سیدنا جابر بن عبداللہ رضی اللہ عنہ کہتے ہیں کہ نبی صلی اللہ علیہ وسلم غلاموں کے بارے میں حسن سلوک کی وصیت کرتے تھے، اور فرماتے تھے: ”ان کو کھلاؤ جہاں سے تم کھاتے ہو اور اپنے لباس سے ان کو لباس پہناؤ۔ اور اللہ عزوجل کی مخلوق کو سزا نہ دو۔“ [صحيح الادب المفرد/حدیث: 139]

معرور بن سوید کہتے ہیں کہ میں نے سیدنا ابوذر رضی اللہ عنہ کو دیکھا، ان پر ایک حلہ تھا اور ان کے غلام پر بھی حلہ تھا (ایک روایت میں ہے: ان پر ایک کپڑا تھا اور ان کے غلام پر حلہ تھا تو ہم نے کہا: اگر آپ یہ لے لیتے اور اس کو کوئی اور چیز دے دیتے یہ آپ کا حلہ بن جاتا)۔ ہم نے ان سے اس کی وجہ دریافت کی تو انہوں نے کہا: میں نے ایک شخص کو گالی دی تھی۔ اس نے نبی صلی اللہ علیہ وسلم سے میری شکایت کر دی۔ آپ صلی اللہ علیہ وسلم نے مجھ سے کہا: ”کیا تم نے اس کی ماں کو طعنہ دیا؟“ میں نے عرض کیا: جی ہاں۔ تو آپ صلی اللہ علیہ وسلم نے فرمایا: ”بیشک تمہارے بھائی تمہارے خادم ہیں، اللہ نے انہیں تمہارے ماتحت بنایا ہے۔ جس کا بھائی اس کے ماتحت ہو اسے چاہیے کہ جیسا خود کھائے ویسا اسے کھلائے اور جیسا خود پہنے ویسا اسے پہنا ئے اور ان سے ایسا کام نہ لو جو ان کے بس کا نہیں۔ اگر تم ان کو ایسے کام کی ذمہ داری ڈالو جو ان کے بس کا نہیں تو ان کی مدد بھی کرو۔“ [صحيح الادب المفرد/حدیث: 140]

سیدنا ابوہریرہ رضی اللہ عنہ سے مروی ہے کہ انہوں نے کہا: کام کرنے والے کی اس کے کام میں مدد کرو، کیونکہ اللہ کا کام کرنے والا یعنی خادم کبھی نامراد نہیں ہوتا۔ [صحيح الادب المفرد/حدیث: 141]

سیدنا ابوہریرہ رضی اللہ عنہ سے مروی ہے کہ نبی صلی اللہ علیہ وسلم نے فرمایا: ”غلام کے لیے (کا حق) اس کا کھانا اور لباس ہے اور یہ کہ اس پر اس کی طاقت سے زیادہ کام نہ ڈالا جائے۔“ [صحيح الادب المفرد/حدیث: 142]

سیدنا مقدام رضی اللہ عنہ سے مروی ہے انہوں نے نبی صلی اللہ علیہ وسلم کو فرماتے ہوئے سنا ہے: ”جو اپنے آپ کو کھلاؤ وہ بھی صدقہ ہے، جو اپنے بچوں کو، بیوی کو اور خادم کو کھلاؤ وہ بھی صدقہ ہے۔“ [صحيح الادب المفرد/حدیث: 143]

سیدنا ابوہریرہ رضی اللہ عنہ سے مروی ہے، وہ کہتے ہیں کہ رسول اللہ صلی اللہ علیہ وسلم نے فرمایا: ”بہترین صدقہ وہ ہے جو کفایت کو باقی چھوڑے۔ اور اوپر والا ہاتھ نیچے والے ہاتھ سے بہتر ہے اور خرچ کرنے کا آغاز اس آدمی کے ساتھ کرو جس کی تم کفالت کرتے ہو۔“ [صحيح الادب المفرد/حدیث: 144]

سیدنا ابوہریرہ رضی اللہ عنہ سے مروی ہے انہوں نے کہا کہ نبی صلی اللہ علیہ وسلم نے صدقہ کرنے کا حکم دیا، تو ایک شخص نے کہا: میرے پاس ایک دینار ہے۔ فرمایا: ”اس کو اپنی ذات پر خرچ کرو۔“ اس نے کہا: میرے پاس ایک دینار اور ہے، فرمایا: ”اس کو اپنی بیوی پر خرچ کرو“، کہا: میرے پاس اس کے علاوہ ایک اور دینار بھی ہے، فرمایا: ”اس کواپنے خادم پر خرچ کرو اور اس کے بعد تم زیادہ سمجھ رکھتے ہو (کہ کون خرچ کا مستحق ہے)۔“ [صحيح الادب المفرد/حدیث: 145]

ابن جریج سے مروی ہے کہتے ہیں کہ مجھے ابوزبیر نے بتایا کہ اس نے ایک آدمی کو سنا وہ جابر سے آدمی کے خادم کے بارے میں سوال کر رہا تھا، جب وہ اپنے آقا کو کھانے پکانے کی مشقت سے اور اس کی حرارت سے کفایت کرتا ہے تو کیا نبی صلی اللہ علیہ وسلم نے حکم دیا ہے کہ اسے کھانے پر بلائے؟ انہوں نے کہا: جی ہاں، اور اگر تم میں سے کوئی شخص خادم کے ساتھ کھانا پسند نہ کرے تو اسے چاہیے کہ اس کے ہاتھ میں لقمہ ہی دے دے۔ [صحيح الادب المفرد/حدیث: 146]

سیدنا ابوہریرہ رضی اللہ عنہ سے مروی ہے وہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جب تم میں سے کسی کے پاس اس کا خادم کھانا لائے تو اسے چاہیے کہ خادم کو اپنے ساتھ بٹھا لے اور اگر وہ قبول نہ کرے تو اسے کھانے میں سے کچھ نہ کچھ پکڑا دے۔“ [صحيح الادب المفرد/حدیث: 147]

سیدنا ابومحذورہ رضی اللہ سے مروی ہے کہ میں سیدنا عمر رضی اللہ عنہ کے پاس بیٹھا تھا جب کہ صفوان بن امیہ ایک پیالہ لایا اسے کچھ لوگ ایک چوغے میں اٹھائے ہوئے تھے۔ انہوں نے سیدنا عمر رضی اللہ عنہ کے سامنے رکھ دیا تو سیدنا عمر رضی اللہ عنہ نے کچھ مسکین لوگوں کو بلایا اور لوگوں کے غلاموں میں سے کچھ غلاموں کو اپنے ارد گرد بلایا تو انہوں نے آپ کے ساتھ کھایا، پھر انہوں نے اس موقع پر فرمایا: اللہ اس قوم کے ساتھ یہ کرے یا فرمایا: اللہ اس قوم پر لعنت کرے جو اپنے غلاموں سے اس بات سے روگردانی کرتے ہیں کہ وہ ان کے ساتھ مل کر کھائیں۔ صفوان نے کہا: خبردار، اللہ کی قسم! ہم ان سے روگردانی نہیں کرتے لیکن ہم اپنے آپ کو ان پر ترجیح دیتے ہیں۔ اللہ کی قسم! ہم عمدہ کھانے میں سے اتنا نہیں کھاتے کہ خود بھی کھائیں اور ان کو بھی کھلائیں۔ بلکہ اپنی ذات پر انہیں ترجیح دیتے ہیں۔ اللہ کی قسم! ہم اچھی قسم کا کھاناکھاتے ہی نہیں جو خود کھائیں اور انہیں بھی کھلائیں۔ [صحيح الادب المفرد/حدیث: 148]