کنانہ عدوی کہتے ہیں: سیدنا عثمان رضی اللہ عنہ کا محاصرہ کرنے والوں میں، میں بھی شامل تھا۔ میں نے کہا: محمد بن ابوبکر رضی اللہ عنہما نے سیدنا عثمان رضی اللہ عنہ کو شہید کیا تھا؟ انہوں نے کہا: نہیں، بلکہ ان کو مصر کے ایک جبلہ بن ایہم نامی آدمی نے شہید کیا تھا۔ اور یہ بھی کہا گیا ہے کہ ان کو ” کبیرہ السکونی “ نے شہید کیا تھا، لیکن اس وقت وہ خود بھی مارا گیا تھا، اور یہ بھی کہا گیا ہے کہ سیدنا عثمان رضی اللہ عنہ کو کنانہ بن تجیبی نے شہید کیا تھا۔ اور ہو سکتا ہے آپ کی شہادت میں یہ سب لوگ شریک ہوں۔ اللہ تعالیٰ کی ان پر لعنت ہو۔ ولید بن عقبہ نے کہا: خبردار! ان کے نبی کے بعد تمام مخلوقات میں سب سے افضل آدمی، اس تجیبی کے ہاتھوں شہید ہوا جو مصر سے آیا تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4617]

سیدنا ربعی بن حراش روایت کرتے ہیں کہ سیدنا عثمان بن عفان رضی اللہ عنہ نے سیدنا عمر رضی اللہ عنہ کے ہاں ان کی صاحبزادی کیلئے پیغام نکاح بھیجا لیکن سیدنا عمر رضی اللہ عنہ نے انکار کر دیا۔ یہ بات نبی اکرم صلی اللہ علیہ وسلم تک پہنچی۔ جب سیدنا عمر رضی اللہ عنہ، حضور صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نے فرمایا: اے عمر! میں تمہیں عثمان رضی اللہ عنہ سے بہتر داماد نہ بتاؤں جو اس کے حق میں تم سب سے زیادہ بہتر ہے؟ سیدنا عمر رضی اللہ عنہ نے عرض کی: جی ہاں یا رسول اللہ صلی اللہ علیہ وسلم ۔ آپ نے فرمایا: تم اپنی صاحبزادی بیٹی کا نکاح مجھ سے کر دو، میں اپنی صاحبزادی عثمان رضی اللہ عنہ کے نکاح میں دیتا ہوں۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4618]

سیدنا ابوہریرہ رضی اللہ عنہ فرماتے ہیں: سیدنا عثمان رضی اللہ عنہ نے دو مرتبہ نبی اکرم صلی اللہ علیہ وسلم سے جنت خریدی۔ بئر معونہ کھدوا کر۔ جیش العسرہ کی تیاری کروا کر۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4619]

سیدنا عمیر بن سعید رضی اللہ عنہ فرماتے ہیں: سیدنا علی رضی اللہ عنہ نے شام کی جانب صفین جانے کا ارادہ کیا تو قبیلہ نخع کے کچھ لوگ جمع ہو کر اشتر کی عیادت کرنے اس کے گھر گئے، اشتر نے پوچھا: گھر میں قبیلہ نخع سے تعلق رکھنے والوں کے علاوہ تو کوئی شخص نہیں ہے؟ لوگوں نے جواب دیا: نہیں۔ تب اشتر نے کہا: ان لوگوں نے اس امت کے سب سے نیک انسان (سیدنا عثمان رضی اللہ عنہ) کو شہید کر ڈالا ہے، ہم نے اہل بصرہ کے ساتھ معاہدہ ہونے کے باوجود قتال کیا کہ معاہدہ کی وجہ سے تو کوئی تاویل بھی ممکن تھی۔ جبکہ تم لوگ ایسی قوم کے پاس جا رہے ہو کہ ہمارا ان کے ساتھ کوئی معاہدہ بھی نہیں ہے، اس لئے تم میں ہر شخص اس بات پر غور کر لے کہ وہ اپنی تلوار کہاں رکھے گا۔ اس حدیث کی اگرچہ سند نہیں ہے لیکن یہ معقد اس مقام پر صحیح الاسناد ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4620]

امام احمد بن حنبل رحمۃ اللہ علیہ فرمایا کرتے تھے: رسول اللہ صلی اللہ علیہ وسلم کے کسی صحابی کے فضائل میں اتنی احادیث وارد نہیں ہیں جتنی احادیث سیدنا علی ابن ابی طالب رضی اللہ عنہ کے فضائل کے بارے میں ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4621]

یحیی بن معین بیان کرتے ہیں کہ ابوطالب کا نام ” عبد مناف “ تھا۔ امام حاکم کہتے ہیں: زیاد بن محمد بن اسحاق نے بھی اسی طرح ذکر کیا ہے اور اس بارے میں روایات حد تواتر تک پہنچی ہوئی ہیں کہ ابوطالب ان کی کنیت تھی اور ان کی کنیت ہی ان کا نام تھا۔ واللہ اعلم۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4622]

یحیی بن معین کہتے ہیں: سیدنا علی ابن ابی طالب رضی اللہ عنہ کی والدہ فاطمہ بنت اسد بن ہاشم تھیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4623]

مصعب بن عبداللہ الزبیری فرماتے ہیں: فاطمہ بنت اسد بن ہاشم وہ پہلی ہاشمی خاتون ہیں جو کسی ہاشمی کے ہاں پیدا ہوئی ہیں۔ یہ رسول اللہ صلی اللہ علیہ وسلم کے عہد مبارک میں عظیم الشان سرکاری محل میں رہا کرتی تھیں۔ رسول اللہ صلی اللہ علیہ وسلم کی حیاۃ طیبہ میں ہی ان کا انتقال ہو گیا تھا۔ آپ صلی اللہ علیہ وسلم نے ان کی نماز جنازہ پڑھائی تھی اور سیدنا علی رضی اللہ عنہ کا نام ” اسد “ تھا۔ اس لئے آپ نے کہا تھا۔ میں وہ ہوں جس کا نام میری ماں نے ” حیدر “ رکھا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4624]

سیدنا زبیر بن سعید القرشی فرماتے ہیں: ہم لوگ سیدنا سعید بن المسیب رضی اللہ عنہ کے پاس بیٹھے ہوئے تھے، ہمارے پاس سے سیدنا علی بن حسین گزرے، میں نے اس سے پہلے کبھی کسی ہاشمی کو نہ دیکھا تھا جو ان سے زیادہ اللہ تعالیٰ کا عبادت گزار ہو، سیدنا سعید بن المسیب رضی اللہ عنہ ان کے احترام میں کھڑے ہو گئے۔ ہم بھی ان کے ساتھ کھڑے ہو گئے، ہم نے ان کو سلام کیا، انہوں نے ہمیں سلام کا جواب دیا۔ سیدنا سعید نے ان سے کہا: اے ابومحمد! آپ ہمیں فاطمہ بنت اسد بن ہاشم، سیدنا علی ابن ابی طالب رضی اللہ عنہ کی والدہ کے بارے میں کچھ بتائیں۔ انہوں نے کہا: جی ہاں۔ میرے والد محترم نے مجھے بتایا کہ امیرالمومنین سیدنا علی ابن ابی طالب رضی اللہ عنہ فرماتے ہیں: جب فاطمہ بنت اسد بن ہاشم کا انتقال ہوا تو رسول اللہ صلی اللہ علیہ وسلم نے ان کو اپنی قمیص میں کفن دیا اور ان کا جنازہ پڑھایا اور 70 تکبیریں پڑھیں۔ اور آپ بذات خود ان کی قبر میں اترے اور قبر میں اردگرد اس طرح اشارے فرما رہے تھے گویا کہ اس کو کھلا کر رہے ہوں، پھر جب آپ قبر سے باہر نکلے تو آپ کی آنکھوں سے آنسو بہہ رہے تھے۔ پھر آپ نے ان کی قبر پر مٹی ڈالی، جب آپ وہاں سے تشریف لے آئے تو سیدنا عمر بن خطاب رضی اللہ عنہ نے عرض کی: یا رسول اللہ صلی اللہ علیہ وسلم جتنی شفقت آپ نے اس خاتون پر فرمائی ہے، میں نے کسی اور پر آپ کو ایسے شفقت فرماتے نہیں دیکھا۔ آپ صلی اللہ علیہ وسلم نے فرمایا: اے عمر! یہ عورت میری اس ماں کی طرح تھی جس نے مجھے جنم دیا ہے، بے شک ابوطالب کام کاج کیا کرتے تھے اور ان کا دسترخوان ہوتا تھا، یہ عورت اس میں سے بچا کر میرے لئے رکھ لیا کرتی تھی اور دوبارہ مجھے دیا کرتی تھی۔ اور سیدنا جبرائیل علیہ السلام نے مجھے بتایا ہے کہ اللہ تعالیٰ نے اس کو جنتی کر دیا ہے اور مجھے جبرائیل علیہ السلام نے بتایا ہے کہ اللہ تعالیٰ نے ستر ہزار فرشتوں کو ان کیلئے دعائے مغفرت کیلئے مقرر فرمایا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4625]

سیدنا عامر بن سعد فرماتے ہیں: سیدنا معاویہ رضی اللہ عنہ نے سیدنا سعد بن ابی وقاص رضی اللہ عنہ سے کہا: تم علی ابن ابی طالب کو برا بھلا کیوں نہیں کہتے؟ سیدنا سعد رضی اللہ عنہ نے فرمایا: ان کے متعلق رسول اللہ صلی اللہ علیہ وسلم نے تین باتیں ارشاد فرمائی ہیں ان کو سوچ کر میں آپ کی سب و شتم سے رکا رہتا ہوں۔ اور ان باتوں میں سے کوئی ایک ہی مجھے مل جائے تو میرے نزدیک یہ سرخ اونٹوں سے بھی زیادہ محبوب ہے۔ سیدنا معاویہ رضی اللہ عنہ نے کہا: اے ابواسحاق! وہ تین چیزیں کیا ہیں؟ ابواسحاق نے کہا: میں آپ کو گالی نہیں دیتا کیونکہ مجھے یاد ہے کہ (ایک مرتبہ) جب حضور صلی اللہ علیہ وسلم پر وحی نازل ہوئی تو آپ نے سیدنا علی، ان کے دونوں صاحبزادوں اور سیدہ فاطمہ رضی اللہ عنہا کو پکڑ کر اپنی چادر میں داخل فرمایا اور کہا: اے میرے رب! یہ میرے اہل بیت ہیں۔ اور میں سیدنا علی رضی اللہ عنہ کو گالی نہیں دیتا کیونکہ مجھے یاد ہے کہ جب رسول اللہ صلی اللہ علیہ وسلم نے ان کو غزوہ تبوک میں شرکت کرنے سے منع فرما دیا تھا تو سیدنا علی رضی اللہ عنہ بولے: (یا رسول اللہ صلی اللہ علیہ وسلم ) آپ مجھے عورتوں اور بچوں میں چھوڑ کر جا رہے ہیں۔ تو رسول اللہ صلی اللہ علیہ وسلم نے فرمایا: کیا تم اس بات پر راضی نہیں ہو کہ تمہاری نسبت میرے ساتھ ویسی ہی ہو جیسی نسبت ہارون علیہ السلام کو موسیٰ علیہ السلام کے ساتھ تھی؟ مگر یہ کہ میرے بعد کوئی نبی نہیں ہو سکتا۔ اور میں آپ کو گالی نہیں دیتا کیونکہ مجھے یاد ہے کہ رسول اللہ صلی اللہ علیہ وسلم نے جنگ خیبر کے دن فرمایا تھا: میں یہ جھنڈا کل اس شخص کو دوں گا جو اللہ اور اس کے رسول سے محبت کرتا ہے اور اللہ تعالیٰ اس کے ہاتھ پر فتح عطا فرمائے گا۔ تو ہم لوگ رسول اللہ صلی اللہ علیہ وسلم کی طرف ہاتھ لمبے کرنے لگے، آپ صلی اللہ علیہ وسلم نے فرمایا: علی کہاں ہے؟لوگوں نے بتایا کہ ان کی آنکھوں میں تکلیف ہے۔ آپ صلی اللہ علیہ وسلم نے فرمایا: اس کو بلاؤ، چنانچہ صحابہ کرام رضی اللہ عنہم نے ان کو بلایا۔ رسول اللہ صلی اللہ علیہ وسلم نے ان کے چہرے پر اپنا لعاب دہن لگایا پھر ان کو جھنڈا عطا فرمایا تو اللہ تعالیٰ نے ان کے ہاتھ پر فتح عطا فرمائی (سیدنا عامر بن سعد) فرماتے ہیں: خدا کی قسم! اس کے بعد مدینہ سے نکل جانے تک سیدنا معاویہ نے ایک لفظ تک نہیں کہا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں کیا۔ تاہم دونوں نے مؤاخاۃ والی حدیث اور جھنڈے والی حدیث نقل فرمائی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4626]