حسن فرماتے ہیں مومن دنیا میں مسافر کی طرح ہے جو دنیا کی عزت میں رغبت نہیں کرتا اور اس کی ذلت پر جزع نہیں کرتا۔ لوگوں کی ایک حالت ہوتی ہے اور اس کی بھی ایک حالت ہوتی ہے۔ اس زائد مال کو جس طرف اللہ نے متوجہ کیا ہے تم بھی اس کو اسی طرف متوجہ کردو۔ [مصنف ابن ابي شيبه/كتاب الزهد/حدیث: 37944]

حضرت زکریا کہتے ہیں کہ میں نے حضرت حسن رحمہ اللہ کو کہتے سنا کہ بیشک ایمان زینت اور تمنی کا نام نہیں ہے بلکہ ایمان وہ ہے جو دل میں بیٹھ جائے اور اس کی تصدیق عمل کرتا ہو۔ [مصنف ابن ابي شيبه/كتاب الزهد/حدیث: 37945]

حضرت محمد بن جحادہ سے روایت ہے وہ کہتے ہیں کہ حسن کے پاس سے ایک غیر عربی گھوڑا ناز ونخرے سے چلتا ہوا گزرا تو آپ نے فرمایا: اوہ! میں جان چکا ہوں کہ جب قیامت آئے گی تو غم کے ساتھ آئے گی۔ [مصنف ابن ابي شيبه/كتاب الزهد/حدیث: 37946]

حسن سے روایت ہے وہ کہتے ہیں کہ بیشک اہل ایمان نے دنیا میں ہی خوف کو پہلے اختیار کرلیا۔ پس اللہ تعالیٰ ان کو قیامت کے دن امن میں رکھے گا۔ اور بیشک منافقین نے خوف کو دنیا سے مؤخر کردیا ہے۔ چناچہ اللہ تعالیٰ ان کو قیامت کے دن خوفزدہ کریں گے۔ [مصنف ابن ابي شيبه/كتاب الزهد/حدیث: 37947]

حضرت حسن سے روایت ہے وہ کہتے ہیں کہ کچھ لوگوں نے عمل کیا لیکن انہوں نے تمنا نہیں کی۔ [مصنف ابن ابي شيبه/كتاب الزهد/حدیث: 37948]

حضرت مبارک سے روایت ہے وہ کہتے ہیں کہ میں نے حضرت حسن کو کہتے سنا۔ بیشک کچھ لوگ ایسے ہیں کہ ان کی آنکھیں روتی ہیں لیکن ان کے دل نہیں روتے۔ پس جس آدمی کی آنکھیں روئیں تو اس کا دل بھی رونا چاہیے۔ [مصنف ابن ابي شيبه/كتاب الزهد/حدیث: 37949]

حسن سے روایت ہے وہ کہتے ہیں کہ ان میں عقلمند ترین انسان وہ ہے جو روئے۔ [مصنف ابن ابي شيبه/كتاب الزهد/حدیث: 37950]

حسن سے روایت ہے وہ کہتے ہیں کہ میں نے ایسے لوگوں کو پایا ہے جو اپنی چاندی (مال) خرچ کرتے تھے اور اپنی زبانیں محفوظ رکھتے تھے۔ پھر میں نے ان کے بعد ایسے لوگوں کو پایا جو اپنی چاندی (مال) کو جمع کرکے رکھتے تھے اور اپنی زبانوں کو کھلا چھوڑتے تھے۔ [مصنف ابن ابي شيبه/كتاب الزهد/حدیث: 37951]

حضرت حسن سے روایت ہے وہ کہتے ہیں کہ حلماء (ایسے ہوتے ہیں کہ) اگر ان کے ساتھ جہالت کا مظاہرہ کیا جائے تو وہ بیوقوفی نہیں کرتے۔ یہ تو ان کا دن ہے۔ اور ان کی رات کیسی ہوتی ہے؟ بہترین رات۔ وہ اپنے آنسو، اپنی گالوں پر بہاتے ہیں اور اپنے قدموں سے صفیں بناتے ہیں۔ اللہ تعالیٰ سے اپنی گردنوں کے چھڑانے کی کوشش کرتے ہیں۔ [مصنف ابن ابي شيبه/كتاب الزهد/حدیث: 37952]

حضرت عاصم سے روایت ہے وہ کہتے ہیں کہ میں نے حسن کو کبھی کسی شعر کو مثال بیان کرتے نہیں سنا۔ سوائے اس شعر کے صرف وہی میت نہیں جو مرگیا اور راحت پا گیا میت تو وہ ہوتا ہے جو زندہ میں میت ہوتا ہے پھر حسن نے فرمایا: خدا کی قسم! اس (شاعر) نے سچ کہا۔ بیشک آدمی زندہ ہوتا ہے لیکن اس کا دل مردہ ہوتا ہے۔ [مصنف ابن ابي شيبه/كتاب الزهد/حدیث: 37953]