حضرت ابی بن کعب کا ارشاد ہے کہ تم پر سنت اور درست راستہ کو اختیار کرنا ضروری ہے۔ اس لیے کہ کوئی شخص بھی ایسا نہیں کہ جو سنت اور درست راستہ پر ہو اور اس کی خشیت الٰہی کی وجہ سے آنکھیں بہہ پڑیں پھر اس کو جہنم کی آگ چھوئے۔ اور کوئی بھی شخص ایسا نہیں جو سنت اور درست راہ پر ہو اور اس کی کھال اللہ کے خوف سے کانپ اٹھے مگر اس کی مثال ایسے درخت کی سی ہے کہ جو خشک ہوچکا تھا اور وہ اسی حالت میں تھا کہ اچانک ہوا چلی اور اس کے پتے کے پتے اس سے جھڑ کر گرگئے۔ اسی طرح اس کے بھی صرف گناہ اسی طرح جھڑ جاتے ہیں۔ سنت اور درست راستہ میں میانہ روی بہتر ہے سنت اور درست راستہ کے علاوہ میں جدوجہد کرنے سے بس تم اپنے اعمال کا جائزہ لو خواہ ان میں میانہ روی ہو یا مجاہدہ، یہ اعمال انبیاء کے طریقے اور ان کی سنت پر ہوں۔ [مصنف ابن ابي شيبه/كتاب الزهد/حدیث: 38264]

حضرت عبداللہ بن شداد فرماتے ہیں کہ میں نے عمر رضی اللہ عنہ کی ہچکیوں کی آواز سنی جبکہ میں آخری صف میں تھا اور وہ سورة یوسف کی آیت {إنَّمَا أَشْکُو بَثِّی وَحُزْنِی إِلَی اللہِ } تلاوت کررہے تھے۔ [مصنف ابن ابي شيبه/كتاب الزهد/حدیث: 38265]

حضرت سالم بن عبداللہ فرماتے ہیں کہ ابن عمر رضی اللہ عنہما نے قرآن پاک کی آیت { وَإِنْ تُبْدُوا مَا فِی أَنْفُسِکُمْ، أَوْ تُخْفُوہُ یُحَاسِبْکُمْ بِہِ اللَّہُ } پڑھی اور رونے لگے تو ان کو یہ عمل ابن عباس رضی اللہ عنہما کو پہنچا تو انہوں نے فرمایا کہ اللہ تعالیٰ ابوعبدالرحمن پر رحم کرے انہوں نے وہی کہا جو اس آیت کے نزول کے وقت اصحابِ رسول اللہ e نے کیا تھا۔ پھر اس آیت کو بعد میں اس آیت نے منسوخ کردیا تھا: { لَہَا مَا کَسَبَتْ وَعَلَیْہَا مَا اکْتَسَبَتْ } [مصنف ابن ابي شيبه/كتاب الزهد/حدیث: 38266]

حضرت ابوبکر رضی اللہ عنہ کا ارشاد ہے کہ ”تم رویا کرو اگر رو نہ سکو تو رونے کی صورت بنا لیا کرو۔ [مصنف ابن ابي شيبه/كتاب الزهد/حدیث: 38267]

حضرت علقمہ بن وقاص فرماتے ہیں عمر عشاء کی نماز میں سورة یوسف تلاوت کیا کرتے تھے اور میں آخری صف میں تھا حتی کہ جب یوسف علیہ السلام کا ذکر آیا تو میں نے ان کی ہچکی کی آواز سنی۔ [مصنف ابن ابي شيبه/كتاب الزهد/حدیث: 38268]

حضرت شقیق بن سلمہ فرماتے ہیں کہ ہم خباب کے پاس عیادت کے لیے آئے تو انہوں نے فرمایا کہ اس صندوق میں اسی ہزار 80000 رکھے ہوئے ہیں، میں نے انہیں کبھی دھاگے سے نہیں باندھا اور میں نے ان سے کسی سائل کو نہیں روکا۔ ہم نے ان سے سوال کیا کہ آپ کس بات پر روتے ہیں تو انہوں نے جواب دیا کہ میرے ساتھی چلے گئے اور دنیا نے ان کا کچھ بھی نہیں بگاڑا تھا اور اب ہم باقی رہ گئے ہیں حتی کہ اب ہم اس کی سوائے مٹی کے اور کوئی جگہ نہیں دیکھتے۔ [مصنف ابن ابي شيبه/كتاب الزهد/حدیث: 38269]

حضرت عبداللہ بن عبیدہ فرماتے ہیں کہ صفیہ آپ e کی بیوی نے لوگوں کو دیکھا کہ انہوں نے آیت سجدہ تلاوت کی پھر سجدہ کیا تو انہوں نے آواز دی کہ یہ تو محض سجدہ اور دعا ہے لیکن رونا کہاں چلا گیا؟“ [مصنف ابن ابي شيبه/كتاب الزهد/حدیث: 38270]

حضرت بختری بن زید بن خارجہ فرماتے ہیں کہ عبادت گزاروں میں سے ایک آدمی کسی لوہار کی کھلی ہوئی بھٹی کے پاس سے گزرا تو کھڑا ہو کر دیکھنے لگا۔ پھر جتنا دیر اللہ نے چاہا وہ دیکھتا رہا بالآخر ایک چیخ ماری اور مرگیا۔ [مصنف ابن ابي شيبه/كتاب الزهد/حدیث: 38271]

حضرت ابن ابی ملیکہ رحمہ اللہ فرماتے ہیں کہ میں نے حضرت عبداللہ بن عمرو رضی اللہ عنہ کو دیکھا کہ آپ رضی اللہ عنہ رو رہے تھے۔ پس میں نے ان کی طرف دیکھا تو وہ کہنے لگے۔ کیا تم تعجب کرتے ہو؟ اللہ کے خوف سے رویا کرو۔ پس اگر تم رو نہیں سکتے تو کم از کم رونے کی صورت ہی بنا لو۔ یہاں تک کہ تم میں سے کوئی کہہ دے۔ ایہ ایہ۔ بیشک یہ چاند بھی اللہ کے خوف سے روتا ہے۔ [مصنف ابن ابي شيبه/كتاب الزهد/حدیث: 38272]

حضرت ابن بریدہ کا ارشاد ہے کہ اگر تمام روئے زمین والوں کے رونے کا داود علیہ السلام کے رونے سے تقابل کیا جائے تو پھر بھی اس کے برابر نہیں ہوسکتا اور اگر داود علیہ السلام کے رونے کا اور تمام زمین والوں کے رونے کا آدم علیہ السلام کے رونے سے تقابل کیا جائے جس وقت ان کو زمین کی طرف اتار دیا گیا تھا تو پھر آدم علیہ السلام کا رونا بڑھ جائے گا۔ [مصنف ابن ابي شيبه/كتاب الزهد/حدیث: 38273]