے ٹھیک کہا۔ پھر وہ ایک جماعت کو لے کر دروازے کی طرف گئے اور انہیں وہاں مقرر کردیا، ایک جماعت کو فصیل کی طرف بھیجا اور باقی لوگوں کو لے کر فصیل پر چڑھ گئے۔ اساورہ میں سے ایک عجمی چھوٹا نیزہ لے کر ان پر اترا اور حضرت مجزأۃ کو نیزہ مار کر شدید زخمی کردیا۔ حضرت مجزأۃ نے ان سے کہا کہ اپنا کام جاری رکھو، میری وجہ سے کوئی چیز تمہیں مشغول نہ کرے۔ انہوں نے ان پر ایک نمدا ڈال دیا تاکہ ان کی جگہ پہچان سکیں اور آگے بڑھ گئے۔ مسلمانوں نے فصیل پر اور شہر کے دروازے پر اللہ اکبر کہا اور دروازہ کھول دیا، اور مسلمان اپنے معمول کے مطابق آگے بڑھے یہاں تک کہ شہر میں داخل ہوگئے۔ ہرمزان سے کہا گیا کہ یہ عرب اندر آگئے ہیں۔ اس نے کہا کہ بلاشبہ وہ زبردستی گھس آئے ہیں۔ وہ کہاں سے داخل ہوئے؟ کیا آسمان سے؟ پھر وہ اپنے ایک قلعے میں قلعہ بند ہوگیا۔ حضرت ابو موسیٰ اپنے عربی گھوڑے کو دوڑاتے ہوئے حضرت انس بن مالک رضی اللہ عنہ کے پاس پہنچے جو لوگوں کے امیر تھے، اور فرمایا کہ اے ابو حمزہ! ہم نے تو آج کچھ بھی نہیں کیا، جبکہ یہ لوگ دشمن سے فارغ ہوچکے ہیں، جنہیں قتل کرنا تھا قتل کرلیا اور جنہیں قیدی بنانا تھا قیدی بنا لیا۔ انہوں نے ہرمزان کو اس کے قلعے میں گھیر لیا اور اس تک نہ پہنچ سکے یہاں تک کہ اسے امان دی اور وہ امیر المومنین حضرت عمر بن خطاب کے فیصلے پر اتر آیا۔ حضرت ابو موسیٰ نے ہرمزان اور اس کے ساتھیوں کو حضرت انس کے ساتھ روانہ کیا۔ وہ انہیں لے کر حضرت عمر کے پاس پہنچے۔ حضرت انس نے ان کے پاس پیغام بھیجا کہ ان لوگوں کے بارے میں آپ کی کیا رائے ہے؟ کیا میں انہیں ننگا اور بندھا ہوا لاؤں یا انہیں حکم دوں کہ وہ اپنے زیور اور عمدہ لباس پہن لیں؟ حضرت عمر نے ان کو پیغام بھیجا کہ اگر تم انہیں تمہارے کہنے کے مطابق ننگا اور بندھا ہوا لاؤ گے تو وہ عام عجمی کسانوں سے زیادہ کچھ نہ لگیں گے، بلکہ انہیں اس طرح لاؤ کہ ان پر ان کے زیور اور عمدہ لباس ہوں تاکہ مسلمان جان لیں کہ اللہ نے انہیں کیا غنیمت عطا فرمائی ہے۔ چنانچہ انہوں نے انہیں حکم دیا تو انہوں نے اپنا عمدہ لباس اور زیور پہن لیا۔ وہ حضرت عمر کے پاس حاضر ہوئے تو ہرمزان نے حضرت عمر سے کہا کہ اے امیر المومنین! میں آپ سے کس طرح بات کروں؟ زندہ رہنے والے آدمی کی طرح یا قتل ہونے والے آدمی کی طرح؟ حضرت عمر سے ایک ایسا کلمہ نکل گیا جس کا انہوں نے ارادہ نہیں کیا تھا کہ بات کرو، تم پر کوئی حرج نہیں۔ ہرمزان نے ان سے کہا کہ اے امیر المومنین! آپ جانتے ہیں کہ جب ہم سب گمراہی پر تھے تو ہمارا اور تمہارا کیا حال تھا۔ عرب کا کوئی قبیلہ ہمارے کسی گھڑ سوار کا تیر دیکھ لیتا تو دور دراز علاقے کی طرف بھاگ جاتا۔ پھر جب اللہ نے تمہیں ہدایت دی اور وہ تمہارے ساتھ ہوگیا تو ہم اس سے لڑ نہ سکے۔ حضرت انس انہیں واپس لے گئے۔ جب شام ہوئی تو حضرت عمر نے حضرت انس کو پیغام بھیجا کہ صبح اپنے قیدیوں کو میرے پاس لے آنا تاکہ میں ان کی گردنیں اڑا دوں۔ حضرت انس ان کے پاس آئے اور کہا کہ اللہ کی قسم اے عمر! یہ آپ کے لئے جائز نہیں۔ حضرت عمر نے فرمایا کہ کیوں؟ انہوں نے کہا کہ آپ اس آدمی سے کہہ چکے ہیں کہ بات کرو، تم پر کوئی حرج نہیں۔ حضرت عمر نے فرمایا کہ تم اس پر دلیل لاؤ ورنہ میں تمہارے ساتھ سختی کروں گا۔ حضرت انس نے حضرت عمر کے ساتھ بیٹھنے والوں سے پوچھا کہ کیا حضرت عمر نے اس آدمی سے یہ نہیں کہا تھا کہ بات کرو، تم پر کوئی حرج نہیں؟ انہوں نے کہا کیوں نہیں۔ یہ بات حضرت عمر پر گراں گزری۔ انہوں نے فرمایا کہ اگر ایسا ہی ہے تو انہیں میرے پاس سے نکال دو۔ چنانچہ انہیں سمندر میں دہلک نامی ایک بستی کی طرف بھیج دیا گیا۔ جب انہیں روانہ کیا گیا تو حضرت عمر نے اپنے ہاتھ اٹھائے اور تین مرتبہ فرمایا کہ اے اللہ! اس کشتی کو ان سمیت توڑ دے۔ وہ کشتی میں سوار ہوئے تو وہ ان سمیت ٹوٹ کر ریزہ ریزہ ہوگئی، لیکن وہ خشکی کے قریب تھی اس لئے وہ نکل آئے۔ مسلمانوں میں سے ایک آدمی نے کہا کہ اگر وہ انہیں غرق کرنے کی دعا کرتے تو وہ غرق ہوجاتے، لیکن انہوں نے تو صرف یہ کہا تھا کہ اسے ان سمیت توڑ دے۔ چنانچہ انہوں نے انہیں وہیں رہنے دیا۔ [مصنف ابن ابي شيبه/كتاب البعوث والسرايا/حدیث: 36077]

حضرت انس رضی اللہ عنہ فرماتے ہیں کہ ہم نے تستر کا محاصرہ کیا تو ہرمزان نے حضرت عمر کے فیصلے پر سر تسلیم خم کرلیا۔ حضرت ابوموسیٰ رضی اللہ عنہ نے ہرمزان کے ساتھ مجھے حضرت عمر کی طرف بھیجا۔ جب ہم حضرت عمر رضی اللہ عنہ کی خدمت میں حاضر ہوئے تو ہرمزان نے کوئی بات نہ کی اور خاموش رہا۔ حضرت عمر نے اس سے فرمایا کہ بات کرو۔ اس نے کہا کہ زندہ شخص کی بات کروں یامردہ کی؟ حضرت عمر رضی اللہ عنہ نے فرمایا کہ تم بات کرو تم پر کوئی حرج نہیں۔ اس نے کہا کہ اے اہل عرب جب تک اللہ تعالیٰ نے ہمیں اور تمہیں آپس میں چھوڑے رکھا، ہم تمہیں قتل کرتے تھے اور دور بھگا دیتے تھے۔ اور جب اللہ تمہارے ساتھ ہوگیا تو اب ہمارا تم پر زور نہیں چلتا۔ پھر حضرت عمر نے فرمایا کہ اے انس تم کیا کہتے ہو؟ میں نے کہا کہ اے امیر المومنین! میں نے اپنے پیچھے زبردست طاقت اور بڑی تعداد چھوڑی ہے۔ اگر آپ اس کو قتل کردیں گے تو لوگ زندگی سے مایوس ہوجائیں گے اور یہ ان کی قوت کے لئے سخت ہوگا اور اگر آپ اسے زندہ چھوڑیں گے تو لوگ لالچ کریں گے۔ حضرت عمر نے فرمایا کہ کیا میں براء بن مالک اور مجزأۃ بن ثور کے قاتل کو زندہ چھوڑ دوں! حضرت انس رضی اللہ عنہ فرماتے ہیں کہ جب میں نے دیکھا کہ وہ اسے قتل کردیں گے تو میں نے کہا کہ آپ اسے قتل نہیں کرسکتے؟ انہوں نے فرمایا کیوں؟ کیا تم نے اس سے کوئی مالی مدد لے لی ہے؟ میں نے کہا میں نے ایسا نہیں کیا۔ آپ نے اس سے کہا کہ تم بات کرو تمہارا کوئی نقصان نہیں ہوگا۔ حضرت عمر نے فرمایا کہ تم اس بات پر گواہ پیش کرو ورنہ میں تمہیں سزا دوں گا۔ پس میں گواہ کی تلاش میں نکلا تو مجھے حضرت زبیر ملے، انہیں بھی وہ بات یاد تھی جو مجھے یاد تھی۔ انہوں نے اس بات کی گواہی دی تو حضرت عمر نے ہرمزان کو چھوڑ دیا اور بعد میں اس نے اسلام قبول کرلیا اور حضرت عمر نے اس کا وظیفہ مقرر کردیا۔ [مصنف ابن ابي شيبه/كتاب البعوث والسرايا/حدیث: 36078]

حضرت شہاب فرماتے ہیں کہ انہوں نے حضرت ابوموسیٰ کے ساتھ جہاد کیا۔ جس دن ہم تستر پہنچے، حضرت اشعری کو تیرلگا اور وہ زمین پر گرگئے۔ میں ان کے پیچھے ڈھال لے کر کھڑا ہوگیا یہاں تک کہ انہیں افاقہ ہوگیا۔ حضرت شہاب فرماتے ہیں کہ میں عرب میں سے پہلا شخص تھا جس نے تستر کے دروازے پر آگ جلائی۔ جب ہم نے تستر کو فتح کرلیا اور قیدی پکڑ لئے تو حضرت ابوموسیٰ نے فرمایا کہ فوج میں سے دس آدمیوں کا انتخاب کرلو کہ وہ ہماری واپسی تک ان قیدیوں کی نگرانی کے لئے تمہارے ساتھ رہیں۔ پھر وہ آگے بڑھے اور بہت سے علاقے فتح کرکے واپس آگئے۔ حضرت ابو موسیٰ نے مجاہدین کے درمیان مال غنیمت کو تقسیم کیا، وہ گھڑ سوار کو دو حصے اور پیادہ کو ایک حصہ دیتے تھے اور جب کسی قیدی عورت کو فروخت کرتے تو اس کو اس کے بچے سے جدا نہ کرتے تھے۔ [مصنف ابن ابي شيبه/كتاب البعوث والسرايا/حدیث: 36079]

حضرت شہاب فرماتے ہیں کہ سب سے پہلے میں نے تستر کے دروازے پر آگ جلائی۔ حضرت اشعری کو تیر لگا اور وہ زمین پر گرگئے۔ جب تستر کا دروازہ کھولا گیا اور دشمنوں کو قیدی بنایا گیا تو حضرت ابو موسیٰ نے مجھے میری قوم کے دس لوگوں پر امیر بنادیا، اور انہوں نے مال غنیمت کی تقسیم سے پہلے مجھے میرے اور میرے گھوڑے کے حصے کے علاوہ ایک آدمی (قیدی) زائد انعام کے طور پر دیا۔ [مصنف ابن ابي شيبه/كتاب البعوث والسرايا/حدیث: 36080]

حضرت خالد بن سیحان فرماتے ہیں کہ تستر میں حضرت ابو موسیٰ کے ساتھ جہاد میں چار یا پانچ عورتیں بھی شریک تھیں جو پانی پلاتی تھیں اور زخمیوں کی دیکھ بھال کرتی تھیں، حضرت ابو موسیٰ نے انہیں بھی مال غنیمت میں سے حصہ دیا۔ [مصنف ابن ابي شيبه/كتاب البعوث والسرايا/حدیث: 36081]

حضرت مطرف بن مالک فرماتے ہیں کہ میں تستر کی فتح میں حضرت ابو موسیٰ اشعری رضی اللہ عنہ کے ساتھ تھا۔ مقام سوس میں ہمیں حضرت دانیال علیہ السلام ملے۔ اہل سوس کا معمول تھا کہ جب ان کے یہاں قحط آتا تو وہ انہیں نکالتے اور ان کے ذریعے بارش طلب کیا کرتے تھے۔ ہمیں ان کے ساتھ ساٹھ گھڑے ملے جن کے منہ مہر سے بند کئے گئے تھے۔ ہم نے ایک گھڑا سب سے قریب والوں میں سے، ایک درمیان والوں میں سے اور ایک سب سے دور والوں میں سے کھولا تو ہر گھڑے میں دس ہزار تھے۔ ہمام کہتے ہیں کہ میرا خیال ہے کہ انہوں نے دس ہزار ہی کہا تھا۔ ساتھ ہمیں کتان کی دو چادریں ملیں اور ایک صندوق ملا جس میں ایک کتاب تھی۔ سب سے پہلے بلعنبر کا ایک آدمی ان تک پہنچا تھا جس کا نام حرقوس تھا۔ حضرت ابو موسیٰ نے اسے دو چادریں اور دو سو درہم دیئے۔ بعد میں اس سے یہ دو چادریں واپس مانگی گئیں تو اس نے دینے سے انکار کردیا اور اسے کاٹ کر اپنے ساتھیوں کو عمامے بنا دیئے۔ راوی کہتے ہیں کہ اس جنگ میں ہمارے ساتھ ایک نصرانی مزدور تھا جس کا نام ”نُعیم“ تھا۔ اس نے کہا کہ مجھے یہ صندوق اس کے سامان سمیت بیچ دو۔ اس سے کہا گیا کہ اگر اس میں سونا یا چاندی یا اللہ کی کتاب نہ ہو تو لے لو۔ دیکھا گیا تو اس میں اللہ کی کتاب تھی۔ لہٰذا لوگوں نے کتاب کے بیچنے کو ناپسند خیال کیا اور صندوق اسے دو درہم میں بیچ دیا اور کتاب اسے ہدیہ کردی۔ حضرت قتادہ فرماتے ہیں کہ اس کے بعد سے مصاحف کی بیع کو مکروہ خیال کیا جانے لگا کیونکہ حضرت اشعری اور ان کے ساتھیوں نے اسے مکروہ خیال کیا تھا۔ [مصنف ابن ابي شيبه/كتاب البعوث والسرايا/حدیث: 36082]