سیدنا علی رضی اللہ عنہ سے مروی ہے کہ ”سرخ ارغونی رنگ کے زین پوشوں سے منع کیا گیا ہے۔“ [سنن ابي داود/كتاب اللباس /حدیث: 4050]

سیدنا علی رضی اللہ عنہ نے بیان کیا کہ رسول اللہ صلی اللہ علیہ وسلم نے مجھے منع فرمایا: ”کہ میں سونے کی انگوٹھی پہنوں یا «الْقَسِيَّ» ”(ریشمی)“ لباس اختیار کروں یا سرخ رنگ کا زین پوش استعمال کروں۔“ [سنن ابي داود/كتاب اللباس /حدیث: 4051]

ام المؤمنین سیدہ عائشہ رضی اللہ عنہا سے منقول ہے کہ رسول اللہ صلی اللہ علیہ وسلم نے ایک منقش اونی چادر میں نماز پڑھی۔ آپ صلی اللہ علیہ وسلم کی نظر اس کے نقوش پر پڑی تو جب نماز سے سلام پھیرا تو فرمایا: ”میری یہ منقش چادر ابوجہم کے پاس لے جاؤ، اس نے مجھے ابھی نماز کے دوران میں مشغول کر دیا تھا، میرے لیے سادہ (انبجانی چادر) چادر لے آؤ۔“ امام ابوداؤد رحمہ اللہ فرماتے ہیں کہ ”ابوجہم بن حذیفہ، بنو عدی بن کعب بن غانم کے فرد تھے۔“ [سنن ابي داود/كتاب اللباس /حدیث: 4052]

عثمان بن ابی شیبہ اور ان کے دوسرے ساتھی بیان کرتے ہیں کہ سفیان نے بواسطہ زہری، عروہ سے، انہوں نے ام المؤمنین سیدہ عائشہ رضی اللہ عنہا سے مذکورہ بالا حدیث کی مانند روایت کیا۔ اور مذکورہ بالا روایت زیادہ جامع ہے۔ [سنن ابي داود/كتاب اللباس /حدیث: 4053]

عبداللہ ابو عمر سے روایت ہے اور یہ سیدہ اسماء بنت ابو بکر رضی اللہ عنہا کے غلام تھے، انہوں نے بیان کیا: ”میں نے سیدنا ابن عمر رضی اللہ عنہ کو بازار میں دیکھا کہ انہوں نے ایک شامی کپڑا خریدنا چاہا، پھر دیکھا کہ اس میں سرخ دھاگے پڑے ہیں تو انہوں نے واپس کر دیا۔ پھر میں سیدہ اسماء رضی اللہ عنہا کے پاس آیا اور انہیں یہ واقعہ بتایا تو انہوں نے لونڈی کو بلایا اور کہا: ”میرے پاس رسول اللہ صلی اللہ علیہ وسلم کا جبہ لے آؤ۔“ تو وہ ایک طیلسان کا (موٹا اونی) جبہ لے آئی جس کا دامن، دونوں کف اور دونوں طرف کے چاک موٹے ریشمی دھاگے سے کڑھے ہوئے تھے۔“ [سنن ابي داود/كتاب اللباس /حدیث: 4054]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ”صرف اسی کپڑے سے منع فرمایا ہے جو خالص ریشمی ہو۔ لیکن اگر ریشمی دھاگے سے کڑھائی ہوئی ہو یا اس کا تانا ریشمی ہو تو اس کا کوئی حرج نہیں۔“ [سنن ابي داود/كتاب اللباس /حدیث: 4055]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ”سیدنا عبدالرحمٰن بن عوف اور زبیر بن عوام رضی اللہ عنہما کو ریشم کی قمیصیں پہننے کی اجازت دی تھی جبکہ وہ سفر میں تھے اور انہیں خارش ہو گئی تھی۔“ [سنن ابي داود/كتاب اللباس /حدیث: 4056]

سیدنا علی بن ابی طالب رضی اللہ عنہ نے بیان کیا کہ اللہ کے نبی کریم صلی اللہ علیہ وسلم نے ریشم لیا اور اپنے دائیں ہاتھ میں پکڑا اور سونا لیا اور اپنے بائیں ہاتھ میں پکڑا، پھر فرمایا: ”بلاشبہ یہ دونوں میری امت کے مردوں پر حرام ہیں۔“ [سنن ابي داود/كتاب اللباس /حدیث: 4057]

سیدنا انس بن مالک رضی اللہ عنہ سے مروی ہے کہ انہوں نے سیدہ ام کلثوم رضی اللہ عنہا دختر رسول اللہ صلی اللہ علیہ وسلم کو دیکھا کہ انہوں نے «السِّيَرَاء» کی ایک چادر اوڑھی ہوئی تھی، یعنی ”دھاری دار ریشمی چادر جس میں چار خانے سے بنے ہوئے تھے“۔ [سنن ابي داود/كتاب اللباس /حدیث: 4058]

سیدنا جابر رضی اللہ عنہ بیان کرتے ہیں کہ ”ہم لڑکوں پر سے (ریشم) اتار لیا کرتے تھے اور بچیوں پر رہنے دیتے تھے۔“ مسعر کہتے ہیں کہ ”میں نے اس روایت کے بارے میں عمرو بن دینار سے دریافت کیا تو انہوں نے لاعلمی کا اظہار کیا۔“ [سنن ابي داود/كتاب اللباس /حدیث: 4059]