سیدنا عبداللہ بن بریدہ اپنے والد کا یہ بیان نقل کرتے ہیں ” سیدنا ابوذر اور ان کا چچا زاد بھائی نعیم اور میں رسول اللہ صلی اللہ علیہ وسلم کی تلاش میں نکلے۔ آپ صلی اللہ علیہ وسلم اس وقت پہاڑ میں چھپے ہوئے تھے۔ سیدنا ابوذر نے کہا: اے محمد! ہم آپ کے پاس آئے ہیں تاکہ ہم سن سکیں کہ آپ کیا کہتے ہیں اور کس چیز کی طرف بلاتے ہیں۔ تو رسول اللہ صلی اللہ علیہ وسلم نے فرمایا: میں کہتا ہوں ” اللہ کے سوا کوئی عبادت کے لائق نہیں ہے اور بے شک میں اللہ کا رسول ہوں “ تو ہم تینوں آپ پر ایمان لے آئے۔ اس وقت سیدنا علی رضی اللہ عنہ، رسول اللہ صلی اللہ علیہ وسلم کے کسی کام کیلئے گئے ہوئے تھے، آپ نے ان کو کہیں بھیجا تھا، رسول اللہ صلی اللہ علیہ وسلم پر پیر کے دن وحی نازل ہوئی اور منگل کے دن سیدنا علی رضی اللہ عنہ نے نماز پڑھی۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4637]

سیدنا انس رضی اللہ عنہ فرماتے ہیں: نبی اکرم صلی اللہ علیہ وسلم کو پیر کے دن نبوت دی گئی (یعنی آپ کی بعثت ہوئی) ظاہری طور پر۔ (ورنہ آپ تو اس وقت بھی نبی تھے جب آدم علیہ السلام ابھی پانی اور مٹی کی کشمکش میں تھے) اور سیدنا علی رضی اللہ عنہ منگل کے دن اسلام لائے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4638]

سیدنا عبدالرحمن ابن ابی لیلی فرماتے ہیں: سیدنا علی رضی اللہ عنہ کو سن 40 ہجری 17 رمضان المبارک جمعۃ المبارک کے دن شہید کیا گیا۔ آپ کی مدت خلافت 4 سال اور 9 ماہ تھی، عبدالرحمن بن ملجم المرادی نے آپ کو شہید کیا۔ اور شہادت کے وقت آپ کی عمر مبارک 63 یا 64 برس تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4639]

سیدنا ابوبکر بن ابی شیبہ بیان کرتے ہیں کہ سیدنا علی رضی اللہ عنہ پانچ سال تک خلیفہ رہے اور چالیسویں سن ہجری میں شہید ہوئے، شہادت کے وقت ان کی عمر 63 برس تھی، آپ کو 21 ویں رمضان، جمعہ کے دن زخمی کیا گیا اور ہفتہ کے دن آپ کا انتقال ہو گیا، آپ کو کوفہ میں دفن کیا گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4640]

ابوسنان الدؤلی کا بیان ہے کہ جب سیدنا علی رضی اللہ عنہ زخمی تھے تو یہ ان کی عیادت کے لئے گئے (ابوسنان کہتے ہیں) میں نے عرض کی: اے امیرالمومنین! آپ کی اس زخمی حالت پر ہمیں تو بہت تشویش ہو رہی ہے۔ سیدنا علی رضی اللہ عنہ نے فرمایا: لیکن خدا کی قسم! مجھے اپنے اوپر کوئی تشویش نہیں ہے کیونکہ صادق و مصدوق رسول اللہ صلی اللہ علیہ وسلم نے مجھے بتا دیا تھا کہ تمہیں اس اس مقام پر زخم آئیں گے (یہ کہتے ہوئے سیدنا علی رضی اللہ عنہ نے اپنی کنپٹیوں کی جانب اشارہ کیا) پھر وہاں سے خون بہے گا حتی کہ تیری داڑھی رنگین ہو جائے گی۔ اور مجھے شہید کرنے والا اس امت کا سب سے بڑا بدبخت ہو گا جیسا کہ اونٹنی کی کونچیں کاٹنے والا قوم ثمود کا سب سے بڑا بدبخت تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4641]

ابن شہاب کہتے ہیں: میں جہاد کے ارادے سے دمشق آیا، تو میں عبدالملک کے پاس سلام کرنے کیلئے آیا، وہ اس وقت مینار کے قریب فرش پر بنے ہوئے ایک قبہ میں موجود تھا اور اس کے نیچے لوگوں کی دو قطاریں تھیں۔ میں سلام کر کے بیٹھ گیا۔ اس نے مجھے کہا: اے ابن شہاب: کیا تم جانتے ہو کہ جس دن سیدنا علی رضی اللہ عنہ کو شہید کیا گیا، اس دن بیت المقدس کی صورت حال کیا تھی؟ میں نے کہا: جی ہاں۔ اس نے مجھے اپنے پاس آنے کو کہا: تو میں لوگوں کے پیچھے سے گزرتا ہوا قبہ کی پچھلی جانب آ گیا، اس نے اپنا چہرہ میری طرف کیا اور بہت شفقت کے ساتھ کہنے لگا۔ کیا صورت حال تھی؟ میں نے کہا: بیت المقدس کی جو بھی اینٹ اٹھا کر دیکھا جاتا اس کے نیچے خون ہی خون ہوتا۔ اس نے کہا: (اس وقت دنیا میں) تیرے اور میرے علاوہ اور کوئی شخص ایسا نہیں بچا جس کو اس بات کا علم ہو، (لیکن اب) تم یہ بات کسی کو بھی بیان مت کرنا۔ چنانچہ عبدالملک کی وفات تک میں نے یہ بات کسی کو نہ بتائی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4642]

سیدنا شرحبیل بن سعد القرشی فرماتے ہیں: سیدنا علی رضی اللہ عنہ کو 35 سن ہجری میں خلیفہ بنایا گیا، اس وقت ان کی عمر شریف 38 سال اور کچھ ماہ تھی۔ جب 35 سن ہجری میں حج کا مہینہ آیا تو سیدنا علی رضی اللہ عنہ نے، سیدنا عبداللہ بن عباس رضی اللہ عنہما کو حج پر بھیجا، یونہی 37 اور 38 سن ہجری میں بھی انہی کو بھیجا۔ پھر حج کا موقع آ گیا لیکن سیدنا علی رضی اللہ عنہ جہاد ہی میں مصروف تھے۔ پھر کچھ لوگوں نے سیدنا شیبہ بن عثمان حجبی کے ساتھ صلح کی کوششیں کیں۔ آپ نے لوگوں کو اس بات پر گواہ بنایا۔ پھر جب چالیسواں سن ہجری تھا تو اسی سال کے رمضان المبارک کی 17 تاریخ کو آپ کو شہید کر دیا گیا۔ اس وقت آپ کی عمر مبارک 63 برس تھی۔ ٭٭ امام حاکم کہتے ہیں: ہم نے غور و فکر کیا تو ہمیں ان تاریخوں کے واضح صحیح اسناد کے ہمراہ مل گئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4643]

سیدنا عبداللہ بن مسعود رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: اسلام کی چکی 35 یا 36 سال تک گھومے گی (یعنی یہ دین قائم و دائم رہے گا) پھر اگر یہ لوگ ہلاک ہو گئے تو ان کا حشر ہلاک شدگان والا ہو گا اور اگر ان کا دین باقی رہا تو ستر سال (بلکہ اس کے بعد بھی) رہے گا۔ سیدنا عمر رضی اللہ عنہ نے کہا: یا رسول اللہ صلی اللہ علیہ وسلم ! یہ واقعہ ابھی رونما ہونا ہے یا گزر چکا ہے؟ آپ صلی اللہ علیہ وسلم نے فرمایا: ابھی رونما ہونا ہے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ امام حاکم ابوعبداللہ الحافظ نے سن 402 ہجری میں املاء کرواتے ہوئے فرمایا: آپ کی شہادت کے وقت میں اختلاف ہے۔ بعض نے یہ کہا ہے: سیدنا عثمان رضی اللہ عنہ کی شہادت کے چار دن بعد سیدنا علی رضی اللہ عنہ کی بیعت کر لی گئی تھی۔ بعض نے کہا ہے کہ پانچ دن بعد بیعت کی گئی۔ بعض نے کہا: 3 دن بعد، اور بعض نے کہا ہے کہ 25 ذوالحجہ بروز جمعۃ المبارک کو بیعت کی گئی۔ بعض نے کہا ہے کہ سیدنا عثمان رضی اللہ عنہ کی شہادت کے فوراً بعد عمرو بن محمد الانصاری (جو کہ بنی عمرو بن مبذول کی اولادوں میں سے ایک ہے) کے گھر میں بیعت کی گئی۔ جبکہ سب سے صحیح تر روایت یہ ہے کہ سیدنا علی رضی اللہ عنہ نے سیدنا عثمان رضی اللہ عنہ کی تدفین تک بیعت سے انکار کئے رکھا۔ (پھر جب ان کی تدفین ہو گئی تو) سیدنا علی رضی اللہ عنہ نے منبر رسول پر بیٹھ کر اعلانیہ بیعت لی۔ اور سب سے پہلے سیدنا طلحہ رضی اللہ عنہ نے بیعت کی تھی۔ اور انہوں نے بیعت کرتے ہوئے کہا تھا۔ یہ بیعت ہے جو توڑ دی جائے گی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4644]

سیدنا اسود بن یزید نخعی فرماتے ہیں: جب رسول اللہ صلی اللہ علیہ وسلم کے منبر شریف پر سیدنا علی رضی اللہ عنہ کی بیعت کی جا رہی تھی تو خضرت خزیمہ بن ثابت رضی اللہ عنہ منبر کے سامنے کھڑے ہوئے درج ذیل اشعار پڑھ رہے تھے۔ * جب ہم نے سیدنا علی رضی اللہ عنہ کی بیعت کر لی ہے تو ہمیں جن فتنوں کا خدشہ ہے ان کے لئے ” ابوحسن “ ہمارے لئے کافی ہیں۔ * ہم نے ان کو لوگوں کی جانوں سے بھی زیادہ قریب پایا ہے اور یہ کتاب اللہ اور سنت رسول کے تمام قریش سے زیادہ جاننے والے ہیں۔ * اور بے شک قریش کی غبار نہیں چھٹی جب کبھی وہ لاغر بدن پر چلتے ہیں اور اس میں وہ ہے جس میں تمام بھلائیاں موجود ہیں اور ان میں ایسا کوئی نہیں ہے جس میں تھوڑی بھلائیاں ہوں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4645]

سیدنا ابوراشد فرماتے ہیں: جب سیدنا علی رضی اللہ عنہ کی بیعت کا معاملہ سیدنا حذیفہ تک پہنچا تو انہوں نے کہا: میں ان کے بعد کسی ٹیڑھے منہ والے یا ناقص شخص کی بیعت نہیں کروں گا۔ ٭٭ امام حاکم کہتے ہیں: یہ وہ اخبار ہیں جو امیرالمومنین رضی اللہ عنہ کی بیعت کے حوالے سے منقول ہیں۔ یہ تمام کی تمام صحیح ہیں اور ان پر اجماع ہے۔ اور جہاں تک تعلق ہے بعض لوگوں کے اس مؤقف کا کہ سیدنا عبداللہ بن عمر، ابومسعود انصاری، سیدنا سعد بن ابی وقاص، سیدنا ابوسیٰ اشعری، سیدنا محمد بن مسلمہ انصاری، اور سیدنا اسامہ بن زید رضی اللہ عنہم نے سیدنا علی رضی اللہ عنہ کی بیعت کرنے سے انکار کر دیا تھا تو یہ بات حقیقت حال کو ٹھکرانے کے مترادف ہے۔ آیئے ہم آپ کو حقیقت حال سے آگاہ کرتے ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4646]