سیدنا جابر رضی اللہ عنہ سے مروی ہے کہ نبی صلی اللہ علیہ وسلم ایک جانور کے پاس سے گزرے جس کو داغا گیا تھا اور اس کی ناک کے نتھنوں سے دھواں نکل رہا تھا۔ نبی صلی اللہ علیہ وسلم نے فرمایا: ”اللہ اس آدمی پر لعنت کرے جس نے یہ کام کیا ہے تم میں سے کوئی نہ تو جانور کے چہرے کو داغ لگائے اور نہ اسے مارے۔“ [صحيح الادب المفرد/حدیث: 131]

ہلال بن یساف کہتے ہیں کہ ہم سوید بن مقرن کے گھر میں کپڑا فروخت کر رہے تھے۔ ایک لونڈی نکلی، اس نے کسی آدمی کو کو ئی بات کہہ دی۔ اس آدمی نے لونڈی کو طمانچہ مار دیا تو سوید بن مقرن نے اس سے کہا: کیا تم نے اس کے منہ پر طمانچہ مار دیا؟ میں نے اپنے آپ کو سات اشخاص میں سے ایک پایا (یعنی ہم لوگ سات آدمی تھے) اور ہمارے پاس ایک ہی خادم تھا۔ ہم میں سے ایک آدمی نے اسے طمانچہ مار دیا تو نبی صلی اللہ علیہ وسلم نے حکم دیا کہ اسے آزاد کر دیا جائے۔ [صحيح الادب المفرد/حدیث: 132]

ابوعمر زاذان سے روایت ہے، وہ بیان کرتے ہیں کہ ہم لوگ سیدنا ابن عمر رضی اللہ عنہما کے پاس تھے۔ تو انہوں نے اپنے غلام کو بلایا جسے انہوں نے مارا تھا۔ انہوں نے اس کی پیٹھ سے کپڑا ہٹایا۔ کہا: کیا تمہیں تکلیف ہو رہی ہے؟ اس نے کہا: نہیں۔ تو انہوں نے غلام کو آزاد کر دیا، پھرتنکا زمین سے اٹھا کر کہا کہ مجھے اس کا اتنا بھی اجر نہیں ملے گا جتنا اس تنکے کا وزن ہے۔ میں نے کہا: اے ابوعبدالرحمان! آپ ایسا کیوں کہتے ہیں۔ کہا کہ میں نے نبی صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے یا آپ صلی اللہ علیہ وسلم نے ارشاد فرمایا: ”جو شخص اپنے غلام کو بےقصور حد لگائے یا اس کی چہرے پر طمانچہ مار دے“ اور ایک روایت میں ہے: ”جس نے اپنے غلام کے چہرے پر تھپڑ مارا یا اسے ایسی حد لگائی جس کا اس نے ارتکا ب نہیں کیا تو اس کا کفارہ یہ ہے کہ اسے آزاد کر دے۔“ [صحيح الادب المفرد/حدیث: 133]

عمار بن یاسر سے مروی ہے انہوں نے کہا: تم میں سے کوئی اپنے غلام کو نہیں مارتا اس حال میں کہ وہ ظالم ہو مگر اس سے قیامت کے دن قصاص لیا جائے گا [صحيح الادب المفرد/حدیث: 134]

ابولیلی نے بیان کیا کہ سیدنا سلمان رضی اللہ عنہ نکلے جبکہ ان کے جانور کا چارہ کھرلی سے نیچے گر رہا تھا۔ اس پر انہوں نے اپنے خادم سے کہا: اگر مجھے قصاص کا ڈر نہ ہوتا تو میں تیری پٹائی کرتا۔ [صحيح الادب المفرد/حدیث: 135]

سیدنا ابوہریرہ رضی اللہ عنہ سے مروی ہے وہ نبی صلی اللہ علیہ وسلم سے روایت کرتے ہیں آپ صلی اللہ علیہ وسلم نے فرمایا: ”ضرور حقوق ان کے مالکوں کو ادا کیے جائیں گے یہاں تک کہ بےسینگ بکری کا سینگ والی بکری سے قصاص لیا جائے گا۔“ [صحيح الادب المفرد/حدیث: 136]

سیدنا ابوہریرہ رضی اللہ عنہ رسول اللہ صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جس شخص نے کسی کو ظلم کے طور پر مارا قیامت کے دن اس سے قصاص لیا جائے گا۔“ [صحيح الادب المفرد/حدیث: 137]

عبادہ بن ولید بن عبادہ بن صامت سے مروی ہے: میں اور میرے والد نکلے ہم انصار کے اس قبیلے میں علم کو تلاش کرتے تھے اس سے پہلے کہ وہ فوت ہو جائیں تو سب سے پہلے جس سے ہماری ملاقات ہوئی وہ نبی صلی اللہ علیہ وسلم کے صحابی ابویسر تھے ان کے ساتھ ان کا غلام بھی تھا، ابویسر پر ایک دھاری دار یمنی چادر تھی اور ایک معافری چادر تھی اور ان کے غلام پر بھی دھاری دار یمنی چادر اور معافری تھی۔ میں نے ان سے کہا: اے چچا جان! اگر آپ اپنے غلا م کی چادر لے لیتے اور اس کو اپنی معافری دے دیتے یا اس کی معافری لے لیتے اور اپنی چادر اسے دے دیتے تو آپ پر بھی حلہ ہوتا اور ان پر بھی حلہ ہوتا، تو انہوں نے میرے سر پر ہاتھ پھیرا اور فرمایا: اے اللہ! اس کو برکت دے، اے میرے بھتیجے! میری ان دونوں آنکھوں نے دیکھا اور میرے ان دونوں کانوں نے سنا اور میرے دل نے خوب یاد رکھا اور اپنے دل کے درمیان کی طرف اشارہ کیا کہ نبی صلی اللہ علیہ وسلم فرماتے تھے ان کو کھلاؤ جہاں سے تم کھاتے ہو اور ان کو پہناؤ جہاں سے تم پہنتے ہو اور میں اسے دنیا کا سامان دے دوں یہ میرے لیے آسان ہے کہ قیامت کے دن یہ میری نیکیاں لے جائے۔ [صحيح الادب المفرد/حدیث: 138]