حضرت عبداللہ بن عمرو رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”دو خصلتیں یا دو کام ایسے ہیں کہ جو مسلمان بندہ بھی ان پر پابندی کرے، وہ جنت میں داخل ہوگا۔ یہ دونوں کام بہت آسان ہیں اور ان پر عمل کرنے والے بہت کم ہیں۔“ رسول اللہ صلی اللہ علیہ وسلم نے فرمایا: ”(وہ دو کام یہ ہیں:) پانچ فرض نمازوں میں سے ہر فرض نماز کے بعد دس دفعہ «سُبْحَانَ اللّٰهِ» ”سبحان اللہ“، دس دفعہ «الْحَمْدُ لِلّٰهِ» ”الحمدللہ“ اور دس دفعہ «اَللّٰهُ أَكْبَرُ» ”اللہ اکبر“ کہے۔ اس طرح زبان پر (پڑھنے میں) یہ کل ڈیڑھ سو کلمات ہیں مگر میزان میں (ثواب کے لحاظ سے) ڈیڑھ ہزار ہیں۔“ (کیونکہ ہر نیکی کے بدلے میں اللہ تعالیٰ دس گنا جزا دیتا ہے)۔ میں نے دیکھا، اللہ کے رسول صلی اللہ علیہ وسلم ان کلمات کو اپنے ہاتھ سے شمار کرتے تھے۔ (دوسرا کام یہ ہے کہ) ”جب تم میں سے کوئی شخص اپنے بستر یا چارپائی پر لیٹے تو تینتیس دفعہ «سُبْحَانَ اللّٰهِ» ”سبحان اللہ“، تینتیس دفعہ «الْحَمْدُ لِلّٰهِ» ”الحمدللہ“ اور چونتیس دفعہ «اَللّٰهُ أَكْبَرُ» ”اللہ اکبر“ کہے۔ یہ زبان پر (پڑھنے کے لحاظ سے) سو کلمات ہیں اور میزان میں (ثواب کے لحاظ سے) ایک ہزار ہیں۔“ رسول اللہ صلی اللہ علیہ وسلم نے فرمایا: ”تم میں سے کون ایسا شخص ہے جو ہر دن رات میں دو ہزار پانچ سو گناہ کرتا ہے؟“ (یعنی جب کہ یہ کلمات اتنے گناہوں کو مٹا دیتے ہیں)۔ پوچھا گیا: اے اللہ کے رسول! کوئی آدمی ان دو کاموں کی پابندی کیسے نہیں کر پاتا؟ آپ صلی اللہ علیہ وسلم نے فرمایا: ”جب کوئی آدمی نماز میں ہوتا ہے تو شیطان اس کے پاس آکر کہتا ہے: فلاں چیز یاد کر، فلاں چیز یاد کر، (اس طرح اس کی توجہ ادھر ادھر ہو جاتی ہے اور وہ نماز کے فوراً بعد اٹھ کر چلا جاتا ہے)۔ اسی طرح سوتے وقت بھی شیطان آکر (ادھر ادھر کے خیالات میں پھنسا دیتا ہے اور) اسے سلا دیتا ہے (جس سے اسے اس ذکر کی طرف توجہ ہی نہیں ہوتی)۔“ [سنن نسائي/كتاب السهو/حدیث: 1349]

حضرت کعب بن عجرہ رضی اللہ عنہ سے مروی ہے، رسول اللہ صلی اللہ علیہ وسلم نے فرمایا: ”فرض نمازوں کے بعد پڑھے جانے والے کچھ ایسے کلمات ہیں جنھیں پڑھنے والا کبھی ناکام نہیں ہوتا۔ ہر نماز کے بعد تینتیس دفعہ «سُبْحَانَ اللّٰہِ»، تینتیس دفعہ «الْحَمْدُ لِلّٰہِ» اور چونتیس دفعہ «اللّٰہُ اَکْبَرُ» پڑھے۔“ [سنن نسائي/كتاب السهو/حدیث: 1350]

حضرت زید بن ثابت رضی اللہ عنہ فرماتے ہیں کہ لوگوں کو حکم دیا گیا (استحاباً) کہ ہر فرض نماز کے بعد تینتیس دفعہ «سُبْحَانَ اللّٰهِ» ”سبحان اللہ“، تینتیس دفعہ «الْحَمْدُ لِلّٰهِ» ”الحمد للہ“ اور چونتیس دفعہ «اللّٰهُ أَكْبَرُ» ”اللہ اکبر“ کہیں۔ ایک انصاری صحابی کو خواب آیا، اسے کہا گیا: کیا تمہیں رسول اللہ صلی اللہ علیہ وسلم نے حکم دیا ہے کہ تم ہر نماز کے بعد تینتیس دفعہ «سُبْحَانَ اللّٰهِ» ”سبحان اللہ“، تینتیس دفعہ «الْحَمْدُ لِلّٰهِ» ”الحمد للہ“ اور چونتیس دفعہ «اللّٰهُ أَكْبَرُ» ”اللہ اکبر“ کہو؟ اس نے کہا: ہاں۔ خواب میں نظر آنے والے شخص نے کہا: تم انہیں پچیس دفعہ کرلو اور ان میں «لَا إِلٰهَ إِلَّا اللّٰهُ» ”لا الہ الا اللہ“ کا اضافہ کرلو۔ جب صبح ہوئی تو وہ انصاری صحابی نبی صلی اللہ علیہ وسلم کے پاس حاضر ہوئے اور پورا خواب بیان کیا۔ آپ صلی اللہ علیہ وسلم نے فرمایا: ”ایسے کرلو۔“ [سنن نسائي/كتاب السهو/حدیث: 1351]

حضرت ابن عمر رضی اللہ عنہ سے روایت ہے کہ ایک صحابی نے خواب میں دیکھا، ان سے پوچھا گیا: تمہارے نبی صلی اللہ علیہ وسلم نے تمہیں کس چیز کا حکم دیا ہے؟ انہوں نے کہا: آپ صلی اللہ علیہ وسلم نے ہمیں حکم دیا ہے کہ ہم (فرض نماز کے بعد) تینتیس دفعہ «سُبْحَانَ اللَّهِ» ”سبحان اللہ“، تینتیس دفعہ «الْحَمْدُ لِلَّهِ» ”الحمد للہ“ اور چونتیس دفعہ «اللَّهُ أَكْبَرُ» ”اللہ اکبر“ کہیں۔ یہ ایک سو ہو جائیں گے۔ اس نے کہا: تم پچیس دفعہ «سُبْحَانَ اللَّهِ» ”سبحان اللہ“، پچیس دفعہ «الْحَمْدُ لِلَّهِ» ”الحمد للہ“، پچیس دفعہ «اللَّهُ أَكْبَرُ» ”اللہ اکبر“ اور پچیس دفعہ «لَا إِلَهَ إِلَّا اللَّهُ» ”لا الہ الا اللہ“ پڑھ لیا کرو۔ یہ بھی ایک سو ہو جائیں گے۔ جب صبح ہوئی تو اس صحابی نے یہ خواب نبی صلی اللہ علیہ وسلم سے بیان کیا۔ رسول اللہ صلی اللہ علیہ وسلم نے فرمایا: ”جیسے یہ انصاری کہتا ہے، اسی طرح کرلو۔“ [سنن نسائي/كتاب السهو/حدیث: 1352]

حضرت ابن عباس رضی اللہ عنہ سے روایت ہے کہ نبی صلی اللہ علیہ وسلم اپنی زوجہ محترمہ جویریہ بنت حارث رضی اللہ عنہا کے پاس سے گزرے جب کہ وہ اپنی جائے نماز پر بیٹھی ذکر اذکار کر رہی تھیں۔ پھر آپ صلی اللہ علیہ وسلم دوپہر کے قریب دوبارہ ان کے پاس سے گزرے۔ (وہ اس وقت بھی بیٹھی تھیں) آپ صلی اللہ علیہ وسلم نے ان سے فرمایا: ”تم اس وقت سے اسی حالت میں ہو؟“ انہوں نے کہا: جی ہاں۔ آپ صلی اللہ علیہ وسلم نے فرمایا: ”میں تمہیں کچھ کلمات نہ سکھا دوں جنہیں تم پڑھا کرو: «سُبْحَانَ اللّٰهِ عَدَدَ خَلْقِهِ» ”اللہ کی تسبیح ہے، اس کی مخلوقات کی تعداد کے برابر۔“ تین دفعہ، «سُبْحَانَ اللّٰهِ رِضَا نَفْسِهِ» ”اللہ کی تسبیح ہے اس کی رضا مندی کے مطابق۔“ تین دفعہ، «سُبْحَانَ اللّٰهِ زِنَةَ عَرْشِهِ» ”اللہ کی تسبیح ہے اس کے عرش کے وزن کے مطابق۔“ تین دفعہ، «سُبْحَانَ اللّٰهِ مِدَادَ كَلِمَاتِهِ» ”اللہ کی تسبیح ہے اس کے کلمات کی روشنائی کے برابر۔“ تین دفعہ۔“ [سنن نسائي/كتاب السهو/حدیث: 1353]

حضرت ابن عباس رضی اللہ عنہما بیان کرتے ہیں کہ فقیر صحابہ رسول اللہ صلی اللہ علیہ وسلم کے پاس آئے اور عرض کیا: اے اللہ کے رسول! مالدار لوگ ہماری طرح نمازیں پڑھتے ہیں اور ہماری طرح روزے رکھتے ہیں، لیکن ان کے پاس مال ہے جس سے وہ صدقہ کرتے ہیں اور غلام آزاد کرتے ہیں۔ (ہم ان کے درجے کو کیسے پہنچ سکتے ہیں؟) نبی صلی اللہ علیہ وسلم نے فرمایا: ”جب تم نماز پڑھ چکو تو تینتیس مرتبہ «سُبْحَانَ اللّٰهِ» ”اللہ پاک ہے“، تینتیس مرتبہ «اَلْحَمْدُ لِلّٰهِ» ”تمام تعریف اللہ کے لیے ہے“، تینتیس مرتبہ «اَللّٰهُ أَكْبَرُ» ”اللہ سب سے بڑا ہے“ اور دس دفعہ «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ پڑھ لیا کرو۔ تم اس عمل کی بدولت اپنے سے آگے بڑھ جانے والے لوگوں کو جا ملو گے اور ان لوگوں سے بہت آگے بڑھ جاؤ گے جو تم سے پیچھے ہیں۔“ (یا جو یہ عمل نہیں کرتے۔) [سنن نسائي/كتاب السهو/حدیث: 1354]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص صبح کی نماز کے بعد سو دفعہ «سُبْحَانَ اللّٰهِ» ”اللہ پاک ہے“ اور سو دفعہ «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ پڑھے، اس کے سب گناہ معاف ہو جائیں گے اگرچہ وہ سمندر کی جھاگ کے برابر ہوں۔“ [سنن نسائي/كتاب السهو/حدیث: 1355]

حضرت عبداللہ بن عمرو رضی اللہ عنہما بیان کرتے ہیں کہ میں نے رسول اللہ صلی اللہ علیہ وسلم کو تسبیحات شمار کرتے دیکھا۔ [سنن نسائي/كتاب السهو/حدیث: 1356]

حضرت ابوسعید خدری رضی اللہ عنہ بیان کرتے ہیں کہ رسول اللہ صلی اللہ علیہ وسلم ماہِ رمضان المبارک کے درمیان والے دس دنوں میں اعتکاف بیٹھتے تھے۔ پھر جب بیس راتیں گزر جاتیں اور اکیسویں رات آ جاتی تو آپ اور آپ کے ساتھ اعتکاف بیٹھنے والے گھروں کو لوٹ جاتے۔ پھر ایک سال اس رات بھی اعتکاف میں بیٹھے رہے جس رات آپ گھر کو لوٹ جایا کرتے تھے۔ پھر آپ نے لوگوں کو خطبہ دیا اور جو اللہ نے چاہا اس کا انہیں حکم دیا۔ پھر فرمایا: ”میں درمیان والے دس دنوں کا اعتکاف بیٹھا کرتا تھا۔ اب مجھے خیال آیا ہے کہ میں آخری دس دنوں کا بھی اعتکاف بیٹھوں، اس لیے جو شخص میرے ساتھ اعتکاف بیٹھا ہے، وہ اپنی اعتکاف گاہ میں بیٹھا رہے۔ تحقیق میں نے لیلۃ القدر خواب میں دیکھی تھی مگر مجھے وہ بھلوا دی گئی، لہٰذا اس رات کو آخری دس دنوں کی طاق راتوں میں تلاش کرو۔ میں نے خواب میں دیکھا ہے کہ میں کیچڑ میں سجدہ کر رہا ہوں۔“ حضرت ابوسعید رضی اللہ عنہ بیان کرتے ہیں کہ اکیسویں رات ہی ہم پر بارش برسی۔ رسول اللہ صلی اللہ علیہ وسلم کی سجدہ گاہ میں مسجد ٹپکنے لگی۔ میں نے دیکھا کہ جب آپ صبح کی نماز سے فارغ ہو کر ہماری طرف مڑے تو آپ کا چہرہ (یعنی ماتھا اور ناک کا کنارہ) کیچڑ سے تر تھا۔ [سنن نسائي/كتاب السهو/حدیث: 1357]

حضرت جابر بن سمرہ رضی اللہ عنہ فرماتے ہیں کہ رسول اللہ صلی اللہ علیہ وسلم جب فجر کی نماز پڑھ چکتے تو سورج طلوع ہونے تک اپنی نماز والی جگہ میں بیٹھے رہتے۔ [سنن نسائي/كتاب السهو/حدیث: 1358]