سیدنا طارق بن شہاب فرماتے ہیں: میں نے سیدنا علی رضی اللہ عنہ کو روئی کے بوسیدہ گالوں کے پالان میں دیکھا وہ سیدنا حسن اور حسین رضی اللہ عنہما سے فرما رہے تھے: تمہیں کیا ہے؟ تم لڑکیوں کی طرح کیوں رو رہے ہو؟ خدا کی قسم میں نے اس معاملہ میں بہت غور و فکر کیا ہے۔ میرے سامنے دو ہی راستے ہیں۔ (1) اس قوم سے جہاد کروں۔ (2) محمد صلی اللہ علیہ وسلم پر نازل شدہ (دین) کا انکار کر دوں۔ سیدنا عبداللہ بن عمر رضی اللہ عنہما کا موقف [المستدرك على الصحيحين/كتاب معرفة الصحابة رضي الله تعالى عنهم/حدیث: 4647]

سیدنا حمزہ بن عبداللہ بن عمر رضی اللہ عنہما سے مروی ہے کہ ایک دفعہ وہ سیدنا عبداللہ بن عمر رضی اللہ عنہما کے پاس بیٹھے ہوئے تھے، ان کے پاس اہل عراق میں سے ایک آدمی آیا اور بولا: اے ابوعبدالرحمن! خدا کی قسم! میری یہ خواہش ہے کہ لوگوں میں اس تفرقہ کے وقت میں تمہاری اقتداء کروں اور تمہارے راستے کو اپناؤں۔ اور حتی المقدور میں شر سے بچ کر رہوں اور میں نے قرآن کریم کی ایک محکم آیت میں پڑھا ہے اور اس کو اپنے دل سے اپنایا ہے۔ چنانچہ اس سلسلہ میں آپ میری راہنمائی فرمائیں، آپ کا اس آیت طیبہ کے بارے میں کیا خیال ہے؟ وَاِنْ طَآئِفَتَانِ مِنَ الْمُؤْمِنِیْنَ اقْتَتَلُوْا فَاَصْلِحُوْا بَیْنَھُمَا فَاِنْ بَغَتْ اِحْدَاھُمَا عَلَی الاُخْرٰی فَقَاتِلُوا الَّتِیْ تَبْغِیْ حَتّٰی تَفِیٓئَ اِلٰی اَمْرِاللّٰہِ فَاِنْ فَآءَتْ فَاَصْلِحُوْا بَیْنَھُمَا بِالْعَدْلِ وَاَقْسِطُوْا اِنَّ اللّٰہَ یُحِبُّ الْمُقْسِطِیْنَ (الحجرات: 9) ” اور اگر مسلمانوں کے دو گروہ آپس میں لڑیں تو ان میں صلح کراؤ پھر اگر ایک دوسرے پر زیادتی کرے تو اس زیادتی والے سے لڑو یہاں تک کہ وہ اللہ کے حکم کی طرف پلٹ آئے تو انصاف کے ساتھ ان میں صلح کرا دو اور عدل کرو بے شک عدل والے اللہ کو پیارے ہیں “ آپ مجھے اس آیت کے بارے میں بتایئے! تو سیدنا عبداللہ بن عمر رضی اللہ عنہما نے وجہ پوچھی (اور فرمایا) تو یہاں سے پلٹ جا۔ تو وہ شخص واپس چلا گیا حتی کہ وہ ہماری نگاہوں سے اوجھل ہو گیا۔ تو سیدنا عبداللہ بن عمر رضی اللہ عنہما ہماری طرف متوجہ ہو کر بولے: اس آیت کے حوالے سے میں نے اپنی سمجھ کے مطابق جو فیصلہ کیا ہے، وہ یہ ہے کہ میں اس باغی گروہ سے جہاد نہیں کروں گا جیسا کہ میرے اللہ نے مجھے حکم دیا ہے۔ ٭٭ یہ باب بہت وسیع ہے۔ سیدنا عبداللہ بن عمر رضی اللہ عنہما سے روایت کرنے والے کبار تابعین کی پوری ایک جماعت ہے۔ تاہم میں نے شعیب بن ابی حمزہ کی زہری سے روایت کردہ حدیث مقدم کی ہے اور صرف اسی پر اکتفا کیا ہے کیونکہ وہ امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے۔ نوٹ: سیدنا اسامہ بن زید کے قتال میں شریک نہ ہونے کا ذکر (درج ذیل ہے) [المستدرك على الصحيحين/كتاب معرفة الصحابة رضي الله تعالى عنهم/حدیث: 4648]

سیدنا ابوالشعثاء اپنے چچا سے روایت کرتے ہیں: سیدنا اسامہ بن زید رضی اللہ عنہ فرماتے ہیں: رسول اللہ صلی اللہ علیہ وسلم نے مجھے اپنے چند صحابہ کرام رضی اللہ عنہم کے ہمراہ ایک جنگ میں بھیجا، تو میں اور ایک انصاری صحابی دوسرے لوگوں سے پہلے دشمن تک جا پہنچے، میں نے ایک آدمی کا تعاقب کیا، جب میں اس کے قریب پہنچا تو اس نے ” اللہ اکبر “ کا نعرہ بلند کیا۔ لیکن میں نے اس کو نیزہ مار کر قتل کر ڈالا کیونکہ میرا خیال تھا کہ اس نے اپنی جان بچانے کیلئے نعرئہ تکبیر بلند کیا تھا۔ جب ہم اس جنگ سے واپس آئے تو وہ انصاری مجھ سے پہلے رسول اللہ صلی اللہ علیہ وسلم کی بارگاہ میں پہنچ گیا اور اس نے کہا: یا رسول اللہ صلی اللہ علیہ وسلم تمہارے شہسواروں سے بہتر کوئی شہسوار نہیں ہے۔ ہم ایک آدمی کو اپنے ساتھ ملانا چاہتے تھے لیکن یہ اس کے پاس ہم سے پہلے پہنچ گئے، اس آدمی نے ” اللہ اکبر “ (بھی) کہا، لیکن اس کے باوجود انہوں نے اس کو قتل کر دیا۔ تو نبی اکرم صلی اللہ علیہ وسلم نے ارشاد فرمایا: اے اسامہ! تم نے آج یہ کیا کیا؟ میں نے کہا: میں نے ایک آدمی کو قابو میں لیا تو اس نے ” اللہ اکبر “ پکارا۔ میں نے سوچا کہ یہ اپنی جان بچانے کیلئے ” اللہ اکبر “ کا نعرہ لگا رہا ہے، اس لئے میں نے اس کو مار ڈالا۔ آپ صلی اللہ علیہ وسلم نے فرمایا: (تم نے اس کو) اللہ اکبر کہنے کے باوجود (قتل کر دیا) تم نے اس کا دل چیر کر کیوں نہیں دیکھ لیا؟ لیکن میں نے جو عذر پیش کرنا تھا کر دیا۔ اس دن آپ مجھ سے مسلسل یہی فرماتے رہے (کہ تم نے اس کا دل چیر کر کیوں نہیں دیکھ لیا؟) اس لئے میں کسی ایسے آدمی سے نہیں لڑوں گا جو ” اللہ اکبر “ کہنے والا ہو، جس سے لڑنے سے حضور صلی اللہ علیہ وسلم نے مجھے منع کیا ہے۔ یہاں تک کہ میں آپ صلی اللہ علیہ وسلم سے جا ملوں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4649]

مذکورہ سند کے ہمراہ بھی سابقہ حدیث منقول ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4650]

سیدنا خیثمہ بن عبدالرحمن فرماتے ہیں: سیدنا سعد بن مالک رضی اللہ عنہ سے کسی نے کہا: سیدنا علی رضی اللہ عنہ تمہارے بارے میں اچھی رائے نہیں رکھتے کیونکہ تم نے ان کی بیعت نہیں کی۔ سیدنا سعد رضی اللہ عنہ نے فرمایا: خدا کی قسم! یہ صرف میری (ذاتی) رائے تھی، اور میری رائے غلط بھی ہو سکتی ہے۔ تاہم سیدنا علی رضی اللہ عنہ کو تین ایسی فضیلتیں حاصل ہیں کہ اگر مجھے ان میں سے ایک بھی حاصل ہو تو دنیا و مافیہا سے بہتر ہے۔ (1) رسول اللہ صلی اللہ علیہ وسلم نے ” غدیر خم “ کے دن اللہ تعالیٰ کی حمد و ثناء کرنے کے بعد ان کے متعلق فرمایا: کیا تم جانتے ہو کہ میں مومنوں کی جانوں سے بھی زیادہ قریب ہوں؟ ہم نے کہا: جی ہاں۔ آپ نے فرمایا: اے اللہ! جس کا میں مولیٰ ہوں، علی (بھی) اس کا مولیٰ ہے۔ جو اس سے دوستی رکھے تو اس سے دوستی کر اور جو اس سے دشمنی رکھے تو اس سے دشمنی کر۔ (2) آپ کو غزوہ خیبر کے موقع پر لایا گیا، اس وقت آپ کی آنکھوں میں تکلیف تھی، آپ نے عرض کیا: یا رسول اللہ صلی اللہ علیہ وسلم میری آنکھوں میں تکلیف ہے تو رسول اللہ صلی اللہ علیہ وسلم نے ان کی آنکھوں میں اپنا لعاب دہن ڈال کر ان کے لئے دعا فرمائی، اس کے بعد شہادت تک کبھی بھی آپ کو آنکھوں کی تکلیف نہیں ہوئی اور اللہ تعالیٰ نے ان کے ہاتھ پر خیبر فتح فرمایا۔ (3) رسول اللہ صلی اللہ علیہ وسلم نے اپنے چچا سیدنا عباس رضی اللہ عنہ اور دیگر صحابہ کرام رضی اللہ عنہم کو مسجد سے منتقل ہونے کا حکم دیا تو سیدنا عباس رضی اللہ عنہ نے آپ سے عرض کی، آپ ہمیں یہاں سے منتقل ہونے کا حکم دے رہے ہیں، حالانکہ ہم آپ کے قریبی رشتہ دار اور تمہارے چچا ہیں۔ اور آپ علی کو مسجد ہی میں ٹھہرا رہے ہیں۔ تو آپ صلی اللہ علیہ وسلم نے فرمایا: نہ میں نے تمہیں منتقل کیا ہے اور نہ اس کو ٹھہرایا ہے بلکہ اللہ تعالیٰ نے تمہیں مسجد سے منتقل کیا ہے اور اس کو ٹھہرایا ہے۔ ایک اور سند کے ساتھ سیدنا محمد بن مسلمہ کا یہ بیان منقول ہے، میں نے عرض کی: یا رسول اللہ! جب نمازیوں (یعنی مسلمانوں) کے درمیان اختلاف رونما ہو جائے تو پھر میں کیا کروں؟ نبی اکرم صلی اللہ علیہ وسلم نے ارشاد فرمایا: تم اپنی تلوار لے کر حرہ (یعنی مدینہ منورہ کے نواح میں موجود پتھریلی زمین) میں جانا اور اپنی تلوار اس پر مار کر (توڑ دینا)۔ پھر اپنے گھر آ کر بیٹھ جانا یہاں تک کہ تمہیں (طبعی) موت آ جائے یا گناہ گار ہاتھ تم تک پہنچ جائے (یعنی جنگجو لوگ تمہیں قتل کر دیں)۔ اور جہاں تک سیدنا ابو مسعود انصاری اور سیدنا ابو موسیٰ اشعری رضی اللہ عنہما کے علیحدگی اختیار کرنے کا ذکر ہے، تو (حقیقت یہ ہے کہ) امیر المومنین رضی اللہ عنہ نے اپنے حق میں بیعت لینے کے لیے اپنے صاحبزادے محمد (بن حنفیہ) اور محمد بن ابی بکر کو کوفہ بھیجا تھا۔ اس وقت کوفہ میں ابو موسیٰ اشعری اور ابو مسعود موجود تھے، تو ابو موسیٰ نے بیعت کرنے سے (عارضی طور پر) انکار کر دیا، جس پر وہ دونوں امیر المومنین کے پاس واپس آگئے۔ پھر آپ رضی اللہ عنہ نے اپنے صاحبزادے حسن (رضی اللہ عنہ) اور مالک اشتر کو بھیجا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4651]

سیدنا شعبی رضی اللہ عنہ فرماتے ہیں: جب سیدنا عثمان رضی اللہ عنہ کو شہید کر دیا گیا اور سیدنا علی رضی اللہ عنہ کی بیعت کر لی گئی۔ تو سیدنا ابوموسیٰ رضی اللہ عنہ اس وقت کوفہ کے گورنر تھے، آپ نے لوگوں کو خطبہ دیا اور اس میں لوگوں کو قتال سے منع کیا اور فتنہ میں شریک ہونے سے روکا تو سیدنا علی رضی اللہ عنہ نے ان کو کوفہ سے ” ذی قار “ سے معزول کر دیا۔ اور سیدنا عمار بن یاسر رضی اللہ عنہ اور سیدنا حسن بن علی رضی اللہ عنہ کو ان کی طرف بھیجا، انہوں نے آ کر سیدنا ابوموسیٰ کو معزول کر دیا اور قرظہ بن کعب کو گورنر بنا دیا پھر جب (سیدنا علی رضی اللہ عنہ) چند ماہ بعد بصرہ سے واپس آئے تو ان کو بھی معزول کر دیا پھر جب آپ صفین کی طرف روانہ ہوئے تو عقبہ عمرو کو عامل بنایا اور جب صفین سے واپس آئے تو سیدنا ابومسعود انصاری رضی اللہ عنہ کو وہاں کا عامل مقرر فرمایا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4652]

سیدنا ابووائل فرماتے ہیں: سیدنا ابوموسیٰ اشعری رضی اللہ عنہ اور سیدنا ابومسعود بدری رضی اللہ عنہ سیدنا عمار رضی اللہ عنہ کے پاس گئے، اس وقت وہ لوگوں کو جنگ کے لئے جمع کر رہے تھے، انہوں نے عمار رضی اللہ عنہ سے کہا: تم جب سے اسلام لائے تو اس وقت سے لے کر آج تک ہم نے تم میں سب سے زیادہ ناپسندیدہ عمل یہی دیکھا ہے کہ تم جنگ میں جلدبازی کر رہے ہو، سیدنا عمار رضی اللہ عنہ نے جواباً کہا: تم جب سے اسلام لائے ہو اس وقت سے لے کر آج تک میں نے تم میں سب سے زیادہ ناپسندیدہ عمل یہی دیکھا ہے کہ تم جنگ میں دیر کر رہے ہو۔ پھر سیدنا عمار رضی اللہ عنہ نے ان کو ایک ایک جوڑا پیش کیا اور نماز جمعہ کے لئے چلے گئے۔ محمد بن مسلمہ انصاری رضی اللہ عنہ کا بیعت سے گریز کرنے کا قصہ [المستدرك على الصحيحين/كتاب معرفة الصحابة رضي الله تعالى عنهم/حدیث: 4653]

سیدنا محمد بن مسلمہ رضی اللہ عنہ فرماتے ہیں: میں نے عرض کی: یا رسول اللہ صلی اللہ علیہ وسلم ! جب نماز پڑھنے والوں میں اختلاف واقع ہو تو اس وقت میں کیا کروں؟ آپ صلی اللہ علیہ وسلم نے فرمایا: تم اپنی تلوار لے جا کر سیاہ پتھروں والی زمین میں مارنا (یعنی اپنی تلوار وہاں پھینک دینا) پھر اپنے گھر آ جانا، یہاں تک کہ تجھ پر قضاء کا ہاتھ آ پہنچے یا کسی خطا کرنے والے کا ہاتھ آ پہنچے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4654]

سیدنا سعد بن زید بن سعد الاشہلی نے نجران سے رسول اللہ صلی اللہ علیہ وسلم کی خدمت میں ایک تلوار ہدیہ بھیجی۔ جب یہ تلوار حضور صلی اللہ علیہ وسلم کے پاس پہنچی تو آپ نے یہ تلوار محمد بن مسلمہ رضی اللہ عنہ کو عطا کی اور فرمایا: اس کے ساتھ اللہ کی راہ میں جہاد کرو لیکن جب لوگوں کا آپس میں اختلاف ہو جائے تو اس کو پتھروں پر مار کر اپنے گھر میں جا کر بیٹھ جانا حتی کہ تجھے کوئی خطا کرنے والا ہاتھ قتل کر دے یا تجھے قضائے الٰہی سے موت آ جائے۔ ٭٭ امام حاکم فرماتے ہیں: یہی اور اس سے ملتی جلتی کچھ دیگر وجوہات تھیں جن کی بناء پر کچھ لوگ سیدنا علی رضی اللہ عنہ کے ہمراہ قتال میں شریک ہو گئے اور کچھ لوگ آپ کے ہمراہ قتال سے کنارہ کش رہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4655]

سیدنا حسن رضی اللہ عنہ فرماتے ہیں: سیدنا طلحہ اور سیدنا زبیر رضی اللہ عنہما بصرہ میں آئے، لوگوں نے ان سے آنے کی وجہ پوچھی تو انہوں نے کہا: ہم سیدنا عثمان رضی اللہ عنہ کا قصاص چاہتے ہیں۔ سیدنا حسن رضی اللہ عنہ نے کہا: واہ! سبحان اللہ، اس قوم کے عقلمند لوگ تو کہتے ہیں کہ خدا کی قسم! سیدنا عثمان رضی اللہ عنہ کے قاتل تو خود تم ہو، پھر جب سیدنا علی رضی اللہ عنہ کوفہ تشریف لائے تو وہاں کے ذمہ دار لوگوں نے کہا: ہم آپ کو اپنا کفیل نہیں بنا سکتے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4656]