ایوب نے نافع کے حوالے سے سیدنا عبداللہ بن عمر رضی اللہ عنہما کا یہ بیان نقل کیا ہے: ”شلوار وہ شخص پہن سکتا ہے جسے تہبند میسر نہ ہو اور موزے وہ شخص پہن سکتا ہے جسے جوتے میسر نہ ہوں۔“ راوی کہتے ہیں: تو انہوں نے اپنے ہاتھ کے ذریعے اشارہ کیا، ابراہیم بن حجاج نے اشارہ کر کے بتایا کہ گویا انہوں نے حدیث کی کوئی پرواہ نہیں کی، تو میں ان کے پاس سے اٹھ گیا، پھر حجاج بن ارطاۃ کی مجھ سے ملاقات مسجد کے اندر ہوئی تو میں نے کہا: اے ارطاۃ! ایسے محرم کے بارے میں آپ کیا کہتے ہیں جو شلوار پہن لیتا ہے یا موزے پہن لیتا ہے؟ تو انہوں نے فرمایا: عمرو بن دینار نے جابر بن زید کے حوالے سے سیدنا عبداللہ بن عباس رضی اللہ عنہما کے حوالے سے نبی اکرم صلی اللہ علیہ وسلم کا یہ فرمان نقل کیا ہے: ”شلوار وہ شخص پہن سکتا ہے جسے تہبند دستیاب نہ ہو اور موزے وہ شخص پہن سکتا ہے جسے جوتے دستیاب نہ ہوں۔“ [صحیح ابن حبان/كتاب الحج/حدیث: 3782]

ابواسحاق نے حارث کے حوالے سے سیدنا علی رضی اللہ عنہ کا یہ فرمان نقل کیا ہے: ”شلوار وہ شخص پہن سکتا ہے جسے تہبند دستیاب نہ ہو اور موزے وہ شخص پہن سکتا ہے جسے جوتے دستیاب نہ ہوں۔“ حماد بن زید کہتے ہیں: میں نے کہا: ”آپ لوگوں کے ساتھی کا کیا معاملہ ہے، وہ تو اس طرح کہتے ہیں۔“ [صحیح ابن حبان/كتاب الحج/حدیث: 3783]

سیدنا عبداللہ بن عمر رضی اللہ عنہما بیان کرتے ہیں کہ ایک شخص نے نبی اکرم صلی اللہ علیہ وسلم سے سوال کیا کہ محرم کون سے کپڑے پہن سکتا ہے، نبی اکرم صلی اللہ علیہ وسلم نے ارشاد فرمایا: ”قمیض، عمامہ، شلوار، ٹوپی اور موزے نہیں پہنے گا، جس شخص کو جوتے نہیں ملتے، تو وہ موزے پہن لے، لیکن وہ ٹخنوں کے نیچے سے انہیں کاٹ لے اور تم ایسا کوئی کپڑا نہ پہنو، جس پر ورس یا زعفران لگا ہوا ہو۔“ [صحیح ابن حبان/كتاب الحج/حدیث: 3784]

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جسے تہبند نہیں ملتا وہ شلوار پہن لے اور جسے جوتے نہیں ملتے وہ موزے پہن لے۔“ [صحیح ابن حبان/كتاب الحج/حدیث: 3785]

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو عرفات میں خطبہ دیتے ہوئے ارشاد فرماتے ہوئے سنا ہے: ”جسے جوتے نہیں ملتے وہ موزے پہن لے اور جسے تہبند نہیں ملتا وہ شلوار پہن لے۔“ [صحیح ابن حبان/كتاب الحج/حدیث: 3786]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جسے جوتے نہیں ملتے وہ موزے پہن لے، البتہ وہ انہیں ٹخنوں کے نیچے سے کاٹ لے۔“ [صحیح ابن حبان/كتاب الحج/حدیث: 3787]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جب محرم شخص کو جوتے نہیں ملتے، تو وہ موزے پہن لے، البتہ وہ انہیں اس طرح کاٹ لے کہ وہ ٹخنوں سے نیچے ہو جائیں۔“ [صحیح ابن حبان/كتاب الحج/حدیث: 3788]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جسے تہبند نہیں ملتا وہ شلوار پہن لے، جسے جوتے نہیں ملتے وہ موزے پہن لے۔“ [صحیح ابن حبان/كتاب الحج/حدیث: 3789]

سیدنا عمر بن خطاب رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو عقیق کے مقام پر یہ بات ارشاد فرماتے ہوئے سنا: ”میرے پروردگار کی طرف سے پیغام رساں میرے پاس آیا اور بولا: «صَلِّ فِي هَذَا الْوَادِي الْمُبَارَكِ» ”آپ اس مبارک وادی میں نماز ادا کیجیے“ اور اس نے یہ بتایا کہ عمرہ حج میں شامل ہو گیا ہے۔“ [صحیح ابن حبان/كتاب الحج/حدیث: 3790]

سیدنا عبداللہ رضی اللہ عنہ بیان کرتے ہیں: ہم نے یعنی نبی اکرم صلی اللہ علیہ وسلم کے اصحاب نے صرف حج کا احرام باندھا تھا، اس کے ہمراہ اور کوئی چیز نہیں تھی۔ ہم ذو الحجہ کی چار تاریخ کی صبح مکہ پہنچ گئے، تو نبی اکرم صلی اللہ علیہ وسلم نے ہمیں یہ حکم دیا کہ ہم احرام کھول دیں۔ نبی اکرم صلی اللہ علیہ وسلم نے فرمایا: ”تم لوگ احرام کھول دو اور اسے عمرے میں تبدیل کر لو۔“ پھر آپ صلی اللہ علیہ وسلم کو ہمارے بارے میں یہ معلوم ہوا کہ ہم یہ کہتے ہیں: اب ہمارے اور عرفہ کے درمیان صرف پانچ دن باقی رہ گئے ہیں اور نبی اکرم صلی اللہ علیہ وسلم ہمیں احرام کھولنے کا حکم دے رہے ہیں، کیا ہم ایسی حالت میں منیٰ کی طرف جائیں گے کہ ہماری شرمگاہوں سے منی ٹپک رہی ہو گی؟ تو نبی اکرم صلی اللہ علیہ وسلم خطبہ دینے کے لیے کھڑے ہوئے اور آپ صلی اللہ علیہ وسلم نے ارشاد فرمایا: ”تم لوگوں نے جو بات کہی ہے وہ مجھ تک پہنچ گئی ہے۔ میں تم سب سے زیادہ نیکوکار اور پرہیزگار ہوں۔ اگر میں اپنے ساتھ قربانی کا جانور نہ لایا ہوتا اور مجھے بعد میں جو خیال آیا ہے، اگر وہ پہلے آ جاتا، تو میں قربانی کا جانور ساتھ نہ لاتا (اور میں بھی احرام کھول دیتا)۔“ راوی بیان کرتے ہیں: سیدنا علی رضی اللہ عنہ یمن سے آئے، تو نبی اکرم صلی اللہ علیہ وسلم نے دریافت کیا: ”تم نے کیا نیت کی ہے؟“ انہوں نے بتایا: وہی نیت کی ہے جو احرام نبی اکرم صلی اللہ علیہ وسلم نے باندھا ہے، تو نبی اکرم صلی اللہ علیہ وسلم نے فرمایا: ”تم قربانی کا جانور ساتھ لائے ہو، تم احرام باندھے رہو جس طرح ہو۔“ راوی کہتے ہیں: سیدنا سراقہ رضی اللہ عنہ نے نبی اکرم صلی اللہ علیہ وسلم کی خدمت میں عرض کی: یا رسول اللہ صلی اللہ علیہ وسلم ! (حج کے احرام کو) عمرے میں تبدیل کرنے کا یہ حکم اس سال کے لیے خاص ہے یا ہمیشہ کے لیے ہے؟ نبی اکرم صلی اللہ علیہ وسلم نے ارشاد فرمایا: ”نہیں بلکہ ہمیشہ کے لیے ہے۔“ [صحیح ابن حبان/كتاب الحج/حدیث: 3791]