حضرت ابوعثمان فرماتے ہیں کہ میں حضرت عمر رضی اللہ عنہ کے پاس نعمان بن مقرن کی شہادت کی خبر لایا تو آپ نے سر پر ہاتھ رکھا اور رونا شروع کردیا۔ [مصنف ابن ابي شيبه/كتاب البعوث والسرايا/حدیث: 36053]

حضرت سعید بن مسیب فرماتے ہیں کہ مجھے یاد ہے کہ جب حضرت عمر بن خطاب رضی اللہ عنہ کے پاس حضرت نعمان بن مقرن کی شہادت کی خبر آئی۔ [مصنف ابن ابي شيبه/كتاب البعوث والسرايا/حدیث: 36054]

حضرت عبد اللہ بن سلام فرماتے ہیں کہ جب نہاوند فتح ہوا تو یہودیوں کے بہت سے جنگی قیدی مسلمانوں کے ہاتھ لگے۔ راس الجالوت (یہودیوں کا سردار) آیا اور یہودی قیدیوں کا فدیہ دے کر انہیں چھڑانے لگا۔ ایک مسلمان کو ایک بہت خوبصورت اور جوان باندی ملی تھی۔ وہ میرے پاس آیا اور اس نے کہا کہ میرے ساتھ اس شخص کی طرف چلو شاید وہ مجھے اس باندی کی قیمت دے دے۔ (٢) چنانچہ میں اس کے ساتھ چلا، ہم ایک مغرور بوڑھے کے پاس پہنچے جس کا ایک ترجمان تھا۔ اس نے اپنے ترجمان سے کہا کہ اس باندی سے سوال کرو کہ کیا اس عربی نے اس سے جماع کیا ہے؟ وہ اس باندی کے حسن کو دیکھ کر غیرت میں آگیا تھا۔ اس نے باندی سے اپنی زبان میں کچھ مجہول بات کی جسے میں سمجھ گیا تھا۔ میں نے اس سے کہا کہ تو نے اس باندی سے اس کی خفیہ بات کے بارے میں سوال کرکے اپنی کتاب کی روشنی میں گناہ کا ارتکاب کیا ہے۔ اس نے مجھ سے کہا کہ تم جھوٹ بولتے ہو، تمہیں کیا معلوم کہ میری کتاب میں کیا ہے؟ میں نے کہا کہ میں تمہاری کتاب کو تم سے زیادہ جانتا ہوں۔ اس نے کہا کہ کیا تم میری کتاب کو مجھ سے زیادہ جانتے ہو؟ میں نے کہا کہ ہاں میں تمہاری کتاب کو تم سے زیادہ جانتا ہوں۔ اس نے پوچھا کہ یہ کون ہے؟ لوگوں نے بتایا کہ یہ عبد اللہ بن سلام ہیں۔ پھر اس دن میں واپس آگیا۔ (٣) پھر اس نے میری طرف ایک قاصد کو بھیجا اور مجھے تاکید کے ساتھ اپنے پاس بلایا اور میرے لیے ایک سواری بھیجی۔ میں اس کے پاس اس نیت سے گیا کہ شاید وہ اسلام قبول کرلے اور میرے نامہ اعمال میں نیکیوں کا اضافہ ہوجائے۔ اس نے مجھے اپنے پاس تین دن تک روکے رکھا۔ میں اسے تورات پڑھ کر سناتا تھا اور وہ روتا تھا۔ میں نے اس سے کہا کہ واللہ یہ وہی نبی ہیں جن کا ذکر تم تورات میں پاتے ہو۔ اس نے کہا کہ پھر میں یہود کا کیا کروں؟ میں نے کہا کہ اللہ کے مقابلے میں وہ تمہارے کسی کام نہیں آسکتے۔ بہرحال اس پر بدبختی غالب آگئی اور اس نے اسلام قبول کرنے سے انکار کردیا۔ [مصنف ابن ابي شيبه/كتاب البعوث والسرايا/حدیث: 36055]

حضرت معقل بن یسار فرماتے ہیں کہ حضرت عمر رضی اللہ عنہ نے ہرمزان سے فارس، اصبہان اور آذربائیجان کے بارے میں مشورہ کیا۔ انہوں نے کہا کہ اصبہان کی مثال سر کی سی ہے اورفارس اور آذربائیجان کی مثال بازوؤں کی سی ہے۔ اگر آپ ایک بازو کو کاٹ دیں گے تو سر دوسرے بازو کے سہارے باقی رہے گا اور اگر آپ سر کو کاٹ دیں گے تو بازو خود ہی گرجائیں گے۔ لہٰذا آپ سر سے ابتدا کریں۔ پھر حضرت عمر رضی اللہ عنہ مسجد میں گئے تو دیکھا کہ حضرت نعمان بن مقرن نماز پڑھ رہے ہیں۔ آپ ان کے قریب بیٹھ گئے، جب انہوں نے نماز پوری کرلی تو حضرت عمر نے ان سے فرمایا کہ میں تمہیں امیر بنانا چاہتاہوں۔ انہوں نے عرض کیا کہ اگر محصول وصول کرنے والا بنانا ہے تو میں راضی نہیں اور اگر جہاد پر بھیجنے کا بنانا ہے تو مجھے قبول ہے۔ حضرت عمر نے فرمایا کہ جہاد کے لئے امیر بن کر جاؤ گے۔ آپ نے انہیں روانہ فرمایا اور اہل کوفہ سے فرمایا کہ ان کی مدد کرو۔ ان کے ساتھ زبیر بن عوام، عمرو بن معدی کرب، حضرت حذیفہ رضی اللہ عنہ، ابن عمر رضی اللہ عنہما اور اشعث بن قیس بھی تھے۔ (٢) حضرت نعمان بن مقرن نے حضرت مغیرہ بن شعبہ کو ان کے بادشاہ کے پاس بھیجا جس کا نام ”ذوالجناحین“ تھا۔ انہوں نے ان کا دریا عبور کیا۔ ذوالجناحین کو بتایا گیا کہ عربوں کا قاصد یہاں ہے۔ اس نے اپنے ساتھیوں سے مشورہ کیا کہ میں اس کے ساتھ بادشاہوں کے انداز میں بیٹھوں یا جنگجو کے انداز میں؟ انہوں نے مشورہ دیا کہ بادشاہوں کے انداز میں بیٹھو۔ پس وہ اپنے تخت پر بیٹھا اور اپنے سر پر تاج رکھا۔ اس کے شہزادے بھی اس کے آس پاس بیٹھ گئے جن کے کانوں میں بالیاں اور ہاتھوں میں سونے کے کنگن تھے اور ان کے جسموں پر ریشم کا لباس تھا۔ حضرت مغیرہ کو ملاقات کی اجازت ملی، آپ کو دو آدمیوں کے پہرے میں لایا گیا، آپ کی تلوار اور آپ کا نیزہ آپ کے ہاتھ میں تھے۔ حضرت مغیرہ نے اپنے نیزے سے ان کے قالین میں سوراخ کردیئے تاکہ وہ اس سے بدفالی لیں۔ وہ بادشاہ کے سامنے کھڑے ہوئے۔ دونوں کے درمیان ایک شخص ترجمان تھا۔ بادشاہ نے کہا کہ اے اہل عرب تمہیں بھوک اور تکلیف نے ستایا ہے اور تم ہماری طرف آلپکے ہو، اگر تم چاہو تو ہم تمہیں مال دے کر واپس بھیج دیتے ہیں۔ (٣) حضرت مغیرہ بن شعبہ نے گفتگو شروع کی، اللہ تعالیٰ کی حمد وثنا بیان کی اور پھر فرمایا کہ ہم عرب ذلیل لوگ تھے۔ لوگ ہم پر ظلم ڈھاتے تھے لیکن ہم کسی پر ظلم نہیں کرتے تھے۔ ہم کتے اور مردارکھاتے تھے۔ پھر اللہ تعالیٰ نے ہم میں ایک ایسے نبی کو مبعوث فرمایا جو ہم میں شرف والے تھے، وہ خاندان کے اعتبار سے سب سے بہتر اور گفتگو کے اعتبار سے سب سے زیادہ سچے تھے۔ اللہ تعالیٰ نے اپنے نبی کو دین عطا فرمایا اور جو باتیں آپ نے فرمائیں وہ سب سچ ثابت ہوئیں۔ انہوں نے ہم سے ایک وعدہ یہ بھی کیا تھا کہ ہم یہاں کی چیزوں کے مالک بنیں گے اور ان پر غالب آئیں گے۔ میں تمہارے اس علاقے میں بہت زیب وزینت اور آرائش دیکھ رہا ہوں اور جو لوگ میرے پیچھے ہیں وہ ان چیزوں کو حاصل کیے بغیر کبھی نہیں چھوڑیں گے۔ پھر میں نے اپنے دل میں کہا کہ اگر میں چھلانگ لگا کر اس کے تخت پر بیٹھ جاؤں تو یہ اس سے بدفالی لیں گے۔ پس میں نے چھلانگ لگائی اور بادشاہ کے ساتھ اس کے تخت پر جا بیٹھا۔ وہ مجھے اپنی ٹانگوں سے مارنے لگے اور اپنے ہاتھوں سے کھینچنے لگے۔ میں نے کہا کہ ہم تمہارے قاصدوں کے ساتھ ایسا نہیں کریں گے۔ اگر میں نے نادانی کی ہے تو تم مجھے سزا نہ دو کیونکہ قاصدوں کے ساتھ ایسا نہیں کیا جاتا۔ (٤) بادشاہ نے کہا کہ اگر تم چاہو تو ہم دریا عبور کرکے تمہاری طرف آجائیں اور اگر تم چاہو تو تم عبور کرکے ہماری طرف آجاؤ۔ میں نے کہا کہ ہم عبور کرکے تمہاری طرف آئیں گے۔ چنانچہ ہم عبور کرکے ان کی طرف گئے۔ وہ پانچ پانچ، سات سات، چھ چھ اور دس دس آدمی ایک زنجیر میں بندھ گئے تاکہ بھاگ نہ سکیں۔ ہم ان کی طرف بڑھے اور ان کے سامنے صف بنا کر کھڑے ہوگئے۔ انہوں نے ہم پر تیر برسائے یہاں تک کہ ہم میں تیزی سے نقصان کرنے لگے۔ حضرت مغیرہ نے حضرت نعمان سے کہا کہ لوگوں میں تیزی سے نقصان ہورہا ہے، لوگ نکل پڑے ہیں، ان میں تیزی سے نقصان ہورہا ہے، اگر آپ حملہ کردیں تو بہتر ہے۔ حضرت نعمان نے کہا کہ آپ بہت سے فضائل اور مناقب والے ہیں۔ آپ رسول اللہ صلی اللہ علیہ وسلم کے ساتھ بہت سے غزوات میں شریک رہے ہیں۔ لیکن میں نے رسول اللہ صلی اللہ علیہ وسلم کے ساتھ رہ کر دیکھا ہے کہ جب آپ دن کے شروع حصے میں قتال نہ فرماتے تو انتظار فرماتے یہاں تک کہ سورج زائل ہوجاتا، ہوا چلنے لگتی اور مدد نازل ہوتی۔ (٥) پھر حضرت نعمان رضی اللہ عنہ نے کہا کہ میں اپنا جھنڈا تین مرتبہ ہلاؤں گا۔ جب میں پہلی مرتبہ جھنڈے کو حرکت دوں ہر شخص اپنی حاجت کو پورا کرکے وضو کرلے۔ جب میں دوسری مرتبہ جھنڈا ہلاؤں تو ہر شخص اپنے جوتے کا تسمہ دیکھ لے اور اپنا ہتھیار درست کرلے اور جب میں تیسری مرتبہ جھنڈا ہلاؤں تو حملہ کردینا۔ کوئی شخص کسی کی طرف متوجہ نہ ہو، اگر نعمان بھی مار دیا جائے تو کوئی اسکی طرف بھی متوجہ نہ ہو۔ میں اللہ سے ایک دعا کرنے والا ہوں اور میں ہر مسلمان کو قسم دیتا ہوں کہ وہ اس پر آمین کہے۔ پھر انہوں نے فرمایا کہ اے اللہ نعمان کو آج مدد اور کامیابی والی شہادت عطا فرما اور انہیں ان پر مدد اور فتح نصیب فرما۔ لوگوں نے آمین کہی۔ پھر انہوں نے جھنڈے کو تین مرتبہ ہلایا، پھر اپنی زرہ اتار دی اور حملہ کردیا اور لوگوں نے بھی حملہ کردیا۔ وہ سب سے پہلے گرنے والے تھے۔ حضرت معقل فرماتے ہیں کہ میں ان کے پاس پہنچا تو مجھے ان کی تاکید یاد آگئی، چنانچہ میں ان کی طرف متوجہ نہ ہوا اور ایک نشان لگا دیا تاکہ ان کی جگہ پہچان سکوں۔ جب ہم کسی آدمی کو قتل کرتے تو اس کے ساتھی اس میں مشغول ہوکر ہم سے غافل ہوجاتے۔ ذوالجناحین اپنے سرمئی خچر سے گرا تو اس کا پیٹ پھٹ گیا۔ پھر اللہ تعالیٰ نے مسلمانوں کو فتح عطا فرمائی۔ میں حضرت نعمان کی جگہ پر آیا تو ان میں زندگی کی رمق باقی تھی۔ میں ان کے پاس پانی کا برتن لایا اور ان کا چہرہ دھویا۔ انہوں نے پوچھا کہ یہ کون ہے؟ میں نے کہا کہ معقل بن یسار۔ انہوں نے پوچھا کہ لوگوں کا کیا بنا؟ میں نے کہا کہ اللہ تعالیٰ نے انہیں فتح عطا فرمادی۔ انہوں نے فرمایا کہ اللہ کا شکر ہے، اس کی اطلاع حضرت عمر کو لکھ بھیجو۔ اور ان کی روح پرواز کرگئی۔ لوگ حضرت اشعث بن قیس کے پاس جمع ہوئے اور انہوں نے حضرت نعمان کی ام ولد کے پاس پیغام بھیجا کہ کیا حضرت نعمان نے تمہیں کوئی وصیت کی تھی یا تمہارے پاس کوئی تحریر ہے؟ انہوں نے کہا کہ ایک ٹوکری ہے جس میں ایک تحریر ہے۔ لوگوں نے اسے نکالا تو اس میں لکھا تھا کہ اگر نعمان قتل ہوجائیں تو فلاں، اور اگر فلاں قتل ہوجائے تو فلاں۔ [مصنف ابن ابي شيبه/كتاب البعوث والسرايا/حدیث: 36056]

حضرت ابو عثمان فرماتے ہیں کہ میں فتح کی خوشخبری لے کر حضرت عمر رضی اللہ عنہ کے پاس گیا۔ آپ نے پوچھا کہ نعمان کا کیا بنا؟ میں نے کہا کہ وہ قتل ہوگئے۔ آپ نے پوچھا کہ فلاں کا کیا بنا؟ میں نے کہا کہ وہ قتل ہوگیا۔ آپ نے پوچھا کہ فلاں کا کیا بنا؟ میں نے کہا کہ وہ قتل ہوگیا۔ اس پر آپ نے إنا للہ وإنا إلیہ راجعون پڑھا۔ میں نے کہا کہ کچھ اور لوگ بھی ہیں جنہیں ہم نہیں جانتے۔ آپ نے فرمایا کہ ہم انہیں نہیں جانتے لیکن اللہ انہیں جانتا ہے۔ [مصنف ابن ابي شيبه/كتاب البعوث والسرايا/حدیث: 36057]

محمد فرماتے ہیں کہ جب حضرت نعمان نے حملہ کیا تو خدا کی قسم ابھی ہم ان کے کندھوں تک بھی نہیں پہنچے تھے کہ وہ دشمن کے درمیان جاکر وار کرنے لگے۔ [مصنف ابن ابي شيبه/كتاب البعوث والسرايا/حدیث: 36058]

حضرت معقل بن یسار فرماتے ہیں کہ حضرت عمر نے ہرمزان سے مشورہ کیا۔ (پھر انہوں نے عفان جیسی حدیث نقل کی) اس میں یہ اضافہ ہے: حضرت نعمان ان کے پاس نہاوند پہنچے اور ان کے اور حضرت نعمان کے درمیان دریا تھا۔ حضرت نعمان نے حضرت مغیرہ کو بھیجا تو انہوں نے دریا عبور کیا اور ان کے پاس پہنچے اور اس وقت ان کا بادشاہ ذوالجناحین تھا۔ [مصنف ابن ابي شيبه/كتاب البعوث والسرايا/حدیث: 36059]

حضرت ربیع بن خثیم فرماتے ہیں کہ حضرت عبد اللہ بن سلام کو مال غنیمت کے حصے میں ایک بوڑھی یہودن ملی۔ وہ اسے لے کر راس الجالوت (یہودیوں کے سردار) کے پاس سے گزرے اور اس سے کہا کہ کیا اس کو خریدو گے۔ اس نے بڑھیا سے بات کی تو اسے معلوم ہوا کہ وہ اس کے دین پر ہے۔ اس نے پوچھا کہ کتنے میں بیچو گے؟ حضرت عبد اللہ بن سلام نے فرمایا کہ چار ہزار میں۔ اس نے کہا کہ مجھے اس کی ضرورت نہیں۔ حضرت عبد اللہ بن سلام نے قسم کھائی کہ وہ اس سے کم نہیں کریں گے۔ پھر حضرت عبد اللہ بن سلام سے اس نے سرگوشی کی اور قرآن مجید کی یہ آیت پڑھی { وَإِنْ یَأْتُوکُمْ أُسَارَی تُفَادُوہُمْ } پھر حضرت عبد اللہ بن سلام نے فرمایا کہ تم؟ اس نے کہا کہ ہاں۔ انہوں نے فرمایا کہ یا تو تم یہ باندی خریدو گے یا اپنے دین سے نکل جاؤ گے۔ اس نے کہا کہ میں نے اس باندی کو لے لیا تم جو چاہو اس کی قیمت میں سے مجھے ہدیہ کردو۔ حضرت عبد اللہ بن سلام نے دو ہزار لے لئے اور دو ہزار اسے واپس کردیئے۔ [مصنف ابن ابي شيبه/كتاب البعوث والسرايا/حدیث: 36060]

حضرت حمید بن عبد الرحمن حمیری فرماتے ہیں کہ ایک صحابی جن کا نام ”حممہ“ تھا۔ وہ حضرت عمر رضی اللہ عنہ کے زمانے میں اصبہان کی طرف جہاد کی نیت سے نکلے۔ انہوں نے اس غزوہ میں دعا کی کہ اے اللہ! حممہ سمجھتا ہے کہ وہ تجھ سے ملاقات کو پسند کرتا ہے۔ اگر حممہ سچا ہے تو اس کے سچ کو صادر فرمادے اور اگر وہ جھوٹا ہے تو بھی اس کا فیصلہ فرمادے خواہ وہ اس کو ناپسند ہی کیوں نہ کرے۔ اے اللہ! حممہ کو اس سفر سے واپس نہ بھیج۔ راوی کہتے ہیں کہ بعد ازاں اصبہان میں ان کا انتقال ہوگیا۔ ان کے انتقال کے بعد حضرت ابو موسیٰ رضی اللہ عنہ نے خطبہ ارشاد فرمایا اور اس میں کہا کہ اے لوگو! رسول اللہ صلی اللہ علیہ وسلم کے ارشادات اور ہمارے علم کے مطابق حممہ شہید ہیں۔ [مصنف ابن ابي شيبه/كتاب البعوث والسرايا/حدیث: 36061]

حضرت علقمہ فرماتے ہیں کہ ہم نے شہر نہاوند کا محاصرہ کیا اور میں نے حضرت معضد کو اپنا ایک کپڑا دیا اور انہوں نے اس کی پگڑی باندھی۔ ان کے سر میں ایک پتھر آن لگا۔ وہ اپنے سر کو ملنے لگے اور میری طرف دیکھ کر کہنے لگے۔ یہ بہت چھوٹا ہے اور اللہ تعالیٰ چھوٹے میں برکت عطا فرمائے گا۔ [مصنف ابن ابي شيبه/كتاب البعوث والسرايا/حدیث: 36062]