سیدنا جابر رضی اللہ عنہ بیان کرتے ہیں کہ بنو عذرہ سے تعلق رکھنے والے ایک شخص نے اپنے غلام کو مدبر کے طور پر آزاد کر دیا، نبی اکرم صلی اللہ علیہ وسلم نے اسے بلوایا، اسے فروخت کیا اور اس کی قیمت اس شخص کے سپرد کی اور پھر فرمایا: ”اپنی ذات سے آغاز کرو، اس پر خرچ کرو، پھر اپنے ماں باپ پر خرچ کرو، پھر اپنے قریبی رشتے داروں پر کرو، پھر اس طرح اور اس طرح کرو۔“ [صحیح ابن حبان/كتاب الزكاة/حدیث: 3339]

سیدنا انس بن مالک رضی اللہ عنہ بیان کرتے ہیں کہ مدینہ منورہ میں سیدنا ابوطلحہ انصاری رضی اللہ عنہ کی زمینیں انصار میں سب سے زیادہ تھیں اور ان کے نزدیک ان کی سب سے پسندیدہ ملکیت ”بیرحاء“ نامی باغ تھا جو مسجد کے بالکل مدمقابل تھا۔ نبی اکرم صلی اللہ علیہ وسلم اس باغ میں تشریف لایا کرتے تھے اور اس کا میٹھا پانی پیا کرتے تھے۔ سیدنا انس رضی اللہ عنہ بیان کرتے ہیں کہ جب یہ آیت نازل ہوئی: ﴿لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ﴾ [سورة آل عمران: 92] ”تم لوگ اس وقت تک نیکی کو نہیں پہنچ سکتے جب تک تم اس چیز کو خرچ نہیں کرتے جسے تم پسند کرتے ہو۔“ تو سیدنا ابوطلحہ رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور انہوں نے عرض کی: یا رسول اللہ صلی اللہ علیہ وسلم ! اللہ تعالیٰ نے اپنی کتاب میں یہ بات ارشاد فرمائی ہے: ﴿لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ﴾ [سورة آل عمران: 92] ”تم لوگ اس وقت تک نیکی کو نہیں پہنچ سکتے جب تک اس چیز کو خرچ نہیں کرتے جسے تم پسند کرتے ہو۔“ میرے نزدیک میرا سب سے پسندیدہ مال ”بیرحاء“ ہے، یہ اللہ کے لیے صدقہ ہے، میں اس کے اجر و ثواب کا اللہ تعالیٰ کی بارگاہ میں امیدوار ہوں۔ یا رسول اللہ صلی اللہ علیہ وسلم ! آپ صلی اللہ علیہ وسلم جہاں چاہیں اسے خرچ کر دیں۔ نبی اکرم صلی اللہ علیہ وسلم نے ارشاد فرمایا: «بَخٍ ذٰلِكَ مَالٌ رَابِحٌ، ذٰلِكَ مَالٌ رَابِحٌ» ”بہت عمدہ! یہ فائدہ بخش مال ہے، بہت عمدہ! یہ فائدہ بخش مال ہے۔ تم نے اس کے بارے میں جو کہا میں نے وہ سن لیا ہے، میں سمجھتا ہوں کہ تم اس کو اپنے رشتے داروں میں بانٹ دو۔“ سیدنا ابوطلحہ رضی اللہ عنہ نے عرض کی: یا رسول اللہ صلی اللہ علیہ وسلم ! میں ایسا ہی کروں گا۔ (سیدنا انس رضی اللہ عنہ بیان کرتے ہیں:) تو سیدنا ابوطلحہ رضی اللہ عنہ نے اپنے قریبی رشتے داروں اور اپنے چچا زاد بھائیوں میں اسے تقسیم کر دیا۔ [صحیح ابن حبان/كتاب الزكاة/حدیث: 3340]

سیدنا طارق محاربی رضی اللہ عنہ بیان کرتے ہیں: پھر میں مدینہ منورہ آیا، وہاں نبی اکرم صلی اللہ علیہ وسلم کھڑے ہوئے لوگوں کو خطبہ دے رہے تھے، آپ صلی اللہ علیہ وسلم نے یہ بات ارشاد فرمائی: ”دینے والا ہاتھ اوپر والا ہے اور تم اپنے زیر کفالت (پر خرچ کرنے) سے آغاز کرو جو تمہاری والدہ، تمہارا باپ، تمہاری بہن، تمہارا بھائی ہے اور پھر درجہ بد درجہ قریبی عزیز ہیں۔“ [صحیح ابن حبان/كتاب الزكاة/حدیث: 3341]

سیدنا جابر رضی اللہ عنہ بیان کرتے ہیں کہ ایک شخص کا نام ابومذکور تھا، اس نے اپنے غلام کو مدبر کے طور پر آزاد کر دیا، اس شخص کے پاس اس غلام کے علاوہ کوئی مال نہیں تھا۔ غلام کا نام یعقوب تھا۔ نبی اکرم صلی اللہ علیہ وسلم نے دریافت کیا: ”اسے کون خریدے گا؟“ تو بنو عدی سے تعلق رکھنے والے ایک شخص نے آٹھ سو درہم میں اسے خرید لیا۔ نبی اکرم صلی اللہ علیہ وسلم نے ارشاد فرمایا: ”جب کوئی شخص غریب ہو، تو اسے اپنی ذات سے آغاز کرنا چاہیے، اگر اس کے پاس اضافی مال ہو، تو اپنی بیوی پر خرچ کرے، اگر اضافی مال ہو، تو اپنے قریبی رشتے داروں پر خرچ کرے، اگر پھر بھی اضافی ہو، تو یہاں اور وہاں خرچ کرے۔“ [صحیح ابن حبان/كتاب الزكاة/حدیث: 3342]

سیدہ میمونہ بنت حارث رضی اللہ عنہا کے بارے میں یہ بات منقول ہے کہ نبی اکرم صلی اللہ علیہ وسلم کے زمانہ اقدس میں انہوں نے اپنی کنیز کو آزاد کر دیا، انہوں نے اس بات کا تذکرہ نبی اکرم صلی اللہ علیہ وسلم سے کیا، تو نبی اکرم صلی اللہ علیہ وسلم نے ارشاد فرمایا: ”اگر تم اسے اپنے ماموں کو دے دیتی، تو یہ تمہارے لیے زیادہ اجر کا باعث ہوتا۔“ [صحیح ابن حبان/كتاب الزكاة/حدیث: 3343]

سیدنا سلمان بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”غریب کو صدقہ دینا صدقہ ہے اور رشتے دار کو صدقہ دینے میں دو پہلو ہیں: صدقہ کرنا اور صلہ رحمی کرنا۔“ [صحیح ابن حبان/كتاب الزكاة/حدیث: 3344]

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”سب سے افضل صدقہ وہ ہے جو خوشحالی کے عالم میں دیا جائے اور تم ان سے آغاز کرو جو تمہارے زیر کفالت ہیں۔“ [صحیح ابن حبان/كتاب الزكاة/حدیث: 3345]

سیدنا ابوہریرہ رضی اللہ عنہ بیان کرتے ہیں، انہوں نے عرض کی: یا رسول اللہ صلی اللہ علیہ وسلم ! کون سا صدقہ زیادہ فضیلت رکھتا ہے؟ نبی اکرم صلی اللہ علیہ وسلم نے فرمایا: ”جس شخص کے پاس پیسے تھوڑے ہوں وہ محنت کر کے صدقہ کرے اور تم اپنے زیر کفالت سے آغاز کرو۔“ [صحیح ابن حبان/كتاب الزكاة/حدیث: 3346]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”بعض اوقات ایک درہم ایک لاکھ درہموں پر سبقت لے جاتا ہے۔“ ایک صاحب نے دریافت کیا: یا رسول اللہ صلی اللہ علیہ وسلم ! وہ کیسے؟ نبی اکرم صلی اللہ علیہ وسلم نے فرمایا: ”ایک شخص کے پاس بہت زیادہ مال ہوتا ہے وہ اپنے مال میں سے ایک لاکھ درہم لیتا ہے اور انہیں صدقہ کر دیتا ہے اور ایک شخص کے پاس صرف دو درہم ہوتے ہیں وہ ان میں سے ایک لے کر اسے صدقہ کر دیتا ہے۔“ [صحیح ابن حبان/كتاب الزكاة/حدیث: 3347]

سیدنا سعد بن عبادہ رضی اللہ عنہ بیان کرتے ہیں: میں نے عرض کی: ”یا رسول اللہ صلی اللہ علیہ وسلم ! کون سا صدقہ زیادہ فضیلت رکھتا ہے؟“ نبی اکرم صلی اللہ علیہ وسلم نے فرمایا: ”پانی پلانا۔“ [صحیح ابن حبان/كتاب الزكاة/حدیث: 3348]