حضرت عقبہ بن حارث رضی اللہ عنہ سے روایت ہے، انہوں نے کہا: نبی کریم صلی اللہ علیہ وسلم نے ہمیں نماز عصر پڑھائی، اس کے بعد جلد ہی گھر تشریف لے آئے، ابھی کچھ ہی دیر ٹھہرے تھے کہ باہر تشریف لائے، اس پر میں نے یا کسی اور نے دریافت کیا تو فرمایا: ”میں گھر میں صدقے کے مال سے ناخالص سونے کا ایک ٹکڑا چھوڑ آیا تھا، مجھے یہ بات پسند نہ تھی کہ اسے تقسیم کیے بغیر رات بسر کر لوں، اس لیے میں نے اسے تقسیم کر دیا ہے۔“ [صحيح البخاري/كتاب الزكاة/حدیث: 1430]

حضرت عبداللہ بن عباس رضی اللہ عنہما سے روایت ہے، انہوں نے فرمایا: نبی کریم صلی اللہ علیہ وسلم عید کے دن باہر تشریف لائے، دو رکعت نماز پڑھائی جبکہ اس سے پہلے اور بعد کوئی نماز نہ پڑھی، پھر آپ نے عورتوں کی طرف توجہ فرمائی، حضرت بلال رضی اللہ عنہ آپ کے ہمراہ تھے، چنانچہ آپ نے عورتوں کو وعظ و نصیحت فرمائی اور انہیں صدقہ دینے کا حکم دیا تو عورتوں نے اپنے کنگن اور بالیاں (حضرت بلال رضی اللہ عنہ کے کپڑے میں) ڈالنی شروع کر دیں۔ [صحيح البخاري/كتاب الزكاة/حدیث: 1431]

حضرت ابو موسیٰ اشعری رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم کے پاس جب کوئی سائل آتا یا آپ صلی اللہ علیہ وسلم سے کوئی حاجت طلب کی جاتی تو آپ صلی اللہ علیہ وسلم فرماتے: ”تم سفارش کر دیا کرو، اس سے تمہیں ثواب ملے گا اور اللہ تعالیٰ اپنے نبی صلی اللہ علیہ وسلم کی زبان پر جو چاہتا ہے فیصلہ کر دیتا ہے۔“ [صحيح البخاري/كتاب الزكاة/حدیث: 1432]

حضرت اسماء رضی اللہ عنہا سے روایت ہے، انہوں نے کہا: نبی کریم صلی اللہ علیہ وسلم نے مجھ سے فرمایا: ”صدقہ و خیرات کو مت روکو وگرنہ تم پر بندش کر دی جائے گی۔“ ایک روایت میں ہے کہ آپ صلی اللہ علیہ وسلم نے فرمایا: ”صدقہ دینے کے لیے گن گن کر مت رکھو، وگرنہ اللہ بھی تمہیں گن گن کر ہی دے گا۔“ [صحيح البخاري/كتاب الزكاة/حدیث: 1433]

حضرت اسماء بنت ابی بکر رضی اللہ عنہا سے روایت ہے کہ وہ ایک دفعہ نبی کریم صلی اللہ علیہ وسلم کے پاس حاضر ہوئیں تو آپ صلی اللہ علیہ وسلم نے فرمایا: ”اپنے مال کو سینت سینت کر مت رکھو ورنہ اللہ اپنی رحمت تم سے روک لے گا اور جس قدر ممکن ہو خرچ کرتی رہو۔“ [صحيح البخاري/كتاب الزكاة/حدیث: 1434]

حضرت حذیفہ رضی اللہ عنہ سے روایت ہے، انہوں نے کہا کہ حضرت عمر رضی اللہ عنہ نے ایک دفعہ فرمایا: تم میں سے کون ہے جسے فتنے کے متعلق رسول اللہ صلی اللہ علیہ وسلم کی کوئی حدیث یاد ہو؟ میں نے کہا: جیسے رسول اللہ صلی اللہ علیہ وسلم نے فرمایا تھا مجھے اسی طرح یاد ہے۔ حضرت عمر رضی اللہ عنہ نے فرمایا: ہاں! تمہاری جرأت اس بارے میں قابل داد ہے، بتاؤ! آپ صلی اللہ علیہ وسلم نے کیسے فرمایا تھا؟ میں نے کہا: ”آدمی کا فتنہ اپنے اہل وعیال، اولاد اور ہمسائے کے متعلق ہوتا ہے، نماز، صدقہ اور بھلی بات، نیز اچھا کام اس کے لیے کفارہ ہے۔“ راویِ حدیث سلیمان نے کہا: وہ یوں فرمایا کرتے تھے کہ ”نماز، صدقہ، اچھے کاموں کا حکم دینا اور برے کاموں سے روکنا یہ سب اس کا کفارہ بن جائیں گے۔“ حضرت عمر رضی اللہ عنہ نے فرمایا: میرا سوال اس کے متعلق نہیں، بلکہ میں تو اس فتنے کے متعلق پوچھنا چاہتا ہوں جو سمندروں کی لہروں کی طرح موجزن ہوگا۔ میں نے کہا: اے امیر المؤمنین! آپ اس کے متعلق کوئی فکر نہ کریں، کیونکہ آپ کے اور اس کے درمیان ایک بند شدہ دروازہ ہے، آپ رضی اللہ عنہ نے فرمایا: وہ دروازہ توڑا جائے گا یا کھولا جائے گا؟ میں نے عرض کیا: نہیں! بلکہ وہ دروازہ توڑا جائے گا۔ حضرت عمر رضی اللہ عنہ نے فرمایا: جب وہ توڑا گیا تو پھر کبھی بند نہیں ہوگا۔ حضرت حذیفہ رضی اللہ عنہ نے عرض کیا: ہاں! معاملہ کچھ ایسا ہی ہے۔ راویِ حدیث کہتے ہیں کہ ہم دروازے کے متعلق سوال کرنے سے ڈرے، اس لیے ہم نے مسروق رحمہ اللہ سے کہا کہ تم حضرت حذیفہ رضی اللہ عنہ سے اس دروازے کے متعلق دریافت کرو، چنانچہ مسروق رحمہ اللہ نے حضرت حذیفہ رضی اللہ عنہ سے پوچھا تو انہوں نے فرمایا: وہ دروازہ خود عمر فاروق رضی اللہ عنہ ہیں، ہم نے عرض کیا: کیا عمر فاروق جانتے تھے کہ آپ کی مراد کیا ہے؟ انہوں نے فرمایا: ہاں! جیسے آنے والے کل سے پہلے رات کا ہونا یقینی ہے، یہ اس لیے کہ میں نے حضرت فاروق رضی اللہ عنہ کو ایک ایسی حدیث بیان کی ہے جو پہیلی یا چیستان نہیں ہے۔ [صحيح البخاري/كتاب الزكاة/حدیث: 1435]

حضرت حکیم بن حزام رضی اللہ عنہما سے روایت ہے، وہ کہتے ہیں کہ میں نے عرض کیا: اللہ کے رسول صلی اللہ علیہ وسلم ! میں زمانہ جاہلیت میں عبادت کی نیت سے جو صدقہ دیتا تھا یا غلام آزاد کرتا اور صلہ رحمی کرتا تھا کیا ان کا مجھے کوئی اجر ملے گا؟ نبی کریم صلی اللہ علیہ وسلم نے فرمایا: ”تم ان نیکیوں کے ساتھ اسلام لائے ہو۔“ [صحيح البخاري/كتاب الزكاة/حدیث: 1436]

حضرت عائشہ رضی اللہ عنہا سے روایت ہے، انہوں نے کہا: رسول اللہ صلی اللہ علیہ وسلم نے فرمایا: ”جب بیوی اپنے خاوند کی اشیائے خوردونوش سے صدقہ کرے بشرط یہ کہ گھر تباہ کرنے کی نیت نہ ہو تو اسے صدقہ کرنے کا ثواب اور اس کے شوہر کو کمائی کرنے کا اجر ملے گا اور خازن کو بھی اس طرح ثواب ملے گا۔“ [صحيح البخاري/كتاب الزكاة/حدیث: 1437]

حضرت ابو موسیٰ اشعری رضی اللہ عنہ سے روایت ہے، وہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”وہ مسلمان خزانچی جو امانت دار ہو، خوشی سے بلا کم و کاست اپنے آقا کا حکم نافذ کر دے اور جس چیز کا آدمی کو دینے کا حکم دیا گیا ہے اس کے حوالے کر دے، تو وہ بھی خیرات کرنے والوں میں سے ایک ہوگا۔“ کبھی آپ صلی اللہ علیہ وسلم «يُنْفِذُ» کی بجائے «يُعْطِي» کا لفظ فرماتے، یعنی چیز دے دے (جس آدمی کو دینے کا حکم دیا گیا ہے اسے)۔ [صحيح البخاري/كتاب الزكاة/حدیث: 1438]