حضرت ام عطیہ رضی اللہ عنہا فرماتی ہیں کہ جب میں نے رسول اللہ صلی اللہ علیہ وسلم کی بیعت کرنے کا ارادہ کیا تو میں نے کہا: اے اللہ کے رسول! ایک عورت نے دورِ جاہلیت میں نوحہ کرنے میں مدد کی تھی۔ میں جاکر اس کی مدد کر کے آتی ہوں، پھر آکر آپ کی بیعت کروں گی۔ آپ صلی اللہ علیہ وسلم نے فرمایا: ”جا، اس کی مدد کر آ۔“ میں گئی اور میں نے اس کی مدد کا اسے بدلہ دیا، پھر میں آئی اور رسول اللہ صلی اللہ علیہ وسلم کی بیعت کی۔ [سنن نسائي/كتاب البيعة/حدیث: 4184]

حضرت ام عطیہ رضی اللہ عنہا سے مروی ہے کہ رسول اللہ صلی اللہ علیہ وسلم نے ہم سے بیعت لی کہ ہم نوحہ نہیں کریں گی۔ [سنن نسائي/كتاب البيعة/حدیث: 4185]

حضرت امیمہ بنت رقیقہ رضی اللہ عنہا فرماتی ہیں کہ میں کچھ انصاری عورتوں کی معیت میں نبی اکرم صلی اللہ علیہ وسلم کی خدمت میں حاضر ہوئی، ہم آپ سے بیعت ہونا چاہتی تھیں۔ ہم نے عرض کی: اے اللہ کے رسول! ہم آپ سے بیعت کرتی ہیں کہ ہم اللہ تعالیٰ کے ساتھ کسی کو شریک نہیں بنائیں گی، چوری نہیں کریں گی، زنا نہیں کریں گی، اپنی طرف سے جھوٹ گھڑ کر کسی پر بہتان طرازی نہیں کریں گی اور کسی نیک کام میں آپ کی نافرمانی نہیں کریں گی۔ آپ صلی اللہ علیہ وسلم نے فرمایا: ”اپنی طاقت اور وسعت کے مطابق (تم پابند ہوگی)۔“ ہم نے کہا: اللہ تعالیٰ اور اس کے رسول صلی اللہ علیہ وسلم ہم پر (ہم سے بھی) زیادہ مہربان اور رحم فرمانے والے ہیں۔ اے اللہ کے رسول! اجازت دیجیے کہ ہم آپ کے دست مبارک پر بیعت کریں۔ رسول اللہ صلی اللہ علیہ وسلم نے فرمایا: ”میں عورتوں سے ہاتھ نہیں ملاتا۔ میرا زبانی طور پر سو عورتوں سے (بیعت کی) بات چیت کرنا ایسے ہی ہے جیسے ہر ہر عورت سے الگ طور پر بات چیت کروں۔“ [سنن نسائي/كتاب البيعة/حدیث: 4186]

آلِ شرید کے ایک شخص عمرو کے والد رضی اللہ عنہ سے روایت ہے کہ بنو ثقیف کے وفد میں ایک کوڑھی شخص بھی آیا تھا۔ نبی اکرم صلی اللہ علیہ وسلم نے اسے پیغام بھیجا: ”واپس چلے جاؤ (میرے پاس آنے کی ضرورت نہیں) میں نے تیری بیعت قبول کرلی ہے۔“ [سنن نسائي/كتاب البيعة/حدیث: 4187]

حضرت ہرماس بن زیاد رضی اللہ عنہ سے روایت ہے کہ میں نے (بیعت کے لیے) اپنا ہاتھ نبی اکرم صلی اللہ علیہ وسلم کی طرف بڑھایا جبکہ میں اس وقت (نابالغ) بچہ تھا۔ آپ صلی اللہ علیہ وسلم نے مجھ سے بیعت نہیں لی۔ [سنن نسائي/كتاب البيعة/حدیث: 4188]

حضرت جابر رضی اللہ عنہ سے مروی ہے کہ ایک غلام آیا اور اس نے ہجرت پر نبی اکرم صلی اللہ علیہ وسلم کی بیعت کر لی۔ نبی اکرم صلی اللہ علیہ وسلم کو علم نہیں تھا کہ وہ غلام ہے۔ کچھ دیر بعد اس کا مالک آگیا، وہ اسے لے جانا چاہتا تھا۔ نبی اکرم صلی اللہ علیہ وسلم نے فرمایا: ”یہ غلام مجھے بیچ دے۔“ پھر آپ نے دو کالے غلام دے کر اس کو خریدا۔ اس کے بعد آپ کسی سے بیعت نہ لیتے حتیٰ کہ پوچھ لیتے: ”وہ غلام تو نہیں؟“ [سنن نسائي/كتاب البيعة/حدیث: 4189]

حضرت جابر بن عبد اللہ رضی اللہ عنہما سے روایت ہے کہ ایک اعرابی نے رسول اللہ صلی اللہ علیہ وسلم کے دستِ مبارک پر قبولِ اسلام کی بیعت کی، پھر اس اعرابی کو مدینہ منورہ میں تپ چڑھ گیا۔ وہ رسول اللہ صلی اللہ علیہ وسلم کے پاس آکر کہنے لگا: اے اللہ کے رسول! مجھے میری بیعت واپس فرما دیجیے۔ آپ نے انکار کر دیا، وہ دوبارہ آیا اور پھر کہنے لگا: میری بیعت واپس فرما دیجیے۔ آپ نے پھر انکار فرمایا۔ آخر وہ اعرابی (بلا اجازت) چلا گیا۔ رسول اللہ صلی اللہ علیہ وسلم نے فرمایا: ”مدینہ منورہ بھٹی کی طرح ہے، میل کچیل کو نکالتا رہتا ہے اور خالص چیز کو باقی رکھتا ہے۔“ [سنن نسائي/كتاب البيعة/حدیث: 4190]

حضرت سلمہ بن اکوع رضی اللہ عنہ حجاج کے پاس تشریف لے گئے، اس نے کہا: اے ابن اکوع! تم مرتد ہو گئے ہو اور ایک کلمہ کہا جس کے معنیٰ تھے کہ (مدینہ چھوڑ کر) بادیہ میں رہنے لگے ہو؟ انہوں نے فرمایا: نہیں، بلکہ رسول اللہ صلی اللہ علیہ وسلم نے مجھے (اپنے بعد) بادیہ میں رہنے کی اجازت دی تھی۔ [سنن نسائي/كتاب البيعة/حدیث: 4191]

حضرت ابن عمر رضی اللہ عنہما بیان کرتے ہیں کہ ہم رسول اللہ صلی اللہ علیہ وسلم کی بیعت کیا کرتے تھے کہ آپ کی بات سنیں گے اور اطاعت کریں گے۔ اللہ کے رسول صلی اللہ علیہ وسلم فرماتے کہ ”اپنی طاقت کے مطابق۔“ [سنن نسائي/كتاب البيعة/حدیث: 4192]

حضرت ابن عمر رضی اللہ عنہما سے مروی ہے، وہ بیان کرتے ہیں کہ جب ہم سمع و طاعت پر رسول اللہ صلی اللہ علیہ وسلم کی بیعت کرتے تو آپ صلی اللہ علیہ وسلم ہمیں فرماتے تھے: ”تمہاری طاقت کے مطابق۔“ [سنن نسائي/كتاب البيعة/حدیث: 4193]