سیدنا ابوہریرہ رضی اللہ عنہ فرماتے ہیں: نبی اکرم صلی اللہ علیہ وسلم کے زمانہ اقدس میں ہماری خوراک صرف دو سیاہ چیزیں ہوتی تھیں: کھجور اور پانی۔ [صحیح ابن حبان/كتاب الحظر والإباحة/حدیث: 5805]

عبداللہ بن ابوسلمہ بیان کرتے ہیں: سیدنا ابوموسیٰ اشعری رضی اللہ عنہ نے سیدنا عمر رضی اللہ عنہ کے ہاں اندر آنے کے لیے تین مرتبہ اجازت مانگی، جب انہیں اجازت نہیں ملی تو وہ واپس چلے گئے، اس بات کی اطلاع سیدنا عمر رضی اللہ عنہ کو ملی تو انہوں نے دریافت کیا: آپ واپس کیوں چلے گئے تھے؟ سیدنا ابوموسیٰ اشعری رضی اللہ عنہ نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جب کوئی شخص تین مرتبہ اجازت مانگے اور اسے اجازت نہ ملے تو اسے واپس چلے جانا چاہیے۔“ اس پر سیدنا عمر رضی اللہ عنہ نے کہا: یا تو آپ اس پر کوئی گواہ لے آئیں ورنہ پھر (یہاں حماد نامی راوی نے یہ کہا: کہ سیدنا عمر رضی اللہ عنہ نے انہیں سزا دینے کا کہا:) راوی بیان کرتے ہیں: سیدنا ابوموسیٰ اشعری رضی اللہ عنہ وہاں سے واپس آئے اور مسجد میں آگئے، وہ انصار کی محفل کے پاس تشریف لائے اور انہیں سارا واقعہ بیان کیا جو سیدنا عمر رضی اللہ عنہ کو انہوں نے بیان کیا اور جو سیدنا عمر رضی اللہ عنہ نے ان سے کہا: تو ان لوگوں نے کہا: آپ کے ساتھ وہ شخص اٹھ کر جائے گا جو ہم میں کم سن ہو، تو سیدنا ابوسعید خدری رضی اللہ عنہ اٹھ کر گئے اور انہوں نے اس بات کی گواہی دی، تو سیدنا عمر رضی اللہ عنہ نے کہا: ہم نے آپ پر کوئی الزام عائد نہیں کیا تھا، لیکن نبی اکرم صلی اللہ علیہ وسلم کے حوالے سے منقول حدیث کا معاملہ اہم ہوتا ہے۔ (امام ابن حبان رحمہ اللہ فرماتے ہیں:) اجازت لینے والے کے لیے واپس جانے کا حکم ہونا اس صورت میں ہے جب شرط موجود ہو اور وہ یہ کہ اجازت کا نہ ہونا واجب ہو لیکن جب شرط پائی جائے گی اور وہ اجازت دینا ہے تو پھر واپس جانے کا حکم کالعدم تصور ہوگا۔ [صحیح ابن حبان/كتاب الحظر والإباحة/حدیث: 5806]

سیدنا ابوموسیٰ اشعری رضی اللہ عنہ کے بارے میں یہ بات منقول ہے، انہوں نے سیدنا عمر رضی اللہ عنہ کے ہاں اندر آنے کے لیے تین مرتبہ اجازت مانگی، انہیں اجازت نہیں ملی، سیدنا عمر رضی اللہ عنہ شاید اس وقت مصروف تھے تو سیدنا ابوموسیٰ اشعری رضی اللہ عنہ واپس چلے گئے، جب سیدنا عمر رضی اللہ عنہ فارغ ہوئے، تو انہوں نے دریافت کیا: کیا میں نے عبداللہ بن قیس کی آواز نہیں سنی تھی؟ تم لوگ اسے اندر آنے کے لیے کہو۔ سیدنا عمر رضی اللہ عنہ کو بتایا گیا، وہ تو واپس چلے گئے ہیں، سیدنا عمر رضی اللہ عنہ نے انہیں بلوایا (اور دریافت کیا) تو سیدنا ابوموسیٰ اشعری رضی اللہ عنہ نے بتایا: ہمیں اس بات کا حکم دیا گیا ہے، سیدنا عمر رضی اللہ عنہ نے کہا: آپ اس پر کوئی ثبوت لے کر آئیں، تو سیدنا ابوموسیٰ اشعری رضی اللہ عنہ انصار کی محفل میں تشریف لے گئے، ان سے اس بارے میں دریافت کیا، تو ان لوگوں نے کہا: آپ کے حق میں اس بارے میں گواہی وہ شخص دے گا جو ہم میں سب سے کم سن ہے اور وہ ابوسعید خدری رضی اللہ عنہ ہے، تو سیدنا ابوموسیٰ اشعری رضی اللہ عنہ سیدنا ابوسعید خدری رضی اللہ عنہ کو ساتھ لے کر گئے، انہوں نے سیدنا عمر رضی اللہ عنہ کے سامنے اس بات کی گواہی دی (کہ ایسا ہی) تو سیدنا عمر رضی اللہ عنہ نے فرمایا: نبی اکرم صلی اللہ علیہ وسلم کا یہ حکم مجھ سے مخفی رہا، بازار میں خرید و فروخت نے مجھے اس سے غافل کر دیا، تاہم تم جو چاہو تسلیم کرو (یا تم جیسے چاہو سلام کرو)۔ [صحیح ابن حبان/كتاب الحظر والإباحة/حدیث: 5807]

سیدنا جابر بن عبداللہ رضی اللہ عنہما بیان کرتے ہیں: میں نبی صلی اللہ علیہ وسلم کی خدمت میں حاضر ہوا، میں نے دروازہ کھٹکھٹایا تو آپ صلی اللہ علیہ وسلم نے دریافت فرمایا: ”کون ہے؟“ میں نے عرض کی: میں ہوں۔ نبی اکرم صلی اللہ علیہ وسلم نے دو مرتبہ فرمایا: ”میں ہوں، میں ہوں“ گویا کہ نبی اکرم صلی اللہ علیہ وسلم نے اس بات کو ناپسند کیا۔ [صحیح ابن حبان/كتاب الحظر والإباحة/حدیث: 5808]

سیدنا سہل بن سعد رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کے حجرہ مبارک میں جھانک کر دیکھا، اس وقت نبی اکرم صلی اللہ علیہ وسلم کے دستِ مبارک میں ایک کنگھی تھی جس کے ذریعے آپ صلی اللہ علیہ وسلم اپنے سر کو کھجا رہے تھے، نبی اکرم صلی اللہ علیہ وسلم نے اسے دیکھا تو ارشاد فرمایا: ”اگر مجھے یہ پتا ہوتا کہ تم اس طرح جھانک رہے ہو تو میں یہ کنگھی تمہاری آنکھ میں چبھو دیتا، اجازت لینے کا حکم اس لیے دیا گیا تاکہ (گھر والوں پر) نگاہ نہ پڑے۔“ [صحیح ابن حبان/كتاب الحظر والإباحة/حدیث: 5809]

سیدنا ابوسعید خدری رضی اللہ عنہ بیان کرتے ہیں: ہم لوگ سیدنا ابی بن کعب رضی اللہ عنہ کی محفل میں موجود تھے، اسی دوران سیدنا ابوموسیٰ اشعری رضی اللہ عنہ عصا ہاتھ میں لے کر تشریف لے آئے اور ٹھہر گئے، انہوں نے کہا: میں آپ لوگوں کو اللہ کا واسطہ دے کر دریافت کرتا ہوں کہ کیا آپ میں سے کسی نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”تین مرتبہ اجازت مانگی جائے، اگر تمہیں اجازت مل جاتی ہے تو ٹھیک ہے، ورنہ واپس چلے جاؤ۔“؟ سیدنا ابی رضی اللہ عنہ نے دریافت کیا: کیا ہوا؟ سیدنا ابوموسیٰ اشعری رضی اللہ عنہ نے بتایا: میں نے سیدنا عمر بن خطاب رضی اللہ عنہ کے ہاں اندر آنے کے لیے گزشتہ شام تین مرتبہ اجازت مانگی، مجھے اجازت نہیں ملی تو میں واپس آ گیا، پھر میں ان کی خدمت میں حاضر ہوا، جب میں ان کے پاس آیا تو میں نے انہیں بتایا: گزشتہ شام میں آپ کے پاس آیا تھا، میں نے تین مرتبہ سلام کیا، پھر میں واپس چلا گیا، تو سیدنا عمر رضی اللہ عنہ نے بتایا: ہم نے آپ کی آواز سن لی تھی، لیکن ہم اس وقت کچھ مصروف تھے، اگر آپ اجازت لیتے رہتے یہاں تک کہ آپ کو اجازت مل جاتی (تو یہ مناسب ہوتا)؛ تو سیدنا ابوموسیٰ اشعری رضی اللہ عنہ نے کہا: میں نے دوسری طرح اجازت لی جس طرح میں نے نبی اکرم صلی اللہ علیہ وسلم کو ارشاد فرماتے ہوئے سنا۔ اس پر سیدنا عمر رضی اللہ عنہ نے کہا: اللہ کی قسم! یا تو آپ اس بارے میں اپنے ساتھ کوئی گواہ لے کر آئیں، ورنہ ہم آپ کی پشت پر سزا عائد کریں گے۔ راوی کہتے ہیں: تو سیدنا ابی رضی اللہ عنہ نے کہا: اللہ کی قسم! آپ کے ہمراہ وہ شخص اٹھ کر جائے گا جو ہم میں سب سے کم سن ہو، اے ابوسعید! تم اٹھو۔ راوی کہتے ہیں: تو میں کھڑا ہوا اور میں سیدنا عمر رضی اللہ عنہ کے پاس آیا، میں نے بتایا: میں نے بھی نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے۔ [صحیح ابن حبان/كتاب الحظر والإباحة/حدیث: 5810]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ایک شخص کا دوسرے شخص کی طرف پیغام رساں کو بھیجنا اس کی طرف سے اجازت (شمار ہو گا)۔“ [صحیح ابن حبان/كتاب الحظر والإباحة/حدیث: 5811]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میرے نام کے مطابق نام رکھ لو لیکن میری کنیت کے مطابق کنیت اختیار نہ کرو۔“ [صحیح ابن حبان/كتاب الحظر والإباحة/حدیث: 5812]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم بقیع میں کھڑے ہوئے تھے، ایک شخص نے بلند آواز میں دوسرے کو مخاطب کیا: ”اے ابوالقاسم!“ نبی اکرم صلی اللہ علیہ وسلم متوجہ ہوئے تو اس نے عرض کی: ”یا رسول اللہ صلی اللہ علیہ وسلم ! میں نے آپ صلی اللہ علیہ وسلم کو نہیں بلایا، میں نے فلاں شخص کو بلایا ہے۔“ نبی اکرم صلی اللہ علیہ وسلم نے ارشاد فرمایا: ”تم لوگ میرے نام کے مطابق نام رکھ لو لیکن میری کنیت کے مطابق کنیت اختیار نہ کرو۔“ [صحیح ابن حبان/كتاب الحظر والإباحة/حدیث: 5813]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میرے نام اور کنیت کو جمع نہ کرو۔“ [صحیح ابن حبان/كتاب الحظر والإباحة/حدیث: 5814]