سیدنا موسیٰ بن عقبہ رضی اللہ عنہ روایت کرتے ہیں کہ سیدنا علقمہ بن وقاص لیثی رضی اللہ عنہ نے فرمایا: جب سیدنا طلحہ اور سیدنا زبیر اور سیدہ عائشہ رضی اللہ عنہم نے سیدنا عثمان رضی اللہ عنہ کے خون کے قصاص کا مطالبہ کرتے ہوئے خروج کیا تو ام المومنین سیدہ عائشہ رضی اللہ عنہا ان کی امیر تھیں اور یہ لوگ ان کے تابع تھے۔ ذات عرق (ایک مقام پر پہنچ کر) جب لشکر کا معائنہ کیا گیا تو سیدنا عروہ بن زبیر رضی اللہ عنہ اور سیدنا ابوبکر بن عبدالرحمن بن حارث بن ہشام کو کمسن قرار دے کر واپس بھیج دیا گیا۔ آپ فرماتے ہیں: میں نے دیکھا کہ سیدنا طلحہ رضی اللہ عنہ کو ان کی سب سے پسندیدہ مجلس سے نکال دیا گیا۔ حالانکہ (وہ اتنی عمر کے تھے کہ) ان کی داڑھی سینہ تک پہنچی ہوئی تھی۔ میں نے ان سے کہا: اے ابومحمد! میں تمہیں دیکھ رہا ہوں کہ تمہیں تمہاری سب سے پسندیدہ مجلس سے نکال دیا گیا ہے حالانکہ تمہاری داڑھی شریف سینے تک پہنچ رہی ہے۔ اگر تمہیں یہ معاملہ پسند نہیں ہے تو تم اس کو چھوڑ دو۔ تمہیں کوئی شخص اس پر مجبور تو نہیں کر رہا۔ انہوں نے کہا: اے علقمہ بن وقاص! تو مجھے ملامت مت کر، ہم کل تک اپنے دشمنوں پر ایک بازو کی طرح تھے لیکن آج ہم لوہے کے دو پہاڑ بنے ہوئے خود ہی ایک دوسرے پر چڑھائی کر رہے ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4657]

سیدنا ابوبکرہ رضی اللہ عنہ فرماتے ہیں: کسریٰ کی ہلاکت کے موقع پر میں نے رسول اللہ صلی اللہ علیہ وسلم کا ایک ارشاد سنا تھا جس نے مجھے بچا لیا ہے (آپ نے فرمایا تھا) ” من استخلفوا “ (ان لوگوں نے کسریٰ کا خلیفہ کس کو بنایا ہے؟) لوگوں نے بتایا: کسریٰ کی بیٹی کو۔ آپ صلی اللہ علیہ وسلم نے فرمایا: وہ قوم کبھی کامیاب نہیں ہو سکتی جس نے اپنے امور کسی عورت کے سپرد کر دیئے ہوں (سیدنا ابوبکر رضی اللہ عنہ) فرماتے ہیں: جب سیدہ عائشہ رضی اللہ عنہا تشریف لائیں تو میں نے ان کو رسول اللہ صلی اللہ علیہ وسلم کا یہ ارشاد سنایا: تو اللہ تعالیٰ نے مجھے اس فرمان کی برکت سے بچا لیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4658]

ام المومنین سیدہ ام سلمہ رضی اللہ عنہا فرماتی ہیں: نبی اکرم صلی اللہ علیہ وسلم نے اپنی بعض ازواج کے خروج کا تذکرہ کیا تو سیدہ عائشہ رضی اللہ عنہا ہنس پڑیں، تو آپ صلی اللہ علیہ وسلم نے فرمایا: اے حمیراء! سوچ لو کہیں وہ تم ہی نہ ہو، پھر آپ صلی اللہ علیہ وسلم ، سیدنا علی رضی اللہ عنہ کی جانب متوجہ ہو کر فرمانے لگے: اگر اس کا کوئی معاملہ تمہارے ہاتھ میں آئے تو اس پر نرمی کرنا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4659]

سیدنا عمرہ بنت عبدالرحمن فرماتی ہیں: جب سیدنا علی رضی اللہ عنہ بصرہ کی جانب روانہ ہوئے تو الوداعی ملاقات کیلئے سیدہ ام سلمہ رضی اللہ عنہا کی خدمت میں آئے، تو ام المومنین سیدہ ام سلمہ رضی اللہ عنہا نے (دعا دیتے ہوئے) کہا: آپ اللہ تعالیٰ کی حفظ و امان میں جائیں، خدا کی قسم، بے شک آپ ہی حق پر ہیں اور حق آپ کے ساتھ ہے۔ رسول اللہ صلی اللہ علیہ وسلم نے ہمیں گھروں میں ٹھہرنے کا حکم دیا ہے۔ اس لئے اگر اللہ اور اس کے رسول کی نافرمانی کا ڈر نہ ہوتا تو میں بذات خود آپ کے ہمراہ چلتی۔ تاہم میں اپنے بیٹے عمر کو آپ کے ساتھ روانہ کرتی ہوں جو کہ میرے نزدیک سب سے افضل ہے اور وہ مجھے میری جان سے بھی زیادہ عزیز ہے۔ ٭٭ مذکورہ تینوں احادیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہیں لیکن شیخین رحمۃ اللہ علیہما نے ان کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4660]

ام المومنین سیدہ عائشہ رضی اللہ عنہا فرماتی ہیں: کاش کہ میں حارث بن ہشام جیسے دس آدمی کھو دیتی لیکن میں ابن زبیر کے ہمراہ اس سفر میں کبھی شریک نہ ہوتی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4661]

سیدنا قیس بن ابی حازم فرماتے ہیں: سیدنا زبیر رضی اللہ عنہ، سیدنا عمر بن خطاب رضی اللہ عنہ کے پاس جہاد کی اجازت لینے کے لئے آئے، تو سیدنا عمر رضی اللہ عنہ نے فرمایا: (آرام سے) اپنے گھر میں بیٹھے رہو، آپ رسول اللہ صلی اللہ علیہ وسلم کے ہمراہ جہاد کر چکے ہو۔ سیدنا زبیر رضی اللہ عنہ نے اصرار کیا تو سیدنا عمر رضی اللہ عنہ نے تیسری یا چوتھی مرتبہ فرمایا: اپنے گھر میں بیٹھے رہو۔ خدا کی قسم! میں دیکھ رہا ہوں کہ مدینہ کی ایک جانب تم اور تمہارے ساتھی خروج کریں گے اور سیدنا محمد صلی اللہ علیہ وسلم کے اصحاب پر فساد کریں گے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4662]

سیدنا قیس ابن ابی حازم فرماتے ہیں: ام المومنین سیدہ عائشہ رضی اللہ عنہا جب بنی عامر کے علاقہ میں پہنچیں تو ان پر کتے بھونکنے لگے۔ انہوں نے پوچھا: یہ کونسا علاقہ ہے؟ لوگوں نے بتایا کہ یہ ” حوأب “ ہے۔ آپ نے کہا: میں واپس لوٹنا چاہتی ہوں۔ سیدنا زبیر رضی اللہ عنہ نے کہا: ایک مرتبہ روانہ ہونے کے بعد واپس جانا درست نہیں ہے۔ جبکہ لوگ بھی آپ کو دیکھ رہے ہیں۔ اللہ تعالیٰ ان کے احوال کی اصلاح فرمائے۔ آپ نے پھر بھی کہا: میرا خیال ہے کہ مجھے واپس ہی جانا چاہئے، میں نے رسول اللہ صلی اللہ علیہ وسلم کو فرماتے سنا ہے ” تم میں سے اس ایک کا اس وقت کیا حال ہو گا جب اس پر ” حوأب “ کے کتے بھونکیں گے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو ان الفاظ کے ہمراہ نقل نہیں کیا۔ تاہم دونوں نے ابواسحاق کی سیدنا براء کے حوالے سے روایت کردہ حدیث مختصراً نقل کی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4663]

سیدنا علی رضی اللہ عنہ فرماتے ہیں: جب ہم مکہ مکرمہ سے نکلے تو سیدنا حمزہ رضی اللہ عنہ کی صاحبزادی ہمارے پیچھے آئی اور اس نے ” اے چچا، اے چچا “ کہہ کر آواز دی۔ میں نے اس کا ہاتھ پکڑ کر سیدہ فاطمہ رضی اللہ عنہا کے حوالے کرتے ہوئے کہا: اس کو پکڑو، یہ تمہاری چچازاد بہن ہے۔ جب ہم مدینہ منورہ پہنچے تو اس کے حوالے سے میرا، سیدنا زید اور سیدنا جعفر رضی اللہ عنہم کا اختلاف ہو گیا۔ میں نے کہا: اس کو میں لوں گا یہ میرے چچا کی بیٹی ہے۔ سیدنا زید نے کہا: یہ میری بھتیجی ہے۔ سیدنا جعفر نے کہا: یہ میرے چچا کی بیٹی ہے۔ اور اس کی خالہ (پہلے ہی) میرے پاس ہے۔ رسول اللہ صلی اللہ علیہ وسلم نے سیدنا جعفر رضی اللہ عنہ سے فرمایا: تم شکل و صورت میں اور عادات و اطوار میں مجھ سے ملتے جلتے ہو۔ اور آپ صلی اللہ علیہ وسلم نے سیدنا زید رضی اللہ عنہ سے فرمایا: آپ ہمارے بھائی اور ہمارے آزاد کردہ غلام ہیں۔ اور آپ صلی اللہ علیہ وسلم نے مجھ سے فرمایا: تو مجھ سے ہے اور میں تجھ سے ہوں۔ اس کو اس کی خالہ کے پاس بھیج دو۔ کیونکہ خالہ (بھی ایک طرح کی) ماں (ہی ہوتی) ہے۔ میں نے عرض کی: یا رسول اللہ صلی اللہ علیہ وسلم آپ اس کو اپنی زوجیت سے کیوں نہیں نواز دیتے؟ آپ صلی اللہ علیہ وسلم نے فرمایا: یہ میری رضاعی بہن ہے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو ان الفاظ کے ہمراہ نقل نہیں کیا۔ تاہم دونوں نے ابواسحاق کی سیدنا براء کے حوالے سے روایت کردہ حدیث مختصراً نقل کی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4664]

سیدنا ابوعبداللہ الجدلی فرماتے ہیں: میں ام المومنین سیدہ ام سلمہ رضی اللہ عنہا کی خدمت میں حاضر ہوا تو انہوں نے فرمایا: کیا رسول اللہ صلی اللہ علیہ وسلم تم میں گالی گلوچ کیا کرتے تھے؟ میں نے کہا: معاذاللہ یا (شاید) سبحان اللہ یا اسی سے ملتا جلتا کوئی لفظ بولا۔ ام المومنین رضی اللہ عنہا نے فرمایا: رسول اللہ صلی اللہ علیہ وسلم نے ارشاد فرمایا: جس نے علی کو گالی دی اس نے مجھے گالی دی۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ جبکہ اسی حدیث کو بکیر بن عثمان البجلی نے ابواسحاق کے حوالے سے چند الفاظ کے اضافے کے ساتھ نقل کیا ہے۔ (جیسا کہ درج ذیل ہے) [المستدرك على الصحيحين/كتاب معرفة الصحابة رضي الله تعالى عنهم/حدیث: 4665]

ابوعبداللہ البجلی فرماتے ہیں: میں کم سنی میں حج کرنے گیا۔ میں مدینہ منورہ سے گزرا۔ میں نے دیکھا کہ بہت سارے لوگ اکٹھے کہیں جا رہے ہیں۔ میں بھی ان کے ساتھ ہو لیا۔ یہ لوگ ام المومنین سیدہ ام سلمہ رضی اللہ عنہا کے پاس گئے۔ ام المومنین رضی اللہ عنہا نے آواز دی: اے شبیب بن ربعی! تو ایک احمق اور بدمزاج آدمی نے جواباً کہا: لبیک اے اماں جان۔ آپ نے فرمایا: کیا رسول اللہ صلی اللہ علیہ وسلم تمہاری مجلسوں میں گالی گلوچ کیا کرتے تھے؟ اس نے کہا: یہ کیسے ہو سکتا ہے؟ ام المومنین رضی اللہ عنہا نے فرمایا: تو سیدنا علی ابن ابی طالب رضی اللہ عنہ (کو لوگ کیوں گالیاں دیتے ہیں؟) اس نے کہا: دنیاوی مفادات کی خاطر۔ ام المومنین رضی اللہ عنہا نے فرمایا: رسول اللہ صلی اللہ علیہ وسلم نے ارشاد فرمایا: جس نے علی کو گالی دی، اس نے مجھے گالی دی اور جس نے مجھے گالی دی اس نے اللہ تعالیٰ کو گالی دی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4666]