سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کی ملاقات سیدنا عبدالرحمن بن عوف رضی اللہ عنہ سے ہوئی، ان پر زرد رنگ کا نشان موجود تھا جو خلوق خوشبو کا تھا۔ نبی اکرم صلی اللہ علیہ وسلم نے ان سے دریافت فرمایا: ”اے عبدالرحمن! اس کی وجہ کیا ہے؟“ انہوں نے بتایا: میں نے ایک انصاری خاتون کے ساتھ شادی کر لی ہے۔ نبی اکرم صلی اللہ علیہ وسلم نے دریافت فرمایا: ”تم نے اسے کتنا مہر دیا ہے؟“ تو انہوں نے جواب دیا: ایک گٹھلی کے وزن جتنا سونا۔ نبی اکرم صلی اللہ علیہ وسلم نے فرمایا: ”تم ولیمہ کرو خواہ ایک بکری (ذبح کر کے دعوت کرو)۔“ سیدنا انس رضی اللہ عنہ بیان کرتے ہیں کہ میں نے انہیں (یعنی سیدنا عبدالرحمن بن عوف رضی اللہ عنہ) کو دیکھا کہ ان کے انتقال کے بعد ان کی ہر بیوی کے حصے میں ایک لاکھ (درہم) آئے تھے۔ [صحیح ابن حبان/كتاب النكاح/حدیث: 4096]

سیدنا ابوہریرہ رضی اللہ عنہ بیان کرتے ہیں: جب نبی اکرم صلی اللہ علیہ وسلم ہمارے درمیان موجود تھے، تو ہمارا (ادا کیے جانے والا) مہر دس اوقیہ ہوتا تھا۔ [صحیح ابن حبان/كتاب النكاح/حدیث: 4097]

مسروق بیان کرتے ہیں کہ سیدنا عبداللہ رضی اللہ عنہ نے ایک ایسے شخص کے بارے میں جس نے ایک عورت کے ساتھ شادی کی، لیکن اس کے ساتھ صحبت نہیں کی اور اس کے لیے مہر بھی مقرر نہیں کیا، تو سیدنا عبداللہ بن مسعود رضی اللہ عنہ نے فرمایا کہ ایسی عورت کو مکمل مہر ملے گا اور اس پر عدت گزارنا لازم ہے، اسے وراثت میں بھی حصہ ملے گا۔ اس پر سیدنا معقل بن سنان رضی اللہ عنہ نے کہا: میں نبی اکرم صلی اللہ علیہ وسلم کے بارے میں گواہی دے کر یہ بات بیان کرتا ہوں کہ نبی اکرم صلی اللہ علیہ وسلم نے بروع بنت واشق رضی اللہ عنہا کے بارے میں یہی فیصلہ دیا تھا۔ [صحیح ابن حبان/كتاب النكاح/حدیث: 4098]

یہی روایت ایک اور سند کے ساتھ سیدنا عبداللہ رضی اللہ عنہ سے مروی ہے۔ [صحیح ابن حبان/كتاب النكاح/حدیث: 4099]

سیدنا عبداللہ بن مسعود رضی اللہ عنہ سے منقول ہے کہ ایک شخص ان کے پاس آیا اور ان سے ایسے شخص کے بارے میں دریافت کیا جس نے کسی عورت کے ساتھ شادی کی اور پھر اس کا انتقال ہو گیا، اس نے اس عورت کے ساتھ صحبت بھی نہیں کی تھی اور نہ ہی اس کا مہر مقرر کیا تھا، اس پر سیدنا عبداللہ رضی اللہ عنہ نے اسے کوئی جواب نہیں دیا یہاں تک کہ ایک مہینہ گزر گیا، پھر انہوں نے یہ بات بیان کی: میں اپنی رائے سے یہ بات بیان کرنے لگا ہوں، اگر یہ درست ہوئی تو اللہ تعالیٰ کی طرف سے ہو گی اور اگر غلط ہوئی تو میری طرف سے ہو گی؛ اس عورت کے بارے میں میری رائے یہ ہے کہ اسے اس کے جیسی دوسری عورتوں جتنا مہر ملے گا جس میں کوئی کمی بیشی نہیں ہو گی، اس عورت پر عدت گزارنا لازم ہو گا اور اسے وراثت میں سے حصہ ملے گا، تو فلاں اشجعی کھڑے ہوئے اور انہوں نے یہ بات بیان کی کہ نبی اکرم صلی اللہ علیہ وسلم نے بروع بنت واشق رضی اللہ عنہا کے بارے میں اسی کی مانند فیصلہ دیا تھا۔ راوی کہتے ہیں کہ سیدنا عبداللہ رضی اللہ عنہ اس بات پر خوش ہوئے اور انہوں نے تکبیر کہی۔ [صحیح ابن حبان/كتاب النكاح/حدیث: 4100]

علقمہ رحمہ اللہ بیان کرتے ہیں کہ کچھ لوگ سیدنا عبداللہ بن مسعود رضی اللہ عنہ کی خدمت میں حاضر ہوئے، انہوں نے عرض کی: ہم آپ کے پاس ایسے شخص کے بارے میں دریافت کرنے کے لیے آئے ہیں جس کا تعلق ہم سے ہے، اس نے شادی کی، اس نے (اپنی بیوی کا) مہر مقرر نہیں کیا اور اللہ تعالیٰ نے ان دونوں میاں بیوی کو ملنے کا موقع نہیں دیا یہاں تک کہ مرد کا انتقال ہو گیا، تو سیدنا عبداللہ رضی اللہ عنہ نے فرمایا: جب سے میں نبی اکرم صلی اللہ علیہ وسلم سے جدا ہوا ہوں اس کے بعد مجھ سے ایسے کسی مسئلے کے بارے میں دریافت نہیں کیا گیا جو میرے نزدیک اس سے زیادہ مشکل ہو، تم لوگ کسی اور کے پاس چلے جاؤ۔ وہ لوگ ایک ماہ تک سیدنا عبداللہ رضی اللہ عنہ کے پاس آتے رہے، پھر ایک ماہ کے بعد انہوں نے سیدنا عبداللہ رضی اللہ عنہ سے کہا: اگر ہم آپ سے دریافت نہیں کریں گے تو پھر کس سے دریافت کریں گے؟ اس شہر میں صرف آپ ہی نبی اکرم صلی اللہ علیہ وسلم کے صحابی ہیں، ہمیں آپ کے علاوہ اور کوئی نہیں ملتا۔ سیدنا عبداللہ بن مسعود رضی اللہ عنہ نے فرمایا: میں اس بارے میں اپنی ذاتی رائے کے مطابق مسئلہ بیان کروں گا، اگر یہ درست ہوا تو اللہ تعالیٰ کی طرف سے ہو گا اور اگر غلط ہوا تو میری طرف سے ہو گا، اللہ اور اس کا رسول اس سے بری الذمہ ہوں گے؛ میرا یہ خیال ہے اس عورت کو اس کے جیسی دیگر عورتوں کی طرح کا مہر ادا کیا جائے گا، جس میں کوئی کمی اور کوئی اضافہ نہیں ہو گا اور اس کو وراثت میں حصہ ملے گا اور اس عورت پر چار ماہ دس دن تک عدت گزارنا لازم ہے۔ (راوی کہتے ہیں) یہ واقعہ اشجع قبیلے کے کچھ افراد کی موجودگی میں پیش آیا تو ایک صاحب کھڑے ہوئے، جن کا نام معقل بن سنان اشجعی رضی اللہ عنہ تھا، انہوں نے کہا: میں اس بات کی گواہی دیتا ہوں کہ آپ نے اس بارے میں وہی فیصلہ دیا ہے جو اس طرح کے مقدمے میں نبی اکرم صلی اللہ علیہ وسلم نے فیصلہ دیا تھا جو ہمارے (قبیلے کی) ایک خاتون کے بارے میں تھا، اس خاتون کا نام بروع بنت واشق رضی اللہ عنہا تھا۔ (راوی کہتے ہیں) سیدنا عبداللہ رضی اللہ عنہ کو اسلام کے بعد اتنا زیادہ خوش اور کبھی نہیں دیکھا گیا جتنا وہ اس واقعہ سے خوش ہوئے (کہ ان کی ذاتی رائے نبی اکرم صلی اللہ علیہ وسلم کے فیصلے کے مطابق تھی)۔ [صحیح ابن حبان/كتاب النكاح/حدیث: 4101]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم میرے پاس تشریف لائے، آپ صلی اللہ علیہ وسلم کا چہرہ مبارک خوشی سے دمک رہا تھا، آپ صلی اللہ علیہ وسلم نے فرمایا: ”کیا تمہیں پتا چلا (ایک قیافہ شناس) مجزز نے کچھ دیر پہلے زید بن حارثہ اور اسامہ بن زید رضی اللہ عنہما کے (صرف پاؤں دیکھے) اور یہ کہا: یہ پاؤں باپ بیٹے کے ہیں۔“ [صحیح ابن حبان/كتاب النكاح/حدیث: 4102]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم خوشی کے عالم میں میرے ہاں تشریف لائے کیونکہ مجزز مدلجی نے اسامہ بن زید رضی اللہ عنہما کو اپنے والد کے ساتھ لپٹے ہوئے دیکھ کر (ان کے صرف پاؤں دیکھ کر) یہ کہا تھا: یہ باپ بیٹے کے پاؤں ہیں۔ (راوی کہتے ہیں) مجزز نامی صاحب قیافہ شناس تھے۔ [صحیح ابن حبان/كتاب النكاح/حدیث: 4103]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”بچہ فراش والے کو ملے گا اور زنا کرنے والے کو محرومی ملے گی۔“ [صحیح ابن حبان/كتاب النكاح/حدیث: 4104]

سیدہ عائشہ صدیقہ رضی اللہ عنہا بیان کرتی ہیں کہ عتبہ بن ابی وقاص نے اپنے بھائی سیدنا سعد بن ابی وقاص رضی اللہ عنہ کو یہ تلقین کی کہ زمعہ کی کنیز کا بیٹا میری اولاد ہے، تم اسے اپنے قبضے میں لے لینا۔ سیدہ عائشہ رضی اللہ عنہا بیان کرتی ہیں کہ فتح مکہ کے سال سیدنا سعد بن ابی وقاص رضی اللہ عنہ نے اس لڑکے کو اپنے قبضے میں لے لیا اور بولے: یہ میرا بھتیجا ہے، اس کے بارے میں میرے بھائی نے مجھ سے عہد لیا تھا، تو عبد بن زمعہ کھڑے ہوئے اور بولے: یہ میرا بھائی ہے، میرے والد کی کنیز کا بیٹا ہے، یہ میرے والد کے بستر پر پیدا ہوا۔ یہ دونوں نبی اکرم صلی اللہ علیہ وسلم کی خدمت میں حاضر ہوئے، سیدنا سعد رضی اللہ عنہ نے عرض کی: یا رسول اللہ صلی اللہ علیہ وسلم ! میرے بھائی نے مجھ سے یہ عہد لیا تھا جو اس بچے کے بارے میں تھا، عبد بن زمعہ نے کہا: یہ میرا بھائی ہے اور میرے والد کی کنیز کا بیٹا ہے، یہ میرے والد کے بستر پر پیدا ہوا تھا۔ نبی اکرم صلی اللہ علیہ وسلم نے فرمایا: ”اے عبد بن زمعہ! یہ تمہیں ملے گا کیونکہ بچہ فراش والے کو ملتا ہے اور زانی کو محرومی ملتی ہے“ پھر نبی اکرم صلی اللہ علیہ وسلم نے سیدہ سودہ بنت زمعہ رضی اللہ عنہا سے فرمایا: ”تم اس لڑکے سے پردہ کرو“۔ اس کی وجہ یہ ہے کہ نبی اکرم صلی اللہ علیہ وسلم نے اس بچے کی عتبہ کے ساتھ مشابہت ملاحظہ کر لی تھی، تو اس لڑکے نے کبھی بھی سیدہ سودہ رضی اللہ عنہا کو نہیں دیکھا یہاں تک کہ وہ اللہ تعالیٰ کی بارگاہ میں حاضر ہو گیا۔ [صحیح ابن حبان/كتاب النكاح/حدیث: 4105]